Luqaasa Mishiraachcho 21
21
Am7ey Imota
(Mar 12:41-44)
1Yesusi dhoqqu gi xeellishin dure asati Xoossa Keeththen muxuwaata izan shiishshizayssa giddon muxuwaata yeggishin be7ides. 2Qasseka issi am7o dizaara nam7u sikkina gidiza nam7u xarqimala he muxuwaata izan shiishshizayssan yeggishin xeellidi, 3«Ta inttes tumu gays; hanna am7eya ubba asaappe bollara aadheth immadus. 4Hayti asati immiday baas diza tirpafe gidishin iza gidikko baas baynda wolqqaafe baas dizaaronne ba duussas koshshizaaro wursa yeggadus» gides.
Xoossa Keeththi Laalettanayssa Yesusi Kaseti Yootida Qaala
(Mato 24:1-2; Mar 13:1-2)
5-6Iza kaallizaytappe issi issi asati Xoossa Keeththay lo7o shuchchaninne asay immida imotan ay mala lo7i keexettidaakko giidi ba giddon haasayettishin Yesusi siyidi, «Hayssi intte be7izayssi wuri laalettontta shuchchi shuchcha bolla keelettida mala attontta wodey yaana» gides.
7Isttika iza, «Astamaaree! Hayssi wuri ayde hananee? Qasse hayssi hananayssas malatay aazee?» giidi oychchida.
8Izikka isttas, «Intte balettontta mala naagettite; daroti bana, ‹Ta Kirstoosakko! Wodeykka matides› gishe ta sunththara yaana shin intte istta kaallofte. 9Ola gishshassinne dere makkallateththa gishshas siyiza wode dagammofte. Hessi wuri kasetidi hananaas bessees; wurseththi gakkides; gido attiin heerakka hanenna» gides.
10Qasse, «Derey dere bolla, kawoy kawo bolla dendana. 11Biittay wolqqama qaath qaaxxana; koshaynne boshay dumma dummason hanana; daro babisizaazinne saloppe gita malatay beettana.
12«Hessi wuri hananaappe kasetidi asay inttena oykkananne gooddana; Ayhuda Woosa Keeththinne qasho keeth gelththana; kawota sinththinne daannata sinth shiishshana. Hessi wuri ta sunththa gishshas intte bolla gakkana. 13Hessi wurikka markkattanaas lo7o qaada gidana. 14Hessa gishshas nuna oychchizaytas nu ay zaarinoo? giidi kasetidi hirgontta mala hayssa wozinan woththite.#Luqa 12:11-12 15Intte morkketappe oonikka inttenara eqettanaassinne baleththanaas dandayontta qaalanne cinccateth ta inttes immana. 16Inttena yelidaytinne intte ishati, intte dabbotinne intte laggeti wuri inttena aaththi immana; inttefe baggata wodhana. 17Ta sunththaa gishshas ubba asaa achchan intte ixettana. 18Gido attiin intte hu7e binanatappe issinakka dhayukku. 19Intte minni eqqiko intte shempo ashshana.
Yesusi Yerusalaame Dhayo Gishshas Kasetidi Yootida Qaala
(Mato 24:15-21; Mar 13:14-19)
20«Ola asay Yerusalaame giddoththishin beyikko izis dhayza wodey matidayssa erite. 21He wode Yuhudan dizayti pude zuma bolla gangetto; kataman dizaytikka katamappe kezite; dere giddon dizaytikka he katamayo geloppetto. 22Xaafettidayssi wuri polettanaas hanna halo kessiza wode.#Hose 9:7 23Biitta bolla gita metoy hanana; hayssa dereza bolla hanqoy yaana; hessa gishshas he wode qanththara diza maccassatassinne dhanththiza aayetas aayye ana! 24Bagga asay mashshan hayqqana; ba dereppe hara dere di7ettana; Yerusalaameykka Xoos erontta dereta wodey polettana gakkanaas, Xoos erontta asatan yedhettidaaro gidana.
Asa Naas Nam7anththo Yuus
(Mato 24:29-31; Mar 13:24-27)
25«Arshe bolla, agina bollanne xoolintte bolla malatay beettana; abbaafenne abba dambala giirissafe dendidayssan biitta bolla diza derey hirgananne metotana.#Isa 13:10; Hizi 32:7; Iyu 2:31; Ajju 6:12-13 26Salo wolqqamati qaaxxiza gishshas asay biitta bolla aazee hananeeshaa guussaninne naagon xalla daaburana. 27He wode Asa Nay wolqqara, gita bonchchoranne shaarara yishin beyana.#Daane 7:13; Ajju 1:7 28Intteka hayti ha ta gidayti poleteth oykkishin inttes ateththa wodey matida gishshas sitti gi eqqite; intte ayfe pude dhoqqu histtite» gides.
Godaa Yuussaa Malatiza Balase Miththay Leemiso
29-30Kaaleththidi, «Balase miththinne hara miththata ubbaa xeellite; he miththati hayth kessishin intte be7iza wode boney matidayssa intte ereeta. 31Hessaththoka haytanti geetettidayti polettishin intte be7iza wode Xoossa Kawoteththi intteko matidayssa erite.
32«Ta inttes tumu gays; hayssi wuri polettana gakkanaas ha yeletay aadhdhenna. 33Saloynne sa7ay aadhdhana shin ta qaalay aadhdhenna.
34«Histtiko wogay baynda duussan, daro ushshaninne duussas hirgan intte wozinay daaburoppo; hessa ooththontta ixxiko he gallassay intte qoppontta narxa mala intte bolla gakkontta mala naagettite. 35Hayssi biitta bollan diza asaa ubbaa bolla gakkana. 36Hessa gishshas buro yaanayssafe intte kessi ekkana malanne Asa Naa sinththan eqqanaas dandayana mala ubba gallas minnidi woossite» gides.
37Yesusi gallas gallas Xoossa Keeththan tamaarsi tamaarsidi omars omars Dabrazayte geetettiza zuma bolla kezi kezi aqees.#Luqa 19:47 38Asay wurikka izappe siyanaas maalado wonttara Yesusaakko Xoossa Keeththe yees.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luqaasa Mishiraachcho 21: GM
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Word for the World International
