LUKA 17

Ubutulanongwa

(Mat 18.6-7,21-22; Mar 9.42)

1Popapo Yesu alinkubabula abafundigwa bake alinkuti, “Imbefyo syo sitikutoligwaga ukwisa; loli sya butolwe kuli uyu sikwisilangamo. 2Kwayaga kununupo umundu yuyuyu linga akungigwaga nulwala mmakosi, ukuti atagigwege munyanja, ukukinda ukumpesya yumo mbanandi aba. 3#Mat 18.15Mwandege lelo! Linga ugwamyinu atulile inongwa, unsokege; lelo linga apindwike unswege. 4Nalinga ikutula inongwa kumyako kahano na kabili kwisiku, linga ikwisa kumyako kahano na kabili nukuti, ‘Mbindwike,’ unswege.”

Ulwitiko

5Popapo abatumigwa balinkuyoba kuNtwa balinkuti, “Ulitongelapo ulwitiko.” 6Umwene Untwa alinkubabula alinkuti, “Linga mwali nulwitiko ulu luli bo akaseke ka mutaka, po angali mukugubula unkuyu ugu mukuti, ‘Kumbuka ukibyale panyanja,’ po angali gukubitika.

Imbombo ya ntu mwa

7“Muno muyilile umwe, ywani uyu ali numbombi gwake uyu ikulima pamo uyu ikutima imitimo, uyu bo akotwike kungunda, ambulege ukuti, ‘Isaga mbibimbibi, tugala ulyemo’? 8Kali atisakumbulaga ukuti, ‘Undendekekesyege ifyakuiya, fwala imyenda gyako, umbombelege ukufika papo nikumalaga ukulya nukunwa, po lelo nugwe gwise ulyege nukunwa’? 9Bule kali ikugwa ulupi kumbombi papo abombile sisyo alagiligwe? 10Bunobuno nanumwe, bo mubombile syosa isi mulagiligwe, mutigi, ‘Uswe tuli babombi abasitakubagila, buno tubombile syene sisyo syatubagile ukusibomba.’ ”

Yesu ikubabumbulusya aba mbungo ya bukoma kalongo

11Lumo lelo bo Yesu ikwenda ukubuka nkaya ka Yerusalemu, alinkukisania pakati pakisu kya Samaria nikya Galilai. 12Lelo bo ingile nkaya kamo, popapo alinkwaganila nabandu kalongo aba mbungo ya bukoma; aba balyimile pabutali; 13balinkwinula ilisyu, balinkukolela balinkuti, “Yesu gwe Malafyale, ulitupakisyaga.” 14#Levi 14.1-32Umwene bo ababwene, alinkubabula alinkuti, “Amubukege mukinangisyege kubaputi.” Lelo bo bikubuka, balinkweluka. 15Yumo loli mmyabo, bo ibwene ukuti aponile, alinkugomoka, alinkuntufya Kyala nisyu ilikulumba, 16alinkwitaga mmalundi gake, alinkungwila ulupi Yesu; umwene yuyuyu yo ali nSamaria. 17Popapo Yesu alinkwamula alinkuti, “Bakalyelusigwe kalongo? Lelo bali kugu bahano na bana bala? 18Bakagigwa nabamo aba bagomwike nukumpa ubukulumba Kyala, loli mwene yu nhesya uyu?” 19Popapo alinkumbula alinkuti, “Sumuka ubukege, ulwitiko lwako lukupokile.”

Ukwisa kwa butwa bwa Kyala

(Mat 24.23-28,37-41)

20Bo abaFarisai bikundalusya Yesu akabalilo aka ubutwa bwa Kyala bukwisilaga, alinkubamula alinkuti, “Ubutwa bwa Kyala butikuboneka mmaso ukwisa; 21kangi batisakuyobaga ukuti, ‘Keta buli kuno! Pamo, buli kula!’ Keta, buno ubutwa bwa Kyala buli nkati mmyinu.”

22Popapo alinkubabula abafundigwa bake alinkuti, “Gikwisaga amasiku, apa mwisakunyonywaga ukuliketa ilisiku limo lya Nnyamundu, loli mutisakulibonaga. 23Po bisakubabulaga ukuti, ‘Keta, kula! Keta, kuno!’ Mungisakubukangako, kangi mungisakubakongaga. 24Buno bo apa ikimweku kya njasi kikumwekuka ukufuma kulubafu lumo lwa mwela, ukwakufika kulubafu ulungi, bo isakuyaga bunobuno yope na Nnyamundu pisiku lyake. 25Loli fikuti tasi akubilwege fiyo, nukusyokeligwa ningulilo iyi. 26#Bwa 6.5-8Bo mumo syayilile mmasiku ga Noa, bo sisakuyaga na mmasiku ga Nnyamundu. 27#Bwa 7.6-24Abandu balinkulya nukunwa, balinkwega nukwegigwa, ukwisakufika pisiku lilyo Noa ingililaga mungalaba; umwelesyo gulinkwisa nukubapyuta bosa. 28#Bwa 18.20—19.25Syali bo bunobuno mope na mmasiku ga Loti; abandu balyaga nukunwa, bulaga nukulisya, babyalaga kangi bayengaga; 29loli pisiku ili Loti asokengemo nkaya ka Sodomu, po gulinkutima ukuti fula umoto ugu gongene nikibiliti ukufuma kumwanya, gulinkubapyuta bosa. 30Bunobuno lelo, bo sisakuyaga na pisiku lya kubonekela Nnyamundu. 31#Mat 24.17-18; Mar 13.15-16Pisiku lilyo, uyu linga ali pamwanya panyumba, nifyela lyake fili nnyumba, yo angisakusulukaga ukwakwega. Yope na uyu ali mungunda, angisakugomokelaga kunyuma. 32#Bwa 19.26Amukumbukilege panka-Loti. 33#Mat 10.39; 16.25; Mar 8.35; Luk 9.24; Yoh 12.25Uyu linga ikulonda ukubuponesya ubumi bwake, yo isakubupesyaga; loli uyu linga ikubupesya, yo isakubuponesyaga. 34Nikubabula une nikuti, Ikilo kikyo, bisakuyangapo abandu pakitala kimokyene; yumo isakwegigwaga, uyungi isakulekigwaga. 35Abakikulu babili bisakusyaga pamopene, yumo isakwegigwaga, uyungi isakulekigwaga.”#17.35 Amasimbo gamo gikongelelako 36 Abandu babili bisakuyaga mungunda, yumo isakwegigwaga, uyungi isakulekigwaga. 37Popapo balinkumwamula balinkuti, “Kugu Malafyale?” Umwene alinkubabula alinkuti, “Apa gulipo umfimba, po apa gikubungana iminombo.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKA 17: NNBII

Highlight

ಶೇರ್

ಕಾಪಿ