Vakatekivu 25
25
Kawa i Epara-ama mai vei Ketura
(1Vei 1.32-33)
1Sa la'ki vakawati tale o Epara-ama kei na dua na yalewa, na yacana o Ketura. 2Oqo o iratou na luvena vua: o Simirani, kei Jokisani, kei Mitani, kei Mitiani, kei Isipaki, kei Sua. 3O Jokisani e tamadrau o Sipa kei Titani, ka ra qai luve i Titani o ira na Asurimi, na Letusimi, kei na Leumimi. 4E ratou luve i Mitiani tagane o Efa, kei Eferi, kei Inoke, kei Apita, kei Elitea. Sai ira kece o ya na kawa i Ketura.
5Sa solia vei Aisake o Epara-ama na veika kecega sa taukena; 6ia ni bera ni mate, a sa vota talega eso na i loloma vei ira na luvena tagane sa sucu mai vei ira na watina lalai. A sa qai vakauti ira yani oqo ki na veivanua ena Tokalau, ka me ra tiko vakayawa mai vua na luvena o Aisake.
Na Mate kei na Bulu i Epara-ama
7A sa 175 taucoko na yabaki ni bula i Epara-ama. 8E a qai mate ni sa yacova e dua na yabaki vinaka ni nona bula, ni sa qase sara, ka sa toki yani vei ira na wekana. 9E rau sa qai buluti koya na luvena tagane o Aisake kei Isimeli ena qara vatu mai Makipila, ena vanua i Efironi na luve i Soa na Itaiti, ena tokalau kei Mamire. 10Sai koya o ya na vanua sa volia o Epara-ama mai vei ira na Itaiti; ka rau sa bulu ruarua kina o Epara-ama kei na watina o Sera.#Vteki 23.3-16 11Ni sa mate o Epara-ama, sa qai vakalougatataka na luvena tagane o Aisake na Kalou, ka sa vakaitikotiko volekata “Na i keliwai i Koya sa bula ka raici Au.”
Na Kawa i Isimeli
(1Vei 1.28-31)
12Oqo o ira na kawa i Isimeli, na luve i Epara-ama, ka vakasucuma vua o Eka na yalewa ni Ijipita, na dauveiqaravi i Sera. 13Oqo na yacadra na luve i Isimeli me vaka na veitarataravi ni nodra sucu. Na nona ulumatua o Nepeioci, ka tarava yani o Kitari, o Atipieli, o Mipisami, 14o Misima, o Tuma, o Masa, 15o Etati, o Tima, o Jeturi, o Nefisi, vata kei Ketema. 16O ya na luve i Isimeli, ka sai koya o ya na yacadra kei na nodra veikoro kei na nodra i tikotiko, e tinikarua na turaga me vaka na nodra veiyavusa. 17A sa 137 na yabaki i Isimeli sa qai mate ka toki yani vei ira na wekana. 18Era sa tiko na kawa i Isimeli ena vanua o Avila kei Suri, mai na tokalau kei Ijipita, ena sala ki Asiria era sa tiko yani vakatikitiki mai vei ira na wekadra.
Na Sucu i Iso kei Jekope
19Oqo na i tukutuku i Aisake na luve i Epara-ama. 20Ni sa yabaki 40 o Aisake, erau sa qai vakawati kei Repeka na luve i Pecueli (e dua na kai Arami mai Mesopotemia) ka ganei Lepani.
21A sa masuti Jiova o Aisake ena vuku i watina baleta ni sega tiko ni vakaluveni rawa. A qai rogoca o Jiova na nona masu ka sa yaco me bukete o Repeka. 22E rau sa veivala na gone e ketena, ka sa kaya, “Kevaka sa vakaoqo, a cava me'u bula tiko kina?” A mai masu yani me taroga na loma i Jiova.
23Ia sa kaya vei Jiova,#Roma 9.12
“E rua na matanitu erau sa tiko e ketemu;
O na vakasucuma e rua na mata tamata.
E dua ena qaqa cake vei koya kadua,
Ia ena qaravi koya sa gone o koya e qase.”
24Ia ni sa yaco me vakasucu, erau a drua na luvena. 25Sa sucu mai na kena i matai, a damudamu ka vutivutia me vaka e dua na i tutuvi vutivutia, era a vakatoka me yacana o Iso.#25.25 Iso: E tauri na yaca oqo me dusi ‘Sia’, oqo na vanua era a qai la'ki tawana na kawa i Iso; E balebale vaka na ‘Sia’ na “vutivutia” ena vosa vakaiperiu. 26Ia ni sucu mai o koya ka gone, a sa taura kaukauwa toka na bukubuku ni yava i Iso, ka sa vakatokai me yacana o Jekope.#25.26 Jekope: Na yaca oqo e balebale vaka na “bukubuku ni yava” ena vosa vakaiperiu. Sa yabaki 60 o Aisake ena gauna erau a qai sucu kina.
Volitaka o Iso na Nona Dodonu Vakaulumatua
27E rau a tubu cake na gone, a yaco me dauvakasasa o Iso ka dau lasa e veikau, ia o Jekope, a tamata galugalu ka dau tu ga e vale. 28E dau taleitaki Iso o Aisake, ka ni dau kania na manumanu sa dau rawata mai ena nona vakasasa; ia sa dau lomani Jekope o Repeka.
29Ena dua na siga ni vakasaqara tiko o Jekope e dua na mataqali kakana damudamu, 30Sa ka levu sara na nona viakana, ka mani kaya vei Jekope, “Au sa viakana sara ga vakalevu; mo solia mada eso na kakana damudamu oqori me'u kania.” (O ya na vuna a vakatokai kina o Iso me yacana o Itomi.#25.30 Itomi: Na yaca oqo e balebale vaka na “damudamu” ena vosa vakaiperiu.)
31Sa qai kaya o Jekope, “Solia mai vei au na nomu i tutu vakaulumatua, au na qai solia vei iko.”
32Sa mani kaya o Iso “Au sa voleka ni mate, a cava na kena yaga vei au na noqu i tutu vakaulumatua?”
33A qai kaya o Jekope, “Mo bubului mada e liu vei au.”#Ipe 12.16
A sa bubului o Iso ka volitaka vei Jekope na i tutu vakaulumatua. 34A sa solia vua o Jekope eso na madrai kei na kakana damudamu.#25.34 kakana damudamu “rourou” (FOV); se “suvu” (GNB); se “sitiu” (NIV, NRSV). A kana o Iso, gunu ka lako yani. A sa beca o Iso na nona i tutu vakaulumatua.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Vakatekivu 25: FNVDC12
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
