Yohana 4
4
Yesu kolonga na mtwanzi wa Kisamalia
1Mafalisayo wahulika kamba Yesu kakala kopata na kobatiza wanahina wengi kubanza Yohana, 2lakini ukweli Yesu hambatize munhu yoyose ila wanahina zake wao wabatize. 3Yesu viyahulike avo, kasegela mwiisi ya Yudea na kubwela mwiisi ya Galilaya. 4Mmwanza wake kalondigwa yabitile Samalia.
5Kavika mwiisi ya Samalia kudibuga da Sikali, behi na mgunda wa Yakobo uyamgwelele mwanage yakemigwe Yusufu. 6Hanhu aho kukala na sima da Yakobo. Yesu viyadonhile na mwanza mtali, kakala aho kudisima. Ikala imisi.
7Mtwanzi wa kisamalia keza kudeha mazi. Yesu kamulongela, “Nigwelele mazi ning'we.” 8Kipindi acho wanahina zake wakala wacholile kudibuga kugula chakuja.
9Mtwanzi ayo kamwidika, “Gweye kwa Muyahudi na niye na Msamalia. Kodahaze kumhula mazi ga kung'wa?” Kwavija Wayahudi hawajaga hamoja na Wasamalia.
10Yesu kamwidika, “Maza ujuwile choolava Imulungu, na maza ujuwile nani yokupula mazi ga kung'wa, wahampulile, nayo yahakugwelele mazi gogala ugima.”
11Mtwanzi ayo kamulongela, “Go mkulu, gweye kwabule doo, na sima dino dingila ng'hani. Wahagapatile kwahi mazi gago gogala ugima? 12Vino gweye kwa mkulu kubanza tata yetu Yakobo yatugwelele sima dino? Heyo mwenyego hamoja na wanage na fugo yake yose wang'wa mazi ga mdisima dino!”
13Yesu kamwidika, “Wanhu wose ong'wa mazi gano okona ng'hilu kabili, 14lakini munhu yoyose yong'wa mazi gonda nimgwelele, honda yone ng'hilu kabili. Mazi gonda nimgwelele niye gokuwa nzasa ya mazi gogala ugima wa milele mgati mmwake.”
15Mtwanzi ayo kalonga, “Go mkulu, nigwee mazi gago ili sikuniwe na ng'hilu kabili, na ndeke kwiza hano kudeha mazi.”
16Yesu kamulongela, “Genda kamkeme mkasano wako, na wize nayo.”
17Mtwanzi ayo kamwidika, “Nabule mkasano.”
Yesu kamulongela, “Kulonga goya kuduhu mkasano. 18Kusoligwa na wakasano watano, na mbigalo yuukala nayo sambi siyo mkasano wako. Kunongela goya.”
19Mtwanzi ayo kalonga, “Go mkulu, vinikona gweye kwa mtula ndagu. 20Wahenga zetu wamtambikila Imulungu kulugongo luno, lakini mweye Wayahudi molonga Yelusalemu aho hanhu holondigwa tumtambikile Imulungu.”
21Yesu kamulongela, “Mama, togola gano gonikulongela, kipindi chokwiza baho wanhu honda wamtambikile Tata kulugongo luno hebu ako Yelusalemu. 22Mweye Wasamalia hamumjuwile goya ayo imumtambikila, lakini siye Wayahudi tumjuwa itumtambikila, kwavija ukombola olawa kwa Wayahudi. 23Lakini kipindi chokwiza na sambi chabahano, aho awo otambikaga kweli, omtambikila Tata kwa loho na kweli, kwavija Tata kolonda wanhu omtambikila kamba vivo. 24Imulungu ni Loho, avo wanhu omtambikila olondigwa wamtambikile kwa loho na kweli.”
25Mtwanzi ayo kamulongela Yesu, “Nojuwa Mkombola kokwiza, yokemigwa Kilisito, yaheza kotulongela mbuli zose.”
26Yesu kamwidika, “Iyo nene, inilonga na gweye.”
27Kipindi acho wanahina zake Yesu wabwela, wakanganya ng'hani viwamvikile Yesu kolonga na mtwanzi ayo. Lakini kuduhu imoja wao yamuuzile mtwanzi ayo, “Kolonda choni?” hebu yamuuze Yesu, “Habali kolonga na mtwanzi ino?”
28Abaho mtwanzi ayo kaleka nongo yake ya mazi, kabweleganya kudibuga na kuwalongela wanhu, 29“Izoni mumulole munhu yanongele gaja gose ganhendile. Vino hadaha kuwa Kilisito Mkombola?” 30Avo wanhu wasegela kudibuga na kumgendela Yesu.
31Mna ikipindi kikija wanahina zake wamnanahiza Yesu, “Mfundiza, chonde, diya tanhu!”
32Lakini Yesu kawedika, “Ninao ndiya mweye hamuijuwile.”
33Avo wanahina wasonga kuiuza, “Vino hana munhu kamgalila chakuja?”
34Yesu kawalongela, “Ujaji wangu, ni kutenda goyolonda ija yanhumile na kuimambukiza sang'hano iyanigwelele. 35Mweye mulongaga vino, ‘Ing'hali miyezi mine tosonga kusenga.’ Lakini nowalongeleni, inuleni meso genu mulole mmigunda! Vihandigwe vikangala volondigwa visengigwe! 36Msengaji kolihigwa, na kwika hamoja indiya kwa ugima wa milele. Avo muhandaji na msengaji wose wadeng'helele hamoja. 37Ulonzi uno wa kweli, ‘Imoja kohanda iyagwe kosenga.’ 38Niwatuma mkasenge mumgunda kinhu kija hamkisang'hanile, wanhu wayagwe awo wasang'hane, na mweye momweda kwa sang'hano yao.”
39Wasamalia wengi wa buga dija wamtogola Yesu kwa gaja gayalongile mtwanzi ayo, “Kanongela gose ganhendile.” 40Avo Wasamalia viwamcholele Yesu, wampula yakale nao. Yesu kakala nao siku mbili.
41Wanhu wengi watogola mbuli ya usenga wa Yesu. 42Wamulongela mtwanzi ayo, “Sambi totogola, siyo mbuli ya gaja gaulongile gaiyeka, lakini siye wenyego tumuhulika, na tojuwa heyo ayo Mkombola wa wanhu wa mwiisi yose.”
Yesu komuhonya mwana wa mkulu imoja
43Vizibitile siku mbili, Yesu kachola isi ya Galilaya. 44Kwavija Yesu mwenyego kalonga, “Mtula ndagu hapata nhogolwa mwiisi yake.” 45Viyavikile mwiisi ya Galilaya, wanhu wengi wambokela, kwavija wakala wacholile kuna indiya ya Pasaka mwiisi ya Yelusalemu na wachona kila kinhu kiyatendile kipindi cha Pasaka.
46Yesu kachola kabili kudibuga da Kana mwiisi ya Galilaya, aho hayagaluse mazi kuwa divai. Aho kukala na mkulu imoja yakalile na mbwanga wake mtamu kudibuga da Kapelinaumu. 47Mkulu ayo viyahulike kamba Yesu keza kulawa mwiisi ya Yudea kwiza mwiisi ya Galilaya, kamcholela Yesu, kampula yachole kudibuga da Kapelinaumu yakamuhonye mbwanga wake, yakalile kolonda kufa. 48Yesu kamulongela, “Kuduhu munhu yoyose hagati yenu yotogola mbaka yone unzonza na vilaguso.”
49Mkulu ayo kamulongela, “Go mkulu, tuchole wose mwanangu yang'hali hanakufa.”
50Yesu kamulongela, “Genda, mwanago kohona!”
Munhu ayo katogola mbuli za Yesu, kachola. 51Mnzila ya kuchola ukae kumwake kawating'hana wasang'hanaji zake wamulongela, “Mbwanga wako kahona!”
52Kawauza mna ikipindi gani mwanage viyahonile, wamwidika, “Ikala jana saa saba imisi vivo homa viimulekile.” 53Bahaja tata ayo kakumbuka ikala kipindi acho Yesu viyamulongele, “Mwanago kohona.” Avo heyo na wanhu wa mng'anda yake wamtogola Yesu.
54Uno ukala unzonza wa kabili yautendile Yesu viyalawile isi ya Yudea kwiza isi ya Galilaya.
NT: © 2014 Pioneer Bible Translators and The Word for the World
OT: © 2019 Pioneer Bible Translators
