ᐅᐸᓓᑭᔅ ᒫᑎᐤ 5
5
ᒋᓴᔅ ᑭᔅᑭᓄᐊᒫᑫᐤ ᐗᒋᒃ
1ᐁ ᐙᐸᒫᑦ ᒫᑲ ᐁ ᒫᒪᐎᒥᒉᑎᓕᒋ ᐃᓕᓕᐗ, ᑮ ᑯᔅᐹᒪᒋᐌᐤ ᐗᒌᒃ: ᐃᔅᐱ ᒫᑲ ᑳ ᓇᐊᐱᑦ, ᑮ ᐯᒋ ᓈᑎᑯ ᐅ ᑭᔅᑭᓄᐊᒪᐙᑲᓇ᙮
ᔕᐌᓕᑖᑯᓯᐎᓐ ᑳ ᑖᐺᒪᑲᒃ
(ᓘᒃ 6:20–23)
2ᑮ ᐹᔅᑭᑐᓀᓕᐤ ᒫᑲ, ᐁ ᑭᔅᑭᓄᐊᒪᐙᑦ, ᐁ ᐃᑗᑦ, 3ᔕᐌᓕᑖᑯᓯᐗᒃ ᑳ ᑭᑎᒫᑭᓯᒋᒃ ᐅᑦ ᐊᒑᑯᐙᒃ; ᐌᓴ ᐅᑦ ᐋᔮᓂᐗᒃ ᑭᒋᑭᔑᑳᐎ ᐅᑭᒫᐎᐎᓐ᙮ 4ᔕᐌᓕᑖᑯᓯᐗᒃ ᑳ ᓇᓀᑳᒋᒧᒋᒃ; ᐌᓴ ᑲᑕ ᒥᓜᓕᒧᐋᑲᓂᐎᐗᒃ᙮ 5ᔕᐌᓕᑖᑯᓯᐗᒃ ᑳ ᓗᔅᐹᑎᓯᒋᒃ; ᐌᓴ ᑲᑕ ᐋᔮᐗᒃ ᐊᔅᑭᓕᐤ᙮ 6ᔕᐌᓕᑖᑯᓯᐗᒃ ᐊᓂᑭ ᑳ ᓄᑌᑲᑌᑐᑕᑭᒃ ᓀᔥᑕ ᑳ ᓄᑌᔮᐸᒀᑐᑕᑭᒃ ᒀᔭᔅᑭᑖᑎᓯᐎᓂᓕᐤ; ᐌᓴ ᑲᑕ ᑮᔥᐳᐋᐗᒃ᙮ 7ᔕᐌᓕᑖᑯᓯᐗᒃ ᑳ ᔕᐌᓕᒋᑫᒋᒃ; ᐌᓴ ᑲᑕ ᒥᓛᐗᒃ ᔕᐌᓕᒋᑫᐎᓂᓕᐤ᙮ 8ᔕᐌᓕᑖᑯᓯᐗᒃ ᑳ ᐸᓓᑭᓯᒋᒃ ᐅᑌᐃᐙᒃ; ᐌᓴ ᑲᑕ ᐙᐸᒣᐗᒃ ᑭᒋᒪᓂᑐᐗ᙮ 9ᔕᐌᓕᑖᑯᓯᐗᒃ ᑳ ᐅᑐᑌᒥᐃᐌᒋᒃ; ᐌᓴ ᑭᒋᒪᓂᑐ ᐅᑦ ᐊᐙᔑᒥᔕ ᑲᑕ ᐃᔑᓂᑳᓱᐗᒃ᙮ 10ᔕᐌᓕᑖᑯᓯᐗᒃ ᐊᓂᑭ ᑳ ᑲᒀᑕᑭᐋᑲᓂᐎᒋᒃ ᒀᔭᔅᑭᑖᑎᓯᐎᓐ ᐅᒋ; ᐌᓴ ᐅᑦ ᐋᔮᓂᐗᒃ ᑭᒋᑭᔑᑳᐎ ᐅᑭᒪᐎᐎᓐ᙮
11ᑭ ᔕᐌᓕᑖᑯᓯᓇᐗᐤ ᐁ ᓈᔦᑕᐎᐃᑎᑖᑾᒃ ᐃᓕᓕᐗᒃ, ᓀᔥᑕ ᑲᒀᑕᑭᐃᑖᑾᒃ, ᓀᔥᑕ ᒥᓯᐌ ᐃᔑ ᑭᓛᔅᑭ ᐋᓕᒧᒥᑖᑾᒃ ᓂᓚ ᐅᒋ᙮ 12ᒪᓚᐙᑕᒧᒃ, ᓈᔅᐱᒡ ᒫᑲ ᓯᑭᓓᓯᒃ; ᐌᓴ ᒥᔕᐤ ᑭ ᑎᐸᐊᒫᑯᓯᐎᓂᐗᐤ ᑭᒋᑭᔑᑯᒃ: ᐌᓴ ᐁᑯ ᑳ ᑮ ᐃᔑ ᑲᒀᑕᑭᐋᒋᒃ ᐅᑭᔅᑭᐙᐃᑫᐗ ᑳ ᐯᒋ ᓂᑳᓂᔅᑳᑖᑾᒃ
ᔑᐎᑖᑲᓐ ᓀᔥᑕ ᐙᔅᑌᐎᓐ
(ᒫᕐᒃ 9:50; ᓘᒃ 14:34–35)
13ᑭᓚᐗᐤ ᐁᐗᑯ ᑳ ᐅᒋ ᔑᐎᑖᑲᓂᐗᒃ ᐊᔅᑭ; ᑮᔥᐱᓐ ᒫᑲ ᔑᐎᑖᑲᓐ ᐱᐃᓵᑫ, ᑖᓐᑌ ᑫ ᐅᒋ ᔑᐎᑖᑲᓂᐗᒃ? ᐁᑯᔅᐱ ᐅᒋ ᓇᒪᐎᓚ ᐙᔦᔥ ᐃᑖᐸᑕᓐ, ᐱᑯ ᑭᒋ ᐗᓚᐎᐌᐱᓂᑳᑌᒃ, ᓀᔥᑕ ᑭᒋ ᑕᑕᑯᔥᑳᑕᑭᒃ ᐃᓕᓕᐗᒃ᙮
14ᑭᓚᐗᐤ ᐁᐗᑯ ᑮ ᐅᒋ ᐙᔅᑌᓂᑲᑌᒃ ᐊᔅᑭ᙮ ᐃᑖᐎᓐ ᐗᒋᒃ ᑳ ᒋᒪᑌᒃ ᓇᒪᐎᓚ ᑲᑕ ᑮ ᑳᑖᓂᐗᓐ᙮ 15ᓇᒪ ᓀᔥᑕ ᐃᓕᓕᐗᒃ ᓭᔅᑲᐊᑾᐌ ᐙᔅᑌᓇᒫᑲᓂᓕᐤ ᔑᐹ ᐙᐎᐊᑖᑲᓂᒃ ᐊᔅᑖᐗᒃ, ᒫᑲ ᐙᔅᑌᓇᒫᑲᓈᑎᑯᒃ; ᐙᔅᑌᓇᒫᑯᐗᒃ ᒫᑲ ᒥᓯᐌ ᐊᓂᑭ ᐱᒋ ᐙᔅᑳᔨᑲᓂᒃ ᑳ ᐃᑖᒋᒃ᙮ 16ᐁᑯᔑ ᑮ ᐙᔅᑌᐄᓂᐗᐤ ᑲᑕ ᐃᔑ ᒐᑳᔅᑌᔅᑳᑯᐗᒃ ᐃᓕᓕᐗᒃ, ᑭᒋ ᑮ ᐙᐸᑕᑭᒃ ᑭ ᒥᓗ ᐊᑑᔅᑫᐄᓂᐙᐗ, ᑭᒋ ᑭᔅᑖᒋᒫᒋᒃ ᒫᑲ ᑯᑖᐎᐙᐗ ᑭᒋᑭᔑᑯᒃ ᑳ ᐃᑖᓕᒋ᙮
ᒋᓴᔅ ᑭᔅᑭᓄᐊᒫᑫᐤ ᐅᓚᔓᐌᐎᓐ ᐅᒋ
17ᐁᑳᐎᓚ ᐃᑌᓕᑕᒧᒃ ᐁ ᐯᒋ ᑕᑯᔑᓂᔮᓐ ᑭᒋ ᓂᔑᐗᓈᒋᑖᔮᓐ ᐅᓚᔓᐌᐎᓐ ᓀᔥᑕᐱᑯ ᐅᑭᔅᑭᐙᐃᑫᐗᒃ: ᓇᒪᐎᓚ ᓂ ᐯᒋ ᑕᑯᔑᓂᓐ ᑭᒋ ᓂᔑᐗᓈᒋᑖᔮᓐ, ᒫᑲ ᑭᒋ ᑎᐱᑐᑕᒫᓐ᙮ 18ᐌᓴ ᑖᐺ ᑭᑦ ᐃᑎᓇᐗᐤ, ᐃᓕᑯᒃ ᑭᔑᒃ ᓀᔥᑕ ᐊᔅᑭ ᒪᔭᐎᐸᓕᑫ, ᐯᔭᒃ ᒐᑲᓯᓇᐃᑲᓐ ᓀᔥᑕᐱᑯ ᐯᔭᒃ ᒐᑲᐯᔨᑲᓐ ᓇᒪᐎᓚ ᑲᑕ ᓄᑌᐸᓕᐤ ᐅᓚᔓᐌᐎᓂᒃ ᐅᒋ ᐱᓕᔥ ᒥᑐᓂ ᑮ ᑎᐱᑐᒋᑳᑌᒃ᙮ 19ᐊᐌᓇ ᑫ ᐱᑯᓇᒧᑴ ᐯᔭᒃ ᐅᐅ ᐁ ᒫᐗᒋ ᐋᐱᔅᑌᓕᑖᑾᓂᓕᒃ ᑲᑫᔅᑴᐎᓂᓕᐤ, ᐁᑯ ᐃᔑ ᓀᔥᑕ ᑫ ᑭᔅᑭᓄᐊᒪᐙᑴ ᐃᓕᓕᐗ, ᐁᐗᑯ ᑫ ᒪᐗᒋ ᐋᐱᔅᑕᑭᒫᑲᓂᐎᑦ ᑭᒋᑭᔑᑳᐎ ᐅᑭᒫᐎᐎᓂᒃ: ᒫᑲ ᐊᐌᓇ ᑫ ᑎᐱᑐᑕᒧᑴ ᓀᔥᑕ ᑭᔅᑭᓄᐊᒫᑫᑴ, ᐁᐗᑯ ᑫ ᑭᔅᑕᑭᒫᑲᓂᐎᑦ ᑭᒋᑭᔑᑳᐎ ᐅᑭᒫᐎᐎᓂᒃ᙮ 20ᐌᓴ ᑭᑦ ᐃᑎᓇᐗᐤ, ᑮᔥᐱᓐ ᐁᑳ ᐊᐙᓯᑌ ᑭᒋᐃᑌᓕᑖᑾᒃ ᑭ ᒀᔭᔅᑭᑖᑎᓯᐎᓂᐗᐤ ᐃᔥᐱᔥ ᐅᒪᓯᓇᐃᑫᐗᒃ ᓀᔥᑕ ᐸᕋᓯᔭᒃ ᐅ ᒀᔭᔅᑭᑖᑎᓯᐎᓂᐗᐤ, ᓇᒪᐎᓚ ᑭ ᑳ ᐱᑐᑳᓇᐗᐤ ᑭᒋᑭᔑᑳᐎ ᐅᑭᒫᐎᐎᓇᒃ᙮
ᒋᓴᔅ ᐁ ᑭᔅᑭᓄᐊᒫᑫᑦ ᐊᐌᓇ ᐁᑳ ᑭᒋ ᑭᓯᐙᓰᔅᑕᐙᑦ ᐎᒋᔕᓇ
21ᑭ ᑮ ᐯᑌᓇᐗᐤ ᐁ ᑮ ᐃᑣᓂᐗᒃ ᑳᔮᔥ, ᐁᑳᐎᓚ ᑮ ᑳ ᓂᐹᔨᐙᓐ; ᓀᔥᑕ ᐊᐌᓇ ᑫ ᓂᐹᔨᐌᑴ, ᑲᑕ ᓈᓂᓵᓂᓯᐤ ᑭᒋ ᑎᐸᔅᑯᓈᑲᓂᐎᑦ: 22ᒫᑲ ᓂᓚ ᑭᑦ ᐃᑎᓇᐗᐤ, ᐊᐌᓇ ᔐᔥᒀᑦ ᑫ ᑭᓯᐙᓰᔅᑕᐙᑴ ᐎᒋᔕᓇ, ᑲᑕ ᓈᓂᓵᓂᓯᐤ ᑭᒋ ᑎᐹᔅᑯᓈᑲᓂᐎᑦ: ᐊᐌᓇ ᒫᑲ ᑫ ᐊᑖᑴ ᐎᒋᔖᓇ, ᕃᑲ, ᑲᑕ ᓈᓂᓵᓂᓯᐤ ᑭᒋ ᐃᑐᑕᐋᑲᓂᐎᑦ ᐁᑖᔅᑕᒪᐱᓕᒋ ᐅᑎᐹᔅᑯᓂᑫᐗ: ᒫᑲ ᐊᐌᓇ ᑫ ᐃᑖᑴ, ᑭᓚ ᑭᔥᑴᑳᓐ, ᑲᑕ ᓈᓂᓵᓂᓯᐤ ᑭᒋ ᐌᐱᓇᑲᓂᐎᑦ ᒪᒋᐃᔥᑯᑌᒃ᙮ 23ᐁᐗᑯ ᐌᒋ ᑮᔥᐱᓐ ᐯᑖᔭᓀ ᑭ ᒥᓕᐌᐎᓐ ᐸᑭᒋᑲᓈᐱᔅᑯᒃ ᐃᔑ, ᐁᑯᑕ ᒫᑲ ᑭᔅᑭᓯᔭᓀ ᐙᔦᔥ ᐁ ᐃᑌᓕᒥᔉ ᑭᒋᔖᓐ; 24ᐁᑯᑕ ᐅᑎᔥᑲᐤ ᐸᑭᒋᑲᓈᐱᔅᑯᒃ ᓇᑲᑕ ᑭ ᒥᓕᐌᐎᓐ, ᑭᑐᑌ ᒫᑲ; ᓃᔥᑕᒻ ᒥᓄᐅᑐᑌᒥᒻ ᑭᒋᔖᓐ, ᐁᑯ ᒫᑲ ᐯᒋ ᐸᑭᑎᓂᑫ ᑭ ᒥᓕᐌᐎᓐ᙮
25ᐎ ᒥᓗᐅᑐᑌᒥᒻ ᐊᓇ ᑳ ᓈᔦᑕᐌᓕᒥᔉ ᐎᐸᒡ ᒣᒀᒡ ᐁ ᐱᒥᐎᒉᐗᑦ, ᑮᔥᐱᓐ ᐁᑳ, ᐊᓇ ᑳ ᓇᔦᑕᐌᓕᒥᔉ ᑭ ᑳ ᐸᑭᑎᓂᒃ ᐅᑎᐹᔅᑯᓂᑫᐗ ᐅᒋᒌᓕᒃ, ᐅᑎᐹᔅᑯᓂᑫᐤ ᒫᑲ ᑭ ᑳ ᐸᑭᑎᓂᒃ ᐊᑑᔅᑫᓛᑲᓇ ᐅᒋᒌᓕᒃ, ᐁᑯ ᒫᑲ ᑭᐸᐅᑐᐎᑲᒥᑯᒃ ᑫ ᐃᔑ ᐌᐱᓂᑲᐎᔭᓐ᙮ 26ᑖᐺ ᑭᑦ ᐃᑎᓐ, ᓇᒪᐎᓚ ᐊᓐᑕ ᑭ ᑳ ᐅᒋ ᐗᓚᐎᓐ, ᐹᑎᒫ, ᑭ ᑎᐸᐊᒪᓀ ᐙᐙᒡ ᒫᒋᒡ ᔔᓕᐊᓈᐱᔅᑯᔑᔥ᙮
ᒋᓴᔅ ᐁ ᑭᔅᑭᓄᐊᒫᑫᑦ ᐁᑳ ᑭᒋ ᐎᒋᐱᔑᑾᑎᓯᒫᒋᒃ ᐊᐌᓈᓇᒃ
27ᑭ ᑮ ᐯᑌᓇᐗᐤ ᐁ ᑮ ᐃᑣᓂᐗᒃ ᑳᔮᔥ, ᐁᑳᐎᓚ ᑭ ᑳ ᐱᔑᒀᑎᓰᓐ: 28ᒫᑲ ᓂᓚ ᑭᑦ ᐃᑎᓇᐗᐤ, ᐊᐌᓇ ᑫ ᑲᓇᐙᐸᒫᑴ ᐃᔅᑴᐗ ᐁ ᐎ ᐎᒋᐱᒪᔑᒫᑦ, ᐋᔕᔾ ᑮ ᐎᒋᐱᔑᒀᑎᓯᒣᐤ ᐅᑌᐃᒃ᙮ 29ᑮᔥᐱᓐ ᒫᑲ ᑭᔥᑭᔑᒃ ᐗᓂᑐᑕᒥᐃᑯᔭᓀ, ᐗᓚᐎᐱᑕ, ᐌᐱᓇ ᒫᑲ: ᐌᓴ ᐊᐙᓯᑌ ᒥᓨᔑᓐ ᐯᔭᒃ ᑭᔥᑭᔑᒃ ᑭᒋ ᓂᔑᐗᓈᑕᒃ, ᐁᑳ ᒫᑲ ᒥᓯᐌ ᑭᔭᐤ ᒪᒋᐃᔥᑯᑌᒃ ᑭᒋ ᐃᔑ ᐌᐱᓂᑳᑌᒃ᙮ 30ᑮᔥᐱᓐ ᒫᑲ ᑭ ᑭᒋᓂᔉ ᐗᓂᑐᑕᒥᐃᑯᔭᓀ, ᒪᓂᔕ, ᐌᐱᓇ ᒫᑲ; ᐌᓴ ᐊᐙᓯᑌ ᒥᓨᔑᓐ ᐯᔭᒃ ᑭᒋᒋ ᑭᒋ ᓂᔑᐗᓈᑕᒃ, ᐁᑳ ᒫᑲ ᒥᓯᐌ ᑭᔭᐤ ᒪᒋᐃᔥᑯᑌᒃ ᑭᒋ ᐃᔑ ᐌᐱᓂᑳᑌᒃ᙮
ᒋᓴᔅ ᐁ ᑭᔅᑭᓄᐊᒫᑫᑦ ᐊᐌᓇ ᐁᑳ ᑲᒋ ᐌᐱᓈᑦ ᐎᐗ
(ᒫᑎᐤ 19:9; ᒫᕐᒃ 10:11–12; ᓘᒃ 16:18)
31ᑭ ᐃᑣᓂᐗᓐ, ᐊᐌᓇ ᑫ ᐌᐱᓈᑴ ᐎᐗ, ᐁᑯᔑ ᑲᑕ ᒥᓓᐤ ᒪᓯᓇᐃᑫᐎᓂᓕᐤ ᐁ ᐎᑕᒃ ᐁ ᐌᐱᓈᑦ: 32ᒫᑲ ᓂᓚ ᑭᑦ ᐃᑎᓇᐗᐤ, ᐊᐌᓇ ᑫ ᐌᐱᓈᑴ ᐎᐗ ᐱᑯ ᐱᔑᒀᑎᓯᐎᓂᓕᐤ ᐅᒋ, ᔑᑭᐁᐤ ᑭᒋ ᐱᔑᒀᑎᓯᓕᒋ: ᐊᐌᓇ ᓀᔥᑕ ᑫ ᐎᑭᒫᑴ ᐊᓂᐃ ᑳ ᐌᐱᓂᒥᒋ ᑐᑕᒻ ᐱᔑᒀᑎᓯᐎᓂᓕᐤ᙮
ᒋᓴᔅ ᐁ ᑭᔅᑭᓄᐊᒫᑫᑦ ᐁᑳ ᑭᒋ ᑭᒋᐃᑗᑦ
33ᒥᓇ, ᑭ ᑮ ᐯᑌᓇᐗᐤ ᐁ ᑮ ᐃᑣᓂᐗᒃ ᑳᔮᔥ, ᐁᑳᐎᓚ ᑭ ᑳ ᑭᓛᔅᑭ ᑭᒋᐃᑣᓐ, ᒫᑲ ᑭ ᑳ ᑎᐱᑐᑕᒪᐗᐤ ᐅᑎᐯᓕᒋᑫᐤ ᑭ ᑭᒋᐃᑗᐎᓇ; 34ᒫᑲ ᓂᓚ ᑭᑦ ᐃᑎᓇᐗᐤ, ᐁᑳᐎᓚ ᐎᔅᑳᑦ ᑭᒋᐃᑗᒃ; ᐁᑳ ᑭᒋᑭᔑᒃ ᐁ ᐊᔅᐱᒧᔦᒃ, ᐌᓴ ᐁᐗᑴᓕᐤ ᑭᒋᒪᓂᑐ ᐅᑦ ᐅᑭᒪᐗᐱᐎᓐ; 35ᐁᑳ ᓀᔥᑕ ᐊᔅᑭ, ᐌᓴ ᐁᐗᑴᓕᐤ ᐅᑦ ᐊᔅᐱᔑᑌᔑᒧᐎᓐ; ᐁᑳ ᓀᔥᑕ ᒋᕉᓴᓚᒻ, ᐌᓴ ᐁᐗᑴᓕᐤ ᑫᔅᑎᓯᑦ ᑭᒋᐅᑭᒪᐤ ᐅᑦ ᐃᑖᐎᓐ: 36ᐁᑳᐎᓚ ᑭᔅᑎᒀᓐ ᑭ ᑳ ᐊᔅᐱᒧᓐ, ᐌᓴ ᓇᒪᐎᓚ ᑭ ᑲᔥᑭᑖᓐ ᑭᒋ ᐙᐸᑖᔭᓐ ᓀᔥᑕᐱᑯ ᑭᒋ ᒪᑲᑌᐎᑖᔭᓐ ᐯᔭᒃ ᑭᔅᑎᑾᓂᐱᐌ᙮ 37ᒫᑲ ᐅᒪ ᐃᔑ ᑭ ᑳ ᐃᑣᓇᐗᐤ ᐁ ᐋᔭᒥᐃᑐᔦᒃ, ᐁᐁ, ᐁᐁ; ᓇᒪᐎᓚ, ᓇᒪᐎᓚ: ᐌᓴ ᑫᒀᓐ ᐊᐙᓯᑌ ᐁ ᐃᑣᓂᐗᒃ ᐃᔥᐱᔥ ᐅᒪ ᐁ ᒫᓛᑕᒃ ᐅᒋᐸᓕᐤ᙮
ᒋᓴᔅ ᐁ ᑭᔅᑭᓄᐊᒫᑫᑦ ᐁᑳ ᑭᒋ ᓇᔅᑯᒃ ᒪᒋᑐᑖᑲᐎᔦᒃ
(ᓘᒃ 6:29–30)
38ᑭ ᑮ ᐯᑌᓇᐗᐤ ᐁ ᑮ ᐃᑣᓂᐗᒃ, ᒦᔅᑭᔑᒃ ᒦᔅᑯᒡ ᒥᔅᑭᔑᒃ, ᓀᔥᑕ ᒥᐱᑦ ᒦᔅᑯᒡ ᒥᐱᑦ: 39ᒫᑲ ᓂᓚ ᑭᑦ ᐃᑎᓇᐗᐤ, ᐁᑳᐎᓚ ᓇᔅᑯᒃ ᐁ ᒪᒋᑐᑖᑲᐎᔦᒃ: ᒫᑲ ᐊᐌᓇ ᐅᑕᒪᐅᔅᑫ ᑭ ᑭᒋ ᑲᓄᐙᒃ, ᑴᔅᑮᔅᑴᓖᔅᑖᒃ ᓀᔥᑕ᙮ 40ᑮᔥᐱᓐ ᒫᑲ ᐊᐌᓇ ᐃᑐᑕᐃᔅᑫ ᐅᑎᔥᑲᐤ ᐅᑎᐹᔅᑲᓂᑫᐤ, ᐎ ᐅᑎᓇᑫ ᓀᔥᑕ ᑭ ᐊᑯᐅᓂᓕᐤ, ᑳᔮᒻ ᑲᑕ ᐋᔭᐤ ᓀᔥᑕ ᑭᑦ ᐊᑾᓂᐎᓂᓕᐤ᙮ 41ᐊᐌᓇ ᒫᑲ ᐎ ᔖᑲᒋᒥᔅᑫ ᑭᒋ ᐎᒉᐗᑦ ᐯᔭᒃ ᑎᐹᔨᑲᓂᓕᐤ, ᑳᔮᒻ ᐎᒉᐤ ᓂᔓ ᑎᐹᔨᑲᓇ᙮ 42ᒦᓪ ᐊᐌᓇ ᑳ ᓇᑐᑕᒫᔉ, ᐊᐌᓇ ᒫᑲ ᐙ ᐗᓯᒥᔅᑭ ᑫᒀᓕᐤ ᐁᑳᐎᓚ ᐋᓉᑕᐤ᙮
ᓵᑭᐃᑯᒃ ᐊᓂᑭ ᑳ ᐸᒀᑎᑖᑾᒃ
(ᓘᒃ 6:27–28, 32–36)
43ᑭ ᑮ ᐯᑌᓇᐗᐤ ᐁ ᑮ ᐃᑣᓂᐗᒃ, ᑭ ᑳ ᓵᑭᐊᐤ ᑮᒋᐃᓕᓕᐤ, ᑭ ᑲ ᐸᑾᑕᐤ ᒫᑲ ᑳ ᐸᒀᑎᔉ: 44ᒫᑲ ᓂᓚ ᑭᑦ ᐃᑎᓇᐗᐤ, ᓵᑭᐃᑯᒃ ᐊᓂᑭ ᑳ ᐸᒀᑎᑖᑾᒃ, ᒥᓦᑭᒥᑯᒃ ᐊᓂᑭ ᑳ ᒪᒐᑭᒥᑖᑾᒃ, ᒥᓗᑐᑖᑯᒃ ᐊᓂᑭ ᑳ ᐗᑳᑎᑖᑾᒃ, ᓀᔥᑕ ᐋᔭᒥᐁᔅᑕᒫᑯᒃ ᐊᓂᑭ ᑳ ᓇᓀᑳᒋᐃᑖᑾᒃ ᓀᔥᑕ ᑲᒀᑕᑭᐃᑖᑾᒃ; 45ᑭᒋ ᐅᑦ ᐊᐙᔑᒥᔑᒥᑖᒃ ᑯᑖᐎᐗᐤ ᑭᒋᑭᔑᑯᒃ ᑳ ᐃᑖᑦ: ᐌᓴ ᐎᓚ ᑐᑕᐌᐤ ᐱᓯᒶ ᑭᒋ ᒐᑳᓯᑫᔅᑕᐙᓕᒋ ᐅᒪᒋᑡᐗ ᓀᔥᑕ ᐅᒥᓗᑡᐗ, ᐃᔑᑎᔕᐊᒪᐌᐤ ᒫᑲ ᑭᒋ ᑭᒥᐗᓂᓕᒃ ᐅᒀᔭᔅᑭᑎᐗ ᓀᔥᑕ ᐅᒪᒑᑎᓯᐗ᙮ 46ᐌᓴ ᑮᔥᐱᓐ ᐱᑯ ᓵᑭᐁᑾᐌ ᐊᓂᑭ ᑳ ᓵᑭᐃᑖᑾᒃ, ᑫᑯ ᑎᐸᐊᒫᑯᓯᐎᓐ ᐁᔮᔦᒃ? ᓇᒪ ᓈ ᐅᒪ ᐃᔑ ᑐᑕᒶᒃ ᐸᑉᓕᑳᓇᒃ? 47ᑮᔥᐱᓐ ᓀᔥᑕ ᑕᒥᔅᑲᐌᑾᐌ ᑭᒋᔖᓂᐙᐗᒃ ᐱᑯ, ᑫᒀᓐ ᐊᐙᓯᑌ ᑎᐅᑕᒣᒃ ᐃᔥᐱᔥ ᑯᑕᑭᔭᒃ? ᓇᒪ ᓈ ᐅᒪ ᐃᔑ ᑐᑕᒶᒃ ᐸᑉᓕᑳᓇᒃ? 48ᐁᐗᑯ ᐅᒋ ᒥᑐᓂ ᒥᓨᑎᓰᒃ, ᑖᐱᔅᑯᒡ ᑯᑖᐎᐗᐤ ᑭᒋᑭᔑᑯᒃ ᑳ ᐃᑖᑦ ᐁ ᐃᔑ ᒥᑐᓂ ᒥᓨᑎᓰᑦ᙮
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ᐅᐸᓓᑭᔅ ᒫᑎᐤ 5: MCNT91
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
