Génesis 3
3
1c. Isgued-onoded
(3:1-24)
Adán Eva-ebogwa Bab-Dummadgi-nosad
1Bab-Dummad-Jehová we-napneggi bela ibmar-durgan obinnisad. Amar-abargi, naibedi ibmar-durgan-baiganba dule-binsaed-gaedgi bur buledid. Naibe omega sogded:
—¿Etto, Bab-Dummad bemarga sogsa: ‘We-nainu-nuedgi sapimar-gwichid-e-san melle bipisaale gunmaloye?’
2Ome naibe-abin sogded:
—Ar igid-sapi-e-san anmar we-nainu-nuedgi gunbimala, sunna bela anmar gunmalad. 3Unnila nainu-nued-abargi sapi-wargwen-gwichid-e-sanbi geg anmar gunned. Bab-Dummad anmarga sogsado: ‘Melle a-sapi-e-sandi be gunmaloye, degine, melle be ebumarbaloye. Ar bemar guchale, bemar burgwemaloye.’
4Ar naibedi omega sogded:
—Suli, degisuli. Bemar gwen burgosuli. 5Ar Bab-Dummad nue-wisid, bemar we-sapi-e-san guchale, ibmar-wisii gudmaloed. Geb agine, bemar Bab-Dummadyob ibmar-wisi gudmaloed, ibi ibnuedi, ibi ib-isganabali.
6Ome sapi-san-dakdegu, dakalid, sapi-san yeerdaklege, nued-gulle-daklege, degine, nue-ibmar-wisi sunna dule-imake daklege. Degisoggu, ome sapi-san-gwachagu, guchad. Geb ome e-suiga uksamogad. E-suide guchamogad. 7Geb agine, na ebobela neg-ittos nadmalad, emarde uka-swili garmakdii. Geb degine, saburega gagan-urwagiid-higueraʼye-nugad maksamalad. Agi, na saburusmalad.
8Dule, e-omebogwa, neg-sedogudanikidgi itoarmalad, Bab-Dummad-Jehová, nainu-nued-abargi garmakdii. Dule, e-omebo deyob itosmargu, Bab-Dummad-Jehováʼgi nainu-nuedgi sapimar-bukwad-imbaba dukunadmalad. Adi, mer Bab-Jehová emar-dakegar.
9Bab-Dummad-Jehováʼdi macheredse goted, ega sogded:
—¿Bia be gudii?
10Dule abin-sogded:
—An be-itosad, nainu-nued-imbaba be gudii. Ar an uka-swili-gudisoggu, an be-dobee itoged. A-ular, an be-idu dukusad.
11Geb degine, Bab-Dummad macheredse egichialid:
—¿Ar doa bega sogsa, be uka-swilii gudiiye? An bega sogsad: ‘Sapi-wargwen-e-san mer be gunnoye.’ ¿A-sapi-e-sande be guchasi?
12Dule Bab-Dummad-abin sogded:
—Ome-anbo-garmakdiguega be anga-uksadi, a, anga sapi-e-san uksad. Geb an guchasunnad.
13Geb degine, Bab-Dummad-Jehová omese egichided:
—¿Ibiga deyob be imaksa?
Ome abin-sogded:
—Ar naibe an-yardaksad. A-ular, sapi-e-san an guchad.
14Geb degine, Bab-Dummad-Jehová naibega sogded:
“Ar weyob be imaksasoggu,
ibmar-durgan-akwilemaladba, degi, ibmar-durgan-sapurbarmalad-baiganba,
bedi bur bule be ukabsalesun.
Emi-iba-onodedgi, be napagi unimakdii gusun,
degine, be-burgwedse, napa-madii be gusun.
15Ome-ebogwa na be isdar-dakdii an be-imakoed.
Ome-e-wagwa, be-wagwa-ebo na isdar-dake gumaloed.
Ome-e-wagwa be-nonogi annaoed.
Bedina e-mali-gasigi onakliksaoed.”
16Bab-Dummad omega sogded:
“Be sikwi-bakalile, nunmaked-dummad an bega ukoed,
nunmakedgi be ugakguoed.
Be-suibina be sogdii guoed.
Be-sui be-iduedga guoed.”
17Bab-Dummad macheredga sogdemogad:
“Ar be-ome-sogedba, sapi-e-san-mer-gunnoye an bega sogsadi, be guchasoggu:
Deyob be imaksad-ular, we-napa iwiles nagusun.
Be burgwedse ise-arbaar-alamakdiidgi, be masgunned-amidii gusun.
18Napa bega ikomar nikuoed,
napa bega gagan-ikobiid nikuoed.
Gagan-nainuginmalad-gunne be guoed.
19Be-wimaked-osuurmakedgi na be masgunned-amidii guoed.
Deyob be guoed, be napaga gannar guedse.
Ar ade, napagi be danikid.
Ar be napasoggu, be burgwisale,
napaga gannar be binyoed.”
20Ar omede bela dulemar-dula-gunonikoed-e-nanga guosoggu, Adán na e-ome Evaʼye onugsasad.
21Bab-Dummad-Jehová, macheredga, degi, omega ibmar-durgan-uka morga imaksad. Geb macheredga, degi, omega mor yossunnad.
22Geb degine, Bab-Dummad-Jehová sogded: “Emigindi, dule anmar-sunnaa gunonimogad. Dulemarde ibmar-nued-wisi, degine, ibmar-isgana-wisi gunonikid. Ar dule sapi-e-san-dula-dule-imaked-guchale, degisadegu dula-gudii guoed. Degisoggu, melle dulemar we-sapi-e-san gwanegala, degi, melle gunnegala, dulemar-nainu-nuedgi-gudiid, an onogoed.”
23Degisoggu, a-ular, Bab-Dummad-Jehová, nainu-nued-Edénʼgi dule-gudiid onossunnad. Degine, napagi-arbaega dule-imaksad. Ar ade, napagi dulede danikid. 24Bab-Jehová, Adán nainu-nuedgi-gudiid onosgua, nainu-nued-dad-nakwedsik baliwiturmar-querubinʼye-nugad ogwichisad. Degine, es-suid-gwabunye-gwichid bela bipirmakgwichi imaksabalid. Adi, melle dule-wargwensaar sapi-dula-dule-imakedse warmakmalagar.
© 2014, Wycliffe Bible Translators, Inc. All rights reserved.
