लुका 19
19
फाळु उकाळन्यु जक्कय
1एक दाहड़ु ईसु यरीहो सहर मायन जाणे बाजी रवलु। 2देखु चां जक्कय नावेन एक लकपती माणुस तीना सहर मां रवतेलु। चु फाळु उकाळन्यान मुख्यु हतलु। 3चु सामळ्यु की ईसु चां मायन जाणे बाजी रयु। ईसु कुण छे, चो मालुम करने करीन, जक्कय ईसुक देखणे हींडतेलु। बाकुन जक्कय नानलु हतलु। 4तत्यार चु गड़दी मां अघु दवड़ीन गुयु ने ईसुक देखणे करीन एक गुलरेन झाड़का पर चहड़ी गुयु। काहाकी ईसु तीनीत वाटे सी जाणे वाळु हतलु। 5जत्यार ईसु तीना झाड़का तळे आयु, ती चु उपर देख्यु, ने तीना जक्कय काजे कह्यु, “ए जक्कय मामार उतरी आव! काहाकी आज मेसेक तारे घर रवणु छे।”
6तत्यार चु जक्कय मामार उतर्यु ने खुस हय्न ईसुन आव-भाव कर्यु, ने हेरे घर ली गुयु। 7ज देखीन आखा यहुदी-माणसे ईसुन वात करीन एक दीसराक कुड़-कुड़ करीन कवणे बाजी गुया, “ईसु ते एक पापीन घर मां मेजवान्यु बणीन आय रयु।”
8बाकुन जक्कय उबु हय्न ईसुक कह्यु, “मालीक मे मारी आखी चीजेन आदु वाटु ईना गांवेन गरीब काजे आप दीस। कदी मे कुय सी धुकु दीन तेरे धड़े धन लेदु हय, ती मे तीनाक तेरो च्यार गुणा पछु वाळ दीस।”#नीरगमन 22:1
9तत्यार ईसु तीनाक कह्यु, “आज ईना घर मां छुटकारु आवलु छे, काहाकी जु बी अब्राहमेन एक अवल्यात मायन छे। 10काहाकी माणसेन पुर्यु खुवायलाक हेरने, ने तीनुक बचावणे करीन आवलु छे।”
कळदार रुप्यान दाखलु
(मत्ती 25:14-30)
11जत्यार माणसे जी वात सामळने बाजी रवला, ती ईसु एक अळी दाखलु सामळायु; काहाकी ईसु यरुसलेमेन गांव धड़े आय रवलु, ने माणसे ज देखीन समजी रवला की भगवानेन राज हय देखाय देणेवाळो छे। 12तेरेमां ईसु कह्यु, एक लकपती माणुस राजु बणीन पछु आवणे करीन बेसके लांबे वाळा देसेम जाणेन तीयारी कर्यु। 13ने चु लकपती माणुस आपसा दस गुलाम पावर्या काजे बुलायु ने तीनुक एक-एक जणाक कळदार रुप्या आपीन कह्यु, मेसेक पछु आवणे लग तुहुं वेपार करीन लेणु देणु करता रवु। 14बाकुन तेरा गांव मां रवण्या तीनाक भुंडात समजाड़तेला, ने चे तेरे पछळ एक काहवाळ्यान साहरे तीना काजे कय मकल्या की हीयु हामरे पर राज नी करनु चाहे।
15तत्यार लकपती माणुस लांबे वाळा देसेम सी राजु बणीन पछु आयु ने चु बुलावणे मकल्यु ने चु गुलाम पावर्या काजे धन आप्लु ने ज जाणने हींडतेलु, की एक-एक जणु लेणु-देणु करीन कतरु कमायु ने वेपार कर्यु। 16पेहलु पावर्यु आवीन कह्यु, मालीक! तु मेसेक दस कळदार रुप्या आपलु, तीनु दस रुप्यान मे अळी दस कळदार रुप्या कमायलु छे। 17मालीक तीनाक कह्यु, ए वारलु पावर्यु तु बेसकु वारु कर्यु! तु नानली सी नानली वातेम बी ईमानदार नीकळ्यु, हय तुसेक दस सहर पर हक आपो। 18दीसरु पावर्यु आवीन कह्यु, मालीक! तारा पांच कळदार रुप्यान साहरे मे पांच कळदार रुप्या अळी कमायलु छे। 19ने मालीक तीनाक बी कह्यु, तुसेक बी पांच सहर पर हक आपो। 20हय तीसरु पावर्यु आवीन कह्यु, मालीक! देख, जु छे तारु कळदार रुप्यु, तीनाक मे एक पुथल्याम बांदीन मेक देदलु। 21काहाकी मे तुसेक देखीन बीहतेलु, काहाकी तु बेसकु आकरु छे; तु जां नी मेले तीनाक ईछी ली जाय, ने जां तु नी एर्यु, तीनाक तु काट लेय। 22चु मालीक तीनाक कह्यु, ए वेरी पावर्या! मे तुसेक तारात मुंहडा सी तारु नीयाव करीस। तु जाणतेलु की मे आकरु छे। ने जां नी मेलो चो ईछ ली जाम, ने जां नी एरु चो काट लम। 23ती तु मारो धन सवकारेन्चां काहा नी मेल्यु? ने तत्यार मे पछु आवीन तीनु पयस्या काजे ईयाज समेत सवकार धड़े सी ली लेतु 24ने मालीक साते उबा हय रवला आखा माणसेक कह्यु, ईना पावर्या धड़े सी चु कळदार रुप्यु, हापकी लेवु, ने जेरे धड़े दस कळदार रुप्या छे, तीनात काजे जु कळदार रुप्यु बी आप देवु। 25चे उबा हय रवला आखा माणसे मालीक काजे कह्या, मालीक! हेरे धड़े ते दस कळदार रुप्या छे। 26मालीक जपाप आप्यु, तेरे धड़े छे, तीना काजे अळी बी आपसे; बाकुन तेरे धड़े काय नी हय, तेरे धड़े सी, च बी मांग लेसे, ज तेरे धड़े छे। 27बाकुन तीनु मारा वेरी काजे, तीनुक ज्य नी चाहतेला की मे तींद्रे पर राज करो तीनुक जां मारे अगळ मार नाखु।
यरुसलेम मां ईसुन भरायणु
(मत्ती 21:1-11; मरकुस 11:1-11; युहन्ना 12:12-19)
28जी वात कयदीन ईसु यरुसलेमेन गांव भीणी तेरा चेला अगळ-अगळ जाणे बाजी गुयु। 29ने ईसु चालतु-चालतु बेतफगे ने बेतन्या गांव धड़े वाळा जेतुन नावेन बयड़ा पर पुग्यु। तत्यार ईसु आपसा दुय चेलाक धड़े बुलायु ने तीनुक ज कय मकल्यु। 30“अगळ पला गांव मां जावु। ने जसा तुहुं गांव मां भरायसु, ती तुहुंक एक गदड़ान पीलो बांद रवलो देखसु। तेरे पर कुय बी माणुस कदी नी बठ्या। तीनाक छुड़ीन जां ली आवु। 31कदी तुहुंक कुय पुछे की ईनाक काहा छुड़ रया? ती तीनाक कवजु” मालीक काजे ज गदड़ान पीलो चाहजे।
32चे दुय चेला तसात कर्या जसु तीनुक कवला। जसु ईसु कय देदलु, तसात तीनुक एक गदड़ान पीलो बांद रवलो जड़्यो। 33जत्यार चे तीनाक छुड़ने बाजी रवला, ती हेरा मालीक तीनुक देख्यु ने पुछ्यु “तुहुं हामरा पीला काजे काहा छुड़ रया?”
34चे कह्या “मालीक काजे ज गदड़ो चाहजे।” 35तत्यार चे पीलाक ईसु धड़े लाया ने चे पीलान पर पुथल्या पांगराय देदा ने तीना पीला पर ईसुक बठाड़ देदा। 36ईसु पीलाक चालाड़ीन सहर भीणी ली गुया, ने माणसे आपसा पुथल्या ने चादरा तेरे अगळ वाट पर आथरीन तेरो आव-भाव कर्या।#2 राजा 9:13
37ईसु जेतुन झाड़कान बयड़ान कड़खे यरुसलेम धड़े पुग्यु, ती ईसुक मान्ने वाळा बेसका माणसे, ईसु आयु करीन खुस हय गुया, ने वारु काम काजे देखीन भगवान काजे बेसकु वारु कह्वीन खुस हय्न तेरी बड़ाय करने बाजी गुया।#जकर्याह 9:9 38“बरकतवाळु छे चु राजु, जु भगवान मालीकेन नावे आवे। सरगे मां सांती छावाय रयो आखाम उचा रहण्या भगवानेन बड़ाय हय रय।”#भजन सहीता 72:18,19; 118:26
39ज सामळीन टुळा मां सी थुड़ाक फरीसी माणसे ईसु काजे कह्या, “ए मास्तर! तु तारा चेलाक झीचकारीन हुगु राख।”
40बाकुन ईसु तीनु फरीसी माणसे काजे कह्यु, “मे तुहुंक कहुं कदी जे हुगा रय जासे ती, जे दगड़ा आपसात आयड़से।”
ईसु यरुसलेम काजे देखीन रड़े
41जत्यार ईसु यरुसलेम सहर धड़े आयु, ने चु सहरेक देखीन रड़्यु। 42ने असु कह्यु, ए यरुसलेम सहर मां रहण्या माणसे कदी तुहुं बी हीने दाहड़े आपसी सुक-सांतीन वाट जाण लेता, ती भलो हवतो, बाकुन हय लग ची सातायली छे, ने तुहुंक नी देखायी।#वेवस्थावीवरन 32:29; यसाया 6:9,10 43काहाकी तारे पर चे दाहड़ा आवसे जत्यार तारा वेरी तारे चारेमेर आवीन तुसेक घेरी लेसे ने चारेमेर सी तुसेक दड़पसे। 44ने ईनु भीतड़ान ईचमां तुसेक ने तारा पुर्याक धुळा मां मीलाड़ देसे ने गांवेन भीतड़ा उदरी जासे, ने दगड़ा पर दगड़ु बी नी रवणे देसे, काहाकी तुहुं भगवान भीणी सी मकेल्ला मसी काजे नी उळख्या।
ईसु यरुसलेम मंदीरेन लेण-देण करन्या माणसेक नीकाळे
(मत्ती 21:12-17; मरकुस 11:15-19; युहन्ना 2:13-22)
45ईसु मंदीरेन आंगणा मां भरायन लेणु-देणु करन्या वेपारीक बाहर नीकाळने बाजी गुयु। 46ने तीनुक कह्यु, “खरला सास्तुर मां ज लिखलो छे, मारो घर दुवान घर कह्वायसे, बाकुन तुहुं ईना घरेक, डाकुन घर बणाय देदा।”#यसाया 56:7; नीरगमन 7:11
47चु ईसु दाहड़ीन मंदीर मां माणसे काजे वात सामळावणे बाजी रवलु। ने ईसु काजे भगवानेन डाहला पुजारा ने यहुदी-सास्तुर सीकाड़न्या ने मालदार माणसे वीरुद करने बाजी गुया ने तीनाक मार नाखणेन मुखु हेर रवला। 48बाकुन तीनुक काय बी नी बण्यु, ने तीनुक समज नी आयु की ज कसों करजे, काहाकी आखा माणसे बेसका तेरी वात सामळने चाहतेला।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
लुका 19: NTBSP23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
