Yohannisa Mishiraachcho 5
5
Yesusi Paththida Toho Sila Addeza
1Hessafe kaallidi Ayhudata ba7aaley diza gishshas Yesusi Yerusalaame bides. 2Yerusalaamen dorsi geliza penge achchan Ibraaweta qaalara, «Betesayda»#5:2 Betesayda: Betesayda issi issi Geeshsha Maxaafati, «Betezata» geettes; birsheththayka, «Maaroteththa keeththa» guussa. geetettiza issi pulttofe shiiqidi eellida haaththi dees; izappe bollara kamay diza ichchashu ogeti deettes. 3Daro harganchchati, ayfe qooqeti, toho wobbetinne toho silati oge bolla ichchidi haaththi qaaxettana gakkanaas naageettes. 4Issi issi wode Godaa kiitanchchay haaththaan wodhdhidi haaththa qaaththees; haaththaa qaaththafe kaallidi koyrottidi haaththaan geliza harganchchay bana sakkiza ay hargefekka paxees.#5:4 Issi issi Geeshsha Maxaafati taybo heedzdzas wurseththa bollafe biidi oyddu wurseth gakkanaas diza qofaa gujjettenna. 5Heen heedzdzu tammanne osppun layth kumeth sakettida issaadey dees. 6Yesusi addezi heen ichchidayssa be7idinne izi daro layth sakettidayssa eridi, «Ne paxana koyay?» gides.
7Harganchchazikka zaaridi, «Godoo! Haaththay qaaxettiza wode tana haaththaan gelththiza asi deenna; ta buro baana gishin haray taappe kaseti haaththaan gelees» gides. 8Yesusikka iza, «Denda! Ne ichchida algaa tookkada ba!» gides.
9Addezikka heerakka paxides; ba algaa tookki ekkidi bides. Hessi haniday Ayhudata Sambata gallassa. 10Hessa gishshas Ayhudata halaqati paxida addeza, «Hach Sambatara ne algaa tookkana mala Muse wogay azazenna» gida.#Nahi 13:19; Er 17:21 11Izikka isttas, « ‹Ne ichchida algaa tookkada ba› gi yootides» gides. 12Isttika, «Nena algaa tookkada ba giday oonee?» gi oychchida. 13Derey darida gishshassinne Yesusi heeppe haakki bida gishshas iza ooni paththidaakko addezi eribeenna.
14Hessafe guye Yesusi addeza Xoossa Keeththan demmidi, «Hekko ha7i ne paxadasa; kaseyssafe aadhdhiza iita miishshi ne bolla gakkontta mala nagara nam7anththo ooththofa» gides.
15Addezikka biidinne iza paththiday Yesusa gididayssa Ayhudata halaqatas yootides. 16Addeza Sambata gallas paththida gishshas Ayhudata daannati Yesusa oykkana yedeththida. 17Yesusikka isttas, «Ta Aaway ubba wode ooththees; tanikka ooththana» gides; 18Hessa gaason Ayhudata daannati Yesusa wodhana mala kaseppe aaththi denththeththida. Qasse izi Sambata moorida gishshas xalla gidontta, «Xoossi ta Aawa» gida gishshassinne bana Xoossara ginisida gishshassa.
Xoossa Naa Godateth
19Yesusi isttas, «Ta inttes tumu gays; Aaway ooththishin be7idayssa oosoppe attiin naazi ba shenen aykkoka ooththenna. Aaway ooththizayssa iza nay hessaththoka ooththees. 20Gaasoykka Aaway naaza dosees. Ba ooththizayssaka wursi iza bessees; intte malalettana mala hayssafekka aadhdhiza ooso buro bessana. 21Aaway hayqqidayta denththizayssaththonne de7o immizayssaththo naazikka hessaththo ba koyidaades de7o immana. 22Aaway oona bollaka pirdenna; gido attiin pirda maata ubbaa ba naazas immides. 23Izi hessaththo ooththiday asay wuri Aawa bonchchana malanne qasseka naazakka bonchchana malassa. Naaza bonchchonttay naaza kiittida Aawaakka bonchchenna.
24«Ta inttes tuma gays; ta qaalaa siyizaadessinne tana kiittidaaden ammanizaades mernaa de7oy dees. Izaadey hayqoppe gede de7on pinnides attiin iza bolla pirdettenna. 25Ta inttes tuma gays; kase hayqqida asati Xoossa naa qaala siyiza wodey yaana; he wodeyakka hanno; siyizayti wuri de7on daana. 26Gaasoykka Aaway ba baggara de7oy diza mala naazikka ba baggara de7oy daana mala ooththides. 27Izi asa naa gidida gishshas pirdana mala godateth izas immides. 28Hayssan aykkoka malalettofte. Gaasoykka kase hayqqidi duufon dizayti wuri iza qaala giiris siyiza wodey yaana. 29Lo7o ooththidayti hayqoppe dendidi paxana. Gido attiin iita ooththidayti hayqoppe dendidi pirdettana.#Daane 12:2
Yesusas Markkattida Asata
30«Tani ta shenen aykkoka ooththanaas dandaykke; gido attiin ta aawappe ta siyida mala pirdays. Tana kiittidayssa shene ooththays attiin ta shenen ta ooththontta gishshas ta pirdan balay baa. 31Tani ta gishshas tarkka markkattiko ta markkay tumu gidenna. 32Gido attiin ta gishshas markkattizaadey haray dees; izikka ta gishshas markkattizaade markkateththay tumu gididayssa ta erays. 33Intte Yohannisakko ase kiittideta shin izikka tumu markkattides.#Yoha 1:19-27; 3:27-30 34Ta hayssa gizay intte attana mala attiin taas hara markkateth koshshida gishshas gidenna. 35Yohannisi eexxidi poo7isiza poo7o mala. Intteka guuththa wode iza poo7on ufayettana koyideta. 36Taas gidikko Yohannisa markkateththafe aadhdhiza markkay dees. Ta markkayka ta Aaway taas immida ooso. Hessika ta ooththiza oosoy ta Aaway tana kiittidayssa taas markkattees. 37Tana kiittida ta Aawaykka ba hu7era taas markkattides. Intte gidikko iza qaala giiris mulekka siyibeekketa; izas medhaakka mulera beyibeekketa.#Mato 3:17; Mar 1:11; Luqa 3:22 38Izi kiittidaaden intte ammanontta gishshas iza qaalay intte achchan deenna. 39Inttes Geeshsha Maxaafatappe mernaa de7o demmanaas misatiin maxaafata pilggeeta; maxaafatikka ta gishshas markkatteettes. 40Gido attiin intte de7o demmanaas taakko ha yaana koyekketa.
41«Tani asappe bonchcho koykke. 42Ta inttena erays; Xoossa siiqoy inttenan bayndayssaka erays. 43Tani ta Aawa sunththan yadis shin intte tana mokki ekkibeekketa. Hara asi qasse ba sunththan yiikko intte iza mokki ekkeeta. 44Intte intte giddon issoy issaafe bonchcho koyzaytoo! Issi Xoossafe beettiza bonchcho koyonttayto intte waanidi tana ammanana dandayeetii? 45Ta Aawa sinththan inttena mootanay inttes tana misatoppo; inttena mootanay intte iza hidota ooththiza Muse. 46Musey ta gishshas xaafidayssa ammanidaakko intte tana ammanana. 47Izi xaafidayssa intte ammanontta aggiko qasse ta qaala intte waani ammananee?» gides.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yohannisa Mishiraachcho 5: GM
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Word for the World International
