Mateo 12
12
Ti Jesus U Panginoon nu Aldew nu Káimang
(Markos 2:23; Lukas 6:1-5)
1Essa Aldew nu Káimang#12:1 Basaan tu Exodo 16:23 tungkul Aldew nu Kaimang. nu Judio hide ay nagtaleb di Jesus tu bállog nu essa a katriguwan#12:1 U trigu ay kumán a pahay. Gagilingan de u bunga para magin harina.. Nagaláp u disepulus ni Jesus kaya nangalap hide tu bunga nu trigu sakay kinan de. 2Nikuna netan hide nu Pariseo hide ay kinagi de ni Jesus “Ilingán mo u gággimitán nu disepulus mo hide. Bawal ina tu Aldew nu Káimang.” 3Tinábbeg hide ni Jesus “Awan moy beman nabasa u ginimet ni David sakay tu kaguman na hide nikuna a nagaláp hide#12:3 Basaan tu 1 Samuel 21:1-6.? 4Sináddáp na u Tabernakulo#12:4 Basaan tu Exodo 26 ni anya u Tabernakulo. sakay kinan de u tinapay a inyalay tu Diyos. Bawal itod a kanán de ayun tu kautusun dipo u maari la a kuman hod ay u saserdote la hide. 5O awan moy beman a nabasa be tu Kasulatan a u saserdote ay magtarabaho tu Aldew nu Káimang pero awan hide nagkasala? 6Ikagi ku nikam a mas mataasák nan tu Templo. 7Awan moy nakwa hinatulan u awan ti kasalanan ni naintendiyan moy la u kinagi nu Diyos a ‘Gusto ko a kagbiyan moy u tolay hide, bakán a u alay moy nikán#12:7 Basaan tu Hoseas 6:6.’ 8Dipo hikán a Anak nu Tolay ay u Panginoon nu Aldew nu Káimang.”
Pinagpiyya Ni Jesus U Kamát Nu Tolay Tu Aldew Nu Káimang
(Markos 3:1-6; Lukas 6:6-11)
9Nadid linakaden ni Jesus u katriguwan sakay immangay siya tu sinagoga di hod. 10Hod ay naketa siya ti tolay a te essa a kamát a awan dán magahikad. Tinanung siya nu Pariseo hide tánni mabintang de siya “Maari wád tu Kautusan a magpapiyya tu te saket tu Aldew nu Káimang?” 11Tinábbeg na hide “Ni mara hikam ay neábbut u essa a tupa moy tu Aldew nu Káimang, awan moy beman iyawas u tupa moy tu ábbut? 12Mas mahalaga pa u tolay nan tu tupa. Kanya maari tu Kautusan a maggimet ti maganda tu Aldew nu Káimang.” 13Sakay kinagi na tu tolay “Iyolnat mo i kamát mowe.” Inyolnat ngane nu tolay u kamát na sakay nagpiyya, nagin kapareho nu essa na a kamát. 14Linumakad u Pariseo hide sakay namágguhonan de ni kodya de ti Jesus a bunuwán. 15Pero tukoy ni Jesus u pinalano de kanya linakaden na itod a lugar. Makpal a tolay u umunonod nikuna sakay pinagpiyya na u atanan a te saket nide. 16Inutusan na hide a dyan de siya ibábbaheta. 17Atananan iye ay nangyare para matupad u kinagi nu Panginoon tu tolay tu itod tu pamamag-itan nu propeta na a ti Isaias. 18U kinagi na ay “Sa iye u Utusan ko a napili ko. Mahal ko siya sakay siya u kinasayaan ko a tahod. Iyatád ko nikuna u Ispiritu ko sakay ibaheta na tu atanan a katolayan u hatul ko. 19Awan siya mákpagdima, awan be siya maghangtet. Awan siya magpalalo tu kakarsada. 20Awan na pahirapan u mágkahina hide sakay tulungan na u pinakabadit ti pag-asa, hanggan a magtagumpay u katarungan. 21Siya u pag-asa nu atanan a tolay.”
Binintang Ti Jesus nu Pariseo a Gábwat ni Satanas u Kapangyariyan Na
(Markos 3:20-30; Lukas 11:14-23)
22Nadid, te essa a tolay a hinayup a buhák sakay bulol pa be a inyangay de ni Jesus. Pinagpiyya ni Jesus u tolay kanya nakaupos sakay naketa dán. 23Nagtaka u atanan a tolay sakay kinagi de “Sa dáwwád iye u Anak ni David#12:23 Basaan tu Mateo 9:27?” 24Pero nikuna nasaneg iye nu Pariseo hide ay kinagi de “Kanya mapalayas na u demonyo hide dipo inatádden siya ti kapangyariyan ni Satanas.” 25Dipo tukoy ni Jesus u inisip de ay kinagi na nide “Ni u totolay tu essa a kahariyan ay maggurugurupo sakay mamáglaban hide ay sigurado a masida u kahariyan. Sakay ni u totolay tu essa a banuwan oni bilay ay mamáglaban ay siguradu be a awan hide magkaessa. Awan hide ti abután. 26Kanya ni palayasán ni Satanas ti Satanas ay kalabanán na u sadili na. Masida u kahariyan na. 27Kagi moy a nagpalayasák ti demonyo dipo inatáddinák ti kapangyariyan ni Satanas. Kodya nadid u disepulus moy hide? Nagpalayas be hide ti demonyo. Kaya hide u magpatunay ni tama u kinagi moy patungkul nikán. 28Pero ni nagpalayasák ti demonyo tu kapangyariyan nu Ispiritu nu Diyos ay nagpatunay ina a dumemát dán nikam u pághari nu Diyos. 29Awan mo masáddáp sakay mapagtakawan u bilay nu essa a makapangyariyan a tolay ni hanggan awan mo siya mapungo. Ni mapungu mu dán siya ay maari mu dán a mapagtakawan u bilay na. 30Ni deya u awan tumulung nikán ay kontra nikán sakay ni deya u awan tumulung nikán a magpaipun ti tolay ay magpaadeyo nide. 31Atanan a kasalanan oni pággupos ti madukás laban tu Diyos ay mapatawad pero u pággupos laban tu Banal a Ispiritu ay awan ti kapatawaden. 32Sakay ni ti deya man u magupos laban nikán a Anak nu Tolay ay mapatawad nu Diyos pero u magupos laban tu Banal a Ispiritu ay awan mapatawad, magin nadid a panahun oni tu demodyan a aldew.”
33Kinagi pa ni Jesus “U kayu ay matukuyan tu bunga na. Ni alagaan mo u kayu ay magin maganda u bunga na hide peru ni awan mu siya alagaan ay magin madukás u bunga na hide. 34Hikam ay kumán a makamandag a biklat. Kodya u mágkadukás a tolay a konna nikam maari a magupos ti maganda? Dipo ni ánya u pirmi hod tu puso moy ay itod labe u lumuwas tu labi moy. 35U mabait a tolay ay magupos ti maganda dipo maganda u he tu isip na. Sakay u makasalanan a tolay ay magupos ti madukás dipo madukás u he tu isip na. 36Ikagi ko nikam a panagutan moy u bawat upos moy a madukás tu Aldew nu Pághukom. 37U iyupos moy nadid ay siya u gamitán a panghatul nikam ni maligtas kam oni awan.”
Magaged ti Himala U Pariseo Hide
(Markos 8:11-12; Lukas 11:29-32)
38Tapos ay kinagi nu sasangan a Pariseo sakay Maisto nu Kautusan ni Jesus “Maistu, maari mo kami beman a petaan ti himala bilang purweba?” 39Timmábbeg ti Jesus “Hikam ay madukás sakay mapangalunya a katolayan ay magaged ti himala. U meatád ko la nikam ay u nangyari a himala ni Jonas#12:39 Basaan tu Jonas 1:17 tu itod. 40Konna ni Jonas a tállo a aldew sakay gibi a hod tu disalad nu tiyan nu dakál a tahod a ikan, ay hikán a Anak nu Tolay ay tállo be a aldew sakay gibi tu disalad nu luta. 41Káddemát nu aldew nu pághatul nu Diyos ay tumaknág u taga Ninive sakay hatulan di kam. Dipo nagsisi hide nikuna tinolduwan hide ni Jonas. Sakay nadid mas mahigiták pa ni Jonas tapus awan kam pa magsisi. 42Káddemát nu aldew nu pághatul nu Diyos ay tumaknág be u Reyna nu banuwan a Sheba#12:42 Basaan tu 1 Hari 10:1-13 sakay hatulan na kam. Dipo adeyo a lugar u ginábwatan na para la mágsaneg tu karunungan ni Solomon. Sakay nadid mas higiták pa ni Solomon tapos awanák moy sanigán.”
U Talinghaga Tungkul tu Madukás a Ispirito a Nagsole
(Lukas 11:24-26)
43Kinagi pa ni Jesus tu Pariseo hide “Ni lumakad u essa a madukás a ispiritu tu essa a tolay ay umangay siya tu kaparangan sakay magehyok ti imangan. Ni awan siya maketa ay 44isipán na a ‘Magsoliyák dálla tu tolay a nilakaden ko.’ Káddemát na hod ay ketan na u dati na a páppágyanan a awan ti lasán, malinis sakay maayus dán. 45Kanya magehyok siya ti pitto a mas madukás pa nikuna sakay angay hide a atanan sumáddáp tu dati na a págyanan sakay mágyan hide hod. Kanya mas lalo a dumukás u kalagayan nu tolay nan tu date. Konna labe hina u magin karanasan moy dipo madukás kam a katolayan.”
Deya U Magin Pamilya ni Jesus?
(Markos 3:31-35; Lukas 8:19-21)
46Nadid alay nu pággupos ni Jesus tu katolayan ay dummemát u ina sakay kapatkákka na hide a lállake. Nágtaknág hide tu luwas nu bilay sakay gusto de siya a uhunán. 47Kanya te nangkagi ni Jesus a atoy hide tu luwas sakay gusto de siya a uhunán. 48Pero timmábbeg ti Jesus “Deya u ina ko sakay kapatkákka ko hide a lállake?” 49Intoldu na u disepulus na hide sakay kinagi na “Hide iye u ina sakay kapatkákka ko hide. 50Dipo ni ti deya u tumupad tu kaluuben nu Ama ko ti langet ay siya u ina sakay kapatkákka ko hide.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mateo 12: MBJC
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
