Genesis 9
9
Iqmoeq 9
Miqyail Nol-avq nee mail daoqma saljial jaq tavq-a nail ganl
1Miqyail neq, Nol-avq dai khi aivq nail yaqyov juq bhai geeqlaoq bivq khi, aqyu juq bhai ge bhiq-a nail: "Miltsaq doi dai bhi jaol bhee-ail nail galduq, yaq mao dai bhao yaoq.
2Miltsaq kovtavq khe doevq nail jaiqyaq juq iqsanl mail maqkhaiq, nqtavq bha bhail nail keivq-avq juq iqsanl mail maqkhaiq, miltsaq kovtavq khe soiq soiq-ail tsao nail jaiqyaq juq iqsanl mail maqkhaiq, iqyaq iq ma khe jaol nail delgil juq iqsanl mail maqkhaiq, nul juq nail aqlavq bhai ngal av bivq khi jaiqyaq al juq iqsanl, nul juq bhai gee sil nail ngaol.
3Nul juq neq, niul seq deel nail heeqlaoq gaoqjal jaq kivq nail khe-ai, niil aq-il, ngal aqdoevq khal doevq nail jaiqyaq juq iqsanl, jaq kivq dai, bivq nail ngaol.
4Thail hai ngaol-aoq, nul juq maq ya jaq nail teevq phaq jiav nail ngaol. Al neq, aqsivq kheq nail haqjoil pevq nail ngaol. Khul khi mail dai ngal-aq neq, doevqyeel neq, aqsivq bhai aol nail ngaol.
5Tsaol-aq bhai heivq nail gaq bhai, ngal dal bhiq nail ngaol. Tsaol-aq bhai heivq nail jaiqyaq juq bhai gail, ngal heivq nail ngaol. Aqivq jaqbheq nail doevqyeel bhai oil nail gaq neq, aivq nail doevqyeel bhai, ngal gaoq oil kovq nail ngaol.
6Miqyail neq, tsaol-aq yaq bhai aivq nee mail dul lai dai, teivq-ai thaq nail ngel-i mail, tsaol-aq bhai heivq nail gaq bhai, tsaol-aq nail aqlavq-i mail gaoq ya bhi heivq kovq nail ngaol.
7Thail hai ngaol-aoq, nul juq nail jeq-a jaq-a mao dai bhi mao lal khi miltsaq doi dai, bhi jeq bhi el-ail yaoq" dai, ge bhiq-a nail ngaol.
8Miqyail neq, Nol-avq dai khi aivq nail yaqyov juq bhai gaoq ge bhiq-a nail:
9-10"Nul juq nee mail maqkhaiq, nul juq nee mail yavq kha lee nail yaq juq nee mail maqkhaiq, laovq laovq ma nail lavqkhoel khe, nul juq nee mail teevq gaq khe-ai, dov lee-a nail tsu nail jaiqyaq juq dai khi, haqtsoiq jaiqyaq juq iqsanl nee mail maqkhaiq, keivq-avq juq iqsanl nee mail maqkhaiq, niil aq-il, ngal daoqma saljial niail hai jaq nail ngaol.
11Ngaq-i mail nul juq nee jaq tavq-a nail daoqma saljial neq, aqdoevq khal doevq nail phaq iqsanl bhai, yaqhao teevq pov ulcuvq-i mail bhi deq pheeq heivq gil khi miltsaq kovtavq bhai maq lav cov-ail.
12Naoq-ai nee teevq gaq khe-ai teevq yeel nee teevq yeel, aqdoevq khal doevq nail phaq iqsanl mail dai khi, ngal khaqmao gail, jaq-ai thaq nail daoqma saljial nail salkhil pevq dai,
13nqdil lavqkhoel bhai, ngal haildallalkov bhi dov lal nail ngaol. Haildallalkov al laiq neq, miltsaq dai khi, ngal daoqma saljial jaq tavq-a nail salkhil ngaol.
14Ngal nqtavq kovtavq bha nqdil bhi dav lal khi, nqdil nail lavqkhoel bhai, haildallalkov dov lee nail yaoq pov yaoq-ao nee,
15aqdoevq doevq nail juq yaoq phaq yaoq-ao nee bhai, yaqhao teevq pov ulcuvq deq pheeq khi, maq lav heivq-ail dai, nul juq dai khi, aqdoevq khal doevq nail phaq iqsanl bhai, ngaq-i mail daoqma saljial jaq-ai thaq nail bhai ngal noeq thaq nail galduq ngaol.
16Nqdil lavqkhoel-ai haildallalkov dov lal nail bhai, ngal ya moel-u phao, miltsaq kovtavq khe khal jaol nail aqdoevq doevq nail phaq iqsanl mail dai khi, ngaq-i mail jaq-ai thaq nail, nqmaq maqluv halyeel ivq nail daoqma saljial bhai, ngal noeq moel nail ngaol" dai, ge bhiq-a nail ngaol.
17A bhai nee ngal-aq, Miqyail Nol-avq bhai gaoq ge bhiq-a nail: "Haildallalkov niil neq, miltsaq kovtavq khe aqdoevq doevq nail phaq iqsanl mail bhai, ngaq-i mail jaq-ai thaq nail daoqma saljial nail salkhil ngaol" dai, ge bhiq-a nail ngaol.
Nol-avq nail yaqyov juq
18Laovq laovq ma nail lavqkhoel nee dov ail-a nail Nol-avq nail yaqyov juq neq Seiq mav, Haq mav dai khi Yaq phai juq ngaol. (Haqmav neq Khaqnanq nail aqbhu pevq nail ngaol).
19Miltsaq kovtavq khe khal jaol nail tsaol-aq yaq juq neq, Nol-avq nail yaqyov hail gaq nee mail jeq lee el lee thaq nail juq pevq nail ngaol.
20Nol-avq neq, kha jaq kha daol nail tsaol-aq teevq gaq pevq khi, aqheeq tsilju nail gaoqkhail nl-a nail ngaol.
21Aivq neq, aqheeq tsilju nail ullul al jaiq-ail daol bov-a nail ngel-i mail, aivq nail haqphal saiqgov lavqkhoel bhai maol deq lavq nel-ail ga nail ngaol.
22Khaqnanq nail aqbhu Haqmav neq, aivq nail aqbhu maol deq lavq nel-ail, jaol nail bhai ya moel-u phao, dov-ail khi aivq nail algao nvq gaq bhai ge bhiq-a nail ngaol.
23Aq-u phao, Seiqmav dai khi Yaqphai neq, phailkhaoq heelma teevq keiv, aqyu juq nail bavqpuv bhai he dav khi mail, oil leevq-a nail ngaol. Aqyu nvq gaq haqphal saiqgov lavqkhoel bhai haoqnaol naol kovq phaq-ail aol lai khi, aivq nail aqbhu bhai he pheeq bhiq-a nail ngaol. Aqyu juq nail aqbhu maol deq lavq nel-ail, ga nail bhai maq bhi moel lal nail galduq, maivphaoq yaoq phaoq yaoq tsiq phaol-a nail ngaol.
24Nol-avq aqmavq mavq nail geel-ail bhiq khi, yaqyov jaqbheq yaqsaq gaq-i mail nl-a nail ganl bhai heeq nia-u phao,
25niail hai ge bhiq-a nail ngaol: "Khaqnanq neq, ivqkhail yavq nail bhai daq khi, aivq nail algao juq nail yaqkav ya jiovq dei-eiq.
26Seiqmav nail Heeqphaq Miqyail bhai geeqlaoq bivq dei-eiq. Khaqnanq neq, Seiqmav nail yaqkav jiovq dei-eiq.
27Miqyail neq, Yaqphai bhai bhi eeq bhi heel lal dei-eiq. Aivq nail jeq-e neq, Seiqmav nail jeq-e nee mail teevq gaq khe-ai, ya jaol dei-eiq. Khaqnanq neq, Yaqphai nail yaqkav jiovq dei-eiq" dai, ivqkhail yavq bhiq-a nail ngaol.
28Ulcuvq deq pheeq gaq khi mail pultavq, Nol-avq neq, 350 kovq bhee dai, aqdoevq doevq khi jaol-a nail ngaol.
29Aivq nail aqkovq 950 kovq bhee lal-u phao, sil-a nail ngaol.
© 2016, Wycliffe Bible Translators, Inc. All rights reserved.