Luke 4
4
1နောက်လောင်နော့် စောင့်ယေရှုန တောင်းဉာဏ်အလင်းတော်တောင်း အူနွေ့ဟင်းဆီ ဆီမေဟွေ့ဂျော်ဒန် ပေါက်မားကော်လော့် ဉာဏ်အလင်းတော်န အောင်းစမွန်း ဦးဆောင်ဆီ ဟောင့်ကွာကော် ခနောဝ်ထိန်လုန်ကော်ဝိုက်။ 2မွန်းန အောင်းမာရ်နတ်နှောက်ယှက် ဟူဝမ်းမွန်းဆီဆစ်(ပ်)ပွန့် ခမ်ရောင့်(ဝ်) မေဝမ်းဟောန့်လေ မွန်းန အဟောင်းကော့်မကျဉ်းဆီ အူဝိုက်။ ဝမ်းဟောန့်လေပွန့်ကော်လော့် မွန်းစောင့်ယေရှုကော့် တောင့်မိုက်မားကော်ဝိုက်။ 3မာရ်နတ်တ အောင်းစောင့်ယေရှု "မောလ ပေါပေးလုစိုင်းစောင့်ဖလားဟောင်ပေါဝါလော့် အောင်းကောင့်(န်)ဟဉ်ဟိုက် တော်ပေါပေးခေါင့်(ဝ်)မွမ်း စမ်းဟေနူ" ဆီ ဝါကော်ဝိုက်။ 4တော်နယ့် မွန်းစောင့်ကော့် အောင်းပါခနောဝ်လိကျမ်းန "ကွန်းလေန အောင်းကျဉ်းတူးနိမ်အင်တောင်း အဆတ်ခွန်းမစော်ဆီ တင့်(မ်)ဝိုက်"ဆီ ဝါကော်ဝိုက်။ 5နယ့်ရောင့်(ဝ်) မာရ်နတ်တ အောင်းစောင့်ယေရှု ဟောင့်ကွာကော် ရာနေနွဲဆွန်ဆီ အောင်းရောင်းမှိန်းခနေကမ္ဘာဟိုင့်လေတောင်းလုန် အောင့်အောင့်အင်တောင်း ပြားဟောင့်(ဝ်)ကော်ဝိုက်။ 6မာရ်နတ်တ "အောင်းကော အောင်းဟောင့်(ဝ်)ဝိုက် အစွမ်းလေတောင်းလုန်တောင်း စည်းစိမ်လေတောင်းလုန် အောင်းကွန်းကောခဟောင့်(ဝ်) ဟောင့်(ဝ်)ဆီနွိုက်ညော့ အောင်းမောကောတဟောင့်(ဝ်)။ 7ကောပ့်နယ့်ညော့ အောင်းကော ဟောင်ပေါဝိုင်(ယ်) အောင်းမော အောင်းဟိုင့်လေတောင်းလုန် တဟောင့်(ဝ်)" ဆီ ဝါကော်ဝိုက်။ 8တော်နယ်ကော့် စောင့်ယေရှုလ "ရာခနောဝ်လိကျမ်း အောင်းစောင့်ဖလားမောနဲဟော် တနယ့်ဝိုင်(ယ်)ဟော။ အောင်းသာသနာတော်စောင့်ဖလားနဲဟော် တနယ့်ဟေဟောဆီ တင့်(မ်)ဝိုက်"ဆီ အောင်းမာနရ် ဖြေပေါက်ကော်ဝိုက်။ 9နောက်ဆုံးနော့် မာရ်နတ်တ အောင်းစောင့်ယေရှု ဟောင့်ကွာကော်ရာမှိန်းဂျေရုဆလင်ရောင့်(ဝ်) ရာဗိမာန်တော် ရာနေရာအောင်းချဉ်းဆွန် ဝိုက်ဆီ "မောလ လုစိုင်းစောင့်ဖလားဟောင်ပေါစော် ဆီမေဟိုက် ဝင်တိုကော်။ 10ခနောဝ်လိကျမ်း စောင့်ဖလားလ အောင်းစမော ဟတွဲနွေ့ဆီ ဆောင်ဝိုက်အောင်းဖီလေညော့ မောအောင်းတစေမစော်။ 11တဉ်းမောလေန တောင်းကောင့်ဟဉ်တောင်း ထိမေကော့် ဟပေါမစေ ဖီလေန တောင်းမေးမနော်တောင်း တအွန့်(မ်)ဝိုက်"ဆီ ဝါကော်ဝိုက်။ 12မေနယ့်လော့် စောင့်ယေရှုန "ခနောဝ်လိကျမ်း အောင်းစောင့်ဖလား မနယ့်စမ်းဆီ ဝါဝိုက်"ဆီ ဝါပေါက်ကော်ဝိုက်။ 13နောက်လောင်နော့် မာရ်နတ်လုန်ကော့် အောင်းစမွန်း အမျိုးမျိုး စမ်းရောင့်(ဝ်)ကော်လော့် ဆီမေစောင့်ယေရှု အောက်ကော်ဆီ နောက်လောင်နော့် ထအချီန်နီးကော်ဝိုက်။ 14နောက်လောင်နော့် မွန်းစောင့်န တောင်းဉာဏ်အလင်းတော်တောင်း တေး(မ်)ဆီ ကြွပေါက် မှိန်းဂါလိလဲကော်ဝိုက်။ သတင်းမွန်းစောင့်ကော့် ရာမှိန်းဂါလိလဲဟောန့် ပျံ့ဟောကော့်ဝိုက်။ 15မွန်းစောင့်ယေရှုန ရာစလပ်ဟောန့်ကွာလောင်(ဝ်)ပြားမောက်ပြားကော်လော့် ကွန်းတောင်းလုန်န ကောပ့်မွန်းလောင်(ဝ်)ပြားဆောန်ပြားညော့ အောင်းမွန်း အိုက်ရောဟင်းကော်ဝိုက်။ 16နောက်လောင်နော့် စောင့်ယေရှုန အောင်းပေးမှိန်းမွန်းလိမ့် ရာမှိန်းနာဇရက် ပေါက်ဟုန်းမားကော်ဝိုက်။ ဝမ်းဥပုလော့် မွန်းန ရာတလားစလပ်လေ နောင်မွန်းကွာ နောင်မေစောင့်ညော့ ကွာဝိုက်။ ရာနေရာဟောန့် မွန်းန ဟပေါနယ့်ဖတ်လိကျမ်း စိန်ကော်ဝိုက်။ 17နောက်လောင်နော့် အောင်းမွန်းစောင့် အောင်းဖွန်လိပရောဖက်ဟေရှာယကျမ်း ဟောင့်(ဝ်)အောင်းမွန်းကော်လော့် မွန်းန အောင်းဖွန်လိကျမ်း ပူဆီဖတ်ကော်ဝိုက်။ 18အောင်းကွန်းစမ်းစောင်း(ဝ်)၊ ကွန်းဖန်လေ သတင်းအောင်းနီးလေ ဟပေါနယ့်လောင်(ဝ်)ဆီ စောင့်ဖလားလ လိတ်မားအောင်းကောဝိုက်။ ကွန်းအပြစ်ရောင်းကော့် ဟပေါလောက်(ဝ်)၊ ကွန်းဟွေတားမဟောန်လေကော့် ဟပေါနယ့်ဟောန်၊ ကွန်းနယ့်ခမ်အောင်း ပေနိစပ်ကော့် ဟပေါနယ့်ကယ်ဆီ ပွယ်မားအောင်းကောဆီ ဝါကော်ဝိုက်။ 19အချီန်ဟိုက်လ စောင့်ဖလားန ပေးအချီန်ပြား အောင်းမဟာဂရုဏာမွန်းဝိုက်။ 20မွန်းစောင့်လ အောင်းဖွန်လိကျမ်းဟိုက် ဖတ်ရောင့်(ဝ်) လှမ်းပေါက်ဆီ ရာကွန်းတာဝန်ရောင်း ဟောင့်(ဝ်)ပေါက်ရောင့်(ဝ်) နောင်ကော်ဝိုက်။ မေနယ့်လော့် ကွန်းရောင်းခနောဝ်စလပ်ဟိုက်လေန တွဲအောင်းစမွန်းစောင့်ဟင်းကော်ဆီ ထောင်(မ်)အောင်းမွန်းစောင့် တန့်ဟင်းဝိုက်။ 21နောင်နယ့်ရောင့်(ဝ်) "ဝမ်းနယ့် အောင်းမဆူနယ့်ဟဉ်းလေန ပေးအောင်းတဲ့တဲ့မားကော်"ဆီ ဝါကော်ဝိုက်။ 22ကွန်းနယ့်ဟဉ်းအောင်းစောင့်ယေရှုဝါလေန အမ်းဟင်းကော်ဝိုက်။ မနော်လေန ဆီမေပါတ်မွန်း အောင်းအောက်မား အောင်းခွမ်းလေအမ်းဟင်းဆီ ကွန်းကမ့်ဖောင်လေန "မွန်းန လုစိုင်းယောသပ် မစော်လေး"ဆီ တန့်ဟင်းကော်ဝိုက်။ 23မွန်းစောင့်ကော့် "အောင်းသေချာလ စောင့်ထိုးရန အောင်းမွန်းတောင်းမွန်း တနယ့်ရားအောင်းတိုင်းဆီ မဆူတဝါဟင်းအောင်းကော။ အောင်းကောဟေမား ရာမှိန်းကပေရနောင်ဟောန့် မဆူနယ့်ဟဉ်းကော်လော့် ရာမန့်ဟောမှိန်းဟောကော့် နောင်နောင့်ဆီ တဟဟေဟင်း။ 24တော်နယ့် ကောတနယ့်ဝါအောင်းစော် အောင်းမဆူပေါဝါလော့်၊ အောင်းပရောဖက်ထောကော့်ခရောင့်(ဝ်) ကွန်းမန့်မွန်း မှိန်းမွန်းလေန အောင်းတလက်ခံဟင်းမစော်။ 25တော်နယ်ကော့် မေခေတ်ဧလိယကော့် ရာမန့်မနော် တော်ဆမ်ပီးပိုင်းပွန့် ဖုန်မတို။ မန့်၊ မှိန်းလေတောင်းလုန် ကိုင်ခေါင့်(ဝ်)ကိုင်နမ့်ဟင်းဝိုက်။ ရာမှိန်းအစ္စရေးကော့် မယ်ဟန့်လေ မကျေးလေမစော် ရောင်းဝိုက်။ 26တော်နယ်ကော့် စောင့်ဖလားန အောင်းစဧလိယ ပွယ်ကော် ရာခန့်မှိန်းဇိဒုန် ရာမှိန်းဇရတ္တဟောန့်ဆီ ဟကွာရာမယ်ဟန့်ကော်နိမ်ကော်ဝိုက်။ 27မေခေတ်ပရောဖက်ဧလိရှဲန ခနောဝ်ကွန်းအစ္စရေးလေန ကွန်းပေးရောဂါလေ မကျေးလေမစော်ရောင်းဝိုက်။ တော်နယ့် ကွန်းမှိန်ဆီးရီးယား နေမန်ဟော် ရားခွင့်နွိုက်ဆီ ဟိုင်ဟော အောင်းကျန်န ဖောကော့် ရားခွင့်မနွိုက်ဟင်း"ဆီ ဝါကော်ဝိုက်။ 28ကွန်းရောင်းရာစလပ်တောင်းလုန်ကော့် နယ့်ဟဉ်းခွမ်းစောင့်ယေရှုကော်လော့် အိုက်ခထားဟင်းကော်ဝိုက်။ 29မနော်လေန စိန်ဟင်းဆီ အောင်းစမွန်း ဆီမေမှိန်းဟောန့် ဟပေါအောက် ဟေဟင်းကော်ဝိုက်။ အောင်းစမွန်းစောင့် အောင်းရောင်းရာခနောက်မှိန်း ခထောတိုဟွေ့ညော့ ဟောင့်ကွာဟင်းကော်ဝိုက်။ 30တော်နယ့် မွန်းစောင့်ကော့် ဆီမေခနောဝ်ကြားကွန်းလေန မွန့်အောက်ဆီ နောင်ခွန်တန်းမွန်းအတိုင်း ပိုင်းအောက်မားကော်ဝိုက်။ 31နောင်လောင်နော့် စောင့်ယေရှုလ ရာစယ်ဂါလိလဲ ရာမှိန်းကပေရနောင် ထီန်ကော်လော့် ဝမ်းဥပုလေန အောင်းကွန်းဖွန်လေ လောင်(ဝ်)ပြား၊ မောက်ပြားကော်ဝိုက်။ 32မွန်းစောင့်လ တောင်းအစွမ်းလေတောင်းဆောန်ညော့ ကွန်းလေကော့် ကျေနပ်ဟင်းဝိုက်။ 33ရာစလပ်ဟောန့် ကွန်းနယ့်ခမ် ဖီမနီးပူးကော်နိမ်န စေကြမ်းကြမ်းဆီ အောင်းမွန်းစောင့် 34"ကွန်းမှိန်းနာဇရက်ယေရှု၊ မောလာဟေဟောင်း အောင်းစကော။ အောင်းစကော ခဖျတ်စီးဆီ မောမားလေး။ မောလ ဖောဝါလ ကောဟု။ မောလ ပေးလုစိုင်းစောင့်ဖလားအောင်းချဉ်းမြတ်ကော်နိမ်"ဆီ ဝါကော်ဝိုက်။ 35မေနယ်လော့် မွန်းစောင့်ကော့် အောင်းဖီမနီး "ရိန်းစမ့်စမ့်အူဆီ၊ ဆီမေကွန်းဟိုက်အောက်ကော်"ဆီ ဟောင့်(ဝ်)အမိန့်ကော်နွေဆပ် ဖီမနီးကော့် အောင်းကွန်းဟောန့် ခနာ့ကွန်းလေ ခနေနောင်နဉ်း လုမ့်ကော်ရောင့်(ဝ်) မဟစေဆီ အောက်ကွာကော်ဝိုက်။ 36ကွန်းရောင်းရာစလပ်လေကော့် အိုက်အမ်းကော်ဆီ "ခွမ်းကွန်းဟိုက်လ နောင်နူးနာ့ ဆီမေရာမွန်း အောင်းဖီမနီးလေ ဆီမေကွန်း အောင်းဟော့်အောက်ပဲ့ အစွမ်းလေရောင်းဝိုက်"ဆီ အချန်းချန်း တန့်ဟင်းကော်ဝိုက်။ 37နောင်နယ့်ရောင့်(ဝ်) သတင်းဟိုက်လ တောင်းမှိန်းမှိန်း ပျံ့ကော်ဝိုက်။ 38မွန်းစောင့်ကော့် ဆီမေစလပ်အောက်ဆီ ကြွကော်ရာဟုန်းရှိမုန်ဟော်ကော်ဝိုက်။ မေနယ့်လော့် မယ်စောင့်(ဝ်)ရှိမုန်လ အိုက်ခိုင့်နောဝ်ဝိုက်။ ကွန်းအောင်းရာင်းရာနေရာဟောန့် ကွန်းမောင်းဖောင်လ အောင်းစောင့်ယေရှု အောင်းမွန်းဟပေါရားဟောင့်(ဝ်) ဝါဟင်းကော်ဝိုက်။ 39မွန်းစောင့်ကော့် ကွာစူးရာမွန်းဆီ အောင်းခိုင့်နောဝ်ဟပေါဟိုင် ဟော့်အောက်ကော်ဝိုက်။ မွန်းကော့် ချရှ်ချန်းအောင်းမွန်းခိုင့်နော်(ဝ်)လ ဟိုင်ဆီ အောင်းစမွန်းစောင့်တောင်းတပဲ့မွန်းလေ ခေါင်ကျဉ်းလေတောင်း လိမ့်ပဲ့ကော်ဝိုက်။ 40မေဝမ်းခမ်နာ့မောင်မားကော်လော့် အောင်းကွန်းပေးရောဂါအမျိုးမျိုးတောင်းလုန် တော့်မားရာမွန်းစောင့် ဟင်းကော်ဝိုက်။ မွန်းစောင့်ယေရှုန အောင်းကွန်းရီကော့်စီ တောင်းမေးမွန်းတောင်း တန်ဆီ တော်ပေါဟိုင် ရားဟောင့်(ဝ်)ကော်ဝိုက်။ 41ဖီမနီးလေကော့် ဆီမေကွန်းမအူနီးလေ အောက်ဆီ "မောလ လုစိုင်းစောင့်ဖလား" ဆီ စေဟင်းကော်ဝိုက်။ ဟေဟောင်းဝါလ မနော်လေန ယေရှုလ မေရှိယဆီ ဟုဟင်းညော့ဝိုက်။ မွန်းစောင့်ယေရှုကော့် နောင်နယ့်ပီဟစေဆီ ဟောင့်(ဝ်)အမိန့်ကော်ဝိုက်။ 42နောင်ဝမ်းမဖု ဖလိန်းကော်လော့် မွန်းစောင့်လ အောက်ကော်ရာတန်းတီကော်ဝိုက်။ ကွန်းဖွန်လ စောင်း(မ်)ခါဆီ ခေါက်(ပ်)ဟင်းကော်လော့် ဟပေါမကွာရာတန်းတီ တောင်းပန်ဟင်းကော်ဝိုက်။ 43တော်နယ့် မွန်းစောင့်လ "မှိန်းအောင်းကျန်တန်းတီလေကော့် အကြောင်းသာသနာစောင့်ဖလားတနယ့်ဟောအွန်။ ကောပ့်နယ့်တောင်းဆီ ပွယ်မားအောင်းကောလ"ဆီ ဝါကော်ဝိုက်။ 44နောက်လောင်နော့် မွန်းစောင့်ယေရှုလ ရာစလပ်အောင်းရောင်းရာမှိန်းယုဒဟောန့် ဆက်ဆီ ဟောတလားကော်ဝိုက်။
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luke 4: ttpv-rv
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
