Matthew 2
2
Diba vene be meda dadido eta rofu baesi egoru reyadi
1Ma Iesu bi Bethlehem taoni Judea gaganiri vata niyo; ma mina ituari Herod bi kini nisi amegamori, diba vene be meda dadido eta gutuna Jerusalem ri baesi 2nikaitegasa diyadi, “Mina mida ruika vata niyo kaere bi Jew vene di kini bi goini? Ini magai meda dadido eta rofu vesi ina nivakegika baeyafa.”
3Kini Herod mina sina neideyori, uka kenoka yaku no niyo, ma Jerusalem ri amiye tau vakoi ka makai reyadi. 4Dada Sei ma amiye utari naivo vene di varika vene ma Sei di ago gira oteimana vene tau vakoi nirutu resi nikaiteyo, “Keriso bi goinari vata nigo?”
5Ina vene yaku nikabai reyadi, “Bethlehem ri Judea gagani ideri, ini adina Sei di ago niyo amiye yaku bi makai bura reyo:
6‘Ye ya Bethlehem vene, Judah gaganiri,#Mic 5.2
ga mokefa ya bi Judah di ourefeidena vene keika;
ini adina ourefeidena amiye yokoi ya utari baego.
Ina bi nai Israel vene fafau ourefeidego.’ ”
7Ma Herod yaku diba vene sui dudu nikaiteyo beika meda nemoko ramari mina magai ogau niyo ma Herod diba niyo. 8Bethlehem ri neyaganedi nifeidegasa niyo, “Nesi mina mida maina rei mona regedi rofu baku regediri, na nioteima, ye na ka nesi ina nivakegida.”
9Mina niyo neideyadiri, bi dadisi neyadi. Idau neyadiri dudusa mina magai meda dadido eta rofu veyadi. Mina magai yaku ourefeidesi mina mida vareyo sana bere niyo. 10Mina magai vegasa ada yaku no iniye niyadi! 11Ye yava ideri dui resi mina mida ini nono Mary sa vegasa efuka meimisi nivakeyadi. Resi ini magedi gugura, goro, sisika buni yabo ena roka frankincense, ma sisika buni yabo ena di muramura roka myrrh ini maua gutuna moi yakusi maradi.
12Ini gagani dairigika bi ida yokoi moiyadi, ini adina bi Sei yaku yaduka dudu nioteimaro bi Herod rofu dairi ga boyaganedi.
Iesu moi ori neyadi Egypt ri
13Kamini diba vene ferei diyadiri, Varika amiye di naivo naivo vima yaduka dudu ogau nisi Joseph rofu niyo, “Herod bi mina mida umuyegika maina rego, ye dadisi mina mida ma ini nono moigiya ma Egypt urana ori negedi; ye mironari amegedi bogo ya nigida mamo Egypt ferei digedi.”
14Mina urusari maka Joseph dadisi Iesu ma ini nono afeyo ma Egypt ri neyadi. 15Resi mironari amegamadi boyo Herod muyeyo mamo. Mina vata niyo bi beika Varika amiye yaku ini ago niyo amiye rofu niyo kana moi rama aeyo, “Nai mida Egypt gutuna raka niyaka ma yakuyo.”#Hos 11.1
Rumana mida keika keika umuyeyadi
16Ye Herod mina diba vene yaku eru reyadi veitao regasa bi gubuyo yaku no niyo. Dadisi ini iya vene ago maro bi rumana mida mida ini lagani remanu ma egona rofu Bethlehem ri ma ini adinari gagani bi umuyei vau reyaganedi. Mina bi diba vene yaku niyadi ma neidesi diba ni mona reyo kana beika meda nemokori mina magai ogau niyo.
17Makai dudu beika Sei di ago niyo amiye Jeremiah yaku niyo bi rama aeyo:
18“Gagani roka Ramah ri kukuroka neideyadi,#Jer 31.15
mina kukuroka bi isaka no iniye nigamadi.
Rachel#2.18 Rachel: Mina ini adina bi rema isaka nigamadi kaere bi Rachel di tutubena. Rachel bi Jacob di rema yokoi, kaere uka tora maro. Ina bi Joseph ma Benjamin di nono, ye bi Jew vene tau noibanu di nokai kana. bi ini mida mida dada isaka niyo;
muyei vau reyadi dada
ini uka de moi amuta reyagane.”
Egypt ri gutuna dairiyadi
19Kamini Herod muyeyori, Varika amiye di naivo naivo vima Joseph rofu Egypt ri yaduka dudu ogau nisi 20makai niyo, “Dadisi mina mida ma ini nono Israel konori afesi dairi bogiya, mina mida umuyegika reyadi vene muyeyadi dada.” 21Ye dadisi Iesu ma ini nono Israel konori afesi boyo.
22Idu Joseph yaku neideyo Archelaus bi ini baba Herod gaubo resi Judea fafau ourefeidegamo, ye mironari dina ori reyo. Yaduka dudu besa beika reyainedi maro ye Galilee gagani rofu bosi 23taoni yokoi roka Nazareth ri amegamo. Ye Sei di ago nidedi vene di ago bi rama aeyo: “Ina bi Nazareth amiye vo nigedi.”#Mk 1.24; Lk 2.39; Jn 1.45
© 2016, Wycliffe Bible Translators, Inc. All rights reserved.
