LUKE 23
23
Sa lewai Jisu ko Pailato kei Eroti, 1—26. Era vakoti Jisu ki na kauveilatai, a sa masulaki ira ko koya, a sa vakabula e dua vei rau na daubutako, a sa vakabauti koya na turaga ni valu, 27—49. Sa buluti koya ko Josefa, 50—56.
1A sa cavu tu ko ira kecega na lewe vuqa, ka kauti koya vei Pailato.
2A ra sa vakatekivu me ra beitaka, a ra sa kaya, Keitou sa kunei koya oqo, ni sa vukici ira vakatani na vanua, sa vakatabuya na soli vakacavacava vei Sisa a sa kaya ni sa Karisito na Tui ko koya. 3A sa tarogi koya ko Pailato, ka kaya, O iko na nodra Tui na kai Jutia, se segai? A sa vosa ko koya, ka kaya vua, O sa kaya dina mai.
4Sa qai kaya ko Pailato vei ira na bete levu kei ira na lewe vuqa, Au sa sega ni kunea e dua na ka ca vua na tamata oqo. 5Era sa qai gumatua vakalevu mai, ka kaya, Sa vakayavalati ira na tamata e Jutia taucoko ko koya e na nonai vakavuvuli, sa vakatekivu mai Kalili ka yaco ki na yasana oqo. 6Ia ni sa rogoci Kalili ko Pailato, sa taroga, se sa kai Kalili ko koya, se segai. 7Ia ni sa kila sa dautiko ko koya e na yasana sa lewa kina ko Eroti, sa talai koya vei Eroti, ko koya talega sa tiko mai Jerusalemi e na gauna ko ya.
8Ia ni sa raici Jisu ko Eroti, sa reki sara: ni sa gadreva makawa me raica, ni sa vuqa na ka sa rogoca vua; a sa nuitaka me raici koya ni kitaka e dua na cakacaka-mana. 9Sa qai vuqa na ka sa tarogi koya kina; a sa sega na ka sa kaya vua ko koya. 10A ra sa tu kina na bete levu kei ira na vunivola, a ra sa beitaka vakalevu sara. 11Ia ko Eroti kei ira na nona sotia, era sa vakasewasewani koya, ka vakalialia, a ra sa vakasuluma e na dua nai sulu lumilumisa, a ra sa tala tale vei Pailato. 12A rau sa qai veivinakati tale e na siga ko ya ko Eroti kei Pailato: ni rau sa veicati eliu.
13Ia ko Pailato, ni sa vakasoqoni ira mada na bete levu kei ira na turaga kei ira na tamata, 14sa kaya vei ira, Dou sa kauta mai vei au na tamata oqo, me vaka e dua sa vukici ira vakatani na tamata; ia ka raica, au sa taroga e na matamudou, ia ka’u sa sega ni kunea vua na tamata oqo e dua na ca dou sa beitaka vua: 15ko Eroti talega, e segai; ni’u a talai kemudou vua; ka raica, sa sega na ka sa kune vua sa dodonu me mate kina: 16o koya oqo ka’u na vakanakuitataki koya, ka sereka. 17Ni sa dodonu me sereka vei ira e dua e na solevu ko ya. 18A ra sa sosoraki vata kecega, ka kaya, Me kau tani ko koya oqo, ka me sere vei keimami ko Parapa: 19ko koya ka biu ki na vale ni veivesu, ni sa vakatubu veisei e na koro ka ni sa laba talega.
20Ia ni sa via sereki Jisu ko Pailato, sa vosa tale vei ira. 21A ra sa kaci, ka kaya, Vakota ga ki na kauveilatai, vakota ga ki na kauveilatai. 22A sa kaya vakatolu vei ira ko koya, A cava na ka ca sa kitaka? au sa sega ni kunea e dua na ca vua e dodonu me mate kina; o koya oqo ka’u na vakanakuitataki koya, ka sereka. 23Era sa qai gumatua sara ka tabalaka na kaci, ni ra sa kerea me vakoti ki na kauveilatai ko koya. A sa gumatua na nodra kaci. 24A sa lewa ko Pailato me yaco me vaka na nodra cikecike: 25a sa sereki koya ka biu ki na vale ni veivesu e na vuku ni veisei kei na laba, ko koya era sa gadreva; a sa soli Jisu me ra veitaliataka.
26Ia ni ra sa tubera yani, era sa taura e dua na kai Kirini, ko Saimoni, ko koya sa lako mai vanua, a ra sa tauca vua na kauveilatai, me colata ka muri Jisu.
27A ra sa lewe vuqa sara era sa muri koya, kei ira talega na yalewa, a ra sa tagi ka tagicaka. 28A sa vuki vei ira ko Jisu, ka kaya, Oi kemudou na yalewa ni Jerusalemi, dou kakua ni tagicaki au, ia dou tagicaki kemudou kei ira na luvemudou: 29raica, sa voleka ni yaco na siga, ena kainaki kina, Sa kalougata na yava, kei na kete sa sega ni sucu maikina na gone, kei na sucudra sa sega ni vakasucuma na gone. 30Era na qai kaya ki na veiulu-ni-vanua, Lutuki keimami mai; ki na veivanua cecere talega, Ubi keimami mai. 31Ia kevaka era sa kitaka na veika oqo ni sa drokadroka na kau, a cava ena caka ni sa qai madu?
32A rau sa lewe rua tani talega, na tamata caka ca, eratou sa tuberi vata kaya me ratou vakamatei. 33Ia ni ra sa yaco ki na yasana, a yacana ko Kalivari [A vanua ni qavokavoka], era sa vakoti koya kina ki na kauveilatai, kei rau talega na tamata caka ca, e dua e na ligana i matau, ka dua e na ligana i mawi.
34Sa qai kaya ko Jisu, I Tamaqu, kakua ni cudruvi ira; ni ra sa sega ni kila na ka era sa kitaka. A ra sa vota na nonai sulu, ka ia e na vakawiri madigi.
35A ra sa tu na lewe vuqa me ra vakaraica. Ko ira talega na turaga era sa vakalialia, ka kaya, O koya sa dauvakabulai ira na tani; me tei vakabulai koya, kevaka sa Karisito ko koya, na digitaki ni Kalou. 36Ko ira talega na sotia era sa vakalialiai koya, a ra sa lako mai vei koya, ka solia vua na wai wiwi, 37a ra sa kaya, Kevaka ko sa nodra Tui na kai Jutia, mani vakabulai iko.
38A sa dua nai vola sa toka ecake vua, sa volai e na vosa va-Kirisi, kei na vosa vaka-Roma, kei na vosa vaka-Iperiu, O KOYA OQO NA NODRA TUI NA KAI JUTIA.
39A sa vosavakacacataki koya e dua vei rau na tamata caka ca sa rube, ka kaya, Kevaka ko sa Karisito ko iko, vakabulai iko kei keirau talega. 40A sa vosa na kenai karua, ka vunauci koya, ka kaya, O sa sega beka ni rerevaka na Kalou, ni ko sa lewai mo mate vakakina? 41ia sa dodonu vei kedaru, ni sa saumi vei kedaru me vaka na nodarui valavala; ia na tamata oqo, sa sega na ca sa kitaka. 42A sa kaya vei Jisu ko koya, Kemuni na Turaga, nanumi au ni kemuni sa lako mai e na nomuni matanitu. 43A sa kaya vua ko Jisu, Au sa kaya vakaidina vei iko, E na siga ga edaidai edaru na tiko vata mai Parataisi.
44Ia sai kaono ni aua, a sa butobuto na vanua taucoko ka yacova nai kaciwa ni aua. 45A sa vakabutobutotaki na mata-ni-siga; a sa sei rua nai lati ni vale ni soro.
46Ia sa kaci e na domo levu ko Jisu, ka kaya, I Tamaqu, au sa solia na yaloqu ki na ligamuni: ia ni sa vosa oti vakakoya, sa qai ciba.
47Ia ni sa raica na turaga ni valu na ka sa caka, sa vakarokorokotaka na Kalou, ka kaya, E dina ga sa yalododonu na tamata oqo.
48Ia ko ira kecega na tamata era sa lako mai me raica na ka oqo, ni ra sa raica na ka sa caka, era sa tavia na lomaseredra, ka lesu tale yani. 49O ira kece talega na wekana, kei ira na yalewa era sa muri koya mai Kalili, era sa tu vakayawa, ka raica na veika oqo.
50Ka sa qai dua tamata na yacana ko Josefa, sa dua vei ira na mataveilewai; a tamata vinaka ka dodonu: 51(a sa sega ni lomavata se cakacaka vata kei ira:) a kai Arimacea, e dua na nodra koro na kai Jutia: a sa waraka talega ko koya na matanitu ni Kalou. 52Sa lako ko koya oqo vei Pailato, ka kerea na yago i Jisu. 53A sa kevutaka sobu mai, ka solega e na dua nai sole lineni, ka vakotora e na dua nai bulubulu sa ta e na vatu, sa sega ni vakotori kina e dua eliu. 54Ia sa siga Vakarau, a sa roro mai na siga ni vakacecegu.
55Ia ko iratou talega na yalewa, eratou a lako vata kaya mai Kalili, eratou sa muri yani, a ratou sa raica nai bulubulu, kei nai valavala ni kena koto na yagona. 56A ratou sa lesu tale, ka vakarautaka eso na ka boivinaka kei nai lumu: a ratou sa vakacegu e na siga ni vakacecegu me vaka na vunau.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKE 23: FOV
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
