Jenɨzɨzɨ 29
29
Jaikopɨ “A'mwe maarɨma!” daka Rasalavɨna Lɨyaavɨna Laivanɨmɨne wawɨnya yaa'.
(29:1-30)
1-14Jaikopɨ nyɨla bilyɨrɨ'devannei Kwaaka Aaranɨna yɨ'mavaawɨna ya'. Aalɨbunyavɨ jɨlɨkyaawarya kwala naanga mwaaidapɨjɨ wanganaka kaanna bɨna yaka jɨlɨkyaawarya maremwaaidɨvɨsaraavɨ wɨda' “A'mwe Laivanɨ jawɨ'mwaava?” “Yo, yawɨ'mwo. Nabaai garaavaanga' Rasala' ganɨmaangere sipɨzipɨyajɨ makabɨvanɨke',” wɨde'. Aalɨbunyavɨ sɨlya' maratangɨrakɨna wa'dɨ'nyɨ Jaikopɨ sɨlya' maarɨna yaka pɨba marakɨna yɨna yaka aalya yɨrɨna, gamɨre sipɨzipɨyangɨna wɨjaavɨna ya'. Mi'na wɨjaavaka Rasalavɨ ata wɨbwa'naka wɨda' “Laivanɨ nyaakaangelyɨ.” Sara kuda' Rasala' gannya angevɨna yarai wɨna yaka ganɨmaangerɨ kuda' kaanyɨve'na wɨjɨmaa'nyɨna yaka ata wɨbwa'nyɨna yaka gannya angevɨna makaba'. Jaikopɨ angevɨ bwina kya' Laivanɨ wɨda' “ ‘Nɨmɨreigɨnyɨ,’ nebwi gɨthɨwa.” Tɨvi'na kuda' Jaikopɨ saba mwaala'.
15-20Lawe pu' wavɨla'daa'nyɨ Jaikopɨ gyaakaangere wawɨnya yɨna kya' Laivanɨ wɨda' “Dahaa' nɨgwɨwawɨnya mivanɨgɨnyajɨ gɨthɨwana. Berɨ' gɨzaavɨjɨwano?” Mi'na kuda' Jaikopɨ wɨda' “Kwarame dawaai dawaai dawaai da' sagaa' gɨthaayɨdeinyɨra. Nɨmɨ mena kya'mujɨ jɨraavaanga dɨviya' Rasalavɨ nyɨjaadeigɨnyɨ.” Sara wɨdɨna kya' “Dɨwaanya' tewaanyasɨra. Gɨzaavɨdesɨra,” wɨda'. Savɨdaasɨ Jaikopɨ yɨlaaya yada wawɨnya ya'.
21-30Kwarame dawaai dawaai dawaai da' kwavɨlava' Jaikopɨ Laivanɨmɨ wɨda' “Rasala' nyɨjaama!” Sara kuda' Laivanɨ tɨka munne yɨlɨna yaka sa' sawɨsavɨ garaavaanga Lɨyaa' Jaikopɨmɨna wɨjaava'. Mwanyavɨ Jaikopɨ dara wanganake' “A'mwe Lɨyaa' damwaalɨ'!” Daka Laivanɨmɨna sɨnna tɨka wɨdava'. Sɨnna tɨka kudava' Laivanɨ wɨda' “ ‘Sɨnnawɨ a'mwe sɨraange' wɨjavaana!’ do' sɨmunya nemɨresɨra. Gɨmɨ Lɨyaasɨ sawɨta ata yuyi ata purɨdaasɨ pɨrɨwaai dɨmwaaidera. Mwaala'gɨzɨ sagaa' Rasala' gɨzaavɨde'na kwarame ata yuyi ata purɨdaasɨ pɨrɨwaala pɨnɨ nɨmɨre wawɨnya nyɨdaayadeigɨnyɨ.” Sara kuda' Jaikopɨ sara ya'. Nabaai Laivanɨ a'mwe Sɨlɨpaavɨ wawɨnya wɨdaayadevɨne' garaavaangevɨne' Lɨyaavɨne' wɨjaavɨna, a'mwe Bilaavɨ wɨdaayadevɨne' garaavaanga pɨrɨvɨna wɨjaava'.
31-35(-)
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Jenɨzɨzɨ 29: byr
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.