Luka 22

Nau rêh ni, nau khĭt, jêh ri nau Brah Yêsu dâk rêh tay

(22:1 – 24:53)

Nau phung kôranh ƀư brah tâm nchră

(Mathiơ 26:1-5; Markôs 14:1,2; Yôhan 11:45-53)

1Rƀŭn Piăng Let Mâu Geh Ndrui, nâm bu ntĭt rƀŭn Nau Găn văch dăch jêh.#Ngluh 12:1-27. 2Phung kôranh ƀư brah toyh jêh ri phung kôranh nchih samƀŭt joi nau ŭch nkhĭt Brah Yêsu, yorlah khân păng klach ma phung âk.

Y-Yuđas tâm rdâng Brah Yêsu

(Mathiơ 26:14-16; Markôs 14:10,11)

3Nôk nây, Satan lăp tâm Y-Yuđas, rnha jêng Iskariôt, jêng du huê tâm jât ma bar kôranh oh mon. 4Y-Yuđas hăn jêh ri tâm nchră đah phung kôranh ƀư brah toyh jêh ri đah phung kôranh mât uănh ma nau păng dơi jao Brah Yêsu ma khân păng. 5Khân păng răm maak ngăn jêh ri ton mra ăn prăk ma păng. 6Păng dơn nau nây, jêh ri joi nar di dơi jao Brah Yêsu dôl phung ƀon lan mâu gŭ ta nây.

Njêng nau rƀŭn Nhêt Sa Tâm Êp

(Mathiơ 26:17-25; Markôs 14:12-21; Yôhan 13:21-30)

7Tât nar rƀŭn Piăng Let Mâu Geh Ndrui, jêng nar bu nkhĭt kon biăp rƀŭn Nau Găn, 8Brah Yêsu njuăl Y-Pêtrôs jêh ri Y-Yôhan hăn jêh ri lah: “Hăn hom ndrăp rƀŭn Nau Găn gay ma he sa.” 9Bar hê bunuyh ơh: “ta ntŭk Nơm Nti ŭch ăn hên mra ndrăp nau rƀŭn nây?” 10Brah Yêsu plơ̆ lah: “Tơlah lăp hom tâm ƀon, geh du huê bunuyh mbăk yăng dak mra mâp khân may; hăn hom tĭng păng bunuyh nây lăp tâm ngih 11jêh ri lah ma kôranh ngih: ‘Nơm Nti ôp ma may pô aơ: mbah ntŭk jrô ndrel ma phung oh mon mra sông sa rƀŭn Nau Găn?’ 12Nơm tơm ngih mra ntĭm ma khân may du jrô toyh ta klơ, ndô ndơ dŏng rơm ndrăp jêh, jêh ri phung kon ndrăp ta nây.” 13Bar hê oh mon hăn jêh ri saơ lĕ nau di nâm bu Brah Yêsu lah jêh, jêh nây khân păng ndrăp nkra rƀŭn Nau Găn.

14Mông tât jêh, Brah Yêsu gŭ ta sưng jêh ri phung kôranh oh mon gŭ ndrel ma Păng. 15Păng lah ma khân păng: “Gâp ŭch ngăn sa rƀŭn Nau Găn aơ ndrel ma khân may êlor ma Gâp dơn nau nđêh nji. 16Yorlah Gâp lah ma khân may, Gâp mâu mra hôm sa rƀŭn Nau Găn nây đŏng ma tât nôk rƀŭn nây dơi lôch jêh tâm ƀon bri hađăch Brah Ndu.” 17Păng sŏk kachok, lah ueh jêh nây lah: “Sŏk hom kachok jêh ri tâm pă ma ndrăng khân may. 18Yorlah Gâp lah ma khân may, ntơm aƀaơ aơ Gâp mâu mra nhêt dak krăk ƀâu aơ đŏng, kŏ tât ƀon bri hađăch Brah Ndu văch.” 19Jêh nây Păng sŏk piăng let, lah ueh, nkê̆ch piăng let, tâm pă ma phung oh mon jêh ri lah: “Aơ jêng săk jăn Gâp ăn ma yor khân may. Ƀư hom nau nây gay ma kah gĭt ma Gâp.” 20Nôk sông sa lôch jêh, Păng ƀư kơt nây đŏng, sŏk kachok ăn ma phung oh mon jêh ri lah: “Kachok aơ jêng nau tâm rnglăp mhe tâm mham Gâp nkhŭt jêh yor khân may.#Yêr 31:31-34. 21Aơ, mpang ti nơm rlăng đah Gâp dôl dơm ta klơ sưng ndrel ma Gâp.#Mprơ Ơm 41:9. 22Kon Bunuyh hăn tĭng kơt nau lĕ dăp nal jêh, ƀiălah rêh ni yơh ma nơm tâm rdâng ma Kon Bunuyh!” 23Phung oh mon ntơm ôp mbu nơm tâm phung khân păng jêng bunuyh mra ƀư nâu nây.

Nau phung oh mon rlăch

(Mathiơ 18:1; Markôs 9:34; Luka 9:46)

24Phung oh mon tâm rlăch tay ndrăng khân păng, mêt uănh mbu nơm tâm phung khân păng mra jêng bunuyh toyh lơn.#Mat 18:1; Mark 9:34; Luk 9:46. 25Ƀiălah Brah Yêsu lah ma khân păng: “Phung hađăch phung bu năch sŏk nau dơi gay chiă, uănh, phung kôranh chiă uănh bu rnha jêng bunuyh ăn nau yô̆, ăn nau ueh.#Mat 20:25-27; Mark 10:42-44. 26Bi ma khân may lơi ôh kơt nây, ƀiălah mbu nơm dŭt toyh tâm phung khân may ăn jêng tâm ban nơm dŭt jê̆, jêh ri mbu jêng kôranh chiă uănh tâm ban bunuyh pah kan.#Mat 23:11; Mark 9:35. 27Yorlah tâm nơm gŭ ta sưng sông ndrel ma bunuyh pah kan, mbu nơm jêng toyh lơn? Di lĕ nơm gŭ ta sưng sông? Ƀiălah Gâp gŭ ta nklang khân may tâm ban ma bunuyh pah kan.#Yôh 13:12-15. 28Khân may tâm krêp jêh ndrel ma Gâp tâm lĕ nau rlong uănh Gâp, 29rĭ dĭng Gâp ăn ma ƀon bri hađăch ma khân may tâm ban ma Mbơ̆ Gâp hŏ ăn ma Gâp kơt nây, 30pôri khân may mra sông sa ta sưng ndrel ma Gâp tâm ƀon bri hađăch Gâp jêh ri mra gŭ ta klơ sưng hađăch gay phat dôih jât ma bar ndŭl mpôl phung Israel.”#Mat 19:28.

Nau mbơh lor ma Y-Pêtrôs

(Mathiơ 26:31-35; Markôs 14:27-31; Yôhan 13:36-38)

31“Hơi Y-Simôn, Y-Simôn, aơ, Satan dăn jêh ŭch mpruh nsiăng khân may nâm bu ba ƀlê. 32Ƀiălah Gâp mbơh sơm jêh gay ma may mâu mra pưt nau chroh. Tơlah may plơ̆ sĭt, ƀư hom ma phung oh nâu may ktang.” 33Y-Pêtrôs ơh: “Ơ Kôranh Brah, gâp ndrăp jêh gŭ tâm ndrung mâu lah khĭt ndrel ma May.” 34Brah Yêsu plơ̆ lah: “Hơi Pêtrôs, Gâp lah ma may gĭt, nar aơ iăr ê hŏ ndrau, may mra pe tơ̆ dun jêng mâu gĭt Gâp.” 35Păng lah tay: “Nôk Gâp njuăl khân may hăn, mâu djôt dŭng prăk, dŭng cheng, ntâu jot, geh lĕ ndơ khân may pưt?” Khân păng ơh: “Mâu pưt ôh.”#Mat 10:9-10; Mark 6:8-9; Luk 9:3; 10:4. 36Brah Yêsu lah: “Ƀiălah aƀaơ aơ, mbu nơm geh dŭng prăk, djôt leo hom; mbu nơm geh dŭng cheng, đŏng kơt nây; mbu nơm mâu geh đao gưm, tăch hom ao padih gay rvăt. 37Yorlah Gâp lah ma khân may, Nau Brah Ndu Ngơi nây dơi tât di ngăn tâm Gâp: ‘Bu kơp Păng ndrel ma phung tih.’ N'hêl nanê̆ ngăn, nau nchih ma Gâp jêng dơi tât di ngăn.”#Êsai 53:12. 38Khân păng ơh pơ aơ: “Ơ Kôranh Brah, geh bar mlâm đao gưm.” Păng plơ̆ lah: “Pôri jêng tŏng jêh.”

N'gar Gêtsêmanê

(Mathiơ 26:36-46; Markôs 14:32-42)

39Pakơi nây, Brah Yêsu luh hăn jêh ri hao yôk Ôlive tĭng nâm nau vay. Phung oh mon ndrel hăn tĭng Păng. 40Tơlah Păng tât jêh ta ntŭk, Păng lah ma phung oh mon: “Mbơh sơm hom gay ma khân may mâu tŭp tâm nau ndơm.” 41Păng hăn tă bơh phung oh mon ƀah klăp lah klŭp mƀăr glo lŭ jêh ri chon kômâk mbơh sơm 42pô aơ: “Hơi Mbơ̆, tơlah Mbơ̆ ŭch, dăn sŏk lơi kachok aơ tă bơh Gâp! Nđâp lah pônây, dăn tĭng nâm nau May ŭch, mâu geh nau Gâp ŭch ôh.” 43Geh du huê tông mpăr tă bơh trôk tâm mpơl jêh ri ntop n'hâm suan ma Păng. 44Tâm nau rngot rvê dŭt hâu, Păng mbơh sơm dŭt n'hâm ngăn, dak rhal Păng jêng tâm ban ma mham lĕ truh ta neh.#22:44 Geh ƀaƀă nau rblang ntơm saơm mâu geh lĕ trong 43-44. 45Mbơh sơm lôch jêh, Păng dâk plơ̆ tay ma phung oh mon jêh ri saơ khân păng gŭ bê̆ch jêh yor nau rngot. 46Păng lah: “Mâm ƀư khân may bê̆ch? Dâk mbơh sơm hom gay ma khân may mâu mra tŭp tâm nau ndơm.”

Nau bu nhŭp Brah Yêsu

(Mathiơ 26:47-56; Markôs 14:43-50; Yôhan 18:3-12)

47Dôl Păng hôm ngơi, aơ, geh du phung âk tât, Y-Yuđas, du huê tâm jât ma bar kôranh oh mon, hăn panăp phung âk nây. Păng hăn dăch Brah Yêsu gay ma chŭm Păng. 48Ƀiălah Brah Yêsu lah: “Hơi Y-Yuđas, may sŏk nau chŭm tâm rdâng ma Kon Bunuyh bơh?” 49Phung bunuyh gŭ ndrel ma Brah Yêsu saơ nau dăch tât nây lah ro: “Ơh Kôranh Brah, he dơi dŏng đao gưm dong mâu lah mâu?” 50Du huê tâm phung khân păng dong oh mon kôranh ƀư brah toyh lơn jêh ri sreh tăch tôr pa ma. 51Ƀiălah Brah Yêsu lah: “Kay lŏng! Nsrŭng hom!” Jêh nây Păng pah ta tôr oh mon nây jêh ri ƀư bah ma păng. 52Brah Yêsu lah ma phung kôranh ƀư brah toyh, ma kôranh king n'gang ngih brah jêh ri ma phung kôranh bu ranh văch nhŭp Păng: “Mâm ƀư khân may djôt đao gưm jêh ri ma mâng văch nhŭp Gâp tâm ban nhŭp du huê bunuyh ntŭng? 53Gâp gŭ ăp nar tâm ngih brah ndrel ma khân may, khân may mâu yơr ti nhŭp Gâp ôh. Ƀiălah aơ jêng mông khân may jêh ri nau dơi ktang tâm nau ngo.”#Luk 19:47; 21:37.

Y-Pêtrôs dun Brah Yêsu

(Mathiơ 26:57,58,69-75; Markôs 14:53,54,66-72; Yôhan 18:12-18,25-27)

54Khân păng nhŭp Brah Yêsu njŭn leo jêh ri têk Păng tât ta ngih kôranh ƀư brah toyh lơn. Y-Pêtrôs hăn tĭng groi Păng ngai ngai. 55Khân păng sênh ŭnh ta nklang ndring nhuang jêh ri gŭ ndrel, Y-Pêtrôs gŭ đŏng ta nklang khân păng. 56Du huê oh mon bu ur saơ Y-Pêtrôs gŭ jêh dăch mbŭch ŭnh, uănh ma păng nge nger jêh ri lah: “Bu klâu aơ gŭ đŏng ndrel bunuyh nây.” 57Ƀiălah Y-Pêtrôs dun jêh ri lah: “Aơ ruh ri, gâp mâu gĭt năl păng ôh!” 58Ƀât lât pakơi, geh bunuyh êng saơ Y-Pêtrôs jêh ri lah: “May jêng phung nây lĕ!” Y-Pêtrôs plơ̆ lah: “Hơi nâu, mâu di gâp ôh.” 59Tâm du mông pakơi nây, geh bunuyh êng lah: “Nanê̆, bu klâu nây gŭ đŏng ndrel ma Brah Yêsu lĕ, yorlah păng ăt jêng bunuyh Galilê.” 60Ƀiălah Y-Pêtrôs lah: “Aơ nâu, gâp mâu gĭt ôh moh nau may lah!” Ro nôk Y-Pêtrôs lah geh iăr ndrau. 61Brah Yêsu n'gĭl uănh ta Y-Pêtrôs. Y-Pêtrôs kah gĭt tay ma Nau Kôranh Brah hŏ ntăm jêh: “Nar aơ, lor ma iăr ndrau, may mra dun Gâp pe tơ̆.” 62Y-Pêtrôs hăn luh padih nhĭm rngot ngăn ngên.

Phung tahan bêk prêng jêh ri dong mbang Brah Yêsu

63Phung bunuyh gak njrăng Brah Yêsu mưch rmot jêh ri dong Păng. 64Khân păng nsêt măt Brah Yêsu, jêh ri ôp: “Lah hom mbơh lor! Mbu dong may?” 65Khân păng hôm ngơi âk nau suai rak ma Brah Yêsu.

Brah Yêsu tanăp Mpôl Kôranh Phat Dôih

(Mathiơ 26:59-66; Markôs 14:55-64; Yôhan 18:19-24)

66Tât ang nar taơ, phung kôranh bu ranh tâm phung ƀon lan, phung kôranh ƀư brah toyh jêh ri phung kôranh nchih samƀŭt tâm rgum, jêh nây khân păng têk leo Brah Yêsu hăn tanăp Mpôl Kôranh Phat Dôih. 67Khân păng ôp: “Tơlah may jêng Brah Krist, lah hom ma hên gĭt.” Brah Yêsu plơ̆ lah: “Tơlah Gâp lah, khân may mâu mra chroh ôh; 68tơlah Gâp ôp, khân may mâu mra plơ̆ lah ôh. 69Ƀiălah ntơm aƀaơ tât kăndơ̆, Kon Bunuyh mra gŭ mpeh pa ma Brah Ndu Nơm nau brah.” 70Lĕ rngôch khân păng ôp da dê: “Kơt nây may jêng Kon Brah Ndu lĕ ƀơh?” Păng plơ̆ lah: “Khân may lah jêh tâm ban pônây.” 71Khân păng lah: “Moh he hôm ŭch ntop nau bu mbơh đŏng? He hŏ tăng jêh tă bơh bâr mbung păng ngơi luh jêh!”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 22: CMO2023

Highlight

ಶೇರ್

ಕಾಪಿ