Yôhan 5
5
Brah Yêsu ta ƀon Yêrusalem. – Păng ƀư bah bunuyh rvĕn ta dak nglao Ƀêthehđa
1Pakơi nây, geh du nar rƀŭn phung Yuđa, Brah Yêsu hăn hao ta ƀon Yêrusalem. 2Ta ƀon Yêrusalem, dăch mpông Biăp, geh du nglao dak, nau ngơi Hêbrơ rnha jêng Ƀêthehđa.#5:2 Ƀêthehđa: rblang tĭng ƀaƀă nau rblang ntơm saơm; bi tĭng nau rblang Hêbrơ jêng: Ƀêthsatha. Nglao nây geh prăm đôr mpông. 3Geh âk ngăn bunuyh ji kuet, chieh măt, rvĕn, jâng ti siăr gŭ bê̆ch ta nây.#5:3 Ƀaƀă nau rblang ntơm saơm geh ntop trong 3b: khân păng gŭ kâp nôk dak nkŏch, jêh ri trong 4: yor mra geh du huê tông mpăr jŏ jŏ du tơ̆ jŭr ta nglao, ƀư ma dak nkŏch. Dôl dak mpât, mbu nơm jŭr lor ta nglao, nđâp tơlah moh nau ji dơi bah. 5Geh du huê bunuyh ji hŏ jŏ pe jât ma pham năm. 6Brah Yêsu saơ bunuyh nây gŭ bê̆ch jêh ri gĭt jêh nơm nây ji hŏ jŏ năm, păng ôp: “May ŭch bah lĕ?” 7Bunuyh ji nây plơ̆ lah: “Ơ kôranh, mâu geh bunuyh kơl mƀăr gâp tâm nglao tâm nôk dak nkŏch, tơ lah gâp tât hŏ geh jêh bunuyh êng hŏ jŭr lor ma gâp jêh.” 8Brah Yêsu lah: “Dâk hom, tuy sưng bê̆ch may jêh ri hăn sĭt.” 9Bunuyh nây dơi bah ji ro, tuy sưng bê̆ch jêh ri hăn sĭt. Nar nây jêng nar saƀat.
Phung Yuđa phong Brah Yêsu ƀư tih tâm nar saƀat
10Phung Yuđa lah ma bunuyh mhe bah ji: “Nar aơ jêng nar saƀat, may mâu dơi ôh tuy sưng bê̆ch.”#Nêh 13:19; Yêr 17:21. 11Ƀiălah bunuyh nây lah: “Nơm ƀư bah nau ji gâp lah ma gâp: ‘Tuy hom sưng bê̆ch may jêh ri hăn.’ ” 12Khân păng ôp: “Mbu nơm đă: ‘Tuy hom sưng bê̆ch jêh ri hăn’?” 13Ƀiălah bunuyh mhe bah nây mâu gĭt năl ôh nơm ƀư bah păng, yorlah Brah Yêsu du jêh ri lăp tâm phung âk ta nây. 14Pakơi nây, Brah Yêsu mâp bunuyh nây tâm ngih Brah, jêh ri lah ma păng: “Aơ, may hŏ bah ji jêh, lơi hôm may ƀư tih ôh, klach lah geh nau mhĭk lơ hô rlau lơn tât ma may.” 15Bunuyh nây hăn nkoch ăn ma phung Yuđa pô aơ Brah Yêsu jêng bunuyh hŏ ƀư bah nau ji ma păng nơm. 16Yor nây, phung Yuđa ƀư mhĭk ma Brah Yêsu, yor nau Păng ƀư bah lĕ nau nây tâm nar Saƀat. 17Ƀiălah Brah Yêsu lah đŏng ma khân păng: “Mbơ̆ Gâp hôm ƀư kan ma tât nar aơ, Gâp kan kơt nây lĕ.” 18Yor nây, phung Yuđa lơ hâu joi nau ŭch nkhĭt Brah Yêsu, yor Păng mâu knŏng ƀư rai nau vay tâm nar saƀat dơm ôh, jêh ri kuăl Brah Ndu jêng Mbơ̆, kơp êng săk Păng nơm tâm ban ma Brah Ndu.
19Pôri, Brah Yêsu lah ma khân păng: “Nanê̆ ngăn, Gâp lah nanê̆ ngăn khân may, Kon mâu dơi ƀư êng ôh, ƀiălah knŏng ƀư nau Kon saơ Mbơ̆ ƀư; yorlah lĕ kan Mbơ̆ ƀư, Kon ƀư đŏng tâm ban pônây. 20Yorlah Mbơ̆ rŏng ma Kon jêh ri, tâm mpơl ma Kon lĕ kan Mbơ̆ hŏ ƀư. Mbơ̆ mra hôm tâm mpơl ma Kon lĕ kan dŭt toyh lơn ma lĕ nau nây đŏng gay ăn khân may hih rhâl. 21Tâm ban ma Mbơ̆ ƀư ăn phung khĭt dâk rêh tay pônây lĕ Kon ăn đŏng nau rêh ma mbu nơm Kon ŭch kơt nây lĕ. 22Mbơ̆ mâu geh phat dôih ôh, ƀiălah jao lĕ nau dơi phat dôih ma Kon, 23gay lĕ bunuyh yơk ma Kon tâm ban yơk ma Mbơ̆ lĕ. Mbu nơm mâu yơk ma Kon mâu đŏng yơk ma Mbơ̆ jêng Nơm hŏ njuăl Kon văch. 24Nanê̆ ngăn, Gâp lah nanê̆ ngăn ma khân may, mbu nơm iăt nau Gâp ngơi jêh ri chroh Nơm hŏ njuăl Gâp, păng geh nau rêh n'ho ro jêh ri mâu geh ôh nau phat dôih, ƀiălah rgăn bơh nau khĭt gay hăn lăp tâm nau rêh.” 25“Nanê̆ ngăn, Gâp lah ma khân may, mông dăch tât, jêh ri hŏ tât jêh, nôk phung khĭt mra tăng bâr Kon Brah Ndu, jêh ri phung bunuyh tăng bâr Păng mra rêh. 26Yorlah nâm bu Mbơ̆ geh nau rêh tâm Păng nơm, pôri Mbơ̆ ăn đŏng ma Kon nau rêh tâm Păng nơm kơt nây lĕ. 27Mbơ̆ hŏ ăn jêh nau dơi ƀư nau phat dôih ma Kon, yorlah Kon jêng Kon Bunuyh. 28Lơi hih rhâl ôh nau aơ, yor mông dăch tât, nôk lĕ rngôch bunuyh khĭt gŭ tâm môch mra tăng bâr Kôranh Brah jêh ri du luh; 29mbu hŏ ƀư nau ueh mra dâk rêh tay gay geh nau rêh ngăn, mbu hŏ ƀư mhĭk mra dâk rêh tay gay dơn nau phat dôih.#Dan 12:2. 30Gâp nơm mâu dơi ƀư êng du ntil kan ôh; Gâp phat dôih tĭng nau Gâp tăng, jêh ri nau Gâp phat dôih jêng nau sŏng, yorlah Gâp mâu joi tĭng nau gâp ŭch, ƀiălah joi tĭng nau mĭn Nơm hŏ njuăl jêh Gâp.
31Tơlah Gâp mbơh nkoch êng ma Gâp nơm, nau Gâp mbơh nkoch mâu nanê̆ ôh. 32Geh Nơm êng nkoch ma Gâp; Gâp gĭt nau Nơm nây mbơh nkoch ma Gâp nây jêng di ngăn. 33Khân may hŏ njuăl jêh bunuyh văch ta Y-Yôhan, jêh ri Y-Yôhan hŏ mbơh nkoch ma nau ngăn.#Yôh 1:19-27; 3:27-30. 34Mâu di ôh Gâp ŭch geh nau kon bunuyh mbơh nkoch, ƀiălah Gâp lah lĕ nau nây gay ma khân may dơi rklaih. 35Y-Yôhan jêng ŭnh kađen mpoh hit ang, bi khân may ŭch geh nau maak ƀât lât tâm nau ang păng. 36Ƀiălah Gâp geh du nau mbơh nkoch dŭt toyh rlau lơn ma nau Y-Yôhan; yorlah lĕ kan Mbơ̆ hŏ jao Gâp ƀư lôch jêh, lĕ kan Gâp dôl ƀư aơ, mbơh nkoch pô aơ Mbơ̆ hŏ njuăl Gâp. 37Mbơ̆ nơm, Nơm hŏ njuăl Gâp, ăt mbơh nkoch lĕ Gâp. Khân may ê mâp tăng bâr Păng, mâu lah saơ muh măt Păng,#Mat 3:17; Mark 1:11; Luk 3:22. 38jêh ri nau Păng ngơi mâu gŭ tâm khân may ôh, yorlah khân may mâu chroh ôh ma Nơm Păng hŏ njuăl văch. 39Khân may sek uănh joi Nau Brah Ndu Ngơi, yorlah mĭn tâm nây geh nau rêh n'ho ro. Nau Brah Ndu Ngơi nây yơh mbơh nkoch ma Gâp, 40ƀiălah khân may mâu ŭch văch ta Gâp gay dơi geh nau rêh n'ho ro.
41Gâp mâu dơn ôh nau chrêk rmah tă bơh kon bunuyh, 42ƀiălah Gâp gĭt jêh khân may mâu geh nau rŏng Brah Ndu gŭ tâm khân may ôh. 43Gâp văch tâm amoh Mbơ̆ Gâp, ƀiălah khân may mâu rom dơn Gâp ôh, tơlah geh bunuyh êng văch tâm amoh êng păng nơm, ri mơ khân may mra rom dơn păng. 44Khân may ŭch dơn nau chrêk rmah ndrăng khân may nơm, mâu joi ôh nau chrêk rmah tă bơh Brah Ndu knŏng nguay, mâm khân may dơi chroh? 45Lơi mĭn pô aơ Gâp mra phong khân may tanăp Mbơ̆. Bunuyh mra phong khân may jêng Y-Môis, bunuyh nây khân may dơm nau kâp gân. 46Tơlah khân may chroh ma Y-Môis, pôri chroh đŏng ma Gâp, yorlah Y-Môis nchih jêh ma Gâp. 47Ƀiălah tơlah khân may mâu chroh ôh lĕ nau Y-Môis nchih, mâm ƀư khân may dơi chroh nau Gâp ngơi?”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yôhan 5: CMO2023
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2023 United Bible Societies. All rights reserved.
