Afositolo 8
8
Saulo tovetumagana gikivekoyodi.
1 #
Af 11:19
Tu medema tovai-nadi kaliva hivebutu tovetumagana adi yo'o Yelusalema againe hikivekoyodi be tagiya lakahina hinuhagana. Hikivekoyodi fa'ina tovetumagana moya'aidi hi'ota tu afositolo gagana himiya. Hi'ota ada Yudiya Sameliya adi fafali moya'aina agaidiya hi'abinauna. 2Tu kaliva tufoidi tafatafalolodiyao Sitiveni hitauna, ada bana fa'ine hive'alulaukuhi lakahina. 3#Af 9:1-2, 26:9-11Tu bana Saulo givebutu tovetumagana adi yo'o giluyaweyawelidi. Au manuwa sa'eyana sa'eyana agaidiya ginunuwaliliuga, tovetumagana kaliva vevine gitaitaidi be ginunauwedi deliya giseusedi.
Filifi Yesu bonana Sameliya againe gilumamalena.
4Tu badi tovetumagana hi'abinauna-ma gava fafali moya'aina agaidiya hina, medede againe Yesu Keliso bonana hilumamalena. 5Bana Filifi melala ana egana Sameliya againe gina, ada miSameliya agaidiya Keliso fa'ine gilumamala. 6Ada yo'o lakahina yana laumamala hinogalina kadu yana aituha fifiwaladi gifaisewadi-ma hi'itana, ada au moya'aidi bonana hinogali-hagihagiyena. 7#Md 10:1; Mk 16:17Moya'aidi wayafunediyao hiyamumu. Yafune hikova'awafatafata tu hiyemu. Kadu tovefela moya'aidi kadu badi walogidi gi'a'uwa-vagahina amanadi hiyamumu. 8Hidedemi moya'aidi hiyamumu fa'ina, miSameliya hivemwamwala lakahina.
Tokwelikweli ana egana Saimoni kahihina.
9-10Tu medema melalai-nadi againe kaliva sa'eyana gimiyami, ana egana Saimoni, ada boi tuwaina givebutu tokwelikweli yadi faisewa gi'abi'abina, ada au hida yana faisewa againe miSameliya moya'aidi gi'iveyaulowogidi. Gigahe vaita bana kaliva kikaiwabuna, ada kaliva moya'aidi, lakahidiyao kadu kabi'odiyao, yana gahe hinogali-hagihagiyena. E, higahe higayo, “Bana hida kalivai-nadi vaita Yaubada amine, higa ana egana Tofaiwala-mo'a.” 11Ada aituha fifiwalana yana kwelikweli againe gififaisewana be gi'iveyaulowogidi, ada hidedemi ahe ginunauwena lauva tunugina fa'ina moya'aidi ginuwa'abiyedi. 12Tu Filifi Venuwa'ata Yamumuna Yaubada yana yo'o ana luku fa'ina gilukahihiyena, kadu Yesu Keliso ana egana fa'ina badi agaidiya gilumamalena, ada yana laumamala hivetumaganena. Hivetumaganeni-yo hibafitaiso, kaliva kadu vevine. 13Kadu bana Saimoni tauna Yesu againe givetumagana ada gibafitaiso. Gibafitaiso-yo Filifi buye buye tu ginunauwena tova moya'aina, ada yana aituha fifiwalana kadu yana abaveyaulowoga lakahina gi'itadi againe, bana kadu nuwana givegafo'uya'uya.
14Tu afositolo Yelusalema againe miSameliya valeyadi hinogalina, higa Yaubada bonana hi'idibumuhigena. Hinogalini-yo Fita Yoni badi agaidiya hi'iveninisedi. 15Ada ahe hiyemu againe tovetumagana fa'idiya hive'o'ola be higa Alu'aluwa Mahalina badi hinavaina. 16Bana Alu'aluwa Mahalina higa aimo keke tamo hakwadi badi agaidiya gidaluvaiyeni. Au Yesu ana eganeya ahe hibafitaiso tu Alu'aluwa Mahalina aimo keke badi agaidiya gidahobu. 17#Af 9:17, 19:6; 2Ti 1:6Ada Fita Yoni hiyemu againe, nimadi badi tovetumagana agaidiya hisena, au Alu'aluwa Mahalina giluvaiyedi.
18-19Tu bana Saimoni gilulauboda. Afositolo nimadi badi tovetumagana agaidiya hiseni-yo Yaubada Alu'aluwa Mahalina badi agaidiya gihawahegena. Hidedemi Saimoni gi'itana againe, mani gitunena Fita Yoni agaidiya ada gigahedi gigayo, “Hida faiwala iya kadu unaveleku be badi gaveyao agaidiya nimaku ganasena, medema Alu'aluwa Mahalina hinavaina.”
20Tu Fita gigahena gigayo, “Taumadi! Makewa o unuwanuwa vaita Yaubada yana abahawahega mani againe afaiweya unakimonena fa'ina Yaubada o ginaluyaweli, kadu ya mani buye ginaluyawelina. 21Ya nuwanuwa keke tunutunugina Yaubada matane fa'ina, keke afaiweya hida Yaubada yana faisewa ime buye kanafaisewa. 22#Af 2:38Au unanuwavilana be hida ya nuwanuwa higa koyona lakahina unavenikohiyena, ada Kaiwabu againe unave'o'ola be ka'i ya nuwanuwa koyo-mo'ena ginayawelina. 23Au ya nuwahinage ahe gahalamanena. Ase'ase italauvadiga againe gimaga ada nuwanuwai-nadi ase'ase gikivekoyona. Ya nuwanuwa koyona gikive'avi be yogoyogoni umimiyami.” Hidedemi Fita gigahe.
24Ada bana Saimoni badi Fita Yoni agaidiya gigahe gigayo, “Omi Kaiwabu againe iya fa'ikuya wadave'o'ola be hida gaitoma koyona wagaheyena-ma keke agaikuya ginalakayemu.”
25Tu Fita Yoni Kaiwabu bonana ahe hilumamalena kadu gavadi gavadi taudiyao agaidiya hi'ayaunena-ma ahe hi'awatalatalaineni-yo au Yelusalema againe hiyewadi. Ada yadina againe melala moya'aina Sameliya ana fafaliya Venuwa'ata Yamumuna hilumamalenauwena.
Filifi kwanaIdiyofiya edeya gimaduhagana.
26Badi hina tu Kaiwabu yana tovenuwa'ata sa'eyana Filifi againe gi'ela gigahena gigayo, “Unakidewadewa be unalowoga. Gava unahobu eda Yelusalema Gasa hinafane ginauna-ma amine unana. Higa hida eda tuwaina babigaga hinafane ginauna.” 27#Ais 56:3-7Au Filifi gikidewadewa be gilowoga. Ginauna tu kaliva lakahina sa'eyana edeya gimaduhagana, kwanaIdiyofiya, ada bana tovehimeya lakahina, badi Kanidesi miIdiyofiya yadi kwini yadi mani matatabuna gi'ita'itave'avina. Ada hida kalivai-nadi Yelusalema againe a gina be Yaubada ginahawadavadavana fa'ina. 28Gina be giyewayewana tu yana waka abalautaina againe gihiyoto tu Yaubada bonana ana to'awatalatalaina ana egana Aiseya yana buki againe gihawahawa. 29#Af 10:19Bana ginauna tu Alu'aluwa Mahalina Filifi againe gigahe gigayo, “Unana yuwa waka abalautaina liline unanudadana.”
Filifi kwana Idiyofiya Yesu fa'ine gikivetuvetununa.
30Au Filifi waka againe gimaduna ada kaliva agona ginogalina, to'awatalatalaina Aiseya yana buki againe gihawahawa. Au gitoliluveluvena gigayo, “Medema uhawahawana-ma ka'i ana nuwanuwa uhalamanena?”
31Bana kwanaIdiyofiya gigayo, “Gavaiya'amine akufaiweya ganahalamaneni, fa'ina aku tokivetuvetunu keke.” Ada au Filifi againe gigahe gigayo, “Ulaka'ela be wakeya buye kanana.” Ada au giyage.
32 #
Ais 53:7-8
Ada Yaubada bonana Veyao Tuwaina ana bukiya gihawahawana-ma ana maita hidedemi gigahe gigayo,
Sifi hinauwena be hinayogona amine, bana'e hinauwena.
Sifi kabi'ona ana to'aikeya matane keke ginakwage amine,
meda bana keke tamo bonalaufata gidagaheye.
33Hikivewowomumuna ada keke tamo gavadi koyona
gidafaisewani tu, au ai'adi hiluve'alikana.
Yana miyami babiya himadudabana fa'ina,
keke tamo hakwadi ana unumamomo fa'idiya ginalukahihi,
fa'ina ana unumamomo keke.
Au hidedemi Aiseya gigahe-ma kwanaIdiyofiya gihawahawa.
34Tu kwanaIdiyofiya Filifi againe gigahe gigayo, “Au unakivetuvetunuku. Hakwadi fa'ine to'awatalatalaina hidedemi gilukahihi, ka'i tauna fa'ine o ka'i mali kaliva fa'ine?” 35Ada bana Filifi givebutu medema Yaubada bonanai-nadi gihawana-ma fa'ina gikivetuvetununa, ada higa Venuwa'ata Yamumuna Yesu fa'ine bana againe gilukahihiyena.
36Ada edeya hinauna tu ni'u sa'eyana againe hiyemu, ada bana kwanaIdiyofiya gigahe gigayo, “Mene u'ita ni'u gidadauda. Nuwanuwaku ganabafitaiso. Ka'i tamo gavadi fa'ina unahawataku be keke akufaiweya ganabafitaiso?” [ 37Filifi gigahena gigayo, “Ka'i velemo'ena uhawahege be Yesu Keliso againe uvetumagana, au afaiweya unabafitaiso.” Ada bana gigayo, “Yesu Keliso velemo'ena Yaubada Natuna ma gavetumaganena.”] 38Ada au yana waka ana tovemadu givehimeyena be ginave'ilovena. Give'iloveni-yo badi adi'iselu Filifi kadu kwanaIdiyofiya ni'u againe hihobu be Filifi gikivebafitaisoyena. 39Gikivebafitaisoyena gihavaina hilaka avaleya, ada auhe'ama Kaiwabu Alu'aluwana Filifi mali fafaliya gimaduvedamanena. Tu bana kwanaIdiyofiya Filifi keke gida'ita-havagileni tu yana wavemwamwala a ginanauna. 40#Af 21:8Ada au Kaiwabu Alu'aluwana Filifi ginuvedamanena ada auhe'ama melala ana egana Asodo againe gilakayemu. Medede againe givebutu melala moya'aina agaidiya ginauna, Venuwa'ata Yamumuna gilulumamalena ginunauwena tu Sisaliya againe giyemu.
© 2003, Wycliffe Bible Translators, Inc. All rights reserved.
