Dibandu 39 - 인기 성경 구절

공유

Fumu amaba na Joseph, motsu ama amavaganga mamabuejingi; amatsananga o ndagu fumu andi agumaba muisi Egypte.

Amasila mambu motsu na Joseph, asamamuekipa mambu masusu yika biguji biandi. Joseph amaba mufudu uboti: nesi diteli nesi yinsi.

Mukelisi tsugu amamuvega musuga uruma bisi tsugu botsu; jandi amakipanga biotsu abi bisi tsugu bamasalanga.

Amabonga Joseph na amamukotisa o tsugu mosi na bakoli bakaga. Ava Joseph amabila o tsugu, Fumu amaba nandi; amamugabila maboti mandi te na nesi mukelisi tsugu amamurondanga.

Mua pesu temu mugatsi fumu andi amamunyungila na amavosa rie: Fubana yitsiga nami! Joseph amabusa na amatsingula mugatsi fumu andi rie: Jaba yiri fumu ami agekipi ne diambu dimosi o ndagu andi; amakwakisa musuga uotsu. Agepiolili musuga o ndagu ejiji; asamakandisa ne yima yimosi, yika ndeʼ buandi mu mbari guvu mugatsi andi. Tsie nyuvayila nsoruru tsimunongu eni nova-ga disumu va gusu Nsambi?

Yilumbu yimosi Joseph amakota o ndagu uyesala yisalu yiandi, amarasuna yiri basalitsi bamapala, kabogu mugatsi Potifar amamugaanga yikutu yiandi na amamuwambila rie: Fubana yitsiga nami! Joseph amamusila na yikutu yiandi va dikaka, amarina o dulombili.