CAWA'TA TUNITA 42
42
Bosiyom Yosefna
1Hay li ma Yakub hum ala sle ma tin ka hay Egipte, nam di tam gurona valamu: Wulin kayn nigi saram mi ir tuwgi ɦawa'an kay mige? 2Nam di'e: Nan hum ala hay nagat Egipte tin ka'a, tuɗgi ɗawni, nigi gusaytiya, kay nay ma lak iriya, kay nay ma mitɗi klasige. 3Guro-biyom Yosefna doogo kalay hay Egipte, kay gus wana. 4Benyamin ɓasum Yosefna Yakub min gum kuɗsiɗi, kay nam li nar ala ɗawn va ma joo'o ma fum klasige. 5Gurona vi Israyel co'o kay gus alkamarena, tapay hiɗi sum segen sa cona kaw; kay dalan ka'a hay nagat Kanaan.
6Yosef di law nagat mi namu, gus alkamaren goy hay ɓam sum sa hay nagat kaf kayn mi namu. Ɓosiyom Yosefna coowa, nisi girif gaa vokamu, dab voksi gaa kay nagata. 7Yosef cuk iram kir ɓosiyomna kayni, nam wisiya, may nam li tuwam ki nam wisiɗi nala, nam lawsi ɗeŋe: Nam ka disiya: Nigi may arige pa? Nisi ala: Numa may goy hay nagat Kanaan pa, numa co kayni kay gus wana. 8Yosef wi ala kayni si guro-biyomna may nisi may wum namɗi. 9Yosef human gum kay duwayta ta dumta.
Nam disiya: Nigi lakŋi si sum sa ɗuw gul-liyna, nigi co kayni kay peɗ galla vi nagata ma ir maŋayna. 10Nisi hot dumu: May naɗi, Mulmana, sa sunda vaŋ co kayni kay gusum mi wa'a ba'. 11Numa kaf lakŋi si gurona vi san kepe; numa si sum sa gasiya, numa sa sunda vaŋ lakŋi say si sa ɗuw gul liyɗi. 12Nam disiya: May noŋɗi; nigi co kayni kay peɗ galla vi nagat ma maŋayna. 13Nisi hot dumu: Numa sa sunda vaŋu, numa guro-biyom tuwman doogo yam ma', numa si gurona vi sa ma kepna hay nagat Kanaan, goor-buma ma goora ay vo'o hiɗi buma'a, ma kepna bay goyo. 14Yosef di'e: Ki nan digi nala, nigi si sum sa ɗuw gul liyn gasiya. 15La nala, nan min patgi dirgi goyo. Farawn ka iriya!#42:15 Farawn ka iriya Kayni ti sumalda, kay hay nagata egipte hay liyn ma jewna, nisi sumal hiɗi sem mulla. la goor-bugi ma goor bay mar tani, nigi as a kal goy tan noŋɗi. 16Gigi sa kuɗgi kep kay nam tuɗ garamiya; may nigi segen lakgi tan daŋgaya. Nan ma pat dir lawta vigi goyo, nan ma wi'e la nigi si sum sa di gasita. La naɗi, Farawn ka iriya! Nigi si sum sa ɗuw gul liyn may. 17Nisi kaf nam cuksi daŋgaya ir buur hiɗi.
18Hay buurta ɦidita: Yosef disiya: Nan kaw mi sa ma li nar kuɗ Lawna. La nigi min lak iriya, nigi ma li ki kayn nala: 19La nigi si sum sa gasiya, goor-bugi mara kep hin tani hay daŋgayna. May nigi segen tuɗgiya, nargi tin mi sa figina. 20Nigi ma maran goor-bugi ma goora, kay nan min fek caw lawta vigiya, kay nigi ma mitɗi kaw. Nisi li ki kayn nala may.
21Nisi ka di jar-tuwsiya: Awa, nay li law ma joo'o kat ɓasuyna; kay nay wi yorta vi dikamu, hay li ma nam ka tiy vok iraya kaw, nay min humum noŋɗi. Lawt fay kayn kuɗ na'ta. 22Ruben sli ditiya di tisiya:
Nan digi ala goor kayni nigi li law ma joo'o ki kayn nala talamɗi ɗisu? May nigi min humanɗi, wulin kayn busuwna valam ka job kaya. 23Nisi may wi ala Yosef ka humaɗi, kay nisi ka muɗ vun kayn muɗi jar-tuwsiya. 24Nam kal goy gine hiɗi nisiya kay tiya. Nam hotaya, lawsiya. Bugol kayni nam vi Simeyon goy jarsiya, cum jaɓn selemu goy kirsi kafe.
25Yosef vul hagata ala sa sunda hob birimna visiya hiɗi alkamarena, gigekaw gum gurjuta valam hay birimna valamu valamu, vulsi sle ma tina hay hagat kaw. Sa sunda li ki kayn nala. 26Nisi hob yam-kurona visi hiɗi alkamarena kaliya. 27Kep jarsiya mal vun birimna valam goyo kay vul hat mi kurona, kayni hay liyn ma nisi min bur hayamna, ɗuw na kayni gurjut ka giy hay birimna valam waŋi. 28Nam di tam segena, gurjuta van nisi hotantiya, na' waŋ hay birimna vanni. Nala diksi muɗ geɗa, hiɗi tuwsi ma visi bat-batna nisi ka di jar-tuwsi ala: Lawn lum tay na kayn mi mige?
29Nisi co tam busi Yakub hay nagat Kanaan, nisi vum labara kay slen ma li kafna; nisi ka dum ala: 30Sa ma ŋom nagatna lawma ɗeŋ ŋolo, nam ŋaɓma ki numa sum sa ɗuw gul liyn nala. 31Numa dum ala numa si sum sa gasiya, numa say si sum sa ɗuw gul liyɗi. 32Numa guro-biyom tuwman ka doogo yam ma', buma kepe, kep jarma bay goyo, ma goora ka hiɗi buma'a hay nagat Kanaan. 33Sa ma ŋolla vi nagata ka duma'a, la nigi sum sa gasiya ni, nan min patgi dirgi goyo. Nigi hinan goor-bugi mara katan kepe, nargi sle ma tin mi sumuna vigina, tuɗgiya, marangi goor-bugi ma goora. 34Nala nan ma vi ala nigi say si sum sa ɗuw gul liyɗi may sum sa gasiya; nala nan ma vulgi goor-bugin goyo, nigi as poy hay nagat goy butiya kaw.
35Hay li ma nisi gra vun birimna visi goyo, kay ko wan goyo, ɗuw na kayni gurjuta vi gigekaw ka hay birimna valamu valamu. Nisi hiɗi busi kaf wi gurju na'ta, nala tuwsi cuk nar ŋolo. 36Yakub disiya, nigi li kayn a hinan goy bay guro'o: Yosef may loɗi, Simeyon may loɗi, nigi min a vi Benyamin lo, kaf kayn nig kan nanu. 37Ruben di tam bulumu: La nan hotaŋ Benyamin ayɗi, gurona van sa ma'n lakŋi naŋ ma cisi goyo; naŋ hinim hay ɓanu, nan ma hotomiya. 38Yakub di'e: Goora van as tuɗis hiɗi nigi hay Egipte noŋɗi, kay ɓasulumna mitiya, nam hini kepe, la va ma joo'o fumawa hay rogoy ta nigi la'ta ɗawni, nan mit hiɗi vot haɓn kan ɗawni hiɗi yorta.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
CAWA'TA TUNITA 42: Massana
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001