Luke 15

Na Sipi ka a Yali

(Maciu 18.12-14)

1Ena dua na siga era a lako vata yani vei Jisu o ira na daukumuni i vakacavacava, kei ira na tamata i valavala ca, me ra vakarorogo ki na nona vosa.#Luke 5.29,30 2Era a qai vosa kudrukudru kina na Farisi kei ira na daunilawa ka kaya, “Na tamata oqo e dau veilasamaki kei ira na tamata i valavala ca ka kana vata kei ira.” 3Sa qai tukuna vei ira na vosa vakatautauvata oqo o Jisu:

4“Kevaka e dua vei kemuni sa tiko vua e 100 na nona sipi, ka qai yali e dua vei ira; ena sega li ni laivi ira tu yani na lewe 99 ena vanua veico, ka la'ki vakasaqara na le dua ka yali me yacova sara ni sa kunea? 5Ia ni sa kunea, sa biuta ki na usouso ni domona ka colata lesu ena mamarau. 6Ni sa yaco ki na nona vale, sa qai kacivi ira vata yani na nona i tokani kei ira ka tiko voleka ka kaya vei ira, ‘Me da mai reki vata mada, ni'u sa kunea tale na noqu sipi ka a yali.’ 7Au sa kaya vei kemuni, ena vakakina na levu ni reki mai lomalagi ena vukuna e dua bau ga na tamata i valavala ca sa veivutuni, ka sega soti ena vukudra na lewe ciwasagavulukaciwa na tamata yalo dodonu ka sega ni yaga me ra veivutuni.

Na Tiki ni Siliva ka a Yali

8“Se kevaka e dua na yalewa e tini na nona tiki ni siliva ka qai vakayalia e dua, ena sega li ni tutuvaka na cina ka taviraka na vale, ka vakasaqara matua sara me yacova sara ni sa kunea? 9Ia ni sa kunea sa kacivi ira vata mai na nona i tokani kei ira ka tiko voleka, ka kaya, ‘Me da mai reki vata mada, ni'u sa kunea tale na tiki ni siliva ka'u a vakayalia.’ 10Au sa kaya vei kemuni ni sa tubu vakakina na reki ena matadra na agilosi ni Kalou ena vuku ni dua bau ga na tamata i valavala ca sa veivutuni.”

Na Cauravou ka a Yali

11Sa qai kaya tale o Jisu, “E a tiko kina e dua na tamata ka lewe rua na luvena tagane. 12Sa qai kaya vei tamadrau o koya e gone vei rau, ‘Tamaqu, solia mada mai vei au na i votavota ni yau sa baleti au.’ Sa qai vota vei rau o koya na i yau. 13Ni sa oti e vica na siga sa qai kumuna vata na nona ka kecega na gone ka lako ki na dua na vanua yawa; ka vakasabusabutaka kina na nona i yau ena veimataqali marau ca. 14Ia ni sa vakayalia taucoko na nona i yau, sa qai tubu e dua na dausiga levu ena vanua o ya, ka sa tekivu me leqa sara mai o koya. 15Sa qai la'ki tiko kei na dua na lewe ni vanua o ya; ka sa talai koya sara na tamata o ya ki na nona i teitei me vakana vuaka kina. 16Sa dau garova o koya me kania na kedra kakana na vuaka, me mamau kina; ka a sega ni bau dua na tamata me solia vua e dua na ka me kania. 17Ia ni sa qai vakilai yalona tale, sa kaya, ‘Sobo! Era sa lewe levu na tamata cakacaka nei tamaqu era sa kana ka mamau ka mai vo tu yani na kedra, ia ka'u sa mai mate ena viakana tu eke oi au! 18Au na tu ka lako vei tamaqu, ka'u na kaya vua, ‘Tamaqu, au sai valavala ca ki vua na Kalou ka vakakina vei kemuni. 19Sa sega ni ganita me'u vakatokai tale me'u luvemuni; ni okati au ga me'u dua na nomuni tamata cakacaka.’ 20A sa qai tu ka lako vei tamana.

“Ia ni se tu vakayawa tu ga yani, a sa raici koya mai o tamana; a sa tuburi koya na loloma levu, ka sa cici yani vua, ka mokota, ka reguca. 21Sa qai kaya na luvena ki vua, ‘Tamaqu, au sai valavala ca vua na Kalou ka vakakina vei kemuni, ka sa sega kina ni ganita me'u vakatokai tale me'u luvemuni.’ 22Ia sa kacivi ira ga na nona tamata dauveiqaravi o tamana ka kaya vei ira, ‘Dou kauta vakatotolo mai na i sulu vinaka sara ka vakasulumi koya kina, ka daramaka na mama ki ligana, kei na i vava ki yavana. 23Dou mokuta talega mai na luve ni bulumakau uro, ka me da kana ka marau! 24Ni a sa mate na luvequ oqo, ia sa qai bula tale; a sa yali, ia sa qai kune tale.’ Era sa qai vakatekivu me ra marau.

25“Ia sa tiko mai na vanua ni teitei na luvena ka qase. Ni sa lesu tiko mai, ka sa lako voleka yani ki vale, a sa rogoca sara na domo ni vakatagi kei na meke. 26Sa qai kaciva e dua vei ira na tamata dauveiqaravi ka taroga se na marau ni cava sa caka tiko o ya. 27A sauma na tamata dauveiqaravi vua ka kaya, ‘Sa lesu tale mai ki vale na tacimuni, ka sa mokuta kina na tamamuni na luve ni bulumakau uro, baleta ni rau sa veikune tale e vale ena bula vinaka.’

28“A sa cudru vakalevu sara o tuakana ka bese ni curu ki vale. Sa qai curu mai ki tautuba o tamana ka vakamasuti koya me curu yani ki loma. 29Ia sa kaya ga vei tamana o koya, ‘Raica, ena veiyabaki kece oqo au cakacaka tu kina vei iko me vaka e dua na bobula, ka'u sega sara ni bau talaidredre ki na nomu lewa; ia o sega ni bau solia vei au e dua wale mada ga na luve ni me, me'u marau vata kina kei ira na noqu i tokani! 30Ia na luvemu oqo sa vakayalia kece na nomu i yau vei ira na yalewa dautagane, ia ni sa lesu mai ki vale, o sa qai vakamatea na luve ni bulumakau uro ena vukuna!’ 31Sa qai kaya vua o tamana, ‘Na luvequ, o iko o sa tiko vata voli ga kei au, ka veika kece sara ka'u taukena era sa nomu. 32Ia e dodonu me da marau ka reki, baleta ni a sa mate na tacimu oqo, ia sa bula tale edaidai; a sa yali tu, ia sa qai kune tale.’ ”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luke 15: FNVDC12

Highlight

ಶೇರ್

ಕಾಪಿ