Lukas 22
22
Intokyon ni Judas ti Jesus
(Mateo 26:1-5; Markos 14:1-2; Juan 11:45-53)
1Nadid, adene dán a dumemát u Piyesta nu Tinapay a awan ti Págpaalsa a kákkagiyán di be a Kasayaan nu Aldew nu Págtaleb. 2U puno nu saserdote hide sakay u Maisto hide nu Kautusan ay magileng ti paraan tánni mepabuno de ti Jesus, pero maingat hide dipo manteng hide tu tolay hide.
Nákpagkasundo ti Judas tu Kadima hide ni Jesus
(Mateo 26:14-16; Markos 14:10-11)
3Ti itod be ay simmáddáp ti Satanas ni Judas a Iscariote, a essa tu sapulo ay ti duwwa a disepulus na. 4Kanya lummakad siya sakay immangay tu puno nu saserdote hide sakay tu puno nu mágbantay hide tu templo para págguhunan de ni kodya na a metokyon ti Jesus nide. 5Nasaya u puno nu saserdote hide sakay pinanantuwan de ti pilak ti Judas. 6Pimmayag ti Judas tu kasunduwan, kanya sapul hod ay nagehyok dán siya ti pagkakataun a metokyon na ti Jesus, tu paraan a awan matukuyan nu katolayan.
Pághanda ti Pangapon para tu Aldew nu Págtaleb
(Mateo 26:17-25; Markos 14:12-21; Juan 13:21-30)
7Dimmemát dán u Aldew nu Piyesta a kuman u Judio hide ti tinapay a awan ti págpaalsa, sakay págbuno di be tu tupa para tu Kasayaan nu Aldew nu Págtaleb. 8Inutusan ni Jesus ti Pedro sakay ti Juan, kinagi na, “Kammoy dán, maghanda kam ti pangapon tam para tu Aldew nu Págtaleb.”
9Tinanung de siya, “Hadya i gusto muway a paghandaan me?”
10Timmábbeg siya, “Angay kam ti Jerusalem. Tehhod kam hod a matagbu a lállake a te sásson a tapayan a te lasán a dinom. Unonudán moy siya tu bilay a sáddáppan na. 11Sakay kagiyán moy tu makábbilay, ‘Petanung ben nu Maisto ni tehhod kam a kuwarto a maare na a gamitán sakay tu disepulus na hide para tu Aldew nu Págtaleb.’ 12Kaya ipeta na nikam u tunay a kadakál a kuwarto tu ontok nu bilay a tehhod dán a nakahanda a gamit. He kam hod a maghanda tu pangapon tam.”
13Lummakad u disepulus hide sakay netan de u atanan a ayun tu kinagi ni Jesus. Sakay inhanda de u Pangapon de para tu Aldew nu Págtaleb.
Intatag de u Banal a Pángngapon nu Panginoon
(Mateo 26:26-30; Markos 14:22-26; 1 Corinto 11:23-25)
14Nikuna dummemát dán u odas nu pángngapon de, ay nákpággatubang ti Jesus tu disepulus na hide. 15Káttapos ay kinagi na nide, “Gugusto ko a makaguman takam ti iye a pangapon baguwák a maghirap. 16Sanigán moy i kagiyán kuwáy nikam, awanák dán kuman a huway ti iye hanggan a mangyare u kahulugen ni iye tu aldew a maghare u Diyos.” 17Sakay inalap na u tasa a te lasán a alak, sakay káttapos na a nagpasalamat tu Diyos ay kinagi na, “Alapán moy iye sakay pamághatiyan moy. 18Tandaan moy i kagiyán kuwáy nikam, awanák dán uminom a huway tu tábbug nu ubas mentaras awan palla dumemát u paghare nu Diyos.” 19Sakay inalap na u tinapay sakay nagpasalamat tu Diyos, káttapos ay tináppeng-táppeng na itod sakay inyatád na nide. Kinagi na, “Iye u bággi ko a nealay para nikam. Gimitán moy iye a pággalaalaan moy nikán.” 20Sakay konna bi hod u ginimet na tu tasa a te alak, sakay kinagi na, “I mainuman iye ay tanda nu bigu a kasunduwan nu Diyos a pinatibay nu dige ko a mebuhus dipo nikam.
21Pero kaatubang ku nadid u mángtokyon nikán. 22U Anak nu Tolay ay dapat a matay sigun tu intakda nu Diyos, pero makaaánteng u sapitán nu tolay a mángtokyon nikuna.” 23Kanya namágtanungan u disepulus hide ni ti deya nide u manggimet ti konna hod.
U Tatahodan a Mataas a Tolay
24Namágtábbegan u disepulus hide ni deya nide u tenggiyán a pinakadakila. 25Kanya kinagi nide ni Jesus, “U hare nu Hentil hide ay amo nu nasakupan na hide, sakay u te kapangyariyan hide ay gusto di a madulaw a, ‘matattulungan tu tolay hide.’ 26Pero bakán a konna hina u dapat moy a gimitan. Nan u pinakadakila u magin pinakamababa sakay u puno u dapat a magin tagapagserbi. 27Deya beman u dakila, u pagserbiyan oni u magserbi? Awan beman ay u pagserbiyan? Pero kakagumanák moy bilang essa a tagapagserbi.
28Matapat kam a kumuyoyog nikán maski tu odas nu makpal a pagsubuk a dinanas ko. 29Ni kodyaák a pinagkaluuben nu Ama ti karapatan a maghare, pagkaluuben takam be ti karapatan a maghare a konna nikán. 30Kapisan takam a kuman sakay uminom tu kahariyan ko, sakay mággetnod kam tu trono hide para mamahala tu sapulo ay ti duwwa a lahe ni Israel.”
Kinagi ni Jesus a Ipamen Siya ni Pedro
(Mateo 26:31-35; Markos 14:27-31; Juan 13:36-38)
31Kinagi ni Jesus, “Simon, Simon! Magsaneg ka! Inaged ni Satanas a purbaan naka konna tu páng-ibut tu lupás tu trigu. 32Pero indaddasal taka a awan manghina u pánnampalataya mo. Ipamenák mo pero pagsisiyan mo labe, kaya gusto ko a tulungan mo u kakagumanan mo hide tánni bumegsák u pánnamplataya de.”
33Timmábbeg ti Pedro, “Panginoon, nakahandaák a mepireso sakay matay a kaguman mo!”
34Pero kinagi ni Jesus, “Tandaan mo i kagiyán kuwáy Pedro, bagu magtarakket u tandang ti aldiwan iye ay pumentálluwák mo a ipamen.”
Pághanda para tu Dumemát a Pagsubuk
35Káttapos ay tinanung hide ni Jesus, “Nikuna a utusan takam a awan ti tawed a pitaka sakay hembeg, oni sapatus, kinulang kam beman?”
Timmábbeg hide, “Awan.”
36Kinagi ni Jesus, “Pero nadid, ni tehhod kam a pitaka oni hembeg ay tawidán moy dán. Ni deyaman u awan ti áttak, ay ilako moy u alikab-kab moy hide sakay mamale kam ti áttak. 37Sanigán moy kagiyán kuwáy, kailangan a matupad dán nadid u sumássulat tu Kasulatan tungkul nikán, ‘Inbilang de siya a essa tu makasalanan hide.’ Dipo u nesulat tungkul nikán ay matupad dán nadid!” 38Káttapos ay kinagi nu disepulus na hide, “Panginoon, tehhod heeh a duwwa a áttak.” Tummábbeg ti Jesus, “Tama dán!”
Nagdasal ti Jesus tu Buked nu Olibo hide
(Mateo 26:36-46; Markos 14:32-42)
39Konna tu date na a gággimitán, limmakad ti Jesus sakay immangay tu Buked nu Olibo hide kaguman u disepulus na hide. 40Káddemat di hod ay kinagi na nide, “Magdasal kam, tánni awan kam madaig nu tokso.”
41Káttapos ay immadeyo siya nide ti sabadit sakay limmuhud sakay nagdasal. 42Kinagi na, “Ama, ni maare ay iyadeyo ped nikán i pághirapan iye. Pero bakán a u kagustuwan ko u masunud nan u kagustuwan mo.” 43Pimmeta nikuna u essa a anghel a gábwat ti langet sakay pinabegsák na u isip na. 44Dipo tu hirap a áisipán na ay lalo siya a nagdasal ti husto. Timmákták tu luta u inet na a kumán a dáddakkál a tuhog ni dige.
45Káttapos na a nagdasal ay nagsole siya tu disepulus na hide. Dinemáttán na hide a tidug dipo tu grabi a lungkut de. 46Tinanung na hide, “Bakin a mágtatidugán kam? Umikat kam sakay magdasal tánni awan kam madaig nu tokso.”
U Pángdakáp de ni Jesus
(Mateo 26:47-56; Markos 14:43-50; Juan 18:3-11)
47Pasiyaan palla a magupos ti Jesus nikuna a dumemát u makpal a tolay a págdidipalonguwan ni Judas. Siya u essa tu sapulo ay ti duwwa a disepulus. Inadeniyan na ti Jesus sakay inámmuwan, 48pero tinanung siya ni Jesus, “Judas, itokyon mo beman u Anak nu Tolay tu pamamag-itan nu ámmo?”
49Pákketa nu disepulus na hide ti itod ay kinagi de, “Panginoon, tegpasan mi dán beman hide” 50Tinegpas ngane nu essa a disepulus u kawanan a talinga nu alipin nu pinakapuno nu saserdote, kaya nahipang u talinga na. 51Pero kinagi ni Jesus, “Tama dan!” Sakay kinahap na u talinga nu alipin kaya nagpiyya.
52Káttapos ay kinagi ni Jesus tu puno nu saserdote hide sakay tu puno nu mágbantay hide tu templo sakay tu ama-amaan hide nu banuwan a immangay hod para dakáppán siya, “Madukássák beman a tolay, kanya kam he a immangay a te átták hide sakay gahote hide? 53Aldew-aldiwák a magtoldu tu Templo sakay katoy kam bi hod, pero awanák moy dinakáp. Pero nadid ay panahun moy dán sakay panahon dambe nu paghare nu kapangyariyan ni Satanas.”
Inpamen ni Pedro ti Jesus
(Mateo 26:57-58, 69-75; Markos 14:53-54, 66-72; Juan 18:12-18, 25-27)
54Dinakáp di ngane ti Jesus sakay inyangay de tu bilay nu pinakapuno a saserdote. Immunonod nide ti Pedro pero adeyo la. 55Nagnamo u tolay hide tu laguwerta nu bilay sakay nagendu, nákpággetnod be hod ti Pedro. 56Nikuna ketan siya nu utusan a bábbey a magendu ay minámmalas na siya. Sakay kinagi na, “Kaguman be ni Jesus i tolayan iye!”
57Pero impamen ni Pedro, kinagi na, “Aha! Awan ko siya matengge!”
58Maya-maya ay te nakaino nikuna a huway sakay tinanung na, “Awan beman essa ka be tu kakagumanan na hide?”
Pero timmábbeg ti Pedro, “Aha! Awanáng.” 59Kállipas nu essa a odas ay inpagpumilit be nu essa a katoy hod, “Kaguman ngani ni Jesus i tolayan itona, dipo essa be siya a taga-Galilea.”
60Pero timmábbeg ti Pedro, “Awan ko tukoy tumo i kákkagiyán muwe!”
Pasiyaan palla siya a magupos ay bigla a nagtarákket u tandang. 61Simmuleg u Panginoon ni Pedro sakay lináttángngan na siya. Kaya naisip ni Pedro u kinagi nu Panginoon a, “Bagu a magtarákket u tandang ti aldiwan iye ay pumentálluwák mo a ipamen.” 62Kanya limmuwas ti Pedro sakay nágsasangitán.
Sineste sakay Binálbág de ti Jesus
(Mateo 26:67-68; Markos 14:65)
63Nadid, sinásseste sakay binábbálbág nu magbantay hide ti Jesus. 64Pinángngássan di siya sakay tinanung, “Nay, tukuyan pay ni ti deya u nangsuntuk niko?” 65Sakay makpal pa hide a kinákkagi a madukás nikuna.
Inyatubang de ti Jesus tu Sanedrin
(Mateo 26:59-66; Markos 14:55-64; Juan 18:19-24)
66Tukadimadimangan na ay namággipun u ama-amaan hide nu banuwan, u puno nu saserdote hide sakay u maisto hide nu Kautusan. Inyatubang di nide ti Jesus sakay tinanung de, 67Kinagi de, “Kagiyán mo nikame ni hiko beman u Mesias.”
Timmábbeg ti Jesus, “Maski kagiyán ko nikam ay awan kam labe maniwala. 68Sakay ni tanungán takam be ay awan kam labe tumábbeg. 69Pero sapul nadid ay mággetnod dán u Anak nu Tolay tu kawanan nu makapangyariyan a Diyos.” 70Sakay kinagi de a atanan, “Gusto muway a kagiyán ay hiko u Anak nu Diyos?” Timmábbeg siya, “Hikamon nagkagiyay a hikán ngane.” 71Sakay kinagi de, “Ánya pa beman a patunay i kailangan tamay? Nasaneg tamon a mismo tu sadile na a labi.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lukas 22: MBJC
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
