MATHAYO 3
3
Ntûmîîri ya Njoana Mûbaatithania
(Mko. 1:1-8; Ruka 3:1-9, 15-17; Njo. 1:19-28)
1Îgiitaani rîru Njoana Mûbaatithania aathi rwanda rwa Njundea gûtûmîîria. 2Augaga, “Îrireeni meeyia meenu n'ûntû ûnene bwa îgûrû bûkûthengeera.” 3Njoana ûyû n'ûra kîroria Isaaya aaragîîria rîra augaga,
“Kayû ka muntû igagûtûmîîria rwanda gakiugaga,
‘Theriani njîra ya Mwathani,
rûngariani kûra agaakûrûkîîra.’ ”#Isaaya 40:3
4Njoana eekagîra nguo yarûthîîtwe na guaya ya nkamîîra akooga mûkanda kauna. Aarîyaga ngige na ûkî bwa kîthaka. 5Kîrîndî kingî kîaumaga bwa taûni ya Njerusaremu, nthîgûrû ya Njundea yonthe, na akubî na îkumbo rîa muuro wa Njorondani gîkaaya kûmûthikîîria. 6Bara baumbûraga meeyia maao, Njoana aababaatithagîria rûûyîîni rwa muuro wa Njorondani.
7Njoana akwona *Abarisai na *Asandukai baingî baayîîte ababaatithia, abeera, “Rûciaro rûrû rwa njoka! N'ûû aabweniirie abwîra bwakuthûka mûthûûro wa Ngai ûra ûûyîîte? 8Rûthagaani mantû mara makoonanagia atî na mma bûkwîrira meeyia meenu. 9Bûtikaathûgaanie bûgaateethua i kuuga, ‘Tiû tûrî ba rûrîîyo rwa Îburaîmu!’ Na mma ga nkûbwîra, Ngai nwa atuîkithie kinya maiga mama aana ba Îburaîmu. 10Kathoka karî akubî gûkûûra mîtî na mîri mîene. Na mûtî unthe ûra ûtaciaraga rûciaro rwega ûgaakûûrwa ûgerwe mwankiini. 11Niû ndîbûbaatithia na rûûyî kwonania bûkwîrira meeyia meenu. Îndî ûra aayîîte nyuma yakwa arî îgweta nkûrûki yakwa. Niû ningwa ntiagîrîte wa kûmûkamatîra iraatû. We akaabûbaatithia na Kîrundu Ûmûtheru na mwanki. 12Agwete ncûûgi na njara akîendaga kûthi rwaraani acûûga ngano ciake aiga îkûmbîîni, abîîthia maûngû na mwanki ûtakîora.”
Yiesû aabaatithua
(Mko. 1:9-11; Ruka 3:21-22)
13Îgiitaani warîru Yiesû auma bwa rûteere rwa Gariiri aathi bwa muuro wa Njorondani abaatithua i Njoana. 14Îndî Njoana eenda kûrega akîmwîraga, “Ka ûûyîîte nkûbaatithia? Woû, i woû ûbatîîrue ûmbaatithia îndî ti niû!”
15Yiesû amûcookeria amwîra, “Gagûkare ûgu îîndî kaingo tûrûtha bûra kwagîrîte.” Rîru i rîo Njoana eetîgîîrie.
16Yiesû akûrîîkia kûbaatithua aumîra rûûyîîni. Warîru îgûrû rîarugûka, oona Kîrundu wa Ngai amwîndamîîrîîte ta îcea aagwîrîîra îgûrû rîake. 17Kayû kauma îgûrû kauga, “Ûyû i Mwana wakwa ûra mbendeete mûno. Nankenagia mûno.”
© 2019, Bible Translation and Literacy
