Text: © The Bible Society in Liberia, 1999 Audio: ℗ 2010 Hosanna

Krahn, Western - 1998 Edition (NT)

The New Testament in Western Krahn published as KU̍O̍ DELEE © The Bible Society in Liberia, 1999.

Ɛ̍ nu̍ Sɔnde̍ bla-a klàɛ̍we̍ gbàìn, wɛ̀ nynɔ̌gbaɔᵻ laa̍ u̍h mu̍ dě Jusu-a gbàlɔ̍ we̍. U̍h gba̍ nɔ̌-dɛ̍ᵻ ìh u̍h po̍-a gba̍a̍-ɛ. U̍h gbɛ̀n-a deě-ɛ, nɛ̀ sɔɔ̌ ɛ̀ nɛ-a dǒ gbàlɔ̍ biě wɔ̍i̍n-ɛ, ɛ̍ sɔ-o. U̍h pa̍-a dě ɛ̍ di̍i̍-ɛ, u̍h se̍ Joi Jusu-a kǔ jě. Sɔ ɛ̍ gbe-e dě u̍h di̍i̍ i̍. Kli-a ka-ɛ, nɛ̀ jɔ̍gbauᵻ sɔɔ̌n nɛ dě jlii̍ plǔᵻ di̍i̍ i̍h-a fa̍n, wɛ̀ u̍h nyna u̍h pùn. Ɛ̍ po̍ nynɔ̌gbaɔᵻ laa̍ faɔn kaa̍, sɔ u̍h bla̍ jii̍ wlù wɛ̀ sǔh. Wɛ̀ jɔ̍gbauᵻ laa̍, u̍h la̍a̍ dě u̍h we̍, “Dɛ̍nu̍ mɔ̀-a pɔ̀n kmɔ̌ nɛ nyɔ̍ i̍ nɔ̌ mɛ̌-nyɔ̍ nynɛ̌ ɛ? Ɔ̍ se̍ da̍a nɛ dɛ, ɔ̍ wlǔh-ee wɛ̀. Ti̍ ɔ̍ nɛ-a Kaladii ke̍-ɛ, dɛ̍ ɔ̍ sà-a dě mɔ̀ we̍-ɛ, ɛ̍ mɔ̀ iě wlùh we̍ nu̍. Ɔ̍ la̍a̍, ‘Nyi̍ɔ̍-a Jǔ kɔn ɔ̍ iě kwlǎ sà-ɛ dě gblɛ̍n sɔ̀ɛ̀n nyɔ̍ kwa̍a̍, wɛ̀ u̍h iě ɔ̍ kɔ̍ dǒ gbàɛ̍ kɛ̍n i̍ tu̍ wlì. Jɛ pò wǐh ta̍a̍n sì-ɛ, nɛ̀ ɔ̍ mu̍-e wlǔh.’ ”
Wɛ̀ ɔ̍ wlu̍ dǔ dǒ u̍h wlì i̍ sǐ-ɛ. U̍h mu̍-a de̍ wlɔ̀-ɛ, wɛ̀ u̍h sèàɛ̍ i̍h we̍ i̍ dě gba̍tòà-a pùè jɔɛ̍ due ke u̍h ba̍ᵻ duuh we̍. Mɛle Makalin ke, Joana ke, Chiin de̍ Mɛle ke, u̍h-u bo ùh ke nynɔ̌gbaɔᵻ duuh na, wɛ̀ u̍h sèàɛ̍ gba̍tòà ìh la wlùh. Jɛ u̍h-a wlu̍ la, ɛ̍ wɔ̀ pàɔ̀n tmɔ̌-ɛ dě gba̍tòà dounᵻ. Ɛ̍ kɔn u̍h se̍ i̍h tìh dǎɛ. Wɛ̀ Pitɛ sɔ bloɔ̍, iě ɔ̍ gba̍ ple̍-ɛ dě gbàlɔ̍ biě we̍. Wɛ̀ ɔ̍ bla̍ jii̍ wlù ɔ̍ gbɛ̀n dě ɛ̍ di̍i̍, iě ɔ̍ jě flɛmɛ̍ jlii̍-a sǔh. Wɛ̀ ɔ̍ blě wlùh i̍ pu̍e̍e-ɛ ɔ̍ mu̍ wlɔ̀ dǒ dɛ̍ ɛ̀ nɛ-aɛ we̍.


Dǒ weɛ̍-a taǐn laa̍ di̍i̍ bo Jusu-a kòà sɔɔ̌n mui dǒ wlɔ̀ due di̍i̍, ɛ̍ nynɛ̌ bo Ɛmeɛ. Sɔ dǒ Juluslɛn ìè mu̍, ɛ̍ wɛ̀ tlu̍hᵻ gbɔ̍ɔ̍ᵻ mɛ̀sɔɔ̌n nu̍-ɛ. Dɛ̍ᵻ kli̍hgbɛ̍ ìh nɛ-aɛ, wɛ̀ u̍h-a sǔh blě i̍h i̍ sà-a u̍h-a mu̍. U̍h-a wlu-aɛ nɛ̀ kǎ u̍h-a pu̍e̍e tìh, iě Jusu-a chɛ̀ jɛɛ u̍h kɛ̍n, wɛ̀ ɔ̍ ke u̍h-a mui wìè-i. Jɛ u̍h se̍ ɔ̍ i̍ juo. Iě Jusu la̍a̍ dě u̍h we̍, “Dɛ̍-ɛ tìh mɔ̀ blě-e sà-a sǔh mɔ̀-a na ɛ?”
Wɛ̀ u̍h nyna-ɛ i̍, jɛ nɛ̀ u̍h gbǎ seɔn. Wɛ̀ u̍h-a due ɔ̀ kɔn nynɛ̌ nu̍-a Kliopa-ɛ tèle ɔ̍ i̍. Ɔ̍ la̍a̍, “Ìn nɛ due bo ɔ̀ nu̍ dihwi̍h dǒ Juluslɛn ɔ̀ se̍ dɛ̍ᵻ ìh gbǎ-a ka-o wǐh sɔɔ̌n la-ɛ juo ae?”
Iě ɔ̍ la̍a̍, “I̍h-a nynɛ̌ ɛ?”
Wɛ̀ u̍h la̍a̍ dě ɔ̍ we̍, “Dɛ̍ᵻ ìh nɛ-a Jusu ɔ̀ sɔ-a dǒ Naaslɔɛ wlɔ̀ di̍i̍-ɛ pùn-ɛ, i̍h-i bo à dǎ. Ɔ̍ nu̍ Nyɔsoa-a tu̍owli po̍ nyɔ̍, iě ɔ̍ blě gbǐh dǒ wɔ̍i̍n wlu̍ ke ɔ̍ nu̍-dɛ̍ᵻ we̍ dě Nyɔsoa ke nyɔ̍ kli̍hgbɛ̍ jlǐh. À slaǎ sà nyɔ̍ klaaᵻ ke nyɔ̍ klaaᵻ sà ɔ̍ kwlǎ, ɔ̍ iě dbǎ-ɛ. Iě u̍h kɔ̍ ɔ̍ dǒ gbàɛ̍ kɛ̍n i̍ tu̍ wlì. Jɛ à tè ɛ̍ wlì de-ɛ, ɔ̍-ɔ bo ɔ̀ mu̍ Eslɔɛ nyɔ̍ sèìe. Ɛ̍ se̍-o siee, dɛ̍ la ɛ̍ gbǎ-aɛ, ɛ̍ wǐh ta̍a̍n sèàn. Dode̍-ɛ, nynɔ̌gbaɔᵻ duuh nɛ-a nɔ̌ à gbɔ̀ù di̍i̍-ɛ, dɛ̍ u̍h bla̍-aɛ ɛ̍ wlǔh i̍ à de̍e̍. U̍h tlùìn dě ɔ̍ gbàlɔ̍ biě we̍ klàɔ̍, iě u̍h se̍ ɔ̍ kǔ jě. U̍h ji̍-a de̍-ɛ, iě u̍h sà i̍h-i ka u̍h ja-a se̍ mɔ̌ ja̍, wɛ̀ u̍h jě-a Nyɔsoa-a ǐnchɔ̀-ɛ. Iě ǐnchɔ̀ sèàɛ̍ u̍h wlùh ka Jusu nɛ-a kmɔ̌-ɛ. Wɛ̀ à nyɔ̍ duuh mu̍ dě gbàlɔ̍ biě-a chɛ̀ we̍. Wɛ̀ u̍h jě ɛ̀ kɔn taǐn nynɔ̌gbaɔᵻ laa̍ u̍h dǎ-aɛ. Jɛ u̍h se̍ ɔ̍ chɛ̀ jě.”
Wɛ̀ Jusu la̍a̍ dě u̍h we̍, “Mɔ̀ boe iě mɔ̀-a pɔluh kma dɛ̍-ɛ i̍ wɔ̌n-ɛɛ. Ɛ̍ kɔn ìh kli̍hgbɛ̍ Nyɔsoa-a tu̍owli po̍ nyɔ̍ bla̍-aɛ, mɔ̀ se̍ i̍h tìh chɛ̀ po̍. Nyɔsoa-a Chèɛ̀ Tba̍ju se̍ kɔn ɔ̍ iě ka jua̍i̍ sàɛ̀ nu̍, wɛ̀ ɔ̍ iě dě ɔ̍ tìh-a i̍ bɛ̌-ɛ di̍i̍ mu̍ dɛbo ae?” Wɛ̀ ìh tba̍-a dǒ ɔ̍ chɛ̀ pùn i̍ dě Nyɔsoa-a wlu̍ kli̍hgbɛ̍ di̍i̍, sɔ dě Mose we̍ wɛ̀ ɛ̍ iě-a Nyɔsoa-a tu̍owli po̍ nyɔ̍ kli̍hgbɛ̍ jɛɛ-ɛ, iě ɔ̍ sèàɛ̍ i̍h we̍ i̍.
U̍h-a nyni̍-a la̍ wlɔ̀ kɔn di̍i̍ u̍h-a mu̍-aɛ, sɔ ka nyɔ̍ mu̍ wlɔ̀ tìè-e chɛ̍n-ɛ nɛ̀ kǎ Jusu-a nu̍ la̍ na-a. Jɛ u̍h sà ɔ̍ wìè-i. U̍h la̍a̍, “Pɛ̌n da̍a àɔ̀ we̍, dɛ̍nu̍ɛ, flì wlǎ i̍ wɛ̀. Wlù-a chɛ̀ wɔ̀ wɛ̀ muɔ.” Wɛ̀ ɔ̍ mu̍ ɔ̍ ke u̍h iě i̍ pɛ̌n. Ɔ̍ ke u̍h tè-a i̍ u̍h iě-a dɛ̍ di̍-ɛ, iě ɔ̍ dǔ blèe̍-e, wɛ̀ ɔ̍ po̍ Nyɔsoa tlɔ̌. Iě ɔ̍ chɛɛn ɛ̍ i̍, wɛ̀ ɔ̍ nyǐ ɛ̍ u̍h. Sɔ dě u̍h jlǐh flɔn-ɛ, iě u̍h juo ɔ̍ i̍. Wɛ̀ ɔ̍ mǎ-ɛ u̍h jlǐh. Wɛ̀ u̍h-a sǔh-a wlu, u̍h la̍a̍, “Na̍ ti̍ ɔ̍ iě-a sɔ̀ìn chɛ̍n dě àɔ̀ we̍ dǒ wìè-i wɛ̀ ɔ̍ iě-a Nyɔsoa-a wlu̍ we̍ i̍ sèàɛ̍-ɛ, nɛ̀ dě àɔ̀ di̍i̍-a si̍n-i lě.”
Wɛ̀ u̍h wa̍n bloɔ̍, iě u̍h mu̍ dǒ de̍ Juluslɛn. Dě u̍h jɛɛ kòà-a pùè jɔɛ̍ due laa̍, ɛ̍ ke nyɔ̍ duuh ùh ke u̍h gbǎ-a tàdùè-ɛ ke. Wɛ̀ u̍h la̍a̍, “Joi wlǔh-e chɛ̀. Ɔ̍ wlǔh-i Samo i̍.”
Iě nynuu̍ sɔɔ̌n laa̍ u̍h sèàɛ̍ ka ɛ̍ nu̍-a nɛ-ɛ dǒ wìè-iɛ we̍ i̍, ɛ̍ ke ka u̍h nu̍-a ɔ̍ i̍ juo-ɛ dǒ ɔ̍ blèe̍ i̍ chɛɛn la̍-ɛ ke.


U̍h nɛ dǒ ɛ̀ la bla̍ la̍ sǔh iě Jusu-a chɛ̀ nyna i̍ dě u̍h nynɛ̌. Iě ɔ̍ la̍a̍, “Wlùh-a i̍ tè-ɛ dǒ mɔ̀ we̍.”
Sɔ dɛ̍ wa̍ u̍h we̍, iě faɔn gbɛ̍n u̍h. U̍h jajeɛ̍ kǔpàùn bo u̍h jě de. Iě ɔ̍ la̍a̍ dě u̍h we̍, “Dɛ̍ ɛ̀ nui mɔ̀ sèò ɛ? Dɛ̍nu̍ nyɔ̍ di̍i̍ i̍ gbe-e dɛ̍ᵻ gbǎ dǒ mɔ̀ wlùh kɛ̍n ɛ? Mɔ̀ gbɛ̀n ǎn sɔ̍nᵻ ke ǎn bu̍hᵻ ja̍ mɔ̀ iě jě ka ɛ̍ nu̍-a mɔ̍-ɛ. Mɔ̀ tǔh ǐn i̍ mɔ̀ iě jě. Dɛ̍nu̍ɛ, kǔpàùn se̍ plǎᵻ dlǔ i̍ nɛ, iě ɛ̍ se̍ gbǎᵻ blě ke, i̍h bo mɔ̀-a jě-a m ǐn blě-a.”
Ɔ̍ wɔ̀-a ɛ̀ la bla̍-aɛ, iě ɔ̍ to u̍h ɔ̍ kɔbaᵻ ke ɔ̍ bu̍hᵻ i̍. Jɛ ɛ̍ flɔn-ɛ u̍h wɔ̍n, iě mɔna̍ jǐi u̍h i̍. Sɔ ka dɛ̍ nɛ si̍h i̍-ɛ, kǎ u̍h-a nu̍ ɛ̍ jě-ɛ. Wɛ̀ Jusu la̍a̍ dě u̍h we̍, “Mɔ̀ blě di̍-dɛ̍ da̍a ae?” Wɛ̀ u̍h nyǐ ɔ̍ jli̍-i smìɛ̍ tile. Iě ɔ̍ dǔ ɛ̍-ɛ, wɛ̀ ɔ̍ di̍ ɛ̍ dǒ u̍h jlǐhwai.
Wɛ̀ ɔ̍ la̍a̍ dě u̍h we̍, “Ti̍ mɔ̀ ke ǐn ke à na-aɛ, ìh kɔn taǐn ǐn bla̍-a dě mɔ̀ we̍-ɛ, i̍h bo ìh-a nɛ-a. Na̍ dɛ̍ᵻ kli̍hgbɛ̍ ìh chlǐh-a dě Mose-a telě chlǐh-dɛ̍ᵻ ke, Nyɔsoa-a tu̍owli po̍ nyɔ̍ naɛ ke Duǐh Chlǐh-dɛ̍ di̍i̍-ɛ, i̍h kɔn i̍h iě chɛ̀-ɛ gbǎ.”
Wɛ̀ ɔ̍ flɔn-ɛ u̍h-a wlùh wɔ̍n u̍h iě Nyɔsoa-a wlu̍ i̍ wɔ̌n. Iě ɔ̍ la̍a̍ dě u̍h we̍, “Kǎ Nyɔsoa-a wlu̍ nu̍ ka chlǐh-ɛ, ɛ̍ la̍ ɔ̍ Chèɛ̀ Tba̍ju-a mu̍ dbǎ-ɛ, wɛ̀ pò wǐh ta̍a̍n sì-ɛ, ɔ̍ iě-e wlǔh. Wɛ̀ gblɛ̍n sɔ̀ɛ̀n-a tìh i̍ tǎli-ɛ ke i̍ bǐi-ɛa tìh iě bla̍-ɛ bloa̍ kli̍hgbɛ̍ kɛ̍n i̍ dǒ ɔ̍ nynɛ̌ kɛ̍n. Dǒ Juluslɛn bo ɛ̍ mu̍ gbɔ̀ tè-ɛ. Mɔ̀ nu̍ sàànsi̍i̍h dǒ i̍h we̍. Nɛ̀ɛ̍, ǎn mu̍ ɛ̀ kɔn wlu̍ ǐn Baa po̍-a tɔ̀ma̍a̍-ɛ mɔ̀ we̍ dbo̍. Jɛ mɔ̀ nɛ da̍a wlɔ̀ te̍e̍ wɛ̀ gbǐh sɔ-a dě ja̍i̍wlɔ̀-ɛ, ɛ̍ iě mɔ̀-ɔ gbǎ.”


Wɛ̀ Jusu sà u̍h dǒ wlɔ̀ ɔ̍ gba̍ u̍h Bɛtani fɔɔ. Iě ɔ̍ te sɔ̍nᵻ ja̍i̍, wɛ̀ ɔ̍ sà-ɛ u̍h nǐ wɔ̍n. Ɔ̍ nɛ dǒ u̍h nǐ wɔ̍n sà-ɛ la̍ wɛ̀ ɔ̍ sɔ dǒ u̍h we̍. Iě ɔ̍ gba̍-ɛ dě ja̍i̍wlɔ̀. Wɛ̀ u̍h sà ɔ̍ wɛɛ, iě u̍h blě mɔna̍ dɔu nu̍-ɛ u̍h mu̍ dode̍ Juluslɛn. Sɔ Nyɔsoa-a tlɔ̌ po̍ la̍ mu̍-ɛ dě slaǎ sà gbò sɔ̀n bo u̍h-a nu̍ la̍ ma̍u̍ kleǐn.

듣기 Luu 24