YOHANI 6

Yesu ikubaswila abandu baelifu bahano (5,000)

(Mat 14.13-21; Mar 6.30-44; Luk 9.10-17)

1Panyuma pali sisisi, po Yesu alinkwambuka ukubuka kwisilya ilingi ilya nyanja ya Galilai, iyi bikuti yo Tiberia. 2Popapo ikilundilo kya bandu ikikulumba kilinkunkonga, namanga bafibwene ifika ifi apelile pababine. 3Umwene Yesu alinkufyuka pakyamba, po alinkwakwitugasya nabafundigwa bake. 4Loli iKyaka kya baYuda ikya Pasa kyasegelile. 5Umwene Yesu bo ikukibona ikilundilo kya bandu ikikulumba kikwisa kumyake alinkundalusya Filipu alinkuti, “Tukulaga kugu ifisyesye ukuti abandu bababa balyege?” 6Loli syo ayobaga sya kungela itolo, namanga umwene asimenye sisyo ayaga pakusibomba. 7Umwene Filipu alinkumwamula alinkuti, “Ifisyesye fya pa badenari#6.7 Denari yumo afwene nuntengo gwa mundu ugwa isiku limo. bamia babili (200) fikabagila ukubafwana ukuti umundu gwesa ambililege finandi.” 8Popapo yumo mbafundigwa bake, Andrea ugwamyabo gwa Simoni Peteri, alinkumbula Yesu alinkuti, 9“Kalipo papapa akalumyana, aka kali nifisyesye fihano ifya malesi nutuswi tubili; fyo fibombe fiki kubandu abingi bababa?”

10Umwene Yesu alinkuyoba alinkuti, “Amubatugasye abandu pasi.” (Lyalipo ilisu lingi itolo papo.) Bunobuno abandu balinkutugasya pasi, abanyambala baliti bali pa baelifu bahano (5,000). 11Popapo Yesu alinkwega ifisyesye, alinkugwa ulupi, alinkubapa abandu aba batugesye; tope nutuswi bububo, balinkufya ukufwana bo mumo balondelaga. 12Lelo bo bikwite, Yesu alinkubabula abafundigwa bake alinkuti, “Amubunganiege utubululukisya utu tusyele, ukuti nakamo kangatagigwaga.” 13Popapo balinkubungama utubululukisya twa fisyesye fya malesi fila, utu basyesye aba balyaga, balinkwisusya ifitundu kalongo na fibili.

14Lelo bo abandu bakibwene ikika iki apelile, balinkuyoba balinkuti, “Uyu yo nsololi naloli yuyo batigi ikwisaga nkisu.” 15Umwene Yesu bo asyagenie ukuti bikulonda ukwisa kukunkola, ukuti bamwimike ukuya malafyale, popapo alinkuyonga, alinkwakwiyekela kukyamba.

Yesu ikwenda panyanja

(Mat 14.22-33; Mar 6.45-52)

16Lelo bo bwilile namayolo, abafundigwa bake balinkusuluka ukubuka kunyanja. 17Balinkwipaka mwiboti, balinkwambuka ukubuka nkaya ka Kapernaumu. Lelo ingisi yagwile, umwene Yesu akali ukufika apa balipo. 18Popapo inyanja yilinkusambuka, papo umbelo unkulumba gwakulaga. 19Bo bafigile pantambo gwa makilomita matatu pamo mana, balinkumbona Yesu ikwenda panyanja, ikusegelela kwiboti; abene balinkutetema. 20Popapo Yesu alinkubabula alinkuti, “Yo une, mungatetemaga.” 21Abene balondaga ukumwegela mwiboti, loli nakalinga itolo iliboti lilinkufika kwisilya kuno balabilaga.

Abandu bikundonda Yesu

22Nulubunju ikilundilo kya bandu iki kyalyimile isilya lila ilya nyanja, kilinkwaga ukuti likalipo iliboti ilingi loli lyene lila lila; nukuti Yesu akalipakile mwiboti pamopene nabafundigwa bake, abene abafundigwa bake babukile bene itolo. 23Loli galisile amaboti aga gafumile mu Tiberia, pabupipi napa balilaga ifisyesye, bo uNtwa agwile ulupi. 24Lelo bo ikilundilo kya bandu kyagile ukuti Yesu akayapo papo, bope nabafundigwa bake bakayapo, popapo balinkwipaka mmaboti, balinkubuka nkaya ka Kapernaumu kukundonda Yesu. 25Lelo bo bayilekumwaga isilya lila lya nyanja, popapo balinkundalusya balinkuti, “Rabi, gwisile ndili kuno?” 26Umwene Yesu alinkubamula alinkuti, “Naloli nikubabula une nikuti, umwe mutikundonda papo mwafibwene ifika, loli papo mwalile ifisyesye, mwalikwite. 27Mungiyulaga kufyakulya ifi fikuyonga, loli mwiyulege kufyakulya ifi fikuyako bwila, ifi fikupa ubumi bwa bwila, ifi Nnyamundu ikubapaga; namanga yo uyu Kyala ugwise ansisimikisye.” 28Abene balinkundalusya balinkuti, “Tutigi fiki lelo ukusibomba imbombo sya Kyala?” 29Umwene Yesu alinkubabula alinkuti, “Isi Kyala ikuti mubombege ko kumwitika yuyo alintumile.” 30Popapo balinkundalusya balinkuti, “Kupelaga kika kiliku lelo ukuti tukibone tukwitikege? Kubombaga fiki? 31#Kuso 16.4,15; Salimo 78.24Batata balyaga mana ndukubo, bo lilyo lisimbigwe ili Ukuti, ‘Abapele ikisyesye ikifuma kumwanya, ukuti balyege.’ ”

32Popapo Yesu alinkubabula alinkuti, “Naloli nikubabula une nikuti, akaya yo Mose uyu abapele ikisyesye ikifuma kumwanya, loli yo yu Tata uyu ikubapa umwe ikisyesye ikya naloli ikifuma kumwanya, nukukipa ikisu ubumi. 33Namanga ikisyesye kya Kyala, kyo iki kikusuluka ukufuma kumwanya, nukukipa ikisu ubumi.”

34Abene balinkundalusya balinkuti, “Gwe Ntwa, utupege bwila ikisyesye kikiki.” 35Popapo Yesu alinkubabula alinkuti, “Yo une ne kisyesye ikipelabumi; uyu linga ikwisa kumyangu, yo yitisakundumaga injala; kangi uyu ikunyitika une, yo atisakumilwamo siku. 36Loli nababulile umwe ukuti, ukumbona ko mumbwene, loli mutikunyitika. 37Kosa aka Tata ikumbaga, kisakwisaga kumyangu; kangi gwesa uyu linga ikwisa kumyangu, yo ndisakunkagilaga siku panja. 38Buno ngasuluka ukufuma kumwanya nkubomba ubwigane bwangu, loli nisile nkubomba ubwigane bwa yuyo alindumile. 39Ubwigane bwa uyu alindumile une bo bwakuti nangakatagaga nakamo muli utu ambele, loli ukuti nisenkasyusyege pisiku lya kusulo. 40Namanga ubwigane bwa Tata bo bwakuti gwesa uyu ikunketa uMwana nukumwitika, ayege nubumi bwa bwila kangi une ni sakunsyusyaga pisiku lya kusulo.”

41Popapo abaYuda balinkwibubusya kumyake, papo ayobile atile, “Une ne kisyesye iki kisulwike ukufuma kumwanya”. 42Balinkuti, “Akaya yo Yesu unnya Yosefu yuyuyu? Uyu ugwise nunna tubamenye? Po ikuyoba bulebile ukuti nsulwike ukufuma kumwanya?” 43Umwene Yesu alinkubamula alinkuti, “Mungibubusyaga mwibene. 44Nayumo akabagila ukwisa kumyangu, loli pene apa linga Tata uyu alindumile une ikunkwaba; kangi nanine nisakunsyusyaga pisiku lya kusulo. 45#Yes 54.13Lisimbigwe mbasololi ilyakuti, ‘Bosa bisakumanyisigwaga na Kyala.’ Gwesa uyu linga apilike kangi amanyile kwa Kyala, yo ikwisa kumyangu. 46Mungatigi yumo ambwenemo Tata, loli mwene uyu afumile kwa Kyala, yo ambwenemo Tata. 47Naloli nikubabula une nikuti, Uyu linga ikwitika, yo ali nubumi bwa bwila. 48Yo une ne kisyesye ikipelabumi. 49Abisemwe balinkulya mana mmatengele, loli balinkufwa. 50Iki kyo kisyesye iki kisulwike ukufuma kumwanya, ukuti umundu bo alile, angafwaga. 51Yo une ne kisyesye ikyumi, iki kisulwike ukufuma kumwanya; gwesa uyu linga ikulya ikisyesye kikiki, yo ikuyaga mumi bwila itolo. Kangi ikisyesye iki nikubapaga umwe ukuya bumi bwa kisu, go gu mbili gwangu.”

52Popapo abaYuda balinkukanikana fiyo babo batupu balinkuti, “Kali umundu uyu ikutupaga bulebule umbili gwake ukuti tulyege?” 53Umwene Yesu alinkubabula alinkuti, “Naloli nikubabula une nikuti, linga mutikulya umbili gwa Nnyamundu, kangi linga mutikunwa nilopa lyake, po mukaya nubumi munda mmyinu. 54Uyu linga ikulya umbili gwangu, ikunwa nilopa lyangu, yo ali nabo ubumi bwa bwila; yo nanine nisakunsyusyaga pisiku lya kusulo. 55Namanga umbili gwangu fyo fyakulya fya naloli, lyope nilopa lyangu fyo fyakunwa fya naloli. 56Uyu linga ikulya umbili gwangu, kangi ikunwa nilopa lyangu, yo ikuyaga mmyangu, nanine mmyake. 57Bo apa Tata umumi andumile une, nanine ndi mumi mwa Tata, po apa uyu ikundya une, yope isakuyaga mumi mu mmyangu. 58Iki kyo kisyesye iki kisulwike ukufuma kumwanya, kikaya bo iki balyaga abisemwe kangi balinkufwa; uyu linga ikulya ikisyesye iki, yo ikuyaga mumi bwila na bwila.” 59Sisisi syo isi Yesu asiyobile nnyumba yakwiputilamo, bo ikumanyisya nkaya ka Kapernaumu.

Abafundigwa bikwilamwa

60Popapo bingi mbafundigwa bake, bo bapilike sisisi, balinkuyoba balinkuti, “Ilisyu ili ipalapala, ywani abagile ukulipilika?” 61Umwene Yesu bo asyagenie munda mmyake, ukuti abafundigwa bake bikwibubusya pisyu lilili, popapo alinkubabula alinkuti, “Kali ilisyu ili likubafulasya mundumbula? 62Po sisakuyaga bulebule bo Nnyamundu ikufyuka ukubuka kuko aliko iyolo? 63Yo yu Mbepo uyu ikupa ubumi, umbili go gukaya nimbombo nayimo. Amasyu aga mbabulile, go gikubatwalila Mbepo Umpelabumi. 64Loli balimo bamo mmyinu aba batikwitika.” (Namanga Yesu amenye ukufuma ku kubwandilo ukuti bo bani aba batikwitika, nukuti ywani uyu isakumbikaga mmaboko ga balugu.) 65Alinkongelapo alinkuyoba alinkuti, “Syo sisyo mbabulile ukuti, nayumo akabagila ukwisa kumyangu, pene papo linga apegigwe na Tata.”

Peteri ikunjoba Yesu ukuya yo Kristi

(Mat 16.13-20; Mar 8.27-30; Luk 9.18-21)

66Panongwa yiyiyi, bingi mbafundigwa bake balinkugomokela ku nyuma, balinkusita nukwenda nagwe. 67Popapo Yesu alinkubabula kalongo na babili bala alinkuti, “Nanumwe mukulonda ukuyonga?” 68#Mat 16.16; Mar 8.29; Luk 9.20Alinkwamula Simoni Peteri alinkuti, “Gwe Ntwa, tuyongelege kwani? Ugwe uli nago amasyu ga bumi ubusita kumalika; 69uswe situkolile, kangi tumenye ukuti gwe Mwikemo gwa Kyala yuyugwe.” 70Popapo Yesu alinkubamula alinkuti, “Bule ngabasalile umwe kalongo na babili? Loli yumo mmyinu yo mohesi.” 71Ambalaga yu Yuda unnya Simoni gwa mu Karioti; namanga ayaga pakumbika mmaboko ga balugu, ali yo yumo muli bala kalongo na babili.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANI 6: NNBII

Highlight

ಶೇರ್

ಕಾಪಿ