JONI 10
10
A vosa vakatautauvata ni bai ni sipi, 121. O ira na kai Jutia era sa tarogi Jisu, se sa Karisito ko koya, se segai, 2238. Ni ra sa via tauri koya, sa lako yani ko Jisu ki tai kadua ni Joritani, 3942.
1E dina, e dina, au sa kaya vei kemudou, O koya sa sega ni curu e katuba ni bai ni sipi, ia sa kaba cake e na tikina tani, sai koya oqo na daubutako ka daukovekove. 2Ia ko koya sa curu e katuba, ko koya oqo nai vakatawa ni sipi. 3Sa dolavi koya nai vakatawa ni katuba; a sa vakarogoca na domona ko ira na sipi: a sa kacivi ira na nona sipi e na yacadra ko koya, ka tuberi ira ki tautuba. 4Ia ni sa kauti ira na nona sipi ki tautuba sa liutaki ira, a sa muri koya ko ira na sipi; ni ra sa kila na domona. 5Ia era na sega ni muria na vulagi, era na dro tani ga vei koya; ni ra sa sega ni kila na domo ni vulagi.
6Sa vosataka vei ira na vosa vakatautauvata oqo ko Jisu: a ra sa sega ni kila na veika sa vosataka vei ira ko koya.
7Sa qai kaya tale vei ira ko Jisu, E dina, e dina, au sa kaya vei kemudou, Oi au na katuba ni sipi. 8Ko ira kece sa liu mai vei au era sa daubutako ka daukovekove: a sa sega ni vakarogoca na nodra vosa na sipi. 9Oi au na katuba: kevaka sa curu kina e dua na tamata e na vukuqu, ena vakabulai, ka na daucuru mai ka daucuru yani, ka na kune kakana. 10Sa sega ni lako wale mai na daubutako, me butako ga, ka ravuravu, ka vakarusa: au sa lako mai me rawa vei ira na bula, ia me rawa vakalevu sara. 11Oi au nai vakatawa vinaka: sa solia na nona bula nai vakatawa vinaka e na vukudra na sipi. 12Ia ko koya sa voli na nona cakacaka, ka sega ni koya nai vakatawa, ka sa sega ni taukeni ira na sipi, sa raica na wolifa ni sa lako tiko mai, ka sa biuti ira na sipi ko koya, ka dro; a sa kati ira na wolifa, a sa vakatolosevi ira: 13sa dro ko koya sa voli na nona cakacaka, ni sa vakakina ko koya, ka ni sa sega ni daunanumi ira na sipi. 14Oi au nai vakatawa vinaka: ia kau sa kilai ira sa noqu, ia ko ira sa noqu era sa kilai au; 15me vaka sa kilai au ko Tamaqu, ka me vaka kau sa kilai Tamaqu: kau sa solia talega na noqu bula e na vukudra na sipi. 16Eso tani tale na noqu sipi, era sa sega ni tiko e na bai oqo: sa kilikili meu kauti ira talega mai, a ra na rogoca na domoqu; ena qai dua bau na qele ni sipi, ka dua bau nai vakatawa. 17A ka oqo sa lomani au kina ko Tamaqu, niu sa solia na noqu bula, meu kauta tale. 18Sa sega e dua sa kovea oqo vei au, ia kau sa solia vakai au ga. Au sa rawata meu solia, ia kau sa rawata meu kauta tale. Ai vunau oqo sa solia mai vei au ko Tamaqu.
19Era sa qai veileti tale na kai Jutia e na vuku ni vosa oqo. 20A sa lewe vuqa vei ira sa kaya, Sa curumi koya e dua na tevoro, a sa lialia; dou sa rogoci koya e na vuku ni cava? 21Eso tani era kaya, Sa sega ni vakaoqo na vosa ni tamata sa curumi koya e dua na tevoro: sa rawata beka e dua na tevoro me basuka na mata ni mataboko?
22Sa qai ia mai Jerusalemi na solevu ni vakasavasavataki ni vale ni soro, a sa vula i liliwa. 23A sa lako voli ko Jisu e na vale ni soro, e na varada nei Solomoni.
24Era sa qai vakavolivoliti koya na kai Jutia, ka kaya vua, A cava so na kena dede ko sa sega ni vakataudeitaka kina na loma i keimami? kevaka ko sai koya na Karisito, tukuna vakamacala mai vei keimami.
25Sa kaya vei ira ko Jisu, Au a tukuna vei kemudou, ia dou sa sega ni vakadinata: a cakacaka kau sa kitaka e na yaca i Tamaqu, o koya oqo sa vakadinadina vei au. 26Ia dou sa sega ni vakadinata, ni dou sa sega ni noqu sipi. 27Sa rogoca na noqu vosa ko ira na noqu sipi, ia kau sa kilai ira, ka ra sa muri au: 28ia kau sa solia vei ira na bula tawa mudu, ia era na sega sara ni rusa, se dua e kaliraki ira mai na ligaqu. 29A Tamaqu, ko koya sa soli ira vei au, sa uasivia na ka kecega: a sa sega e dua sa rawata me kaliraki ira mai na liga i Tamaqu. 30Keirau sa dua bauga kei Tamaqu.
31Sa qai tomitomika tale na vatu ko ira na kai Jutia, me ra vakaviriki koya.
32Sa kaya vei ira ko Jisu, E vuqa na cakacaka vinaka kau a vakatakila vei kemudou maivei Tamaqu; a cava na cakacaka vei ira oqo dou sa vakaviriki au kina? 33Sa kaya vua ko ira na kai Jutia, Sa segai e na vuku ni cakacaka vinaka keimami sa vakaviriki iko kina; e na vuku ga ni nomu vosavakacacataka na Kalou; e na vuku talega ni ko sa tamata ga, ka sa qisi iko mo Kalou.
34Sa kaya vei ira ko Jisu, Sa sega li ni volai e na nomudou vunau, Au a kaya, Dou sa kalou? 35Kevaka sa vakatokai ira me kalou ko koya, ni sa yaco vei ira na vosa ni Kalou, (a sa sega ni biu wale rawa nai Vola Tabu;) 36dou sa kaya li vua sa lesia na Tamaqu, ka tala ki vuravura, Ko sa vosavakacacataka na Kalou: niu sa kaya, Oi au na Luve ni Kalou? 37Kevaka kau sa sega ni kitaka na cakacaka i Tamaqu, kakua ni vakabauti au: 38ia kevaka kau sa kitaka, dou vakadinata na cakacaka, kevaka dou sa sega ni vakabauti au; mo dou kila kina, ka vakadinata, ni sa tiko vei au ko Tamaqu, kau sa tiko vei koya koi au.
39Era sa qai via tauri koya tale: a sa lako tani ko koya mai na ligadra.
40A sa lako tale yani ko koya ki tai kadua ni Joritani, ki na yasana sa veipapitaisotaki kina eliu ko Joni: a sa tiko kina. 41A sa lewe vuqa era sa lako vua, ka ra kaya, Sa sega ni kitaka e dua na ka-mana ko Joni: ia sa dina ga na ka kecega sa vosataka ko Joni e na vuku ni tamata oqo. 42A ra sa lewe vuqa sa vakabauti koya maikea.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JONI 10: FOV
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
