Luk'k'aasa 24
24
Yesuusakokki Goyikko kiyaano
(Mat. 28:1-10; Mar. 16:1-8; Yan. 20:1-10)
1Almmakko tahoree arrii heleel taɂekkaasateraan shittoo abere ul bullaɂowaa giraan k'amal tos seete. 2K'amal guukko kaɂotottoolero eɂemo deen. 3Orroddeen kakkotabareen goorata ade Goottaa Yesuusakokki rees lakkoheleen. 4Usu ayeesii girddi ameen giraan, aaloo kahank'aaro sarssi osarssateeraan ibaaddojja lama derɂa iso dollee aalleen. 5Heleeljana abssikko kakkeeyi hussi ameen giraan, ibaaddojja haa ameen «Arddokki kalleero usu k'amal orrokko muun dootaattan? 6Usu keera! Hittanii lakkogiro, adena Galiilaayi takkogiree me usu isinne amero shaada. 7‹Ere kaɂibaaddo gene tac'ubbaalessaayi roori sisamin, suwaamiinna taseedi arri goyikko kiin dootisara› ame gire.»
8Heleelnna hassu goorata haafura kayesuusa shaade. 9Heleelnna banɂe tak'amalkko abbaabatere hikka ayees dubba tomonkko koowunna kakkalee ibaaddo dubbaan segeen. 10Hikka ayees ofarameeraawun osegeeraanna, kamegidella ulkotti Mayiraame, Yohaana, Aaye tayayik'ooba Mayiraaminee isone wota kakkalee heleelnna gire. 11Iso goɂameen heleel kaɂayeesere ayees kadanddowaraan aani isoon mankkollee maraan lakkoɂabddateren. 12P'et'iroosa goɂameen keegure k'amal tos tiiyye. Eserraa geegurena hussi amere orroddi gowochchiro gashe taalaal girano dee. Kalleero ayesuun mamaa minkkeessa abbaabate.
Raa kaɂemahusi
(Mar. 16:12-13)
13Ese arri Yesuusakko oɂagaalssatareenkko lama, Iyyerusaalemikko kuma tomonkko koo tallabssi gitakki fakki kaɂame, Emahusi kaɂamamaro maaman tos seetaa gireen. 14Isona kalleero ayees dubba isi isisiɂorroo ayeesaa gireen. 15Ayeesaanna sessettaan gutii giraan Yesuusana iso tos gabbalamere isoneta seetano haggaɂabe. 16Ayesuun goɂameen iso usu goggoɂaddeesonkko ilɂoɂoottiso abameen gireen. 17Yesuusa, «Isin sesseetaa giraan, raadii isi isiɂorroo haa kaɂayeesatteen meyya?» ame.
Isona aaloo yaada orro tabeen tollimeen aalleen. 18Isokkona koo, K'eliyoop'a kaɂamamere, «Hinɂa arrijjoolii hittanii Iyyerusaalemii kalleero ayees kakkasoon, ati uluun marttitta?» ame abbaabe.
19Yesuusa, «Kalleera ayees meyya?» ame. Isona haa ameen. Waayinna ibaaddo dubba hore felooyinna haafuraayi kaɂatii kahegeroo mankkolleere maraan,
«Hikkina kanaazireti Yesuusa gutii kafelamero ayeesiya. 20Usu tuuk'aamokokki woyichchaalnna mootijjolkaani goyikokki firddaan usu rooriseen siseen, suyeen. 21No andde kaɂisiraɂeel gosaawun wodoo leerowa aminne abddi kayelannenne usuye. Kakkaleekkona ade, hikki haa golleekko hittaari arri taseeditta. 22Adena no orrokko heleel kookkoo no mamise, isona bullane k'amal tos seetereen. 23Reesinna kakkowaatareen goorata emeeteren ‹Yesuusa neefone gira› oɂamaraan erggichchaal raaga deenne amaa abbaabateen emeeten noon segeen. 24No orrokko kookkoo k'amal tos seetere, likkii heleel goggoɂameroo kalleero deen. Yesuusa ade lakkodeeren.»
25Yesuusa haa ame, «Isin gowoolee ibaaddo, wodanatisinna kahegerool kaɂayeesenaan dubba ammanatana waattii adallaatte, 26Kiristoosa hikka ayeesi hitta rakkoo atatanona kabaja tos tabano lakkodootisaroya?» 27Musekkona kahegeroo dubbakko haggaɂabere k'ulluukki mas'aafajjool garakkeessa kas'aafamero tusaa fure segee.
28Kaseetaren maaman kakkogabbalamereen goorata, Yesuusa iisi karoorinaro aani lee. 29Iso addeen, «Arriti iite buyitetta, ul hemeen laara, haanssun noonne wota hittanii bari!» ameeren ataayiseen ebaaten. Haanssun isoneta barin tabe.
30Isoneta babo aamin kakkohamas's'eere goorata babo keesere Waa galateere ebise isoon sise. 31Usu goorata Iilɂoɂoottiso banamereen Yesuusa laano addeesen, usuna isokko siyame. 32Isona, «No raadii giraan, no ayeesisaa k'ulluukki mas'aafana bane agaalssisaa, wodanattaani gubataa lagittella?» ameen.
33Usu goratawa keengureene Iyyerusaalemi abbaabateen seeteen. Tomonkko koo usukko oɂagaalssataranna okkalee isone wota koolleen kukkumeen ogiraan heleen. 34Isona, «Goottaa Yesuusa ogiraan keera! Simoonanna mutera» amaa gireen. 35Yesuusakko oɂagaalssatareen lama raadii kalleero ayeesina Yesuusa babo ebise kakkosisare goorata misii isoon addeesamero segeen.
Yesuusa usukko oɂagaalssatarawun mute
(Mat. 28:16-20; Mar. 16:14-18; Yan. 20:19-23; Ofa. Fe. 1:6-8)
36Iso hikka ayeesaa giranttii, Yesuusa iso orroo aalleere, «Nogodda isinuun halleeto» ame.
37Iso ade neengureene abssateen. Gaari kaddeeran aani isoon lee. 38Yesuusana haa ame, «Muun niyattaan? Wodanattisinii muun hedaattan? 39Genennoɂootteenna luk'ak'k'oɂoottee diyaa, aniwayya. Ada in dina diyaa, in gutii goggodiyaattanii gaari soonna lefaalnna lakkoɂabtto.»
40Hikka amegure genennona luk'k'ana isoon tusate. 41Isona geggelokkona mamanokko kakkeeyi ganaa haɂabddannon giraan, «Hittanii kooko kaɂaamiraan abttaane?» ame. 42Isona eleenii kadubamero kunɂubkko usuun siseen. 43Yesuusana atatere iso hore aame.
44Usuna, «Ani isinneta takkogiree, seera kamuseeyi, kahegeroolnna mazamurikokki mas'aafayi in maraan kas'aafamere dubba gudayin dootisara ame ani isinuun kasegeere haafurakki hikkaya» ame.
45Usu goorata k'ulluukki mas'aafajjolii goggoshaadinawun sammuutisoo bane. 46Haanna ame, «Kiristoosa rakkoo atayinara. Taseedi arrina goyikko kinnara. Haa amame mas'aafa k'ulluukkii s'aafamera. 47Iyyerusaalemikko haggaɂabere gosa dubbaan c'ubbokko gula galanona c'ubbo haheso amamano megekkeessayi lallabaaminara. 48Isinna hikkanun atottaan. 49Aninna Aabbokki tasisero abddi isinuun farnnara. Isin adi elekko hunna taaɂatattaanii Iyyerusaalemii gira.»
Yesuusakokki daruur biyaano
(Mar. 16:19-20; Ofa. Fe. 1:9-11)
50Esekko abbaabatere Yesuusa usukko oɂagaalssataran katamaakko beesere Bitaanya taageero aate bee. Genennoɂoottessana keesere iso sommaasate. 51Iso galataa giraanna, isokko assaabame daruur tos bee. 52Isona sagadeen, geggeloo oɂatiitinna Iyyerusaalemi tos abbaabateen. 53Waa galataa arggetto k'ulluukki min kawaayi gireen.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luk'k'aasa 24: BayNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Word for the World Northern Africa
