Yokana 12
12
1 #
Mat 26:6-13; Mk 14:3-9. Kosodi esalito apaarasia akanykape eriŋa edoluno Aleleŋ, kobu Yesu Betaniya, nekejai Lasaro, lokitajaruni Yesu kotoma okatwak. #Yok 11:1,43.
2 #
Luk 10:40. Kitemokinoi epucit kanen; kijaanak Marita, konye kerai Lasaro ediopet kalukemorete kaŋes. 3#Luk 7:38. Kosodi kolem Mariam elatiri loka akinyet naelai naka etiai loepol, kinyonyoanak akeje nuka Yesu, konina akekeje kitimake; kilelebun aures naka akinyet etogo kere, 4Konye kobala Yuda Isikariot, ediopet kokesisiakake, loekoto abilakin ŋes ebotet, ebe, 5“Kanukinyo mam egwelarere akinyet na adenarin akwat auni, koinakinai lukican?” 6#Luk 8:3. Kinera nu mere kanu etimitor lukican; konye naarai kerai ekokolan, ŋes etiŋenenei eriagi koyaŋanar nukibwaanakinio toma. 7Kosodi kotema Yesu atiar, “Kinyeisi ŋes, kiŋadak kanuka apaaran naka aidaioka, 8#Ikis 15:11. Naarai ejaas lukican nenipe kayes apaarasia kere, konye eoŋ mam kija kayes apaarasia kere.”
9Kosodete kejenut luipu koYudayan ebe ejai ŋina; kopotu kesi, mere kanuka Yesu bon, dimarai aanyun Lasaro da, lokitajaruni ŋesi kotoma okatwak. 10Konye kinerut isasedotin lupeti aiar Lasaro da; 11naarai kanukeŋ apotu luipu koYudayan kotiakas, kiyuut Yesu.
12 #
Mat 21:1-11; Mk 11:1-10; Luk 19:29-40. Apaaran naatupakini kiira ekodet loepol loabunit kanuka epucit ebe ebuni Yesu Yerusalem. 13#Sab 118:25,26. Kogweununut atenieik nuka amusogon, kolomasi aisiriam ŋes, kiworoto ebe, “Kosana! Isirereŋitoi ŋol loebunit kokiror loka Ejakait, Ekabaka loka Isirael!” 14#Sek 9:9. Adumunit Yesu ikoku yenika asigiria, kibwanen; kwape iwadikatere ebe,
15“Sirikikurianar, ijo akoku naka Sion;
Koany ebunit Ekonikabaka,
Ibwanenit ikoku yenika asigiria.”
16 #
Yok 7:39. Mam ber ikekesisiak apotu kojenut ŋun: konye kedau Yesu aitopoloorio, ŋes konyet kiitunioto ebe iwadikatai ŋun kanukeŋ, eswamakis da ŋes ŋun. 17Kitejen ekodet lokejai kaŋes nakenyaraunia Lasaro alomun kates, kitajaru da ŋes kokatwak. 18Kanuka ŋun kolot ekodet aisiriam ŋes naarai apotu kiirasi ebe eswamat aanyunet ŋin, 19#Yok 11:48. Kineranakinos Iparisayon bonik ebe, “Koanyutu mam ipedorete ibore; koany, atupasi ŋes lukakwapin kere.”
20 #
Yok 7:35; 11:55. Kejaas Iyonanin ice kotoma kalukedokarito aima kopucit, 21#Yok 1:44; Luk 19:3; 23:8. Aso koloto ŋul mama ejai Pilip, etuŋanan loko Betesaida loko Galilaya, kilipata ŋes ebe, “Ejakait, kikoto isio aanyun Yesu.” 22Kolot Pilip kolimok Anderea; kouparos Anderea ka Pilip, kolimokis Yesu. 23Koboŋok Yesu kes ebe, “Adol esawa kitopolooroi Okoku loka etuŋanan, 24#Rom 14:9; 1 Kor 15:36. Abeit, abeit, katemari yes atiar, Arai mam ecokat loka akimait edoi kwap kotwani, esalit ikoni nepenen; konye arai ketwana, erai araito nuipu. 25#Mat 10:39; Luk 14:26; 17:33. Yenemina akeijar itooliori; ka yenelait akeijar kakwapin kanu idari kiton aijar naka ikar kere. 26#Yok 14:3; 17:24. Arai kejaanakini ituŋanan eoŋ, katup; neajai eoŋ ejauni ikakejaanakinan da nepenen; arai kejaanakini ituŋanan eoŋ, itopoloori Papa ŋes.
27 #
Sab 6:3; 42:5; Mat 26:38. “Kwana ekadakinit ekatau; atemari ai? Papa, koyuunai kosawa kalo. Konye kanuka ŋun abu kadol osawa lo. 28#Yok 1:51; 5:37; Mat 3:17; 17:5. Papa, kitopoloo ekonikiror.” Kosodi kobu eporoto kotoma akuj ebe, “Etopolo, ido etopoloori bobo.” 29#Luk 22:43. Nakiiraria ekodet lokebwoi kanen kobalas ebe Eretu akuj; kobalas ice ebe, “Emalaika enerata kaŋes.” 30#Yok 11:42. Koboŋok Yesu kotema atiar, “Mam ebunit eporoto lo kanukaŋ, konye kanukus. 31#Yok 14:30; 16:11; Luk 10:18. Atubokin kwana akwapin nu akiro: ereŋear kwana ekapolon loka akwapin kanu. 32#Yok 8:28. Eoŋ da arai keekiar kakwap, eriari ituŋa kere mamakaŋ.” 33Konye kinera nu itodikini aketwanare naetwani. 34#Sab 110:4; Isa 9:7; Dan 7:14. Koboŋok ekodet kotema ŋes atiar, “Kiirarit isio kotoma okisila ebe ebusi Kristo ikar kere: ikwaikini ai ijo inera ebe ibusakinit Okoku loka etuŋanan aikiario? Iŋai bo ŋol erai Okoku loka etuŋanan?” 35#Yok 8:12; 9:5; 11:10. Kotema Yesu kes atiar, “Eroko aica ejai kayes apak naedit. Koloto yesi eroko aica ejai kayes, kinye amuton adolokin yes; ŋin yenelosi kamuton mam ejeni neelosi. 36#Pes 5:8; Mat 23:39. Eroko aica ejai kayes, kiyuutu aica ŋin, tetere iraunete idwe luka aica.”
Kiner Yesu ŋun, konyou kamakec koŋop. 37Karaida abu kiswama aanyuneta nuipu noi kakonyenekec mam apotu kiyuut ŋes; 38#Isa 53:1; Rom 10:16. tetere edoli akirot naka enabi Isaia nakinerit ebe, “Ejakait, iŋai eyuunit akosikirot? Iŋai da epukokinitai akan naka Ejakait?” 39#Isa 6:9,10; Mat 13:14,15. Kanuka ŋun ŋes mam kiyuuniata naarai enerit bobo Isaia ebe,
40“Etumudak akecekonye, etininik ikecetauon,
Kinyeis aanyun kakecekonye, kojenut kotauonokec,
Ka aibelokin, ketaŋaleu kes.”
41 #
Isa 6:1. Kinera Isaia akiro ŋun naarai abu koany aibusesuke, kolimo akiroke. 42#Yok 7:48; 9:22. Konye kiton ikayaitok da kiyuut ŋes luipu; konye kanuka Iparisayon mam apotu kolimosi, kinyeis aireŋeario katukos: 43#Yok 5:44. naarai keminasi aibuses naka ituŋa aitelekarit aibuses naka Edeke.
44 #
Mat 10:40. Kiworo Yesu kobala ebe, “Ŋin yenikeyuunit eoŋ, mam keyuunit eoŋ, dimarai je lokejukuni. 45#Yok 14:9. Yenikaanyuni eoŋ, eanyuni je lokejukuni, 46#Yok 8:12; 12:35. Abu eoŋ kabu araun aica toma akwapin, tetere ŋin yenikeyuunit mam esalakini amuton, 47#Yok 3:17; 8:15; Luk 9:56. Arai kiira ituŋanan akakiro, komam erici, mam eoŋ atubokini ŋes; naarai mam eoŋ abunit atubokin akwapin, dimarai aitajar akwapin. 48#Bur 4:12; Apu 19:15. Yenikaŋeri eoŋ, yenimam ecamuni akakiro, ejai ekatubokinanike: akirot naenerit, ŋes etubokini kapaaran nakawasia. 49Naarai mam eoŋ enerit kanukaŋ bon; konye Papa lokejukuni kainakinit aicorakinet, nuatemari ka nuenera da. 50#Yok 8:26,28. Ajeni ebe akeicorakinet erai aijar naka ikar kere: aso akiro nuenera eoŋ, kwape kalimokinitor Papa, kwape kwaŋin enerar.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yokana 12: AOV1961
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.
