Luqaasa Mishiraachcho 6
6
Sambata Gishshas Oyshettida Oysho
(Mato 12:1-8; Mar 2:23-28)
1Issi Sambata gallas Yesusi kaththa giddora aadhdhi bishin iza kaallizayti tiya xuphi ekkidi ba kushen shigechchi mishin,#Zaare 23:25 2Farsaawetappe issi issi asati, «Sambata gallas ooththanaas bessonttayssa ays ooththeetii?» gida.
3Yesusikka isttas, «Dawiti izara diza asati gafida wode izi ooththidayssa nababibeekketii?#1Same 21:1-6 4Izi Xoossa Keeththe gelidi qeeseti xalla maana mala azazettida dumma ukeththaa baas miidi banara dizaytas immides» giidi zaarides.#Lewe 24:9
5Qasseka Yesusi, «Asa Nay Sambata Godaa» giidi isttas yootides.
Yesusi Paththida Kushe Sila Addeza
(Mato 12:9-14; Mar 3:1-6)
6Yesusikka hara Sambata gallas Ayhuda Woosa Keeththe gelidi tamaarsishin ushachcha kushey silida issi asi heen dees. 7Muse wogaa tamaarsizaytinne Farsaaweti Yesusa mootanaas gaaso koyidi ane izi Sambata gallassan addeza paththiko beyana giidi naagishe gam7ida. 8Yesusikka istta wozina qofaa eridi kushey silida addeza ubbaa sinththan, «Denda eqqa» gides. Addezikka dendi eqqides.
9Yesusikka istta, «Ta inttena issi miish ane oychchays; Sambata gallas ooththanaas bessizay lo7o oosoyee? Iita oosoo? Shempo asho woykko dhayssoo?» giidi oychchides.
10Qasseka Yesusi ba yuushon diza ubbaa yuushshi xeellidaappe guye addeza, «Ne kushe piddisa» gides; addezikka Yesusi gida mala ooththides. Iza kusheykka paxides.
11Gido attiin asati hanqettida; Yesusa bolla ay ooththanaas koshshizaakko ba giddon zorettida.
Tammanne Nam7u Hawaareta Dooreteth
(Mato 10:1-4; Mar 3:13-19)
12He gallassatappe issi gallas Yesusi woossanaas zuma bolla kezidi omars kumeth Xoossaa woossishe aqides. 13Gadey wontishin bana kaallizayta xeygidi isttafe tammanne nam7ata doorides. Isttaka, «Hawaareta» giidi sunththides.
14Isttika Phexroosa giidi sunththida Simoonanne iza isha Indiraasa, Yaaqoobe, Yohannisa, Piliphoosa, Bartelemoosa, 15Matoosa, Toomaasa, Ilfiyoosa naa Yaaqoobe, ba baggas mishettiza Simoona, 16Yaaqoobe naa Yuhudanne Yesusa aaththi immida Asqoronto Yuhuda.
Yesusi Daro As Tamaarsidessinne Paththides
(Mato 4:23-25)
17Yesusikka isttara issife zumaa bollafe duge wodhdhidi dembason eqqides. Iza kaallizaytappe daro asay heen dees, Yuhudappenne Yerusalaameppe, qasseka Xirooseppenne Sidoona Abba achchafe yida keehi daro asaykka heen dees. 18Isttika yiday Yesusi gizayssa siyanaassinne hargefe paxanaassa; tuna ayanaykka waayisizayti wuri paxida. 19Wolqqayka izappe kezidi darota paththiza gishshas asay wuri iza bochchanaas yides.
Anjjonne Waaye Gaasota
(Mato 5:1-12)
20Yesusikka bana kaallizaytas, «Xoossa Kawoteththay inttes gidida gishshas intteno manqotoo! Intte anjjettidayta;
21«Intte guyeppe kallana gishshas
ha7i gafizaytoo!
Intte anjjettidayta;
intte guyeppe miiccana gishshas
intteno ha7i yeekkizaytoo!
Intte anjjettidayta;
22asay ta gishshas inttena ixxishin
ba giddofe shaakkishin,
borishininne
inttena iita sunththara xeygishin
intte anjjettidayta;#1Phex 4:14
23«Inttes salon gita woytoy diza gishshas he wode ufayssan guppite; ays giikko istta Aawati nabeta bolla hessaththo ooththida.#2Taari 36:16; Hawa 7:52
24«Gido attiin intteno duretoo!
Intte ha7i ufayettida gishshas
inttes aayye ana!
25Intteno ha7i kallidaytoo!
Inttena aayye ana!
Intte guyeppe gafana;
intteno ha7i miiccizaytoo!
Inttes aayye ana!
Intte guyeppe
mishettananne yeekkana.
26«Asi wuri intte gishshas lo7o haasayza wode inttes aayye ana! Ays giikko istta aawati wordo nabetas hessa mala ooththida.
Morkke Siiqo Gishshas
(Mato 5:38-48; 7:12)
27«Gido attiin ta yootizayssa siyizaytoo! Tani inttes yootizay intte morkketa siiqite; inttena ixxizaytas lo7o ooththite; 28inttena qanggizayta anjjite; inttena qohizaytas woossite; 29Issi shagalan baqqiko nam7anththo shagalaa#6:29 Shagala: Shagala geetettizayssi issi issi bagga Gamoththo qaalan qinxalle geetettees. gujja bessa; oonikka ne bollara may7idayssa qaari ekkiko gaaththara may7idayssaka diggofa.
30«Nena woossiza ubbaas imma; ne miishshaa ekkida asi zaari immana mala oychchofa.
31«Asi inttes ooththana mala intte koyzayssaththo intteka hara asas ooththite.#Mato 7:12
32«Nagaranchchatikka bana siiqizayta siiqiza gishshas intte inttena siiqizayta xalla siiqikko inttes ay dumma anjjoy dizee? 33Intte inttes lo7o ooththizaytas xalala lo7o ooththiko inttes ay dumma anjjoy dizee? Ays giikko nagaranchchatikka hessaththo ooththeettes. 34Tal7e ekkidi zaarana dandayeettes gizaytas xalla intte tal7iko intte hara ay dumma anjjo demmanee? Ays giikko nagaranchchatikka istti tal7idayssa sire zaaridi ekkanaas nagaranchchatas tal7eettes. 35Gido attiin Xoossi bana galatonttaytassinne iitatas kiya gidida mala intte morkketa siiqite; lo7o ooththite; guyeppe zaari ekkanaas qoppontta dishe tal7e immite; hessankka inttes kushe zaaroy gita gidana; qasseka intte wogga Xoossaa naa gidana. 36Intte aaway kiya gidida mala intteka kiyata gidite.
Hara Asa Bolla Pirdanaas Bessenna
(Mato 7:1-5)
37«Intte harata bolla pirdofte; intte bollaka pirdettenna; intte bolla pirday darontta mala harata bolla pirda darsofte; Asas atto giite; intteska atto geetettana. 38Immite! Intteska imettana; inttes intte makkida miishshan simmidi makettana; harappeka naaqqi baqettidi yigetti kumidi wora gukkanaashe lo7o makkiza miishshan makettidi inttes imettana» gides.
39Qasseka Yesusi isttas leemison, «Qooqey qooqe kaaleththanaas dandayzee? Kaaleththikokka nam7ati issoy issaara oykettidi ollan gelettennee?#Mato 15:14 40Tamaarey bana tamaarsizaadefe aadhdhenna; gido attiin lo7eththi tamaarda asi wuri ba astamaare mala gidees.#Mato 10:24-25; Yoha 13:16; 15:20
41«Ne ayfe giddon diza tuussaa xeellontta dashe ne isha ayfe giddon diza buuraa ays xeellay? 42Ne ayfen diza tuussaa be7ontta ne ishaa, ‹Tani ne ayfen diza buuraa ane kessays› gaanaas wostta dandayay? Nenoo qoodheppe qommon hanizaysso koyrottada ne ayfen diza tuussaa kessa; hessafe guye ne ishaa ayfen diza buuraa kessanaas lo7eththa xeellandassa.
Miththi Ba Ayfen Erettees
(Mato 7:17-20; 12:34-35)
43«Lo7o miththi iita ayfe ayfenna; qasseka iita miththi lo7o ayfe ayfenna. 44Miththi wurikka ba ayfen ayfen erettees; Agunththafe Balase geetettiza miththa ayfey maxettenna; laadeppe woyne ayfey qanxxettenna.#Mato 12:33 45Lo7o asi ba wozinaa kumida lo7o miish kessees; iita asikka ba wozina kumida iita miishshaafe iita kessees; asi wurikka ba wozina kumi palahidayssa ba doonan haasayees.#Mato 12:34
Nam7u Qommo Keeththe Keexxiza Asata
(Mato 7:24-27)
46«Tani gizayssa ooththeketa shin ays tana, ‹Godoo! Godoo!› geetii? 47-48Taakko yiidinne ta qaala siyidi polizay wuri oona misatizaakko ta inttena bessana; keeththe keexxanaas ziqqi ooththi bookkidi shuchcha bollan ba keeth keexxida asa misatees. Haro haaththi yiidi he keeththaa sugides; gido attiin minni keexettida gishshas qaaththanaas dandaybeenna. 49Gido attiin ta qaala siyidi polontta asi ba keeththe lo7eththi baasonttanne giddon shuch yeggontta keexxida asa misatees; haroykka keeththaa sugiin keeththay heerakka kundidi iita laaleth laalettides» gi yootides.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luqaasa Mishiraachcho 6: GM
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Word for the World International
