Joni 6

E Vakani Ira na Lima na Udolu o Jisu

(Maciu 14.13-21; Mari 6.30-44; Luke 9.10-17)

1Ni sa oti na veika o ya, sa qai lako o Jisu ki tai kadua ni wasawasa o Kalili, o ya na wasawasa o Taiperia. 2Era a mani muri koya e lewe vuqa sara na tamata ni ra a sa raica oti na veicakacaka mana sa cakava vei ira na tauvimate. 3Sa qai cabe ki na ulunivanua o Jisu ka dabe sobu kei iratou na nona tisaipeli. 4A sa voleka tiko mai na gauna ni Solevu ni Lakosivia. 5Ni sa vakararai wavoki o Jisu ka raici ira na lewe vuqa ni ra sa lako tiko yani vua, sa qai tarogi Filipe, “E vei beka na vanua e rawa ni tou na voli madrai kina me ra bau kana kina o ira oqo?” 6(A sa tukuna oqo me vakatovolei Filipe ga; ni sa kila tiko o koya na ka me na cakava.)

7Sa qai sauma vua o Filipe, ka kaya, “Kevaka me ra kana vakalalai na tamata kece, ena gadrevi kina e sivia e 200 na i lavo siliva me voli kina na madrai.”

8Sa qai kaya vua o Adriu, na taci Saimoni Pita, e dua vei iratou na nona tisaipeli, 9“E tiko oqo e dua na cauravou lailai ka tiko vua e lima na madrai barile kei na rua na ika. Ia ena sega ga ni rauti ira kece na lewe vuqa oqo?”

10Sa qai kaya o Jisu, “Dou tukuna vei ira na tamata me ra dabe sobu.” (A sa bau veico vinaka toka na vanua o ya.) Era sa mani dabe sobu na tamata, ka rauta ni ra lewe 5,000 na tagane. 11Sa qai taura na madrai o Jisu, ka vakavinavinakataka vua na Kalou, ka vota vei ira na tamata era sa dabe e kea; ka vakakina na ika, me vaka na kena levu era sa vinakata. 12Ia ni ra sa mamau kece, sa qai tukuna vei iratou na nona tisaipeli, “Dou kumuna vata na veitikina lalai sa vo; ka me da kakua ni vakamaumautaka e dua na tikina.” 13E ratou a mani kumuna na i vovo ni buli madrai barile e lima ka vo mai vei ira era sa kana, ka vakasinaita e tinikarua na basikete.

14Ia ni ra sa raica na tamata na cakacaka mana sa cakava o Jisu, era sa qai kaya, “Sa i koya dina oqo na Parofita ka a dodonu me na lako mai ki vuravura!” 15Ia ni sa kila rawa o Jisu ni ra sa vakarau la'ki tauri koya vakaukauwa na tamata me ra buli koya me tui, sa qai biuta duadua na vanua o ya ka lako tale ki na ulunivanua.

Sa Lako e Dela ni Wai o Jisu

(Maciu 14.22-33; Mari 6.45-52)

16Ni sa yakavi mai na vanua, e ratou sa lako sobu na nona tisaipeli ki matasawa; 17ka ratou vodo ki na dua na waqa, ka kosova tale na drano me ratou lako ki Kapenaumi. Sa qai bogi sara mai na vanua, ia e se sega tikoga ni yaco yani vei iratou o Jisu. 18Sa liwa mai e dua na cagi kaukauwa ka sa yavavala vakalevu na wai. 19Ia ni sa rauta beka e lima se ono na kilomita na vanua e ratou vocera, e ratou sa qai raici Jisu ni sa lako tiko ena dela ni wai, ka sa torova tiko yani na waqa, ka ratou sa rere vakalevu. 20Ia sa qai kaya vei iratou o Jisu, “Oi au ga oqo; dou kakua ni rere.” 21E ratou sa qai vakavodoki koya sara ki waqa ena yalo marau; ka sa udu sara yani na waqa ki na vanua e ratou a mua tiko kina.

Era sa Vakasaqarai Jisu o Ira na Tamata

22Ena mataka, era sa qai raica o ira na lewe vuqa ka ra tu mai na tai kadua ni wai ni a sa vo duadua tikoga mai kea e dua na waqa; era raica talega ni a sega ni vodo vata kei iratou na nona tisaipeli o Jisu, ka ni ratou a lako ga vakai iratou. 23Era a lako talega yani eso na waqa mai Taiperia, ka voleka ki na yasana era a kana madrai kina ni sa vakavinavinakataka oti na Turaga. 24Ni ra sa raica na lewe vuqa ni sa sega e kea o Jisu, ka sega talega kina o iratou na nona tisaipeli, era sa qai vodo tale ki waqa, ka lako ki Kapenaumi, me ra vakasaqarai Jisu.

O Jisu na Madrai ni Bula

25Ia ni ra sa raici koya ena tai ni drano kadua, era sa qai kaya vua, “Vakavuvuli, o ni a lako mai ki ke ena gauna cava?”

26Sa qai sauma vei ira o Jisu ka kaya, “A ka dina au na tukuna oqo vei kemuni: o ni sega ni vakasaqarai au baleta ni o ni a raica na veicakacaka mana au a cakava, ia baleta ga ni o ni a kania na madrai ka mamau kina. 27Ni kakua ni ogataka na kakana e rawa ni rusa, ia na kakana ga ena tu dei tu ka yacova na bula tawamudu, na kakana ka na solia vei kemuni na Luve ni Tamata: ni sai koya sa tiko vua na i vakatakilakila ni sa vakadonui koya na Kalou o Tamana.”#Sr 24.19-22

28Era sa qai kaya vua, “A cava me keimami cakava, me keimami kitaka kina na cakacaka ni Kalou?”

29Sa qai sauma o Jisu ka kaya vei ira, “Sa i koya oqo na cakacaka e vinaka vua na Kalou: mo ni vakabauti koya ka a tala mai o koya.”

30Era sa qai kaya vua, “A cakacaka mana cava o na cakava, me keimami raica ka vakabauti iko kina? A cava o na cakava? 31O ira na noda qase era a kania na mana ena loma ni vanua lala, me vaka sa volai, ‘Sa solia vei ira na madrai mai lomalagi me ra kania.’ ”#Lako 16.4,15; Same 78.24; Ym 16.20,21

32Sa qai kaya vei ira o Jisu, “Au sa tukuna vakadodonu vei kemuni oqo: sa sega ni madrai dina mai lomalagi na kena sa solia vei kemuni o Mosese; ia sai Tamaqu ga ka sa solia vei kemuni na madrai dina mai lomalagi. 33Na madrai sa solia na Kalou sai koya ka sa lako sobu mai lomalagi ka sa solia na bula ki vuravura.”

34Era sa qai kaya vua, “Turaga, ni solia mada mai vei keimami na madrai oqo.”

35Sa qai kaya vei ira o Jisu, “Oi au na madrai ni bula. O ira sa lako mai vei au era na sega vakadua ni viakana; kei ira sa vakabauti au era na sega vakadua ni viagunu. 36Ia au sa kaya vei kemuni, o ni sa raici au ia o ni sega ni vakabauta. 37O ira kece sa solia mai vei au o Tamaqu era na lako mai vei au. Au na sega ni vakatala tani e dua vei ira sa lako mai vei au, 38baleta ni'u a sa lako mai lomalagi me'u kakua ni vakayacora ga na lomaqu, ia na loma i koya ga sa talai au mai. 39Sa loma i koya ka sa talai au mai me'u kakua ni vakayalia e dua vei ira sa solia mai vei au o koya, ia me'u na vakaturi ira cake ga ena i otioti ni gauna. 40Ni sai koya oqo na ka e vinakata o Tamaqu, o ya me ra rawata na bula tawamudu o ira vakayadua sa raica na Luvena ka vakabauti koya; ka'u na vakaturi ira cake ena i otioti ni gauna.”

41Era sa qai tekivu vosa kudrukudrutaki koya o ira na Jiu baleta ni sa kaya, “Oi au na madrai ka sa lako sobu mai lomalagi.” 42Era sa kaya kina, “E sega li ni o Jisu oqo na luve i Iosefo? Eda sa kilai rau o tamana kei tinana. E qai kaya ga vakacava o koya ni sa lako sobu mai lomalagi?”

43Sa qai sauma o Jisu ka kaya vei ira, “Dou kakua ni vosa kudrukudru. 44E sega ni rawa ni lako mai vei au e dua na tamata kevaka e sega ni vakayarayarataki koya mai o Tamaqu, o koya ka a talai au mai; ka'u na vakaturi koya cake ena i otioti ni gauna. 45Era a vola na parofita ka vaka, ‘Ena vakavulici ira kecega na tamata na Kalou.’ O ira kecega era rogoci Tamaqu ka vuli vua, era na lako mai vei au.#Aisea 54.13 46E se sega mada ni sa raici Tamaqu e dua na tamata. O koya duadua ga ka lako mai vua na Kalou e sa raici koya. 47Au tukuna vakadodonu sara vei kemuni ni sa nona na bula tawamudu na tamata sa vakabauta. 48Oi au na madrai ni bula. 49Era a kania na mana ena loma ni vanua lala o ira na nomuni qase, ia era sa mate. 50Ia kevaka e dua e kania na madrai oqo, na madrai ka a lako sobu mai lomalagi, ena sega ni mate. 51Oi au na madrai ni bula sa lako sobu mai lomalagi; kevaka e dua sa kania na madrai oqo, ena bula ka tawamudu. Na madrai au na solia vua sai koya na lewequ, ka'u sa solia me yaco rawa kina na bula vei ira na kai vuravura.”

52Era a qai veileti vakai ira na Jiu, ka kaya, “Ena solia rawa tu vakaevei na tamata oqo na lewena me da kania?”

53Sa qai kaya kina vei ira o Jisu, “Au tukuna vakadodonu sara vei kemuni, kevaka o ni sa sega ni kania na lewe ni Luve ni Tamata ka gunuva na nona dra, sa segai vei kemuni na bula. 54O ira sa kania na lewequ ka gunuva na noqu dra sa nodra na bula tawamudu, ka'u na vakaturi ira cake ki na bula ena i otioti ni gauna. 55Ni sa kakana dina na lewequ, ka sa wai ni gunu dina na noqu dra. 56O koya sa kania na lewequ ka gunuva na noqu dra, sa bula tiko e lomaqu, ka'u sa bula tale tikoga e lomana oi au. 57Me vaka sa bula tiko o Tamaqu ka a talai au mai, au sa bula talega ena vuku i Tamaqu. Sa vaka talega kina o koya sa kani au, ena bula talega ena vukuqu. 58Sa i koya oqo na madrai ka a lako sobu mai lomalagi: e sega ni vaka na kena era a kania na qase, ka ni ra a qai mate ga. O koya e kania na madrai oqo ena bula ka tawamudu.”

59E a vosataka na veika oqo o Jisu ena valenilotu, ni a veivakatavulici tiko mai Kapenaumi.

Na Vosa ni Bula Tawa Mudu

60Ni ra sa rogoca na vosa o ya e lewe vuqa na nona tisaipeli, era sa qai kaya, “Sa rui dredre na vakasama oqo, o cei ena muria rawa?”

61Ia ni sa kila e lomana o Jisu ni ra sa vosa kudrukudru na nona tisaipeli ena ka o ya, sa qai kaya vei ira, “E vakaevei e vakaleqa na lomamuni na ka oqo? 62Ia a cava beka o ni na kaya kevaka o ni na raica na Luve ni Tamata ni sa lako cake ki na vanua ka a tiko kina e liu? 63Sa i koya na Yalo ni Kalou ka solia na bula, ia na kaukauwa ni tamata e sega sara ga na kena yaga. A vosa ka'u sa vosataka vei kemuni sa vosa vakayalo ka sa vu ni bula.#Ym 9.13-18 64Ia eso vei kemuni e sega tiko ni vakabauta.” (Ni sa kilai ira mai na i vakatekivu o Jisu o ira ka sega ni vakabauta, kei koya ena bukiveretaki koya.) 65Sa qai kaya tale o koya, “O koya oqo au a kaya kina vei kemuni ni na sega ni lako rawa mai vei au e dua na tamata, kevaka e sega ni dolava vua na sala o Tamaqu.”

66Ena vuku ni ka o ya, era a suka tale kina e lewe vuqa vei ira na nona tisaipeli, ka sega tale ni lako vata kaya. 67Sa qai kaya o Jisu vei iratou na lewe tinikarua, “Dou sa via lako tani talega oi kemudou?”

68Sa qai sauma vua o Saimoni Pita ka kaya, “Turaga, me keitou qai lako tale vei cei? Sa tu ga vei kemuni na vosa ni bula tawamudu. 69Keitou sa vakabauta ka kila ni sai kemuni na Le Dua Yalosavasava ni Kalou.”#Maciu 16.16; Mari 8.29; Luke 9.20

70Sa qai sauma vei iratou o Jisu, “E sega li ni'u a digitaki kemudou na lewe tinikarua? Ia e dua vei kemudou sai to tiko ni tevoro.” 71A sa vosa vakaoqo o koya me baleti Jutasa, na luve i Saimoni Isikarioti, ni dina ga ni dua vei iratou na lewe tinikarua o koya, ia ena qai bukiveretaki koya e muri.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Joni 6: FNVDC12

Highlight

ಶೇರ್

ಕಾಪಿ