Luka 15

Nau hôr ma biăp hăn nhhơt, prăk roh jêh ri kon bu klâu ƀư blă blơ

(Mathiơ 18:12-14)

1Nôk nây, lĕ rngôch phung riu pi jêh ri phung tih hăn dăch ta Brah Yêsu, gay ma iăt nau Păng mbơh nkoch.#Luk 5:29-30. 2Phung Pharisi jêh ri phung kôranh nchih samƀŭt ngơi ƀŭk dŭk suyh lah: “Bunuyh aơ rom phung tih jêh ri sông sa ndrel ma khân păng!”

3Yor nây, Păng nkoch bri nau hôr aơ ma khân păng: 4“Mbu nơm tâm phung khân may geh du rhiăng mlâm biăp, tơlah roh du mlâm, mâu chalơi phung sĭn jât ma sĭn mlâm hôm tâm bri rdah gay ma hăn joi du mlâm biăp roh jêh ăn tât dơi saơ păng ƀơh? 5Tơlah hŏ joi saơ jêh, răm maak tuy biăp ta săng nglik. 6Jêh ri tât ta ngih, păng kuăl phung mĭt jiăng jêh ri phung chiau meng tât jêh ri lah: ‘Maak hom ndrel ma gâp, yorlah gâp hŏ joi saơ jêh biăp gâp roh.’ 7Tâm ban lĕ, Gâp lah ma khân may, ƀon ueh klơ trôk mra răm maak yor du huê bunuyh tih tâm rmal nau tih rlau lơn jêng sĭn jât ma sĭn nuyh sŏng srăng mâu ŭch rmal nau tih. 8Mâu lah mbu bu ur geh jât rêl prăk, tơlah roh du rêl, ƀiălah mâu mpoh ŭnh kađen, mâu pih ngih, jêh ri mâu joi nanê̆ ăn tât păng dơi saơ prăk? 9Tơlah joi saơ prăk nây, păng kuăl phung mĭt jiăng jêh ri phung chiau meng tât jêh ri lah: ‘Maak hom ndrel ma gâp, yorlah gâp hŏ joi saơ jêh rêl prăk roh.’ 10Kơt nây đŏng, Gâp lah ma khân may, phung tông mpăr Brah Ndu mra răm maak ma du huê bunuyh tih rmal nau tih.”

11Păng nkoch bri tay: “Du huê bunuyh ri geh bar hê kon bu klâu. 12Nơm jêng oh ngơi đah mbơ̆ păng: ‘Hơi mbơ̆, dăn pă ma gâp kô̆ drăp ndơ mpeh ndơ gâp.’ Jêh ri mbơ̆ păng pă drăp ndơ ma păng. 13Jêh nây mâu ir jŏ, oh nây sŏk lĕ drăp ndơ jêh ri hăn tât du n'gor ngai; ta nây, păng pâl rlưn ƀư blă blơ, ƀư roh drăp păng, mpŭng drăp ndơ păng nơm. 14Nôk hŏ ƀư rai lĕ drăp ndơ jêh, tâm n'gor geh nau ji ngot toyh jêh ri păng ntơm tŭp tâm nau ndĭt trơi. 15Păng hăn pah kan ma du huê bunuyh gŭ tâm n'gor jêh ri bu siăm sŭr, ƀiălah bu đă păng mât sŭr. 16Păng hăn ŭch sŏk ntâu tuh ma sŭr gay sa ma hơm ƀiălah bu mâu ăn ôh. 17Nôk nây păng mhe kah gĭt, mĭn êng: ‘Geh âk bunuyh pah kan ma mbơ̆ gâp, geh piăng let sa âk rmeh, ƀiălah ta aơ gâp khĭt ji ngot. 18Gâp mra hăn plơ̆ sĭt ta mbơ̆ gâp jêh ri lah ma păng: Hơi mbơ̆, gâp ƀư tih jêh đah trôk jêh ri đah may, 19mâu hôm khư kuăl jêng kon may đŏng. Dăn may kơp gâp tâm ban bunuyh kan nkhôm ma may dơm.’

20Păng dâk ro, plơ̆ sĭt ma mbơ̆ păng. Ƀiălah dôl hôm ngai, mbơ̆ păng saơ jêh ri nuih n'hâm yô̆ nđach, nchuăt ran ut ta trô ko păng jêh ri chŭm. 21Kon ri lah ma mbơ̆: ‘Hơi mbơ̆, gâp ƀư tih jêh đah trôk jêh ri đah mbơ̆, mâu hôm khư ôh ăn may kuăl gâp jêng kon may ôh.’ 22Mbơ̆ păng lah ma phung oh mon: ‘Sŏk ndơ̆ gơnh hom ao jong dŭt ueh nsoh an păng, dok rgên ta nglau ti păng, ntrŭp ntâu jot ma jâng păng. 23Sŏk hom kon ndrôk lay ƀư puăch. Sông sa răm maak hom he! 24Yorlah kon gâp aơ khĭt jêh ƀiălah aƀaơ aơ dâk rêh đŏng, roh jêh ƀiălah aƀaơ aơ joi dơi saơ.’ Jêh nây khân păng ntơm nhêt sông sa răm maak.

25Nôk nây, kon bôk rah dôl gŭ tâm mir. Tơlah păng sĭt dăch tât ta ngih, tăng bâr kreh mprơ jêh ri pâl ntalơ̆, 26păng kuăl du huê oh mon jêh ri ôp moh nau geh ƀư nây. 27Oh mon nây ơh: ‘Oh may hŏ sĭt jêh, jêh ri mbơ̆ may ƀư puăch kon ndrôk lay, yorlah păng saơ oh may plơ̆ sĭt geh nau ngăch prăl.’ 28Kon bôk rah hao ji nuih ro jêh ri mâu ŭch lăp tâm ngih. Mbơ̆ păng du luh jêh ri bonh đă ma păng lăp. 29Ƀiălah păng ơh ma mbơ̆: ‘Aơ, jŏ năm jêh gâp pah kan ma mbơ̆, mâu mâp rlau nau mbơ̆ ntrŭnh ôh, ƀiălah mbơ̆ mâu mâp ăn du mlâm kon be ma gâp gay ƀư nau maak đah phung mĭt jiăng gâp. 30Ƀiălah tơlah kon may, jêng nơm hŏ dâk lĕ drăp ndơ may đah bu ur văng tĭr jêh nây plơ̆ sĭt, mbơ̆ ƀư puăch kon ndrôk lay gay nhêt sông sa maak!’ 31Mbơ̆ plơ̆ lah: ‘Hơi nâu, kon ƀaƀơ gŭ ndrel ma gâp, lĕ ndơ mbơ̆ geh jêng ndơ kon. 32Ƀiălah di ngăn ƀư nau sông sa jêh ri răm maak, yorlah oh may aơ khĭt jêh, ƀiălah nar aơ păng dâk rêh, hŏ roh jêh ƀiălah dơi saơ.’ ”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 15: CMO2023

Highlight

ಶೇರ್

ಕಾಪಿ