Jenesis 16
16
Haga an Ismael
1Nao kam kasem taem ya, Sarae hu hemi waef blong Ebram, hemi no garem eni pikinini. Bat hemi garem wanfala slev gele, wea i gele long Ijip, an nem blong hem nao Haga. 2Nao Sarae hemi talem long Ebram olsem, “Kam kasem distaem, Yawe hemi gohed fo stopem mi, fo no garem pikinini. Mi tingse hemi gudfala samting fo yu go slip wetem slev gele blong mi ya. Maet hemi save garem wanfala pikinini fo mi.” An Ebram hemi agri long toktok blong hem ya. 3Olketa bin stap tenfala yia finis long Kenan taem Sarae hemi talem hasban blong hem, Ebram, fo tekem Haga. 4Oraet, Haga hemi slip wetem Ebram go-go hemi babule. An taem hemi save dat hemi babule finis, hemi filpraod fogud an oltaem nomoa hemi save lukdaon long Sarae.
5Nao Sarae hemi tok olsem long Ebram, “Gele ya hemi gohed fo bikhed nogud tumas long mi nao, diswan ya from yu nao ya. Mi sendem kam fo stap wetem yu, bat taem hemi save dat hemi babule finis, hemi filpraod tumas, nao oltaem nomoa, hemi save lukdaon tumas long mi. Hemi gud fo Yawe hemi jajem yumitufala , mekem hemi somaot olsem hu long yumitufala nao hemi stret.” 6Bat Ebram hemi tok olsem long hem, “Oraet slev gele ya hemi blong yu ya, an hemi stap andanit long han blong yu nomoa. Yu save duim enisamting nomoa long hem olsem wea yu laekem.” Nao Sarae hemi gohed fo mekem Haga safa, go-go Haga hemi ranawe nao. 7Hemi go stap long wanfala drae eria, long saet blong wanfala springwata wea i stap long saet rod fo go long Sua long saot. Nao enjel blong Yawe#16:7 “Enjel blong Yawe” Taem disfala toktok “Enjel blong Yawe” hemi kamap long Oltestamen, hemi minim wea Yawe seleva nao hemi mekem mirakol fo hemi luk olsem wanfala enjel, mekem olketa pipol save lukim hem. Lukim Jenesis 16:13; Eksodas 3:2; Jajis 6:22-23; 2 Samuel 24:16; Aesaea 37:36. hemi kam nao hemi faendem hem long ples ya, 8an hemi askem hem olsem, “!Haga! ?Yu stat kam long wea ya? ?An yu go wea nao ya? !Yu slev gele blong Sarae ya!” An Haga hemi tok olsem, “Mi ranawe from bos blong mi Sarae ya.”
9Bat enjel ya hemi tok olsem long hem, “Yu mas gobaek long Sarae, an yu mas gohed fo obeim toktok blong hem moa.” 10An enjel ya hemi tok moa olsem long hem, “Olketa pikinini wea bae i bon kam long laen blong yu, bae mi mekem olketa fo kamap plande fogud, wea no eni man save fitim fo kaontem. 11Distaem yu babule nao, an bae yu bonem wanfala pikinini boe. An yu mas kolem hem Ismael, bikos yu filnogud tumas, nao yu krae go long Yawe, an hemi herem yu.#16:11 “Ismael” Long Hibru langguis ‘Ismael’ hemi here olsem wod wea hemi minim “God hemi herem”. 12Bat pikinini blong yu ya bae hemi olsem wanfala wael dongki wea hemi falom tingting blong hem seleva. An bae hemi agensim evri pipol, an evri pipol bae i agensim hem. Bae hemi stap seleva, farawe from olketa famili blong hem.” 13Nao Haga hemi gohed fo tingting seleva olsem, “!Maewat! !Mi lukim God finis ya, bat mi no dae nomoa!” So Haga hemi givim narafala nem long Yawe olsem “El-Roe” wea hemi minim “God hemi gohed fo luk kam long mi,” bikos God hemi bin toktok long hem. 14Dastawe, stat kam long taem ya ka-kam kasem tude, olketa pipol i gohed fo kolem springwata ya long midol long tufala taon ya, Kades an Bered, olsem “Beere-lahae-roe” o “Springwata blong disfala God hu hemi laef an hemi gohed fo luk kam long mi.”
15Nao bihaen, Haga hemi bonem wanfala pikinini boe wea dadi blong hem nao Ebram, an Ebram hemi kolem hem Ismael. 16Long taem ya, Ebram hemi kasem eiti-siks yia blong hem.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Jenesis 16: SIPB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.