LUKA 24

Ukusyuka kwa Yesu

(Mat 28.1-10; Mar 16.1-8; Yoh 20.1-10)

1Loli pisiku ilitasi ilya ndungu, nulubunju fiyo, abakikulu bala balinkubuka kwipumba, balinkutwala imikota iminunga gigyo batendekisye. 2Loli balinkwaga ilibwe liseguligwepo pipumba, 3balinkwingila, balinkwaga umbili gwa Ntwa Yesu gukayamo. 4Lelo bo bikwalangana itolo pali sisisi, keta, balinkwaga abandu babili bimile pabupipi nabo, bafwele imyenda igi gyamulikaga. 5Popapo balinkutetema fiyo, balinkwinamila pasi; abene abandu bala balinkuyoba balinkuti, “Umumi yo mwati mundondege mbafwe muno? 6#Mat 16.21; 17.22-23; 20.18-19; Mar 8.31; 9.31; 10.33-34; Luk 9.22; 18.31-33Akayamo muno, mma, loli asyukile. Amukumbukege isi ababulile bo akali tasi ali nkisu kya Galilai, 7apa atigi, Nnyamundu fikuti abikigwege mmaboko ga batulanongwa, akomeligwege pakipingika, kangi pisiku lya butatu asyukege.” 8Abene balinkugakumbuka amasyu gake; 9popapo balinkugomoka ukufuma kwipumba, balinkwakubabula abakalongo na yumo nabangi bosa inongwa syosa sisisi. 10Abene bali bo ba Maria Magadalena, na Yohana, na Maria unna gwa Yakobu, nabakikulu abangi aba bali pamopene nabo; balinkubabula abatumigwa inongwa sisisi. 11Loli abene, inongwa sisisi silinkuboneka ukuya sya itolo, balinkusita nukubitika. 12Umwene Peteri alinkusumuka, alinkubopa ukubuka kwipumba; alinkwinangila nkati, alinkugibona gyene gi myenda; alinkubuka kukaya, alinkuswiganika itolo kuli isi syabonike.#24.12 Syabonike: amasimbo gamo gakaya na vesi 12.

Injila ya ku kaya ka Emausi

(Mar 16.12-13)

13Lelo popapo musi gugo, abafundigwa bamo babili balinkubuka nkaya aka batigi Emausi, kali pantambo gwa makilomita mahano namabili ukufuma nkaya ka Yerusalemu. 14Balinkuyobesania pali syosa isi syabonike. 15Lelo bo bikuyoba nukulalusania, popapo Yesu yuyo alinkusegelela, alinkulongosania nabo. 16Loli amaso gabo gafwanaga gigaligwe ukuti bangammanyaga. 17Umwene Yesu alinkubalalusya alinkuti, “Go masyu maki aga mukuyobesania bo mukwenda?” Popapo balinkwima nubusulumanie. 18Lelo umwinabo yumo uyu ali yo Kleopa ingamu, alinkumwamula alinkuti, “Kali yo ugwe gwe uli nhesya gwimwene mu Yerusalemu, gwe ukasimanya isi sibonike mula amasiku aga?” 19Umwene alinkuti, “Siliku?” Abene balinkumbula balinkuti, “Isya Yesu gwa nkaya ka Nazareti, uyu ali nsololi gwa maka mumbombo na mmasyu, nkyeni mwa Kyala na mbandu bosa; 20na mumo abaputi bitu abakulumba nabalagili balimbikile mbulongi bwa kuti afwege, nukunkomela pakipingika. 21Loli uswe twasubilaga ukuti yo gwa kuntabula Israeli. Pamwanya pali isi, ili lyo isiku lya butatu ukufuma apa syabonekile sisisi. 22Lilino kangi bamo abakikulu aba nkilundilo kyitu batunyomwisye, abene batemelile kwipumba, 23loli bakagwaga umbili gwake; bo bagomwike bayobile ukuti bakibwene ikisetuka kya bandumi, aba bababulile ukuti mumi. 24Kangi nabinitu bamo bo babukile kwipumba, balinkwakwaga sili bo mumo bayobile abakikulu, loli Umwene balinkusita nukumbona.”

25Popapo Yesu alinkubabula alinkuti, “Mwe basitamahala umwe, mwe basito indumbula ukusitika syosa isi basiyobile abasololi! 26Ngimba kukabagile ukuti Kristi akubilwege muli syosa sisisi, po atigi nukwingila mbukulumba bwake?” 27Ukwanda isi mmasimbo ga Mose naga basololi bosa, alinkubalingania syosa isi sikunjoba yuyo.

28Balinkusegelela nkaya aka babukangamo, Umwene alinkufwana ikulonda ukukisania. 29Popapo abene balinkumfimbilisya balinkuti, “Uligonaga nanuswe papapa, buno mayolo, kangi ubusiku bwilile.” Popapo alinkwingila nnyumba alinkuya nabo. 30Lelo bo atugasenie nabo pakulya, alinkwega ikisyesye, alinkugwa ulupi, alinkukimenyania alinkubapa. 31Popapo amaso gabo galinkwiguka, balinkummanya; Umwene loli alinkuyonga kumaso gabo. 32Popapo balinkuyobesania balinkuti, “Bule kali indumbula syitu sikapyaga mmyitu, bo ikuyoba nanuswe munjila nukulingania isya mmasimbo?” 33Popapo balinkusumuka pakabalilo kako, balinkugomoka ukubuka nkaya ka Yerusalemu; mo balinkwakwaga bala kalongo na yumo, naba bali nabo babungene, 34bikuti, “Sya naloli, uNtwa asyukile, ansetukile Simoni.” 35Bope balinkubapangila isya munjila, na muno balimmanyile bo ikumenyania ikisyesye.

Yesu ikubasetukila abafundigwa bake

(Mat 28.16-20; Mar 16.14-18; Yoh 20.19-23; Imbo 1.6-8)

36Lelo bo bali pakusiyoba sisisi, nakalinga itolo Yesu yuyo alinkwima pakati pamyabo alinkuyoba alinkuti, “Ulutengano luyege nanumwe.”

37Popapo balinkunyomoka nukutenguka fiyo; binogonaga ukuti bambwene nsyuka. 38Umwene alinkubabula alinkuti, “Mukwalangana fiki, mukwilusania fiki mundumbula syinu? 39Amugaketege amaboko gangu namalundi, yo yuyune; amumbalamasyege mukete, buno unsyuka akaya numbili nififupa, bo apa mukumbona une ukuya nafyo.” 40Umwene bo ayobile lilili, popapo alinkubanangisya amaboko namalundi.#24.40 amasimbo gamo gakaya na vesi 40. 41Lelo bo bakali batikwitika panongwa ya lusekelo, bo bakali bikuswiga, alinkubabula alinkuti, “Muli nafyo fimo ifyakulya apa?” 42Abene balinkumpa ikipimba kya nswi inyokye; 43Umwene alinkwega, alinkulya nkyeni mmyabo.

44Popapo alinkubabula alinkuti, “Aga go masyu gala nababulile bo ngali ndi nanumwe, aga kuti, fikuti simalisigwege syosa isi sikunjoba une mu ndagilo sya Mose, na masimbo ga basololi kangi na munyimbo sya Israeli.” 45Popapo alinkubigulila amahala aga kusyagamkisya isya mmasimbo. 46Alinkubabula alinkuti, “Bo sisimbigwe bunobuno isya kuti, Kristi isakukubilwaga, nukusyuka mbafwe pisiku lya butatu; 47nisya kuti ulupinduko nubuswe bwa nongwa fifumusigwege mungamu yake kufikolo fyosa, ukwanda nkaya ka Yerusalemu. 48Umwe muli baketi ba nongwa sisisi. 49#Imbo 1.4Keta lelo, nikubatumilaga ulufingo lwa Tata; loli umwe tasi amuyege nkaya munomuno, ukufika apa mukufwikigwaga amaka ga kumwanya.”

Yesu ikufyuka kumwanya

(Mar 16.19-20; Imbo 1.9-14)

50 # Imbo 1.9-11 Popapo alinkusoka nabo, alinkulabila nabo nkaya ka Betania; alinkwinula amaboko gake, alinkubasaya. 51Lelo bo ali pakubasaya, alinkwikwaba kumyabo, alinkwegigwa ukubuka kumwanya. 52Popapo balinkumbungulukila, balinkugomoka ukubuka mu Yerusalemu nulusekelo ulukulumba; 53balinkuya bwila Nnyumba ya Kyala mo balinkuntufya Kyala mumo.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKA 24: NNBII

Highlight

ಶೇರ್

ಕಾಪಿ