Mwanduso 21
21
Kuleleka kwa Isaka
1Mndewa Imulungu kamnogela Sala, katenda gaja gayalongile. 2Mna ikipindi kikija kiyalongile Imulungu, muuvele wake Abulahamu, Sala kagoga inda, kamulelela mwana wa kimbigalo. 3Abulahamu kamgwaa mwana ayo yamulelile Sala twaga da Isaka. 4Kamba viyalagizwe na Imulungu, Isaka viyavikize siku nane toka kuvumbuka kamwigiza kumbi. 5Abulahamu kakala na miyaka gana Isaka viyaleleke. 6Avo Sala kalonga, “Imulungu kangalila daba na munhu yoyose yonda yahulike mbuli ino koseka na niye.” 7Abaho kengeza kulonga, “Nani yahamulongele Abulahamu kamba Sala yahakong'heze mwana? Lakini muuvele wake nimulelela mwana wa kimbigalo.”
8Imwana viyakulile kalekeswa tombo. Siku da kulekeswa tombo imwana, Abulahamu katenda nyimwilinyimwili ng'hulu.
Hajili na Ishimaeli owingingwa
9Siku dimoja Ishimaeli, mwanage Abulahamu yaleligwe na Hajili, Mmisili, kakala koseka. 10Sala viyawone, kamulongela Abulahamu, “Muwinge kutali mtumwa ino na mwanage, kwavija havidahika mwana wa mtumwa ino yahazi hamoja na mwanangu Isaka.” 11Mbuli ino imgaza ng'hani Abulahamu kwavija vivija Ishimaeli kakala mwanage. 12Lakini Imulungu kamulongela, “Sikuulumile moyo mbuli ya mwana ayo hebu mtumwa wako Hajili. Togola mbuli yoyose iyokulongela Sala kwavija gweye kopata ulelo kubitila Isaka kamba vinikulongele. 13Vivija imwana wa mtumwa, nomtenda yawe na ulelo onda uwe kabila kwavija heyo vivija mwanago.”
14Imitondo iyagwe, Abulahamu kasola ndiya na nongo ya mazi kamgwaa Hajili. Kamdikwa mmaega gake, abaho kamuwinga heyo na mwanage. Hajili kasegela, kakala kowegela kuluwala lwa Beelisheba. 15Gamazi vigeshile mwiinongo yake, Hajili kamtambaliza mwanage mkisolo, 16abaho kakala hasi, utali wa magulu gana. Kalonga munda kwa munda, “Sidaha kulola mwanangu viyofa.” Na viyakalile aho, kasonga kulila.
17Imulungu kahulika viyolila imwana, na msenga wa kuulanga kamkema Hajili, kamulongela, “Hajili, kilamuso choni? Sikuudumbe, Imulungu kahulika kililo cha mwanago ako kuyeli. 18Mwinule mwanago umgoge mkono, kwavija nomtenda yawe na ulelo onda uwe kabila kulu.” 19Imulungu kamgubula Hajili gameso, kajona sima da mazi. Kachola kamemeza mazi inongo, kamgwaa mwanage yang'we. 20Imulungu kakala hamoja na mwana ayo, viyakalile kokula. Kakala kuluwala na kakala galu wa kupigisa migoha kwa upinde. 21Viyakalile kokala kuluwala lwa Palani, mamake kamsolela mtwanzi wa Kimisili yawe mwehe wake.
Abulahamu koilagana na Abimeleki
22Kipindi acho, Abimeleki hamoja na Fikoli, mkulu wa wakalizi wake, kamulongela Abulahamu, “Kila kinhu kiutenda Imulungu kahamoja na gweye. 23Lelo, niduwile kwa Imulungu honda umvizile niye, hebu wanangu, hebu lukolo lwangu. Kamba niye vinhendile ganogile kumwako na gweye unhendele vivo, hamoja na isi yuukala.”
24Abulahamu kalonga, “Noiduwila.”
25Abulahamu kakala yamuyalalile Abimeleki mbuli ya sima diyabokigwe na wasang'hanaji zake Abimeleki. 26Abimeleki kamulongela, “Niye simjuwile bule munhu yatendile vivo, na gweye hunongele bule mbuli ino, niihulika sambi.” 27Abaho Abulahamu kamgwaa Abimeleki ng'hondolo na ng'ombe, wanhu awo wabili watenda lagano. 28Abulahamu kawabagula ng'hondolo saba wa kitwanzi, 29Abimeleki kamuuza Abulahamu, “Habali kowabagula ng'hondolo wano saba wa kitwanzi?”
30Abulahamu kamwidika, “Bokela ng'hondolo wano saba wa kitwanzi kulawa mmakono gangu kamba usindila kamba niye iyo nihimbile sima dino.” 31Avo hanhu haja hakemigwa Beelisheba, fambulo jake sima da kuiduwila, kwavija hanhu aho wanhu awo wabili aho hawatendile lagano jao.
32Viwailumbile ako Beelisheba, Abimeleki na Fikoli, mkulu wa wakalizi wake, kabwela mwiisi ya Wafilisiti. 33Abaho Abulahamu kahanda biki dikemigwa tamalisiki ako Beelisheba, kamgwaa ukulu Mndewa Imulungu, Imulungu yelibule uhelelo. 34Abulahamu kakala ng'hani mwiisi ya Wafilisiti.
NT: © 2014 Pioneer Bible Translators and The Word for the World
OT: © 2019 Pioneer Bible Translators
