Fingec fingec 2
2
Tacnegeng
1Anutungo deu bangec nga kurumenga kurumenga amma wiac sasawa imohai fede imoc ifi fingecdarec. 2#Mke 20:8-11; 31:17; Dser 5:14; Heb 4:4, 10Fingecdaru uameme seweng anec. Uameme seweng ammanu ua sasawa fau taru tacnegenec. 3Ye wiac sasawa meficgedacma wenac imohai tacnegenecac uameme seweng imoc meisinggema keneheec.
Anutungo wiac sasawa meficgeecac siduc tosea Fingec fingec 2:4–4:26
4 Kebu Anutungo bangec nga kurumenga kurumenga meficyunudarec, yomoc imocac siduha. 5Naso imohai icbarama nga kpindzing amma dzaring imoc bangecfunac mi erekefec. Imoc yofiac, ye kia kpeudeac mi deu kia mong bangecfu mi feec nga semeng ua memeac ngicngac ifingoc mi kecgec. 6Anu doku imoc ine bangecfunac erema bangec meu imoc dokuyagoc andarec.
Ngic meec
7 #
Fing 1:27; 3:19; 1Kor 15:45, 47 Anu Kebu Anutungo bangectehec mema ngic meec. Mema samahau kekecac asu fifiu kemeu ngic ye ngic kekehagoc anec.
Edenggac ic ua
8Anu wenac ere ereaubigeng bangec kpara Eden imohai ic ua mong homecma ngic meecmoc ye imohai faiec. 9#Fing 3:22; Yneg 3:13, 18; Yhkp 2:7; 22:2, 14Faima deu bangecfunac ic siricngina gombunga sasawa nga fora nenea gombunga imohai ereec. Amma ua botuhau kekecac ic ereec nga ic ogea mong ifingoc ereec ic imoc gombunga nga manganaac hania negen negenggac ic.
10Anu doku kiwa mong Edennu fingecma ua doku mima imohai tohoma doku 4 anec. 11Mong kpara Pison imocngo Hawila bangecfu yerecgema kenec. Bangec imohai gol fede. 12Anu bangec imocac gol imoc gombunga yombong. Imohai bedeli icsopea#2:12 Bedeli imoc ic sopea mong homuna gombunga. nga oniks hoc#2:12 Oniks imoc hoc seria siriha gombunga. ifingoc fede. 13Amma doku mong imocac kpara Gihon. Imocngo Kus bangec sasawa yerecgema kenec. 14Nga doku mong imocac kpara Hiddekel#2:14 Hiddekel imoc yaguc kpara Tigiris anu yaguc Hiddekelgoc siricngira socfungoc gedang mi andape. Doku imocngo Assur bangec tegiau wenac ere ereaubigeng kende. Amma doku mong imocac kpara Perat.#2:14 Perat imoc yaguc kpara Euphrates anu yaguc Peratgoc siricngira socfungoc gedang mi andape.
15Anu Kebu Anutungo ngic mema Eden ua imoc henggareng amma uaya meudeac faiec. 16Faima ngic yofi dema edeec, “Ic sasawa uau nandacdae imocac fora naric nedacnade. 17#Rom 5:12; 6:23; 1Tim 5:6; Yak 1:15Nga gombunga nga manganaac hania negen negeng ic mocgusac imocac fora mi nebesena. Foracngoc, imocac fora nenadeu naso imohai homenade.”
18 #
Mde 4:8-9; 1Kor 11:9 Ifi edeu wisickeu ye yofi negemma deec, “Ngic ye tembuha kefu naric mi andeac ni memefiha mong meba yeac ogea ambeso.” 19Ye warac bangecac yang sasawa nga sawaac neng sasawa bangectehecngo meyunuec yeni ngicaru meyunuma kenu yeng kpacngina dafi kparu negenudeac kenec. Kenu ngic ye kpacngina dafi kparec kpac imoc wiac kekehagoc sasawa yeneac kpacngina anec. 20Ngic ye ifi amma amayang sasawa nga sawaac neng amma bangecac yang sasawa yeneac kpacngina kpacdarec. Amma yengena ogo memefiha mong ine mi henec.
Ngac meec
21Imocac Kebu Anutungo ngic ammiu gau kuneng feec. Feu pandzengaac sic mong kpedzima titinga fingerec imoc fusiangomonggoc mesufuec. 22Amma ye ngicac pandzengaac sic memaimocngo ngac mong mema ngicaru hesickema kenec. 23Wangecmakenu ngicngo ngac imoc hemma yofi deec, “Yomoc yeac sic imocneac sicnango memea nga fusia imoc neac fusinango memea. Yengicarunac memeaac kpara ngac g kpacbesonga.” 24Imocac ammangicngo nonggomanghora wayuruma yengena ngacaru kpeketahauyeri sebi mocgu amma kefecde. 25Anu ngicngac yeri yerahafocsenggang kefoc amma imocac game mong mi yuruec.
© (Active), Wycliffe Bible Translators, Inc. All rights reserved.
