Chivkeeb 3
3
Noobneej Tsis Mlooglus
1Nab yog tus tsiaj uas ntse tshaj txhua yam tsiaj qus uas tus TSWV uas yog Vajtswv tau tsim los. Nab thiaj nug tus pojniam hais tias, “Vajtswv yeej txwv kom neb tsis txhob noj txhua yam txivntoo uas nyob hauv lub vaj no tiag lov?” #Tshwm 12:9; 20:2
2Tus pojniam teb tias, “Wb yeej noj tau txhua yam txivntoo uas nyob hauv lub vaj no, 3tsuas tshwj tsob uas nyob hauv plawv vaj xwb thiaj noj tsis tau. Vajtswv yeej txwv tsis pub wb noj lossis kov tej txiv ntawd li; yog wb noj, wb yuav tuag.”
4Nab txawm hais rau tus pojniam hais tias, “Tej ntawd tsis muaj tseeb, neb yeej yuav tsis tuag. 5Vajtswv hais li ntawd, rauqhov Nws paub tias thaum twg uas neb noj tsob txiv ntawd, ces neb qhovmuag yuav pomkev, thiab neb yuav zooli Vajtswv,#3:5: Vajtswv; lossis tej nyuag vajtswv. yuav paub qhov zoo thiab qhov phem.”#3:5: paub qhov zoo thiab qhov phem; lossis paub txhua yam.
6Tus pojniam pom tias tsob ntoo ntawd zoonkauj thiab tej txiv ntxim qab kawg li, thiab nws xav tias tej txivntoo ntawd tseem yuav ua rau nws ntse ntxiv thiab. Ces nws txawm mus de ib co los noj thiab nws kuj muab rau nws tus txiv uas nrog nws nyob ntawd noj thiab. 7Thaum nkawd noj tagnrho xwb, nkawd ob lub qhovmuag txawm qhib tuaj thiab paub tias nkawd liabqab; yogli ntawd nkawd thiaj mus de nplooj txiv ncuavpias los xaws hnav npog nkawd lub cev.
8Thaum yuav tsausntuj uas muaj cua tuaj txias zias, nkawd hnov tus TSWV uas yog Vajtswv mus kev hauv lub vaj, nkawd thiaj khiav mus nkaum rau hauv cov ntoo kom tus TSWV uas yog Vajtswv tsis txhob pom. 9Tiamsis tus TSWV uas yog Vajtswv tau hu tus txivneej hais tias, “Koj nyob qhovtwg?”
10Nws teb tias, “Kuv hnov Koj mus kev hauv lub vaj, kuv ntshai kuv thiaj khiav mus nkaum lawm, rauqhov kuv liabqab.”
11Vajtswv nug hais tias, “Leejtwg hais rau koj tias koj liabqab? Puas yog koj noj tsob txivntoo uas Kuv xaaj tsis pub koj noj ntawd lawm?”
12Tus txivneej teb tias, “Tus pojniam uas Koj muab rau kuv ntawd yog tus muab cov txivntoo los rau kuv noj, kuv thiajli tau noj lawm.”
13Tus TSWV uas yog Vajtswv nug tus pojniam hais tias, “Uacas koj thiaj ua li ntawd?”
Nws teb tias, “Nab ntxias kuv, es kuv thiajli noj.” #2Klt 11:3; 1Tim 2:14
Vajtswv Qhia Txog Kev Txiavtxim
14Tus TSWV uas yog Vajtswv thiaj hais rau nab hais tias, “Tagnrho txhua yam tsiaj huv tibsi, koj yog tus uas raug lolus foom phem vim koj dag tus pojniam no; txij hnubno mus, koj yuav ntaug ntawm koj lub plab thiab yuav noj hmoov av mus tag koj simneej. 15Kuv yuav ua kom koj thiab tus pojniam no sibntxub; koj cajces thiab nws cajces yuav ua yeebncuab mus li. Nws tus xeebntxwv yuav tsoo koj taubhau kom ntsoog, thiab koj yuav tom tus xeebntxwv#3:15: xeebntxwv; lossis lawv. ntawd lub lujtaws.”
16Vajtswv hais rau tus pojniam tias, “Kuv yuav tsub teebmeem ntau heev rau koj thaum koj suab menyuam thiab thaum koj yug menyuam yuav mob koj heev. Txawm li ntawd los koj txoj kev ntshaw yeej tseem yog rau koj tus txiv, thiab nws yuav ua tus tswjhwm koj.”
17Vajtswv hais rau Adas hais tias, “Vim koj mloog koj tus pojniam lus thiab noj co txiv ntawm tsob ntoo uas Kuv tau xaaj tsis pub koj noj. Vim koj tau ua li ntawd av thiaj raug foom phem. Koj yuav tau siv zog khwv mus tag simneej mas koj thiaj yuav muaj noj muaj haus. 18Av yuav tuaj nroj thiab tuaj pos, thiab koj yuav tau de tej nrojtsuag los ua zaub noj. #Henpl 6:8 19Koj yuav siv zog khwv txog lub hws nrog mas koj thiaj muaj noj muaj haus mus txog thaum koj rov mus rau hauv cov av uas siv los puab koj. Koj yog tsim los ntawm av, ces koj yuav tau rov mus ua av.”
20Adas#3:20: Adas: Lolus no lus Henplais txhais hais tias “txhua tsav tibneeg.” tis nws tus pojniam npe hu ua Evas,#3:20: Evas: Lub npe no hais muaj ntsis thooj li lolus Henplais uas hais tias “muaj sia nyob,” uas txhais hais tias yog “ntiajteb tibneeg.” rauqhov nws yog txhua tsav tibneeg leejniam. 21Tus TSWV uas yog Vajtswv txawm muab tawv tsiaj los ua tsoostsho rau Adas thiab nws tus pojniam nkawd hnav.
Adas Thiab Evas Raug Ntiab Tawm Hauv Lub Vaj Edees
22Tus TSWV uas yog Vajtswv hais tias, “Nimno tus txivneej no zooli peb lawm thiab nws paub qhov phem thiab qhov zoo.#3:22: paub qhov phem thiab qhov zoo; lossis paub txhua yam. Yuav tsis pub nws mus de tsob txivntoo uas muaj txojsia los noj, es muaj sia nyob mus ibtxhis.” #Tshwm 22:14 23Yogli ntawd, Tus TSWV uas yog Vajtswv thiaj ntiab nws tawm hauv lub Vaj Edees thiab kom nws mus khawb av ua noj ua haus ntawm daim av uas tau muab los puab nws. 24Thaum Vajtswv muab nws ntiab tawm lawm, Vajtswv tso ib co khelunpees#3:24: khelunpees: Tej phau sau hais tias cov uas ciajsia; Saib Cov Lus Txhais uas teev rau tomqab. thiab muaj ib rab ntaj nplaimtaws uas tig tau rau txhua phab los zov lub Vaj Edees sab hnubtuaj, tsis pub leejtwg mus tau ze rau ntawm tsob txivntoo uas ua rau muaj txojsia.
© 2022 United Bible Societies. All rights reserved.
