Luka 24

Ekwômoka kwa Yesu

(Mat 28:1-10; Mar 16:1-8; Yow 20:1-10)

1Ábere lwe'inga lumbuli-mbuli, ba bakasi bera kulamukira kwa shinda, béte emarashi ma bábaa bakúnganyise. 2Bera kubuana ekoi lya lyábaa lìbikibwe kwa chiso che'shinda, lyàsiikibwe era musike. 3Bera kwêngira mwa shinda, si chiro bákabuana mwe'chirunda cha Enawetu Yesu. 4Ei myasi yera kutuma bânganwa. Mwo'ku kwânganwa, unao-unao, ala musike sabo era kwîmanga bandu babiri ba bábaa běmbese njimba sa sálangala busese. 5Rero bushi ne'buba, abu bakasi bera kukoma emeho mwa chitaka. Si abu bandu bera kubura'bo mbu: «Chi chátuma mwáhondera mwa bafu emundu ola ulí muuma-uma? 6Àtachiri anola, ômókire mira! Mukéngeraa emyasi era abáburaa mango abáa àchiri eKalilaya. 7Abáburaa mbu: ‹Nyi'Mwana we'Mundu byěmire nyǎnyibwe mwa mino se'bandu be'bibi. Bangányimanyika kwa musalaba, si kwa lusuku lwa kahatu era nyuma se'kufa kwanyi, nyingômoka.›»

8Abu bakasi bera kwire bákengera emyasi era Yesu áburaa'bo. 9Bera kutenga kwa shinda na báya kubalira endumwa* ekumi na nguma sa Yesu ne'banji bandu kwo'yu mwasi. 10Babano bu bakasi báfuliraa endumwa* kwo'yu mwasi: Mariya we'Makatala, na Shani, na Mariya nyina wa Yakobo, ala'uma na banji bakasi. 11Si endumwa* sáchichingaa mbu ei myasi ya'bu bakasi ìri ya buha-buha, chiro síkayemerera.

12Si Petero yeke era kubatuka, na álibichira fuba kwa shinda. Áikire'ko, era kwínamirira, era kulola kwa mirembe oshâo era babáa bàbungirire kwa chirunda cha Yesu. Chasinda, era kufuluka kwa wai, áenda ásanwa busese bushi ne'myasi era yàbere.

Yesu ápamukira ku banafunzi babiri mwa njira ye'Emau

(Mar 16:12-13)

13Mwo'lu lusuku luno'lu, babiri mwa banafunzi* ba Yesu bábaa báya ku musi muuma mbu i'Emau. Oyu musi, ábaa àli ku bilometere bìngaika kwe'kumi na chiuma ne'musi we'Yerusalemu. 14Bábaa báenda báhambala era luulu se'myasi yoshi era yàrengire. 15Ábere banáchiri báhambala ne'kubusanya, Yesu yeine era kuika ofu nabo, na áenzikanya nabo. 16Bábaa bàmusene'ko, si kandu kauma kera kwângika'bo bàtamumenyerera.

17Yesu era kubusa'bo mbu: «Myasi ichiye mwáenda mwáhambala'ko?»

Abu banafunzi* bera kwîmanga, batáhalukire. 18Muuma mubo mbu i'Keleopa, era kumwǎkula mbu: «Besha mwa musi we'Yerusalemu boshi bèshi emyasi era yàrengire'mo mwa kano kabiri! Rero, weine u'ùtanêshi ei myasi?» 19Yesu nai mbu: «Myasi ichiye kasi?»

Nabo mbu: «Emyasi era yaíkiraa Yesu we'Nasareti. Abáa murebi* munene. Abáa éte buashi mwa kuteta no'mwa kuira ebisomarano, era muhondo sa Ongo ne'ra muhondo se'bandu boshi.

20«Rero, ebakulu-kulu betu be'bakuhanyi*, ala'uma ne'bashamuka betu, bàmwânaa chasiya achínjibusibwe kufa. Chasinda, bera kumumanyika kwa musalaba. 21Tubano twabáa tulángalire kwa i'ungánunula eBaisiraeli. Si rero, lwarero lu'lusuku lwa kahatu kutengera ala ei myasi yàberere. 22Si kanji bakasi bauma bo'mwa chikembe chetu bàtushishasaa. Abu bakasi, balámukiraa kwa shinda mwa lumbuli-mbuli, 23si chiro bákabuana echirunda chai. Bera kufuluka kutubalira emwasi mbu bamalaika* babápamukiraa'ko na bábura'bo mbu Yesu àli muuma-uma. 24Chasinda, bauma mu tubano bera kuya kwa shinda, bera kubuana emyasi yoshi ngo'kwa abu bakasi bànatetaa. Nabo bàtanalolaa kwa chirunda chai.»

25Yesu kukwera kubabura mbu: «Mwabo mùli mbuta! Ne'michima yenyu ìtaika yémerera emyasi yoshi era barebi* bátetaa. 26Byabáa byěmire Kirisito* àlibusibwe bacha tanga, ànêngirire mwe'tunda lyai!» 27Chasinda, Yesu era kubalikisisa'bo emyasi era yǎnjikirwe era luulu sai mwa Maanjiko Mabuya-buya moshi. Era kutangirira kwa bitabo bya Musa, kuikira kwa bitabo bye'barebi* boshi.

28Ábere bera bàli ofu ne'musi ola bábaa báya'mo, Yesu era kulorekana'ko ngo'la uchíri wáya bure. 29Si abu banafunzi* bera kumwěma busese mbu: «Ushíbaa netu, bushi lwera loolo-olo luno, ne'butufu bwáhonda kwera.»

Bushi no'ku, era kwêngira mwa nyumba, chasiya ashibe nabo. 30Era kwekala álye ebiryo ala'uma nabo. Era kutola emukati, era kuteta mbu akoko era mwa Ongo, chasinda era kuishanga muo na áberesa. 31Emeho mabo mera kwire málola kubuya-buya, na bámumenyerera. Si Yesu era kuirima, chiro bákachimulola'ko. 32Bera kuburana mbu: «Kubinali, mango abáa áhambala netu mwa njira na kutubalikisisa era luulu se'Maanjiko Mabuya-buya, emichima yetu yabáa yèhwire mwe'lumoo!»

33Bera kubatuka mwe'chi chihangi chi ne'chi na báhuba eYerusalemu. Bera kubuana endumwa* ekumi na nguma sa Yesu sìri mwa lubuanano ala'uma na banji bandu bo'mwa chikembe chabo. 34Abu bábaa babúanayire bera kubura abu banafunzi* babiri mbu: «Kubinali, Enawetu anômwokire! Àpamukiraa ku Simoni!»

35Abu banafunzi* babiri nabo, bera kubalikisisa balikabo emyasi era yabáa mwa nijra, na kute baményereraa Yesu mango àishangaa mwa mukati.

Yesu ápamukira kwa banafunzi bai

(Mat 28:16-20; Mar 16:14-18; Yow 20:19-23; Mikol 1:6-8)

36Ábere ebanafunzi* bánachiri báhambala era luulu se'i myasi, Yesu yeine kuna kupamukira mwa kachi-kachi kabo. Era kubura'bo mbu: «Mubáa ne'bôlo!»

37Bera kuchihalima na kwôbaa busese, bushi bachíchingaa mbu musimu ibàlolire'ko. 38Si Yesu era kubabura mbu: «Chi chátuma ebwenge bwábasungulira? Na chi chátuma mwáhungwa-hungwa mwa michima yenyu? 39Musóngaa emino sanyi ne'maulu manyi, análi nyono kanangana! Munyíumaa'ko munányitumbikise. Emusimu àtatusa minyofu nesi makinya. Si nyono, musene kwa nyéte'bi.» #24:39 Yesu átetaa ebyera chasiya ebanafunzi* balóle kwa nzuwe se'misumari mwa mino no'kwa maulu mai. Ábaa áhonda bémerere kanangana kwa ino'yu.

40Mango Yesu ábaa era àtetaa bacha, era kubalosa emino ne'maulu mai. 41Abu banafunzi* bábaa bàtanasa kwêmerera bushi ne'lumoo ala'uma ne'kusanwa. Yesu kukwera kubusa'bo mbu: «Mwéte kalyo anola?»

42Bera kumweresa chimbi che'fi era yǒchirwe. 43Era kutola'chi na álya'chi mwa meho mabo. 44Chasinda, era kubura'bo mbu: «Mango nabáa nyìri ala'uma nenyu, nabáburaa mbu: ‹Emyasi era ìtechire era luulu sanyi mwa Mwaso wa Musa, no'mwa bitabo bye'barebi*, no'mwa chitabo che'Saburi, yeémire ibérere yoshi.›»

45Yesu era kwire áboola'bo ebwenge, chasiya baményerere eMaanjiko Mabuya-buya. 46Era kubabura mbu: «Byǎnjikirwe mbu kwémire Kirisito* àlibusibwe, anômwoke kwa lusuku lwa kahatu era nyuma se'kufa kwai.#24:46 Somaa Isaya 53; Oseya 6:2. 47No'mwe'sina lyai mu bangábalira ebandu boshi, kutangirira eYerusalemu mbu babíndukaa bàtenga mwa bibi byabo, banábabalirwe. 48Mwabo mu mungénde mwáteta bya mwìshi era luulu se'i myasi. 49Nyeine nyingábatumira cha Tata álanyaa. Si mwǐkalaa tanga mwa musi we'Yerusalemu kuikira mango mungábona ebuashi bwa bwátenga kwa nguba.»#24:49 Somaa Mikolo ye'ndumwa 1:4-5.

Yesu érusibwa kwa nguba

(Mar 16:19-20; Mikol 1:9-11)

50Chasinjire, Yesu era kutenga ne'banafunzi* bai mwa musi we'Yerusalemu, ábeka ofu ne'we'Betaniya. Era kwêmusa emino mwa chanya na áahanyira'bo. 51Ábere anáchiri ábaahanyira, era kulikana nabo ne'rusibwa kwa nguba. 52Nabo bera kumwèra, chasinda, bera kuhuba eYerusalemu báenda bámowa busese. 53Esuku soshi, bera kunde bába mwa Luhu lwa Ongo* bámutonga.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 24: tbt

Highlight

ಶೇರ್

ಕಾಪಿ