Panagnaꞌan 40
40
Si Yusup magpahāti teginep meꞌ pilisu
1Pag tiggel-tiggel ne amban miyaꞌan, niyaꞌ duwangan daraꞌakan sultan Misirin niyaꞌ kasallaꞌan amuden si siye. 2Inastel sultanin si daraꞌakanne duwangan miyaꞌan. Dambuwaꞌin nakuraꞌ meꞌ aꞌa magboꞌo-boꞌo ininum si sultanin duk dambuwaꞌin nakuraꞌ meꞌ aꞌa maghinang-hinang panin. 3Dinaꞌak siye kinalabusu weꞌ sultanin laꞌi si lumaꞌ kapitan meꞌ guwaldiyahin. Laꞌi hep isab pangalabusuhan si Yusupin. 4Dinaꞌak si Yusup weꞌ kapitanin ngahatul duwangan pilisu miyaꞌan. Tiggel-tiggel siye laꞌi dem kalabusu.
5Manjari dambuwaꞌ sangem neginep duwangan daraꞌakan sultan Misir miyaꞌan pag laꞌi dem kalabusu. Magseddili-seddili teginepden duk magseddili-seddili isab hātinen. 6Pag tekka si Yusup salungin takitene weꞌ suse siye. 7Hangkan tilewne siye, paꞌinne, “Weꞌey kaꞌam suse kuweꞌitu?” 8Nambung siye, paꞌinde, “Suse kami peggeꞌ niyaꞌ teginep kami dibuhiꞌ bu gaꞌ niyaꞌ taꞌu mahātine.” Paꞌin si Yusup, “Na, luwal du Tuhanin ngurung kataꞌu mahāti teginep. Akahanun bi ku bang ine tineginepbin.”
9Manjari magaka ne nakuraꞌ meꞌ aꞌa magboꞌo-boꞌo ininumin sabab tineginepnen pu si Yusup, paꞌinne, “Neginep ku weꞌ niyaꞌ koꞌ bahan ubas si harapanku. 10Bahan miyaꞌan tege pange tellu. Ngandawen meꞌ pange miyaꞌan bu magtawus numping duk tege buwaꞌ ubus bu tahak buwaꞌnen. 11Laꞌi koꞌ ku ngantan sawan sultanin bu ineddoꞌ weꞌ ku buwaꞌ ubasin duk pinessel weꞌ ku pinapī boheꞌnen dem sawanne duk sōnganku iye.”
12Paꞌin si Yusup, “Na, inin hātinen, tellu pangehin tellum bahangi. 13Katellum bahanginen ampun sultanin kew iyan duk pinaluwas kew duk pinabalik pī si hinangnu tagnaꞌin. Duk sōngannu du sawanin si sultanin kuweꞌ tagnaꞌin. 14Na, bang hāp ne parasahannun esseb-essebun saꞌ ku duk sabbutun ku si sultanin duk du ku paluwasne amban kalabusu inin. 15Hangkan hep ku tuꞌu si lahat inin peggeꞌ bakas ku siniggew amban lahat meꞌ Hibrani. Bu tiggelanku tuꞌu si lahat inin gaꞌ isab niyaꞌ bakas hinangku laꞌat bu masi pe ku iside dem kalabusu.”
16Pag kale nakuraꞌ meꞌ aꞌa maghinang-hinang panin weꞌ hāp hatiꞌ tineginep aꞌa magboꞌo-boꞌo ininum si sultanin, paꞌinne pu si Yusup, “Na, teginepkun isab weꞌ maglutu ku tellu parakaꞌ pinagbangkat-bangkat pennoꞌ weꞌ pan. 17Parakaꞌ amban diyataꞌin pennoꞌ weꞌ bayuꞌ-bayuꞌan pan duk bāngbāng para si sultanin. Manjari pan amban diyataꞌin kinakan weꞌ meꞌ manuk-manuk.” 18Paꞌin si Yusup, “Hātinen, tellu parakaꞌin tellum bahangi isab. 19Katellum bahanginen paluwas sultanin du kew ubus bu daꞌakne pinunggelan kōknun duk binowet barannun diyataꞌ kayu duk kakan meꞌ manuk-manuk isinun.”
20Katellum bahanginen ne, ellew panganakan sultanin. Magkādjaꞌan iye duk batikne kēmon kapangandelannen. Paluwasne amban kalabusu nakuraꞌ meꞌ aꞌa magboꞌo-boꞌo ininumin duk nakuraꞌ meꞌ aꞌa maghinang-hinang panin duk daꞌakne binoꞌo si harapan kapangandelannen kēmon. 21Pinabalik weꞌ ne nakuraꞌ meꞌ aꞌa magboꞌo-boꞌo ininumin pī si hinangne tagnaꞌin supaya sōnganne sawanin si sultanin. 22Saguwaꞌ nakuraꞌ meꞌ aꞌa maghinang-hinang panin dinaꞌak weꞌ ne pinapatey binowet diyataꞌ kayu. Tewwaꞌ teꞌed meꞌ bakas pinaꞌin si Yusup sabab taginepden. 23Manjari nakuraꞌ meꞌ aꞌa magboꞌo-boꞌo ininumin gaꞌ taꞌessebne nabang si Yusup. Takeyipatne ne.
© 2019, Wycliffe Bible Translators, Inc. All rights reserved.
