Mwanduso 22
22
Imulungu komulagiza Abulahamu yamulave Isaka
1Ako kumwande, Imulungu kamgeza Abulahamu, kamkema, “Abulahamu!” Abulahamu kamwidika, “Nabaha!”
2Imulungu kamulongela, “Msole mwanago Isaka, yuumnogela ng'hani, uchole mwiisi ya Molia, ukamulave nhosa ya kusoma moto kulugongo londa nikulagusile.” 3Imitondo yake, Abulahamu kaidamuka, kamtanda kihongwe wake. Kawasola wasang'hanaji zake wabili na imwana Isaka. Viyamambukize kukanha ngodi za kusomela inhosa, kafunga mwanza wa kuchola hanhu kuyalongeligwe na Imulungu. 4Siku da kadatu Abulahamu kenula kihanga chake kahona hanhu aho kwa kutali. 5Abaho kawalongela wasang'hanaji zake, “Kaleni hano na ikihongwe, niye na mwanangu tochola haja kumtambikila Imulungu abaho towabwelela.” 6Abulahamu kamdikwa Isaka ngodi za kusomela nhosa, na heyo mwenyego kasola moto na mwele. Wachola hamoja, 7Isaka kalonga, “Agweye tata!”
Tatake kamwidika, “Kolongaze mwanangu?”
Isaka kamulongela, “Moto na ngodi za baha lakini ing'hondolo wa nhosa kakwahi?”
8Abulahamu kamwidika, “Mwanangu, Imulungu mwenyego iyo yonda yatugwelele.” Avo wose wabili wagendelela na mwanza wao.
9Viwavikile hanhu kuyalongeligwe na Imulungu, Abulahamu kazenga upango wa kulavila nhosa na uchanha keka ngodi. Abaho kamgodeka imwana, kamtambaliza muupango wa nhosa, mna zingodi. 10Abaho kagolosa umkono, kasola mwele yamchinje imwana. 11Lakini msenga wa kuulanga wa Mndewa kamkema, “Abulahamu! Abulahamu!”
Abulahamu kamwidika, “Nabaha.”
12Kamulongela, “Sikuumulumize imwana. Sambi nojuwa komdumba Imulungu, kwavija hugomese bule mwanago yuumnogela.”
13Abulahamu kahinduka, kona ng'hondolo wa kimbigalo, mhembe zake zangama mkisolo. Avo kachola kumsola ing'hondolo, kamulava nhosa ya kusoma moto hanhu ha mwanage. 14Avo Abulahamu kahakema hanhu aho, “Mndewa Imulungu kogola.” Kamba wanhu viwolonga mbaka lelo, “Kulugongo lwa Mndewa Imulungu wanhu ogweleligwa.”
15Msenga wa Mndewa kamkema kabili Abulahamu, 16kalonga, “Mndewa Imulungu kolonga vino, ‘Noiduwila mwenyego, kwavija kusang'hana vino na hugomese mwanago yeli yaiyeka yuulelile na Sala, 17nokutenda umwede na kuutenda ulelo wako uwe kamba nhondo za kuulanga na kamba msanga wa mwhani. Ulelo wako osola isi za wanhu wawehile, 18na kubitila ulelo wako wanhu wa makabila gose omweda kwavija kunhegeleza niye.’ ” 19Abulahamu kabwela kwa wasang'hanaji zake, kachola nao Beelisheba, kakala kuko.
Ulelo wa Naholi
20Ako kumwande Abulahamu kahulika kamba Milika kamulelela wana Naholi, ndugu yake. 21Usi mwana wa chaudele na Buzi ndugu yake, na Kemueli tatake Alamu, 22Kesedi na Hazo na Pilidashi na Yidilafu na Besueli, 23Besueli kamulela Lebeka. Milika kamulelela Naholi, ndugu yake Abulahamu, wana wanane. 24Mtumwa wa kitwanzi, yakalile kamba mwehe wake yakemigwe Leuma, vivija kamulelela wana, Teba na Gahamu na Tahashi na Maaka.
NT: © 2014 Pioneer Bible Translators and The Word for the World
OT: © 2019 Pioneer Bible Translators
