Afositolo 6
6
Kaliva adiveseveni hivegidedi be afositolo hinavelugadi.
1Himiyami tu tova moya'aina Yesu ana tomuliya higa tovetumagana himoyamoya'ai. Himoya'ai tu vekwageya gilakayemu. Sikwasikwa adiga fa'ina hivekwageya. Badi miYuda tovetumagana bona Gilika againe hilulukahihi amanadi badi kadu tovetumagana bona Hibeliu againe hilulukahihi-ma hi'alawoluwoluyedi, higahegahe vaita malalauga sa'eyana sa'eyana a'a ana folaka againe badi bonadi Gilika ma yadi sikwasikwa kabi'ona amine hivaivaina, tu badi bonadi Hibeliu ma yadi sikwasikwa lakahina amine hivaivaina. 2Hidedemi hi'alawoluwolu fa'ina afositolo adivetuwelo tovetumagana moya'aidi hikovavaga'auhidi ada higahedi higayo, “Ka'i ime a'a ana folaka ana'itave'avina be Yaubada bonana ana laumamala anahegena digo, medema keke gidalubodani. 3Au tobohiyameyao kaliva adiveseveni wanavegidedi, valeyadi ma au hagihagina higa Alu'aluwa Mahalina givemagadi kadu tonuwahuya velemo'ena. E, wanavegidedi be hida abavehimeya a'a ana folaka anaveledi. 4Tu ime'eyao ma ve'o'ola kadu laumamala ana faisewa tova moya'aina ana'ita'itave'avina.”
5Au tovetumagana yadi yo'o matatabudi afositolo yadi gahe fa'ina nuwadi giyamumu, ada kaliva hivegidedi. Kaliva sa'eyana hivegidena-ma ana egana Sitiveni, bana yana vetumagana toyogina kadu Alu'aluwa Mahalina againe gimaga-mo'a. Kadu kaliva velugadiyao hivegidedi-ma adi egana Filifi, Felokolo, Naikena, Timoni, Famenasi, kadu Nikolesi bana kwanaAnidiyoka yo'o tulidiyao kalivana tu miYuda yadi tafalolo againe gidamana be givekwanamiYuda. 6#Af 13:3Au hida kalivai-dina afositolo matadiya hisedi be hive'o'oledi, ada nimadi badi agaidiya hisena be faisewai-nadi fa'ina hisevehailedi.
7 #
Af 16:5
Ada Yaubada bonana ginauna ada kaliva moya'aidi hinogalina be hivetumaganena. Ada tovetumagana yadi yo'o Yelusalema againe himadumoya'ai, kadu abaveyao ana tofaisewa tufoidi moya'aidi Yesu bonana againe hihawahegedi.
MiYuda adi tonagona Sitiveni hikive'avina.
8Tu bana Sitiveni ase'asena Yaubada yana nuwanuwa againe gimaga, kadu tova moya'aina Yaubada yana faiwala againe gimiyami fa'ina aituha fifiwalana kadu abaveyaulowoga lakahina kaliva hinafadiya gififaisewadi. 9Tu kaliva tufoidi hivekwageyena, miYuda adi yo'o sa'eyana kalivai-dina. Manuwa-abavehawala ana egana sinagogi againe badi hivavaga'auta, ada manuwai-nadi hivewagana Libetini yadi sinagogi. Ada badi miYudai-dina melala adi egana Sailini kadu Alekisanidiya kaliva. Badi'iyao kadu miYuda Silisiya ada Esiya ana fafali kalivai-dina hivebutu Sitiveni buye hivekwavekwageya. 10#Lu 21:15Tu Alu'aluwa Mahalina nuwahuya lakahi-mo'ena Sitiveni givelena fa'ina yana laumamala againe hive'amata, keke adifaiweya hinabonalaufata.
11 #
Md 26:60-61
Au badi miYuda kaliva tufoidi higahekauyedi be hinagahe hinagayo, “Bana wadevama kalivai-nadi anogalina Mosese gihawatagona kadu Yaubada gihawatagona.”
12Au hidede amine badi miYudai-dina badi yo'o hi'ive'ago'ugadi, ada kaliva lakahidiyao kadu Mosese yana vehimeya ana tovehawala buye hi'ive'ago'ugadi, ada au hina Sitiveni hikive'avina be miYuda yadi Koniselo agaidiya hinauwena. 13Sitiveni Koniselo agaidiya hilukuwena, kadu togahe-kawowo buye hilukuwedi be bana fa'ine hifwaya higayo, “Bana hida kaliva tova moya'aina yada manuwa-tafalolo lakahina kadu Mosese yana vehimeya gihawahawavekoyoyena. 14Ime bonana anogalina, gigahe vaita hida Yesu kwanaNasaledi manuwa-tafalolo lakahina gidayawelina, ada vehimeya moya'aina Mosese yada yo'o tuwaina giveleda-ma gidahawatani be vehimeya velugana againe kanamiyami.” Hidedemi togahe-kawowo higahe. 15Ada kaliva moya'aidi samuba hinagene bana Sitiveni hi'itakwanekwanena, ada magigina mahamahali-mo'ena hi'itana vaita lobama ana tovenuwa'ata ana bela amine.
© 2003, Wycliffe Bible Translators, Inc. All rights reserved.
