Luqaasa Mishiraachcho 17
17
Asas Dhuphe Gidanaappe Naageteth
(Mato 18:6-7,21-22; Mar 9:42)
1Yesusi bana kaallizayta, «Asa dhuphidi nagaran yeggiza miishshi yontta aggenna; gido attiin yaana dhuphezas gaaso gidizaades aayye ana! 2He addezi ha guuththatappe issaas dhuphe gidanaappe woxa shuchchi iza qoodhen qashettiin abba giddo izi yegettizaakko izas lo7o gidana. 3Hessa gishshas intte hu7es naagettite. ‹Ne ishay nena qohikko hanqetta; izi ba mooro eridi simmiko maara.›#Mato 18:15 4Issi gallassan laappunto zaari zaari qohidi laappuntokka zaari zaari, ‹Maara› giikko maara» gides.
5Hawaaretikka, «Godoo! Nuus ammano gujja» gida.
6Godaykka, «Gaashe ayfe lagge ammanoy inttes diikko hayssa, ‹Eththaa dhoqalletta baada abban gela toketta› intte giikko izi inttes azazettana» gides.
7-8Qasseka Yesusi, «Intte giddofe issi asas goshshanchchay woykko dors heemmiza ashkaray diikko izi goshshasoppe simmishin, ‹Taas maana kawo giigsa; ta maada uyana gakkanaas gixettada taas ooththa; hessafe guye maandasanne uyandassa› gees attiin ha7i quma maana haa aadhdha gizee? 9Histtiko he ashkaraa goday izi iza azazo polida gishshas iza galati erizee? 10Hessa gishshas inttenikka intte azazettidayssa wursi polida wode, ‹Nuni go7ay baynda oosanchchata nuus ooththanaas bessizayssa poli ooththidos› gite» gides.
Yesusi Inchchirachcha Hargefe Paththida Tammu Asata
11Hessafe guye Yesusi Yerusalaame bishe Samaariyaranne Galila achchara aadhdhides. 12Issi guta gelida wode inchchirachcha hargiza tammu asati iza demmida. Isttika haahon eqqidi 13ba qaala dhoqqu histtidi, «Yesusaa! Godoo! Nuus mishettarkkii!» gida.
14Izikka istta be7idi, «Biite! Inttena qeesetas bessite» gides; isttika buro bishe oge bolla paxida.#Lewe 14:1-32 15Isttafe issoy ba paxidayssa be7idi ba qaala dhoqqu histtidi Xoossaa bonchchishe simmides. 16Izaadeyka Yesusa toho bolla kundidi galatides; izikka Samaariya biitta asa.
17Yesusikka addeza, «Paxidayti tammu as deettennee? Histtiin uddufunati awa bidoo? 18Hayssa dumma dere addezappe attiin Xoossa galatizay baa guussee?» giidi oychchides. 19Addezakka zaaridi «Dendada ba! Nena ne ammanoy paththides» gides.
Xoossa Kawoteththa Yuussa Gishshas
(Mato 24:23-28,37-41)
20«Xoossa Kawoteththi ayde yaanee?» giidi Farsaaweti Yesusa oychchida wode Yesusi, «Xoossa kawoteththi beettiza malatatan yuukku. 21Asay Xoossa kawoteththi haan dawus woykko heen dawus gaanaas dandayettenna; Xoossa kawoteththi intte giddon dawus» giidi zaarides.
22Bana kaallizaytaska, «Asa Naa gallassatappe issi gallassayo beyanaas intte amottana wodey yaana; gido attiin intte beyekketa. 23Asay inttes, ‹Haan dawus› woykko, ‹Heen dawus› gaana shin intte istta kaallidi boopite. 24Gaasoykka wolqqanththi wolqqamidi ha gaxappe he gaxa gakkanaas poo7isiza mala Asa Nay yiza gallas iza mala hanana. 25Gido attiin hayssi wuri hananaappe koyro Asa Nay daro meto ekkanaassinne hayssa ha yeletaan kadhettanaas bessees.
26«Nohe wode hanidayssa mala Asa Naa wodenkka hessaththo hanana.#Medhe 6:5-8 27Nohey markaben gelana gallas gakkanaas asay mishininne uyishin, ekkishininne gelishin dhayssiza haaththi yiidi wursika dhayssides.#Medhe 7:6-24
28«Looxe wodekka iza mala hanides; asay meessinne uyees; bayzeessinne shammees; tokkizaaz tokkees; keeththika keexxees. 29Gido attiin Looxey Sodoomeppe kezida gallas shuchchinne mith qorontta diine tamay saloppe bukkidi ubbaa dhayssides.
30«Asa Nay qoncciza gallas hessaththo hanana. 31He wode ba keeththa bolla dizaadey oonikka keeththa giddon diza miish ekkana giidi duge wodhdhofo; hessaththoka goshsha soon diza asi guye soo simmofo.#Mato 24:17-18; Mar 13:15-16 32Looxe machcho qopite.#Medhe 19:26 33Ba de7o gam7isana koyzay wuri dhayssana; ba shempo aaththi immizaadey gam7isana.#Mato 10:39; 16:25; Mar 8:35; Luqa 9:24; Yoha 12:25 34Ta inttes gizay he wode omars nam7u asi issi hiixan ichchana; issoy ekettana; issoy attana. 35Nam7u maccassati issife gaaccishin issineya ekettana; hankkoora attana. 36Nam7u asi issife goshshason daana; issoy ekettana; issoy attana.#17:36 Issi issi Geeshsha Maxaafatan taybo 36 bolla diza qofaa gujjeettes; qofazikka Mato 24:40 dizayssa misatees.
37«Isttika zaaridi, ‹Godoo! Istti awa ekettanee?› gida; izikka ahay dizason ankkoti shiiqana» gides.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luqaasa Mishiraachcho 17: GM
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Word for the World International
