Noo Mian 10
10
CAB. X.
1As tra ve er nemagh er e ghaa ostyl jeig huggey, hug e daue pooar harrish spyrrydyn niau‐ghlen, dyn eyrt magh ad, as dy [leihys dy chooilley hingys, as dy] chooilley ghoghan.
2As shoh va enmyn yn daa ostyl yeig; yn chied er, Simon ta enmyssit Peddyr, as Andreays e vraar. Jamys mac Zebedee, as Ean y braar echyssyn,
3Philip as Bartholomew, Thomas, as Mian yn publican, Jamys mac Alpheus, as Lebbeus va slennooit Thaddeus.
4Simon yn Canaanite, as Yuase Iscariot, ren myrgeddyn e y vrah.
5Yn ghaa yeig shoh hug Yeesey magh, as doardee e daue, gra, Ny gow‐jee ayns raad ny Ashoonyn quaagh, ny gys ard‐valjyn ny Samaritanee.
6Agh gow‐jee hoshiaght gys kirree cailjey thie Israel.
7As myr vees shiu goll, jean‐jee preacheil, gra, Ta reeriaght Niau er‐gerrey.
8Slaanee‐jee sleih chingey, glen‐jee ny louranee, jean‐jee ny merriu y vioghey, tilg-jee magh drogh spyrrydyn: nastee ta shiu er gheddyn, as dy nastee cur-jee veu.
9Ny cur‐jee lieu aer, ny argid, ny prash ayns ny sporranyn eu:
10Ny stoyr dy vee son y raad, ny daa chooat, ny braagyn, ny luirg (son ta’n obbree feeu e veaghey.)
11As ard‐valley ny balley erbee dy jed shiu stiagh ayn, fenee‐jee quoi ayn ta feeu, as marishyn furree‐jee, derrey hed shiu reue.
12As tra vees shiu goll stiagh ayns thie, bannee‐jee daue.
13As my vees y thie feeu, lig da’n shee eu cheet er: agh mannagh bee eh feeu, lig da’n shee eu chyndaa hiu hene reesht.
14As quoi‐erbee nagh jean nyn mea y oltaghey, as nagh der geill da ny goan eu, tra aagys shiu yn thie ny’n ard‐valley shen, crie‐jee yn joan jeh ny cassyn eu.
15Dy firrinagh ta mee gra riu, dy vow cheer Sodom as Gomorrah ny smoo dy foar, ec laa ny briwnys, ny yiow yn ard‐valley shen.
16¶ Cur‐my‐ner ta mish dyn goyrt shiu magh, myr kirree mastey moddee‐oaldey. Bee-jee er‐y‐fa shen creeney myr ard‐nieughyn, as gyn loght myr calmanyn.
17Agh cur‐jee twoai jeh deney, son livrey‐ee ad shiu seose gys ny coonceilyn as custee ad shiu ayns ny kialteenyn oc.
18As bee shiu er nyn goyrt fenish kianoortyn as reeaghyn er y choontey ayms, dy vod oyr y ve eu, fenish y ymmyrkey#10.18 Jeh’n credjue Chreestee. dauesyn as da ny Ashoonyn quaagh.
19Agh tra livrey‐ys ad shiu seose, ny bee‐jee imneagh kys ny cre nee shiu y loart, son bee eh er ny choyrt diu ayns yn oor keddyn, cre nee shiu y loart.
20Son cha nee shiuish ta loart, agh spyrryd yn Ayr eu ta loart ayndiu.
21As livrey‐ee yn derrey vraar yn braar elley gys baase, as yn ayr y liannoo; as nee cloan girree seose noi nyn ayr as nyn moir, as deyree ad ad gys baase.
22As ver dy chooilley ghooinney feoh diu, kyndagh rish yn ennym ayms: agh eshyn nee fannaghtyn gys y jerrey, bee e er ny hauail.
23Agh tra vees ad janoo tranlaase erriu ’sy derrey ard‐valley, roie-jee shiuish er‐chea gys ard‐valley elley: son dy firrinagh ta mee gra riu, dy bee mac y dooinney er jeet#10.23 Dy stroie ard‐valley as ashoon ny Hewnyn., roish my bee shiu er gholl harrish ard‐valjyn Israel.
24Cha vel yn scoyllar er‐skyn e vainshter, ny’n chiarvaant er‐skyn e hiarn.
25Slioyr da’n scoyllar dy ve myr e vainshter, as da’n chiarvaant myr e hiarn: my ta’d er chaeu Beelzebub er mainshter y thie, cre woad smoo nee ad e vooinjer y oltooan?
26Ny gow‐jee er‐y‐fa shen aggle rowe: son cha vel nee erbee follit, nagh jig gys soilshey, ny nee erbee kellit nagh jig magh.
27Shen ta mish dy insh diu ayns y dorraghys, loar‐jee shiuish jeh ayns y toilshey, as ny ta shiu er chlashtyn ayns y chleash eu voyms, jean-jee y phreacheil er mullagh ny thiyn.
28As ny bee‐jee agglagh rowesyn varrys y corp, agh nagh jiarg er yn annym y varroo: agh bee‐jee ayns aggle smoo roishyn, oddys corp as annym neesht y stroie ayns Nivrin.
29Nagh vel daa sparrow er nyn greck son farling? as cha duitt annane oc marroo er y talloo fegooish oardaghey’n Ayr eu.
30Agh ta eer renaigyn nyn ging ooilley er nyn earroo.
31Ny bee‐jee shiuish er‐y‐fa shen ayns aggle, ta ny smoo dy ve soit jiu, ny jeh ymmodee sperriu.
32Quoi‐erbee er‐y‐fa shen ghoys rhyms kiongoyrt rish deney, goyms rishyn myrgeddyn kiongoyrt rish my Ayr t’ayns niau.
33Agh quoi‐erbee obbys mish kiongoyrt rish deney, eshyn neems myrgeddyn y obbal kiongoyrt rish my Ayr t’ayns niau.
34Ny smooinee‐jee dy daink mish dy chur liam shee gys y talloo, cha daink mee dy chur liam shee, agh cliwe.
35Son ta mish er jeet dy scarrey dooinney veih e ayr, as yn inneen veih e moir, as y ven chlewn veih e moir ’sy leigh.
36As noidjyn dooinney vees adsyn jeh’n lught‐thie echey hene.
37Eshyn ta ny sgraihee er ayr ny moir ny orryms, cha vel e feeu jeem: as eshyn ta ny sgraihee er mac ny inneen ny orryms, cha vel e feeu jeem.
38As eshyn nagh jean e chrosh y ymmyrkey as geyrt orryms, cha vel e feeu jeem.
39Eshyn nee e vioys y hauail, caillee e eh, agh eshyn chaillys e vioys er my ghraih’s, nee e eh y hauail.
40Eshyn ta soiaghey jiuish, te soiaghey jeems, as eshyn ta soiaghey jeems, te soiaghey jehsyn t’er my choyrt.
41Eshyn ta cur oltaghey‐bea da phadeyr ayns ennym phadeyr, yiow e leagh phadeyr, as eshyn ta cur oltaghey‐bea da dooinney cairagh ayns ennym dooinney cairagh, yiow e leagh dooinney cairagh.
42As quoi‐erbee ver cappan dy ushtey feayr da annane jeh’n vooinjer veggey shoh dy iv, ayns ennym annane jeusyn ta sheer geyrt orryms, dy firrinagh ta mee gra riu, nagh jean e er aght erbee e leagh y choall.
historic text maintained in digital form by the British and Foreign Bible Society (Sheshaght y Vible)
