Matthew 7
7
Amiye bedakai rofu mokei no rena
(Lk 6.37–38, 41–42)
1“Amiye di no rofu mokei no ga refa, ye Sei yaku ka yi no rofu kota de rego. 2Adina ya yaku amiye di no rofu mokei no regedi kana, makai Sei ya kota rego, ma ya amiye gokai toe madedi kana, Sei yaku mina toe dairisi ya mago.#Mk 4.24 3Beika resi bubudo yi usika ourena di nemokori bi veisa, idu yabo rata yi nemokori bi de nidodi reisa? 4O gokai ida dudu yi usika ourena rofu nigiya, ‘Na ferei kumo yi nemokori bubudo amedo mina moigida,’ ma yi nemokori yabo rata amedo? 5Ya ofarosi amiye! Yi nemokori yabo rata amedo mina siko moi etagae rigiya, mamo vei mona resi yi usika ourena di nemokori bubudo amedo mina moi etagae ri.
6“Beika bi akeke bi auna rofu ga masi yi fore roka pearl bi dona di budari ga makufa. Makai regediri, bi ini yuka yaku etei ri fufuta resi kero resi ya aki rei usika regedi.
Usa nina, maina rena, raka nina
(Lk 11.9–13)
7“Usa nifa kumo ya mago; maina refa kumo baku regedi; raka nifa kumo ya rofu ida vena moi ekego. 8Adina kaere yaku usa usa nigo bi moigo, ma kaere maina rego bi baku rego, ma kaere raka nigo bi ina rofu ida vena moi ekego. 9O yi fogori kaere amiye ini mida yaku beredi usa nigori, rama dadisi fore moi mago ba? 10O oyena usa nigori, rama dadisi aruma mago ba? 11Ma ya vene no bi yi mida mida rofu gugura buni magi diba nidedi vonisi, bi yi Baba omari amedo amiye yaku gugura buni usa nigedi vene bi besa besa mago!
12“Mina dada ya ura rededi amiye yaku beika tau ya rofu rebigedi, ya ka ina rofu makai refa. Adina mina bi Moses di ago gira ma Sei di ago niyadi vene di ago di adina.#Lk 6.31
Ida vena kakaita
(Lk 13.23–30)
13“Ida vena kakaitari dui refa, adina no moina sana rofu bona ida vena bi rafo ma ini ida bi tora, ma amiye tau tora bi minari dui rededi. 14Idu ida vena bi kakaita ma ida bi keika vegu sana rofu bodedi, ma amiye tau de mina sana baku rededi.
Yabo ma ini meko
(Lk 6.43–45)
15“Sei di ago nidedi ofa vene vei mona regasa amebifa. Ya rofu bi mamoe di varuka akusi baegedi, idu ini uka ideri bi sufa gadeva auna no iniye iniye. 16Ini beika moi ogau ridediri maka vei mama regedi. Rama amiye yaku waini meko bi imiye tafari butu de regedi o fuka meko bi onana imiyeri butu de regedi. 17Ye yabo buniri bi meko buni varededi, idu yabo nori bi meko no varededi. 18Yabo buniri bi meko no de varegedi, ma yabo nori bi meko buni de varegedi. 19Yabo tauri meko buni de varededi mina yabo bi nugasi ita mokari ori kamu rededi.#Mt 3.10; Lk 3.9 20Mina dada ini beika redediri maka vei mama regedi.#Mt 12.33
Na na toga ya toto
(Lk 13.25–27)
21“Amiye tau kaere na rofu ‘Varika amiye’ vo nidedi, bi Sei di ourefeidena amena sana omari de dui regedi, idu nai Baba kaere bi omari amedo di mokedo vegu rededi vene maka dui regedi. 22Mina medari Sei yaku amiye tau kota aegori amiye tau gade yaku na rofu nigedi, ‘Varika amiye, una bi yi rokari Sei di ago nirausi resi vima no meki resi mokena vegu regamafa ba ide?’ 23Minari mamo na yaku ina vene fafau nigida, ‘Vegu no rededi vene, na bi toga ya toto; na rofu etagae ri difa!’#Ps 6.8
Yava akuna amiye remanu
(Lk 6.46–49)
24“Mina dada amiye kaere yaku nai ago neidesi regedi, bi mokena tora amiye kaere yaku ini yava abita fore fafau akuyo kana. 25Miya deyo, abata deyo, ma itu aura mina yava fafau baeyo, bi de yareyo, ini adina bi ini gado bi abita fore fafau akuyo dada.
26“Ye amiye kaere nai ago neidesi de rego, bi ada de amiye yaku ini yava vasa fafau akuyo kana. 27Miya deyo, abata deyo ma itu aura mina yava fafau baeyori, ma ini yareyo bi no iniye iniye!”
Iesu di vava
28Iesu mina ago ni vau reyori, mina amiye tau gade bi ini oteimana ago rofu tururu reyadi,#Mk 1.22; Lk 4.32 29adina ini oteimana bi kaere vava nufa amiye kana, ma ago gira oteimana vene kana de.
© 2016, Wycliffe Bible Translators, Inc. All rights reserved.
