Luke 24
24
Yesu gimididi-havagi.
Madiu 28:1-10; Maki 16:1-8; Yoni 20:1-10
1Tu sabati higa Satadei hihege tu tafaloloya mala giwedala vevine vanedimodimo hi'ihagihagiyena-ma hivaina be hina tomohuyehuyeya. 2Hiyemu-yo kabala tomohuyehuyeya tamo hakwadi ahe give'awawana-ma hi'itana. 3Tu hiluku againe Kaiwabu Yesu wowona hi'i'avana. 4Ada mema nuwadi givevegafo'uya'uya tu kaliva adi'iselu gilu'afuneunedi lilidiya himidi, adi vaigau ve'akinamanamalidi. 5Au vevine himatauta be babiya hi'ibo'ula-mo'a tu kaliva higahedi higayo, “Gavana fa'ina yawayawana waleleleni to'alika yadi abageya? 6#Lu 9:22, 18:31-33Bana'e keke hidedei gidamiyami, au gimididi-havagi. Yana gahe agaimiya boi Galili againe aimo gimiyami tu gigahemi, medema nuwami ginanunauyena. 7Gigayo, Iya Tohobu'ela kaliva koyodiyao nimadiya hinahegenauweku ada kelose againe hinatutuvefoseku, ada aiyeta anaveto ganamididi-havagi. Hidedemi gigahe.” 8Au yana gahe againe vevine nuwadi ginauna.
9Ada tomohuyehuyeya hitauya be hiyewadi melaleya, hida gaitoma moya'aina tomuliya ileveni kadu kaliva velugadiyao moya'aidi agaidiya hilukahihiyena. 10#Lu 8:2-3Vevine ma Meli vineMagidala, Yowana, Meli Yemesa hinana kadu mali vevine hibwa'ulidi-ma gaitoma hidevama afositolo agaidiya hilukahihiyena. 11Tu afositolo hivaita badi vevine hidagahe-kawowo fa'ina yadi gahe keke hidavetumaganeni. 12Atu Fita gitowamidi be gimadu tomohuyehuyeya. Giyemu-yo gi'ibo'ula be gilukenala againe, to'alika yana lifigaga gi'itana. Au ginauna manuweya tu nuwana givevegafo'uya'uya gaitomai-nadi ahe giyemu-ma fa'ina.
Yesu Emeusa ana edeya gilakayemu.
Maki 16:12-13
13Tu medema aiyetai-nadi tomuliya luhei agaidiya melala ana egana Emeusa hinauna, Yelusalema ana lauva kilomita ileveni. 14Ada hida gaitoma moya'aina ahe gilakayemu-ma fa'ina buye hilukahihi. 15Buye hilulukahihi hiveve'atolitoli tu Yesu Tauna lilidiya giyemu be buye hinauna. 16Tu matadi giluhowahowa be hifaniyena. 17Ada gigahedi gigayo, “Medema gavaimi waveve'agahegahe tu wananauna?” Au walumagiboudiyao himidi-vagata.
18Kaliva sa'eyana ana egana Kaliyofasi gigahena gigayo, “O'eni, wakawaka Yelusalema againe umimiyami tu gaitomai-dina tova hidevama hiyemu-ma ka'i O akaibe keke udahalamanedi?”
19 #
Af 13:27
Bana gigayo, “Gava gaitoma!”
Badi higayo, “Yesu kwanaNasaledi fa'ine, Bana'e ma Yaubada bonana ana to'awatalatalaina, gugai be gahe againe gifaiwala Yaubada matane kadu kaliva moya'aima matameya. 20Kadu abaveyao ana tofaisewa kikaiwabudiyao kadu ama tonagona badi miLoma agaidiya hihegenauwena be alika againe hinahegena, ada au hikivekelosena. 21#Lu 1:68, 2:25; Af 1:6Tu ime anuwave'avina vaita Bana'e miIsileli nibaideyao agaidiya ginakibababaleda. Kadu'e Yesu a gi'alika tu aiyeta tohiye ahe kahegedi. 22-23#Lu 24:1-11Ada vevine tufoidi yama yo'o agaidiya yadi gahe againe ase'asema gi'alilihiwana. Badi hi'enohobu be hina tomohuyehuyeya tu wowona hi'i'avana au hi'ela higayo, Lobama ana tovenuwa'ata a'itadi, badi higahema Yesu yawayawana gimimiyami. 24Kadu tufoidi ime buye amiyami-ma hilowoga be hina. Ada vevine higaheyena amine hi'itana tu Bana'e keke hida'itani.”
25Hidedemi kaliva higahe-yo Yesu gigahedi gigayo, “Kwavakwavamiyao! Yaubada bonana ana to'awatalatalaina yadi gahe moya'aina Veyao Tuwaina ana buki againe gidadauda-ma ase'asemi givenogale-'abobowena. 26Keliso Yaubada yana Tovegida ana vehimeya ma aulolo kaliva nimadiya ginanuhagana, ada muliya yana wakikaiwabu ginamiyami. Mena to'awatalatalaina yadi gahe ma'i wanuwenuwena o ka'i keke?” 27#Ais 53:12; Sam 22:1,7-8,16-18, 69:21Ada Yesu givebutu gahe moya'aina Tauna fa'ine Veyao Tuwaina ana bukiya gidadauda-ma gahe-nadi fa'ina gikivetuvetunudi. Givebutu Mosese yana buki agaidiya kadu Yaubada bonana ana to'awatalatalaina yadi etoladi agaidiya be ginunauwena buki moya'aina giluyabuna.
28Tu melala againe hinauna-ma liline hiyemu-yo Yesu gihuluva vaita ginanulovedi. 29Tu yadi gaheya hisiveyewana higayo, “Mala a gilavina kabi'ona ginabogi fa'ina au buye kanamiyami.” Au giluku buye himiyami. 30Ada hi'enolukekela hi'au'a tu Yesu a'a givaina digo Yaubada againe givesiule gikihinena ada giveledi. 31#Lu 24:16Au matadi gimahalina be hihalamane-mo'ena, auhe'ama gilu'amuvedamana. 32Ada buye hive'agahegahe higayo, “Wona velemo'ena ada ayauna giyamuyamumu edeya kanauna tu Bana ide buye kalulukahihi be Yaubada bonana fa'ina gikivetuvetunuda.”
33-34Auhe'ama adi'iselu hitowamidi Yelusalema againe hiyewadi, yo'o ileveni hinuhagadi kaliva velugadiyao buye hivaga'auta higahegahe higayo, “Makewa Kaiwabu ahe gimididi-havagi ada Saimoni againe gilakayemu.” 35Au kaliva adi'iselu gaitoma edeya gilakayemu-ma hilukahihiyena, kadu higayo, “A'a gikihinena againe ahalamanena.”
Yelusalema againe Yesu ana tomuliya agaidiya gilakayemu.
Madiu 28:16-20; Maki 16:14-18; Yoni 20:19-23; Afositolo 1:6-8
36Aimo hilulukahihi tu Yesu Tauna gilu'afuneunena hinafadiya gimidi gigahedi gigayo, “Ase'asemi gina'ilova.”
37Tu ase'asedi gi'akolukoluna ada himatautave'ine, hivaita balauma hida'ita'itani. 38Tu Yesu gigahedi gigayo, “Gavadi-yo wa'ase'u'aulolo? Gavana fa'ina ase'asemi gi'amalakibo? 39Nimaku ageku wana'itana. Hima Iya Tauku. Wanakidadaniku be wana'itaku. Balauma keke wawowona keke waluluna tu we'a wawowoku waluluku.”
40Gigahe-yo nimana agena givehawaledi. 41Tu badi hivemwamwala lakahina kadu nuwadi giyaulowoga fa'ina, aimo keke hidavetumagane-mo'eni tu Yesu gigahedi gigayo, “Ka'i mene tamo a'a?” 42-43Au igana kabukabunina hivelena ada givaina be matadiya gi'ana.
Yesu nuwadi gikiyauyauga be Yaubada bonana hihalamanena.
Afositolo 1:2-5
44Ada gigahedi gigayo, “Boi aimo buye kamiyami tu gavenuwa'atami-ma hidede amine. Gilubodana be gavadi moya'aina boi tuwai-mo'ena Iya fa'ikuya Veyao Tuwaina ana bukiya hi'etoladina, medema gidalakayemu velemo'ena. Gahe-nadi Mosese yana buki-vehimeya againe gi'etoladina, kadu Yaubada bonana ana to'awatalatalaina hi'etoladina, kadu Yaubada yana kaliva Same againe hi'etoladina.”
45 #
Lu 24:27
Au Yesu nuwadi gikiyauyauga be Yaubada bonana ana nuwanuwa hinahalamanena. 46Ada gigahedi gigayo, “Hidede amine hi'etoladi higa Iya Keliso ganatagi tu aiyeta anaveto againe alikeya ganamididi-havagi. 47Kadu yaku kaliva nuwavilana be koyona ana aba'aiyawela aku eganeya hinalulumamalena. Hinavebutu Yelusalema againe hina'avalalakahina be hinanunauwena fafali moya'aina agaidiya. 48Gaitoma hidevama ana tohawavemogatala omi'iyao. 49#Yo 15:26, 16:7Ada wanogali! Abahawahega Kamaku giwonadabedabemi-ma gana'iveninisena higa Alu'aluwa Mahalina, tu hidei melaleya wanabodaboda tu lobama yana faiwala againe ginave'osemi.”
Yesu gilaka lobameya.
Maki 16:19-20; Afositolo 1:9-11
50Tu Yelusalema hitauya be Bedani tufone givega'auledi, ada nimana gikilakahina be gigahenuwakabubuyedi. 51Gigahegaheyeni Yaubada lobameya gisilakahina be ginuyabuyabudi. 52#Yo 14:28Au hihawadavadavana be yadi wavemwamwala Yelusalema againe hiyewadi. 53Ada tova moya'aina manuwa-tafalolo againe himiyami be Yaubada hihawadavadavana.
(Yesu kahihina iya Luke ga'etoladina-ma au hidede amine.)
© 2003, Wycliffe Bible Translators, Inc. All rights reserved.
