Jenɨzɨzɨ 47
47
Jaikopɨnɨdaka Peroyarɨ angyɨrɨ'maata yaa'.
(47:1-12)
1-6Jozepɨyai gya'mweraavɨ mi'na wɨdaka Peroyaryawɨnna kaanna wɨna yaka wɨda' “Nɨmaamaangelyɨ nya'mwerajɨ sara Kwaaka Gozanɨ mwaaiha'.” Jozepɨyai Peroyarɨ wɨdakegaa' gya'mwera a'mwe daraai daraai dalyara Peroyare angevɨ mwaale'. Kamwaale' Peroyai wɨdɨna “Bewawɨnya yadɨvɨtaihɨlaka?” Sara kuda' kumɨ wɨde' “Nenɨmaangei jɨlɨkyaawarya kyɨ'dɨvala' nabaai nemɨ sara yɨ'dɨvaidaanyainera. Kwaaka Kainanɨ nemɨre jɨlɨkyaawaryaraavɨne wapaaya mwarika. ‘Kwaaka Gozanɨ saba dɨmwaalyɨla!’ kaneda'gɨzɨ saba mwalaadennera.” Mi'na kude' Peroyai Jozepɨyarɨ wɨda' “Gɨmaamaangelyɨ ja'mwerajɨ saraavɨ dutha! ‘Kwaaka Gozanɨ tewaanyaba dɨmwaalyɨla!’ ‘Wawɨnaangera pwara damwaaihava!’ da'gɨzɨ ‘Peroyare jɨlɨkyaawarya jɨ'dɨvalyɨla!’ duthana!”
7-12Mi'na dɨnagɨlyagaa' Jozepɨyai ganɨmaangerɨ wɨjɨmaa'nyɨna yaka kaanna bɨna. Kaanna bɨna kyagi Peroyai Jaikopɨmɨ wanganaka wɨda' “Kwarame gara gara gwavɨlavaka?” Sara kuda' Jaikopɨ wɨda' “A'mwe neinyɨ kwarame naanga naanga (130) nyavɨlava'.” Wi'na wɨdaka “Kwarame kwalaalya gɨmɨ tewaanna mwaaihɨna gyathe Gotɨyai.” Sara wɨdaka sabadaasɨ kaanna wɨna ya'. Nabaai Jozepɨyai kaanna wɨna yaka kwaaka tewaanyaba ganɨmaangelyɨ gya'mwerajɨ saraavɨne wɨjaavɨna yaka wapaaya kumɨnyɨne wɨjaavɨna ya'.
A'mwe yuyarajɨ samɨlɨka Jozepɨyarɨ wapaaya mubyaa'.
(47:13-26)
13-26Sagaa' Kwaaka Kainanɨ Kwaaka Yɨzɨpɨ sabanyaai wapaaya kunegaakɨra. A'mwemɨlɨka Jozepɨyarɨ wapaaya kamube' Jozepɨyai nɨgwia maaraka Peroyarɨna wɨjaava'. Sana sana yɨna yɨna yakegaa' a'mwemɨlɨka Jozepɨyarɨ wɨde' “Nemɨ dahaa' nɨgwia mwarika. Kunemɨlɨkanera. Mɨjɨka naanga bala'daanyamɨlɨkanera. Wapaaya nejaama!” Tɨvi'na kude' Jozepɨyai wɨda' “Sarɨmɨre jɨlɨkyaawarya kanyɨjaavapɨjɨ wapaaya yɨhɨzaavɨdeihɨlyɨra.” Sara kuda' a'mwemɨlɨka jɨlɨkyaawarya maareva wɨjaavɨna kye' Jozepɨyai wapaaya wɨjaavɨna ya'. Wapaaya wɨjaavɨna kya' kwarame pɨrɨ' kwavɨlava' a'mwemɨlɨka Jozepɨyaryabanna kaanna bɨna yeva wɨde' “Nɨgwiajɨ jɨlɨkyaawaryajɨ yuya mwari'. Dahaa' kunegaa' mɨjɨka naangegaa' nemɨre kwaakejɨ nemɨjɨ warɨ'. Wapaaya nya'ne witɨzɨla wia'ne kanejaava'gɨzɨ yuya gɨzavaadera.” A'mwemɨlɨka sara kude' Jozepɨyai Yɨzɨpɨ mwaalyaraavɨ wɨdɨna “Sarɨmɨre kwaakejɨ sarɨmɨjɨ sangihɨrɨ Peroyarɨne yɨhɨmubɨvanɨge nayaa jawɨrila! Wia'ne yɨhɨzaavanɨge dɨvurɨjɨla! Yawaka kyojɨ sarɨmɨ mɨlɨna yapɨjɨ gɨlya atina mihapɨjɨ gɨlya gave pɨrɨ' Peroyarɨne wɨmaarina jidesɨra. Sana sana witɨzɨla yuya jidengɨra. Gɨlya dawaai dawaalyangɨdaasɨ witɨzɨla nya'ne witɨzɨla wia'ne dɨmaaryidengyɨhɨlyɨra. Sarɨmɨresɨra.” Sara wɨdɨna kya' a'mwemɨlɨka yɨlaaya yɨna yeva wɨda' “Dahaa' nemɨ mwalaadeinera. Peroyare wɨdayadaanyaina yɨlaaya mwalaadera.”
Jaikopɨ gannya gɨlaaya wakadevanna wɨjaa'.
(47:27-31)
27-31Jaikopɨnɨdaka kwala naanga yɨma'nyɨna kye' Gozanɨ mwaalakei Jaikopɨ gɨlyɨvɨta naangejɨyai mwaala'. Jaikopɨ kwarame 147 kwavɨlava' dara wanganake' “Ai, nɨmɨ a'mwe neinyɨ yarai balɨdeinyɨ daaka!” Daka Jozepɨyarɨ “Yarai dɨvama!” jaka wɨdɨna yaka wɨda' “Nɨmɨ kabala'mujɨ Yɨzɨpɨ dava nanyakɨpɨka! Nɨmaamaangei warɨkeba dɨnyakideinyɨra.” Sara kuda' Jozepɨyai “Naange' gɨthɨwana ‘Gɨnnya dadɨnyaba gwakɨde'nanyɨra,’ ” wɨda'.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Jenɨzɨzɨ 47: byr
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.