1. Mose 1
1
Gott muak aules soo aus am daut jefoll
1Aum Aunfank muak Gott Himmel un Ieed. #Hiob 38,4; Psa 90,2; Joh 1,1-3; Opb 4,11 2Un de Ieed haud noch kjeen Jeschekj un kjeen Läwen, un äwa daut deepe Wota wia aules stock diesta. Un Gott sien Jeist bewäajd sikj äwa daut Wota.
3Dan säd Gott: Lot Licht schienen! Un daut wort dach. #Psa 33,9; Jes 45,7; Heb 11,3 4Un Gott jefoll daut Licht, un hee sad daut diestre oppoat von daut Licht. 5Un Gott nand daut Licht: Dach, un daut diestre nand hee Nacht. De Owent un de Morjen vejinjen vom ieeschten Dach.
6Un Gott säd: Lot doa een Himmel sennen, om daut Wota oppoat to saten. 7Un Gott muak eenen Lofthimmel, toom daut Wota em Lofthimmel von daut Wota unja däm Lofthimmel oppoat to saten. Un daut wia soo. #Psa 19,2; 136,6; 148,4 8Un Gott nand dän Rum Himmel. De Owent un de Morjen vejinjen von däm tweeden Dach.
9Un Gott säd: Lot daut Wota unja däm Himmel sikj opp eene Städ saumlen, un lot doa drieejet Launt väakomen. Un daut wia soo. #Hiob 38,8-11; Psa 24,2; 2Pet 3,5 10Gott nand daut drieeje Launt: Ieed, un daut jesaumelde Wota nand hee Mäa. Un Gott sach daut et waut goodet wia. 11Un Gott säd: Lot de Ieed Jewaus väabrinjen, soont aus Plaunten, dee jieda fa sikj Sot haben, un Beem met Frucht, wua dee äare Sot bennen es, eene jiedre Sort fa sikj. Un daut wia soo. 12Un doa woss Jreens oppe Ieed, Plaunten dee Sot hauden, jieda Sort fa sikj, un Fruchtbeem, dee Sot enne Frucht hauden, eene jiedre Sort fa sikj. Un Gott sach daut daut goot wia. 13De Owent un de Morjen vejinjen von däm dredden Dach.
14Un Gott säd: Lot doa Lichta em Himmel sennen, dee doa dän Dach von de Nacht unjascheeden. Lot de Lichta Doag un Joarestieden un Joaren aunwiesen, #5Mo 4,19; Psa 74,16; Jes 47,13 15un lot daut Lichta aum Himmel sennen, daut see de Ieed bedachen. Un daut wia soo. 16Un Gott muak twee groote Lichta, daut jratre Licht, woont dän Dach rejieet, un daut kjlandre Licht, woont de Nacht rejieet. Un hee muak uk de Stierns. #Psa 136,7-9 17Gott sad dee em Himmel, daut see oppe Ieed Licht jeewen, 18daut see dän Dach un de Nacht rejieeden, un daut see daut Licht von daut diestre unjascheeden. Un Gott sach daut daut goot wia. 19De Owent un de Morjen vejinjen von däm vieeden Dach.
20Un Gott säd: Lot daut Wota met veschiedne Tieren schwoarmen, un lot Väajel flieejen äwa de Ieed un em Himmel. 21Un Gott muak de groote Tieren em Mäa un aul de veschiedne Sorten Tieren dee em Wota schwoarmen, eene jiedre Sort oppoat, un aul de Väajel, eene jiedre Sort oppoat. Un Gott sach daut daut goot wia. #Psa 74,13-14; 148,7 22Un Gott säajend dee aula un säd, see sullen Junge haben un sikj vemieren, un daut Mäa fellen; un de Väajel sullen sikj vemieren oppe Ieed. 23De Owent un de Morjen vejinjen von däm feften Dach.
24Un Gott säd: Lot läwendje Tieren oppe Ieed väakomen, eene jiedre Sort oppoat, Vee, un soont waut kjript, un wille Tieren, jiedre Sort oppoat. Un daut wia soo. 25Un Gott muak de wille Tieren oppe Ieed, jiedre Sort oppoat, un veschiednet Vee, jiedre Sort oppoat. Hee muak aules waut doa oppe Ieed kjript, eene jiedre Sort oppoat. Un Gott sach daut daut goot wia. 26Un dan säd Gott: Well wie Menschen moaken, dee soo aus wie sent un ons likjnen. Lot an Macht haben äwa de Fesch em Mäa, äwa de Väajel enne Loft, äwa daut Vee un de wille Tieren, un äwa aules waut doa kjript. #Psa 8,6-9; Efs 4,24; Kol 1,15; 3,10; Jak 3,9 27Un Gott muak Menschen, dee soo wieren aus hee, no sienem Plon. Hee muak Maunsmensch uk Frumensch. #1Mo 9,6; Mat 19,4 28Un Gott säajend dee un säd: Mucht jie Kjinja haben un junt äwa de gaunze Ieed vemieren, un äwa de Ieed rejieren. Jie sellen Macht haben äwa de Fesch em Mäa, äwa de Väajel enne Loft un äwa aules waut doa oppe Ieed läft. 29Un Gott säd: Kjikjt emol. Jie derwen von aule Plaunten oppe Ieed dee Sot haben, un von aule Beem, dee Sot en äare Frucht haben, äten. #Mat 6,25-34 30Un aule Tieren un Väajel un aules waut doa kjript, aules waut oppe Ieed läft, doaf von irjent eene jreene Plaunt fräten. Un daut wia soo. #Psa 145,16 31Un Gott sach waut hee jemoakt haud un hee sach daut daut sea goot wia. De Owent un de Morjen vejinjen von däm sasten Dach. #Mat 19,17; 1Tim 4,4
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1. Mose 1: PB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.