Mateo 24
24
An Pag-istorya Ni Jesus Manungod Sa Pagkaruba San Templo
(Marcos 13:1-2; Lucas 21:5-6)
1Paghali ni Jesus sa templo, nagharalapit an mga disipulos agod ipakita sa iya na matahom ini. 2Pero sinabat niya sinda, “Nakikita niyo ini tanan? Ginasiguro ko sa iyo na waraʼn nagaturumbawan na bato didi na mabibilin ni usad kay an tanan maruruba.”
Mga Kalisudan Kag Mga Patios
(Marcos 13:3-13; Lucas 21:7-19)
3San nakaingkod si Jesus sa may Bukid San Kaolibohan nagkaradto sa iya an mga disipulos na sinda-sinda lang tapos nagsabi, “Sabihi kami kun san-o ini mangyayari kag nano an tanda na igapakita san imo pagbalik kag san katapusan san kinab-an.”
4Nagsabat si Jesus, “Maglikay gayod kamo na dili maluko san sin-o man, 5kay damo an magaabot na masambit san ngaran ko kag magaangkon, ‘Ako an Cristo.’ Kaya damo na mga tawo an pagalukuhon ninda. 6Ayaw kamo pagkahandal sa mga barita na may mga gyera o mga nagasabi-sabi na may gyera na maabot. Dapat ini mangyari pero dili pa ina an katapusan. 7Magagyerera pa man an mga nasyon kag an mga kahadian naman magapauruataki. Magkakaigwa sin grabe na gutom kag mga paglinog sa damoʼn lugar. 8Ini tanan pagtuna pa lang san kalisudan na bagaʼn pagsakit sa pag-anak.
9“Tapos dadakupon kamo kag iintriga agod kastiguhon kag ipapatay. Pagakabadlian man kamo san katawuhan san tanan na nasyon dahilan sa akon. 10Sani na panahon may damo na mawawaraan sin pagsarig. May mga magapaturutraydoran kag magaururitan sa kada usad. 11Damoʼn maruluwas na mga buwaon na mga propeta. Damo sindaʼn pagalukuhon 12kag dahilan sa paglukop san karautan sa kinab-an mawawara an pagkamuot san haros tanan na mga tawo sa Dios. 13Pero masasalbar an may masarig na pagtuod hasta sa katapusan san buhay. 14Igapahayag man sa bilog na kinab-an ini na Maayo Na Barita manungod san kahadian agod makabati an tanan na katawuhan. Sani pa lang mangyayari an katapusan.”
An Pinakagrabe Na Patios Sa Mga Taga-Jerusalem
(Marcos 13:14-23; Lucas 21:20-24)
15“Niyan kasadto pa ginpahayag san propeta na si Daniel an manungod san ‘bagay na mauuritan gayod san Dios kag magapasira sa tawo.’#24:15 Kitaa sa Daniel 11:31. Dapat gayod na masabutan ini san nagabasa. Pakakita niyo na ini nakatungtong na sa banal na lugar, 16dapat magdulag na sa mga kabukidan idtoʼn adto sa Judea. 17Kun may tawo na adto sa atop dili na siya dapat maglusad pa agod magkuha san iya mga garamiton. 18Kun may tawo naman na adto na sa uma, dili na gayod siya dapat mag-uli pa para magkuha san iya bado. 19Kun sugad kamakaluluoy man sadtoʼn mga budos kag may mga ginapadudo pag-abot sana na panahon!
20“Mangadyi kamo na an iyo pagdulag dili makatagbo na tighagkutan o Adlaw San Pagpahuway. 21Nasabi ko ini kay sana na panahon magkakaigwa sin grabe na pagtios an katawuhan na dili pa nabatyagan tuna san katuna-tunai san kinab-an hasta yana kag dili na mangyayari gihapon hasta na lang. 22Mala ngani kun wara pagpahalip-uta san Ginoo ina na mga adlaw wara gayod sin mabibilin na buhay. Pero alang-alang sa iya mga pinili pinahalip-ot niya ina.
23“Kun may nagasabi sa iyo sana na panahon na, ‘Kitaa, adi an Cristo!’ o ‘Kitaa, adto siya!’ ayaw pagtuod sana. 24Nasabi ko ini kay damo an maruluwas na magapatuod na mga Cristo kag mga propeta sinda. Makakahimo sinda sin mga makangangawa na mga bagay kag mga milagro agod makaluko bisan sa mga pinili san Dios kun mahimo ninda. 25Pamatii gayod kay ginpadaanan ta na kamo antes pa ini mangyari. 26Kun magsabi sinda sa iyo, ‘Kitaa, adto siya sa disyerto,’ ayaw kamo pagkadto didto. Kun magsabi naman sinda, ‘Kitaa, adi siya nagatago,’ dili man kamo magtuod, 27kay pareho san kilat na nagaidlap sa sirangan hasta sa kalundan an pag-abot ko na Anak San Tawo. 28Mangyayari gayod ini pareho san pagtiripon san mga uwak kun diin may patay.”#24:28 Sa Griego, “Kun diin may patay, didto man magatiripon an mga uwak.”
An Pagbalik Sa Kinab-an San Anak San Tawo
(Marcos 13:24-27; Lucas 21:25-28)
29“Pakatapos lang san mga patios sana na mga adlaw pagapadulumon an adlaw, mawawar-an sin pawa an bulan, magakahurulog an mga bituon sa langit kag an mga makagagahom sa kalangitan pagauy-ugon. 30Sana mismo maganguruyngoy an tanan na katawuhan san kinab-an kay makikita ninda sa langit an tanda ko na Anak San Tawo. Taud-taod magaabot ako na nakatungtong sa mga dampog sa langit kag makikita san mga tawo na may gahom ako kag masilaw gayod na glorya. 31Tapos sa makusog na tunog san trumpita susuguon ko an akon mga anghel na tiripunon an akon mga pinili na katawuhan hali sa bilog na kinab-an.
An Leksyon Manungod San Kahoy Na Ginatawag Higera
(Marcos 12:28-31; Lucas 21:29-33)
32“Dapat kamo makaaram sin leksyon hali sa puno san kahoy na ginatawag higera. Pagsaringsing san mga sanga sani kag pag-uruslot san mga dahon naaaraman niyo na halapit na an kwaresma didi sa aton. 33Sugad man kun makita niyo idtoʼn tanan na mga pangyayari, maaaraman niyo na halapit na ako mag-abot, bagaʼn ada na lang gayod sa pwertahan. 34Ginasiguro ko sa iyo na mangyayari idtoʼn tanan antes na magkamaratay an mga tawo na nabuhay yana. 35An langit kag duta mawawara pero magapadayon hasta na lang an akon mga surmaton.”
Dios Lang An Maaram San Adlaw San Pagbalik Ni Jesus
(Marcos 13:32-37; Lucas 17:26-30, 34-36)
36Nagpadayon si Jesus, “Niyan manungod san oras kag adlaw san akon pagbalik waraʼn iba na maaram kundi an Ama lang. Bisan ngani an mga anghel sa langit kag ako mismo na iya anak dili maaram. 37Pero makapareho san kamutangan san kapanahunan ni Noe an kamutangan didi sa kinab-an pagbalik ko na Anak San Tawo. 38Sadto na panahon antes nagbaha an kinab-an wara pag-intyindiha san mga tawo. Adlaw-adlaw nagakaraon sinda, nagairinom kag kun minsan nagaarasawa hasta sa adlaw na nag-sulod si Noe sadtoʼn sarakyan sa tubig na ginatawag arka. 39Wara ninda namangnuhi an mangyayari hasta na bumuhos an baha kag inanod sinda tanan. Sugad man sani an kamutangan sa pag-abot ko na Anak San Tawo. 40Sana man mismo may duha na lalaki na nagatrabaho sa umahan. Kukuhaon an usad kag an iya kaupod ibibilin. 41May duha naman na babayi na nagagiling. Kukuhaon an usad kag an iya kaupod ibibilin.
42“Kaya magbantay kamo kay dili niyo aram kun san-o maabot an iyo Ginoo. 43Tandai ini: kun may tag-iya san balay na aram an oras pagkagab-i na magaabot an makawat, magabantay gayod siya kag dili niya pagatugutan na masulod an iya balay. 44Kaya kamo man dapat na pirme magbantay kay magaabot ako na Anak San Tawo sa oras na dili niyo ginalauman.”
An Matinumanon Kag Dili Matinumanon Na Mga Suruguon
(Lucas 12:41-48)
45“Niyan kun sin-o man an matinumanon kag madunong na suruguon, siya an ginpaniwalaan san iya amo sa iba pa na mga suruguon agod magpakaon sa inda sa tama na oras. 46Kaya malipay ina na suruguon kun ina an ginahimo niya pagbalik san iya amo. 47Ginasiguro ko sa iyo na igapaniwala sa iya san amo an tanan niya na kasadirihan. 48Pero kun maraot ina na suruguon, iisipon niya, ‘Madudugay pa an akon amo’. 49Kaya pagabalbagon an iya mga kapwa suruguon, tapos makikaon kag makiinuman kaupod san mga parahubog. 50Tapos sa adlaw na dili niya ginalauman magaabot an iya amo sa oras na dili niya aram. 51Didi kakastiguhon siya kag ibibiyo sa mga pakitaʼn-tawo lang. Didto maganguruyngoy an mga tawo kag magararagot an inda mga ngipon sa kasakit.”
© 1993, Wycliffe Bible Translators, Inc. All rights reserved.
