Luka 13
13
Bu nkhĭt phung Galilê. – Tơm rvi mâu geh play
1Rnôk nây, geh ƀaƀă bunuyh gŭ ta nây nkoch bri ma Brah Yêsu ma nau Pilat nkhĭt phung bunuyh Galilê, ƀư ăn mham khân păng pot li ndrel ma ndơ ƀư brah khân păng nhhơr. 2Brah Yêsu plơ̆ lah: “Khân may mĭn ma phung bunuyh Galilê nây ƀư tih toyh lơn ma lĕ rngôch phung Galilê êng yorlah khân păng dơn nau rêh ni pônây? 3Gâp lah ma khân may, mâu di; ƀiălah tơlah khân may mâu tâm rmal nau tih, khân may mra roh rai tâm ban lĕ. 4Mâu lah phung jât ma pham nuyh ri ngih prêh Silôê cha lôt nklân khĭt lĕ rngôch, khân may mĭn lĕ khân păng geh tih toyh lơn ma phung êng gŭ tâm ƀon Yêrusalem? 5Gâp lah ma khân may, mâu di; ƀiălah tơlah khân may mâu rmal nau tih, khân may mra rai roh tâm ban lĕ.”
6Jêh nây Păng ngơi nau hôr aơ: “Du huê bunuyh tăm du tơm rvi tăm tâm đang krăk ƀâu păng; păng hăn joi play ƀiălah mâu saơ play ôh. 7Pôri păng lah ma nơm tăm krăk ƀâu: ‘Ri lĕ pe năm jêh gâp hăn pĕ play tơm rvi aơ, ƀiălah mâu saơ moh ndơ ôh. Kăl lơi păng, mâm ƀư păng in neh dơm dam?’ 8Nơm tâm krăk ƀâu ơh: ‘Hơi kôranh, dăn om păng du năm aơ ƀât, kâp gâp kuyh neh jŭm tơm păng jêh ri suy ek buh. 9Klăp lah pakơi taơ păng mra geh play; lah mâu geh, may mra kăl lơi păng.’ ”
Nau ƀư bah tâm nar saƀat
10Tâm nar saƀat, Brah Yêsu dôl nti lah tâm du ngih rƀŭn. 11Ta nây, geh du huê bu ur brah djơh lơh ƀư ma păng ji kuet jât ma pham năm, ndŭr kơi păng krô, mâu hôm dơi dâk sŏng ôh. 12Tơlah saơ bu ur nây, Brah Yêsu kuăl jêh ri lah: “Hơi bu ur, ay dơi rklaih bơh nau ji kuet ay jêh.” 13Jêh ri Păng pah ma ti păng. Ƀât lât, bu ur nây dâk sŏng tay, jêh ri tâm rnê ma Brah Ndu. 14Kôranh mât uănh ngih rƀŭn saơ Brah Yêsu ƀư bah nau ji tâm nar saƀat, păng ji nuih jêh ri lah ma phung bunuyh pô aơ: “Geh prao nar dơi pah kan, pôri văch hom tâm lĕ nar nây gay dơi ƀư bah, lơi hăn tât tâm nar saƀat ôh.”#Ngluh 20:9-10; Nkah 5:13-14. 15Brah Yêsu plơ̆ lah: “Hơi phung nuih n'hâm nklă, tâm nar saƀat, mâu di lĕ rngôch khân may doh ndrôk mâu lah seh bri khân may nơm tă bơh hip gơ̆ gay ma leo khân păng nhêt dak lĕ ƀơh? 16Bi bu ur aơ jêng kon bu ur Y-Abraham, Satan kât păng lĕ jât ma pham năm jêh, mâu dơi doh ma păng tâm nar saƀat lĕ ƀơh?” 17Dôl Păng ngơi pônây, lĕ rngôch phung tâm rdâng đah Păng bêk da dê, jêh ri lĕ phung ƀon lan răm maak ma lĕ nau khlay ngăn Păng hŏ ƀư.
Găr trau jêh ri ndrui
(Mathiơ 13:31-33; Markôs 4:30-32)
18Pôri, Brah Yêsu lah: “Mâm đah dơi tâm ntĭt ƀon bri hađăch Brah Ndu? Moh ndơ Gâp dơi ƀư tâm ban ma păng? 19Ƀon bri hađăch nây nâm bu du găr trau, du huê sŏk gay tăm tâm đang trau, păng hon jêng tơm si toyh, jêh ri phung sĭm trôk ƀư rsuăn ta n'gĭng păng.” 20Păng lah đŏng: “Mâm đah Gâp tâm ntĭt ƀon bri hađăch Brah Ndu? 21Ƀon bri hađăch nây tâm ban ma ndrui, du huê bu ur ri sŏk pot tâm pe rbâng rnih, ma tât rnih dang hao âk.”
Mpông huêt
(Mathiơ 7:13,14,21-23)
22Brah Yêsu hăn ăp ƀon, lam ƀon jê̆, n'ho ntĭm nti n'ho hăn trong tât ƀon Yêrusalem. 23Geh du huê lah ma Păng: “Ơ Kôranh Brah, di lĕ knŏng geh djê̆ bunuyh dơi rklaih dơm ƀơh?” 24Păng plơ̆ lah ma khân păng: “Nsrôih hom gay lăp tâm mpông huêt, yorlah Gâp lah ma khân may, âk bunuyh mra joi gay lăp ta nây ƀiălah mâu dơi lăp ôh. 25Tơlah kôranh ngih dâk jêh ri nchăng mpông jêh, khân may gŭ padih, goh mpông jêh ri kuăl pô aơ: ‘Ơ kôranh, dăn pơk mpông ma hên!’ Păng mra plơ̆ lah: ‘Gâp mâu gĭt khân may ntŭk tă.’ 26Nôk nây khân may mra ơh: ‘Hên sông sa nhêt jêh tanăp măt may, jêh ri may ntĭm nti jêh tâm trong sâng ƀon toyh hên.’ 27Ƀiălah păng mra lah ma khân may: ‘Gâp mâu gĭt khân may tă ntŭk. Lĕ rngôch phung ƀư nau mâu di, du ngai hom tă bơh gâp!’#Mprơ Ơm 6:8. 28Nôk nây, khân may mra saơ Y-Abraham, Y-Isăk, Y-Yakôp jêh ri lĕ rngôch phung nơm mbơh lor gŭ tâm ƀon bri hađăch Brah Ndu da dê, ƀiălah khân may bu mra klŭp mƀăr luh padih jêng ntŭk geh nau nhĭm nhhiăng jêh ri nau rket sêk.#Mat 22:13; 25:30.#Mat 8:11-12. 29Jêh nây ntơm bơh mpeh luh nar, nhâp nar, pa dâng, pa lơ, bu mra tât gŭ râng nhêt sông sa tâm ƀon bri hađăch Brah Ndu. 30N'hêl nanê̆ ngăn, geh phung bunuyh nglĕ mra jêng lor, jêh ri phung bunuyh lor plăch jêng nglĕ.”#Mat 19:30; 20:16; Mark 10:31.
Hađăch Hêrôt ŭch nkhĭt Brah Yêsu
31Tâm mông nây, geh ƀaƀă bunuyh Pharisi văch lah ma Brah Yêsu: “Nơm Nti du hom tă bơh ntŭk aơ yor Hêrôt ŭch nkhĭt May.” 32Păng plơ̆ lah: “Hăn lah hom ma mpik nây pô aơ: ‘Nar aơ, nar ôi taơ, Gâp mprơh brah mhĭk jêh ri ƀư bah nau ji, tât nar tal pe, Gâp mra lôch jêh nau kan Gâp. 33Ƀiălah, nar aơ, nar ôi taơ, jêh ri nar ôi klak Gâp hăn trong tay, yorlah du huê nơm mbơh lor mâu dơi khĭt padih ƀon Yêrusalem.’ ”
Brah Yêsu vơl nduyh ƀon Yêrusalem
(Mathiơ 23:37-39)
34“Hơi Yêrusalem, Yêrusalem! May nkhĭt phung nơm mbơh lor jêh ri klŭp ma lŭ phung bu njuăl ma may! Âk tơ̆ jêh Gâp ŭch tâm rgum phung kon may tâm ban ma iăr me rtŭk kon păng gay pôn lơi tâm dâng năr păng, ƀiălah khân may mâu ŭch ôh. 35Aơ, ngih khân may mra jêng rngot njăp. Gâp lah ma khân may, khân may mâu mra saơ Gâp ôh kŏ tât dôl khân may mra lah pô aơ: ‘Tâm rnê ma Nơm văch ma amoh Kôranh Brah!’ ”#Mprơ Ơm 118:26.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 13: CMO2023
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2023 United Bible Societies. All rights reserved.
