ዶመ 37
37
ዮሴፋነ አ እሻቱዋ
(37:1—45:28)
1ያቆብ ባረ አዉ ደኤዳ ካናነ ቢታን ኡቴዳ።
2ያቆባ ናናይ ሀኔዳባይ ሀዋፐ ካሊደ ጻፈቴዳዋ።
ዮሴፎ ታማነ ላፑን ላይ ናኣ ግዴዳ ዎደ፥ ባረ አዎ ሀራ ማቼቱዋፐ፥ ባልፐነ ዝልፕፐ የለቴዳ ባረ እሻቱዋና ዉድያ ሄመ። ሄ ዎደ እ ባረ አዎ ኡንቱንቱ ኦዳ ኢታባ ኦዴዳ።
3እስራኤሊ ዮሴፋ ጭሚደ የሌዳ ድራዉ፥ ባረ ሀራ አቱማ ናና ኡባፐ አደ ሲቄ። እ አዉ አሌቄዳ ማዩዋ ጊግሴዳ። 4አ እሻቱ ባረንቱ አዉ አ ኡንቱንቱፐ አደ ሲቅያዋ በኤዳ ዎደ፥ ኡንቱንቱ አ እጺደ፥ ሎኦ ቃላ አዉ ሃሳያናዉ ዳንዳይበይክኖ።
5ዮሴፎ አኩሙዋ አኩመቲደ፥ ባረ እሻቶ ኦዴዳ፤ ኡንቱንቱ አ ያ ዳርሲደ እጼድኖ። 6እ ኡንቱንታ፥ “ታን አኩመቴዳ አኩሙዋ ስስተ። 7ኑን ጋደን ፖችያ ቃችሽን፥ ታ ምርቂ እት ኩን ደንዲደ ስት ግ ኤቂሽና፥ ህንተንቱ ምርቀቱ ዩይ አደ ታ ምርቂያዉ ጎይኔድኖ” ያጌዳ።
8አ እሻቱ አ፥ “ኔን ኑ ቦላን ካተታና ሀናይዬ? ዎይ ኑና ቱሙ ሞዳና ሀናይዬ?” ያጌድኖ። ኡንቱንቱ አ አኩሙዋ ድራዉነ አ ኦዱዋ ድራዉ፥ ያ ዳርሲደ እጼድኖ።
9ቃይ ዮሴፎ ሀራ አኩሙዋ አኩመቲደ፥ ባረ እሻቶ ኦዴዳ፤ “ስስተ፤ ታን ሀራ አኩሙዋካ አኩመታድ። ሄ አኩሙዋን አዋይ፥ አግናይነ ታማነ እት ጾልንተቱ ታዉ ጎይኒኖ” ያጌዳ።
10ባረ አዎነ ባረ እሻቶ ሄ አኩሙዋ ኦዴዳ ዎደ፥ አ አዉ አ፥ “ሀዌ ኔን አኩመቴዳዌ አያ አኩሜ? ቱሙ ታን፥ ነ ዳያነ ነ እሻቱ ዪደ፥ ነ ስንን ሳኣን ጉፋኒደ ነዉ ጎይናነየ?” ያጊደ ሴሬዳ። 11አ እሻቱ አ ቃናቴድኖ፤ ሽን አ አዉ ሀ የዉዋ ባረ ዎዛናን ዎዳ።#ኪታ 7:9
እሻቱ ዮሴፋ ዛልኤድኖ
12እት ጋላስ አ እሻቱ ሰኬማ ማታን ባረንቱ አዉዋ ዶርሳ ሄማናዉ ቤድኖ። 13እስራኤሊ ዮሴፋ፥ “ነ እሻቱ ሰኬማን ዉድያ ሄምያዋ ኤራሳ። ሃያ፤ ታን ኔና ኡንቱንቱኮ ኪታና” ያጌዳ።
ዮሴፎ፥ “ኤኖ” ያጌዳ።
14እ አ፥ “ባ፤ ነ እሻቱዋነ ዉዲ ሳራ ግድያዋ በአ፤ ኡንቱንቱባ ታዉ ኦዳሳ” ያጌዳ። አ ከብሮና ድልባፐ ኪቴዳ።
እ ሰኬማ ቤዳ። 15ያን ደምባ ግዶን ያ ሃ ስመረትሽን፥ እት አሳይ አ ደሚደ፥ “ላ አያ ኮያይ?” ያጊደ ኦቼዳ።
16እ፥ “ታ እሻቱዋ ኮያይ፤ ኡንቱንቱ ዉድያ ሄምያ ሳአይ ሀቃነንቶ ሀያና ታዉ ኦዳርኪ!” ያጌዳ።
17ብታኒ፥ “ሀዋፐ ደንድ ክቼድኖ፤ ኡንቱንቱ፥ ‘ኑን ዶታና በቶ’ ጊሽን ስሳድ” ያጌዳ። ሄዋ ድራዉ፥ ዮሴፎ ባረ እሻቱዋ ጌዱዋ ቢደ፥ ኡንቱንታ ዶታናን ደሜዳ።
18ሽን እ ሃኩዋን ደእሽን፥ ኡንቱንቱ አ በኤድኖ፤ እ ኡንቱንቱኮ ጋከናን ደእሽን፥ ኡንቱንቱ አ ዎናዉ አ ቦላ ማቀቴድኖ። 19እቱ እቱዋ፥ “በእተ! አኩሙዋው የ። 20ሃይተ፤ አ ዎደ፥ ሀ ኦላቱዋፐ እቱዋ ግዶ የጎይተ። ሄዋፐ ጉየ፥ ‘ኢታ ዶአይ አ ሜዳ’ ያጋና፤ ያቲደ አ አኩሙ አህያዋ በአና” ያጌድኖ።
21ሮቤል ሄዋ ስሴዳ ዎደ፥ ኡንቱንቱ ኩሽያፐ አ አሻናዉ ኮዪደ፥ “አ ዎናን አጎይተ። 22ሱ ጉሶፕተ፤ አ ህንተንቱ ዎራን ደእያ ሀ ኦላ ግዶ ኦልተ፤ አ ቦላ ኩሽያ ዎፕተ” ያጌዳ። ሮቤል ሀዋ አ ኡንቱንቱፐ አሺደ ጉየ አ አዉዋኮ የዳናዉ ጌዳ።
23ዮሴፎ ባረ እሻቱዋኮ ጋኬዳ ዎደ፥ እ ማዬዳ አሌቄዳ ማዩዋ አፐ ቃር አኬድኖ፤ 24አ አፊደ ሃይ ባይና መላ ኦላን የጌድኖ።
25ኡንቱንቱ ባረንቱ ቁማ ማናዉ ኡት ደእሽን፥ እስማኤላ አሳቱ ግብጼ ባናዉ ጋላኣደፐ ይያዋንታ ቁ ጊደ በኤድኖ፤ ኡንቱንቱ ባረንቱ ጋሉዋን ሳዉዋ፥ ባላሳነ ግያ ልያነ ካርቢያ ጫን ዎድኖ።
26ይሁዳይ ባረ እሻቱዋ፥ “ኑን ኑ እሻ ዎደ አ ሱ ቆስያዋ ግዶፐ ኑና አያ ጎኢ? 27ሃይተ፤ አ እስማኤላቶ ዛልኦይተ፤ አ ቦላ ኑ ኩሽያ ዎኮ፤ አያዉ ጎፐ፥ እ ኑ እሻ፥ ኑ አሹዋ” ያጌዳ። አ እሻቱ ማየቴድኖ። 28ሄዋ ድራዉ ምድያማ ቢታ ዛልአንቻቱ ሄዋና አሽን፥ አ እሻቱ ዮሴፋ ኦላፐ ከሲደ፥ እስማኤላ አሳቶ ላታሙ ጻጋራ ብራን ዛልኤድኖ። ኡንቱንቱ ዮሴፋ ግብጼ ጋድያ አፌድኖ።#ኪታ 7:9
29ሮቤል ኦላኮ ስሚደ፥ ዮሴፎ ያን ባይናዋ በኤዳ ዎደ፥ ካዮቲደ ባረ ማዩዋ ፖሼዳ። 30እ ጉየ ባረ እሻቱዋኮ ቢደ፥ “ናአይ ያን ባዋ፤ ሀእ ታን ሀቃ ቦሻ!” ያጌዳ።
31ሄዋፐ ጉየ ኡንቱንቱ ዮሴፎ ማዩዋ አኪደ፥ ዴሻ ኦርግያ ሹኪደ፥ ሄ ሱን ናቄድኖ። 32አሌቄዳ አ ማዩዋ ባረንቱ አዉዋኮ አፊደ አ፥ “ኑን ሀዋ ደሜዶ፤ ሀዌ ነ ናኣ ማየንቶነ አነ ጼላ” ያጌድኖ።
33ማዩዋ እ ኤሪደ፥ “ሀዌ ታ ናኣ ማዩዋ! ዎራ ዶአይ አ ም ድጌዳ። ዮሴፎ ቱሙካ ዱጸረት ክቼዳ” ያጌዳ።
34ያቆብ ካዮቲደ፥ ባረ ማዩዋ ፔዳ፤ ባረ ጼሳን ዋሩዋ ዳንጪደ፥ ባረ ናአዉ ዳሮ ጋላሳ ዬኬዳ። 35አ አቱማ ናናይነ ማጫ ናናይ ኡባይ አ ምንናዉ ዬድኖ፤ ሽን እ ምነናን እጺደ፥ “ቱይት፥ ታን ዬካደ ታ ናኣኮ ባደ፥ ዱፉዋን ገላና” ያጊደ፥ አ አዉ አዉ ዬኬዳ።
36ሄ ዎደ ሚድያማ ቢታ አሳቱ ዮሴፋ ግብጼ ካትያ ኦሳንቻ ጶጽፋራዉ ግብጼን ዛልኤድኖ፤ እ ናግያዋንቱ ካፑዋ።
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ዶመ 37: DFBE
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
The Word for the World Ethiopia