CAWA'TA TUNITA 39
39
Yosef coowa hay Egipte
1Nisi kal Yosef hay Egipte. Potifar ma ŋolla vi sojena sa ŋom mulla Farawn ma Egipten gusumu hay ɓam sa Israyella sa tuɗum ɗawni. 2Lawn Ma-Vatɗina ay hiɗi namu, kay bolda vi Lawn tap kuɗumu; nam ay musi hay ziyna vi mulamna, sa ma Egiptena. 3Mulamna wi ala Lawn ka hiɗi namu, kay slen kaf ma nam ka lum hiɗi ɓalamna Ma-Vatɗin ka gi bol kalamu. 4Yosef fi slugot vok ir mulamna, nam tunum kay li lopna valamu, tunum kay ziyna valamu, slena valam noŋ kaf nam hinimti hay ɓalamu. 5Hay li ma Potifar tunum kay ziyna valamu hiɗi slena valam kaf tunna, Lawn gi bol kay ziyna vi sa ma Egiptena kuɗ Yosef; bolda vi Ma-Vatɗina mus kay slena valam noŋ kaf, la mi ziyna la mi sinena kaw. 6Slen ma ir valamna kaf nam hinim hay ɓam Yosef, hin hay ɓalam kayn mi fun ma nam dom kulo vunamna tuta. Yosef kayni, nam wuli kulo fiyoko, nam jifiy ŋolo kaw.
7Bugol slen kayni cata vi mul Yosefta ira' vumu, na', ka dum ala: Buraŋ hiɗi nanu. 8Nam minɗi. Nam di tam cata vi mulamna: Wulin kayni hay ziyn tani, mulanna may var kay slen ma nam hin hay ɓanu noŋɗi, slen ma ir valamna kaf nam vulumawa hay ɓanu. 9Hay ziyn tani nam may ŋol suwan nanɗi, sle hena nam may telan kalam noŋɗi, may ti nak kepe, kay nak ti cata valamu. Joota ta ŋol ki kayn nala nan as la'ɗi, nan as li suluk kat Lawnɗi. 10Buurta kaf na' ka di Yosef, may nam minɗi, nam min bur hiɗi na'ɗi, min tap hiɗi na'ɗi. 11Fat tara kep nam kal kalaf hay ziyna kay li lopna valamu, sum segen a sa vona kaf say hay liy namnaɗi, 12na' vi vun sligara valamu ka dumu: Buraŋ hiɗi nanu, nam hina' sligara valam hay ɓa'a, pir malam goy jiya. 13Hay li ma na' wi ala nam hin sligara valamawa, may nam kay tuwam piri goy jiya, 14na' yi sum sa vo hay ziyna, na' ka disiya: Ɗuwgi tige, nam mar sa ma Hebren kayni kay liw hiɗi naya. San kayni co garanu kay bur hiɗi nanu; may nan siwel hiɗi delan kulo ŋolo. 15Hay li ma nam wi ala nan ka siwel hiɗi delan kulo ŋolo, nam hin sligara valam lak' goy galanni, piri goy jiy jaŋi. 16Na' lak sligara vi Yosef kata' laki, ta-ta jufa' co vo'o. 17Nala na' ka dum ala: Gorvona vaŋ ma Hebrena ma naŋ maramna co tan tani kay liw hiɗi nanu. 18Hay li ma nan siwel hiɗi delan kulo ŋolo, nam hin sligara valam gaa tanu pir goy jiy jaŋi. 19Hay li ma nam hum dita ma cata valam dum ala: Kayn mi va ma sa ma gorvona vaŋ lum tanu, nam muɗ hiy dono ŋolo. 20Nam vi Yosef, gum daŋgaya, hay liyn ma sa daŋgayna vi mulla ay duki hayamna. Nam musi ɗawni, hay daŋgayna.
21Ma-Vatɗina ay hiɗi Yosef, nam li ŋaata valam talamu. Nam hinim fi slugota vok ir sa ma ŋolla vi ziyda daŋgayna. 22Ma ŋolla vi daŋgayna hinsi kaf hay ɓam Yosef kay nam ma ŋomsiya; lop ma nisi lum ɗawn kaf dum lawam mi namu. 23Mulla vi daŋgayna may gar a wi sle ma nam hinim hay ɓam Yosefna noŋɗi, kay Ma-Vatɗina ay hiɗi namu, slen kaf ma nam ka li'e, Ma-Vatɗin ka gi bol kalamu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
CAWA'TA TUNITA 39: Massana
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001