Yôhan 1
1
Nau ngơi gleh
(1:1-18)
Nau Ngơi plăch jêng kon bunuyh
1Ntơm saơm geh Nau Ngơi,#1:1 Nrn: Logos, nâm bu ntĭt jêng nau ngơi. Tâm nau vay Grek, rplay samƀŭt aơ ntĭm ma nau ngơi nđâp ma nau mĭn tâm nuih n'hâm, jêh ri ntĭm ma nau di lĕ nau jêh ri nau ƀư kan tâm trôk neh ntu. Tâm ndrom samƀŭt Yuđa, Nau Ngơi jêng nau gai ma nau rhăk njêng (uănh Mprơ Ơm 33:6). Nau Ngơi gŭ ndrel ma Brah Ndu, jêh ri Nau Ngơi jêng Brah Ndu nơm. 2Bơh ntơm saơm, Păng gŭ ndrel ma Brah Ndu. 3Lĕ rngôch ntil ndơ Păng rhăk njêng da dê, mâu geh ôh du ntil ndơ dơi rhăk njêng lah mâu tă bơh Păng. 4Tâm Păng geh nau rêh, nau rêh nây jêng nau ang ma kon bunuyh. 5Nau ang sol tâm nau ngo, ƀiălah nau ngo mâu dơn#1:5 Mlr: mâu buh nhhât dơi. ôh nau ang.
6Geh du huê bunuyh Brah Ndu njuăl văch amoh păng Y-Yôhan.#Mat 3:1; Mark 1:4; Luk 3:1-2. 7Păng nây văch jêh jêng du huê nơm mbơh gay mbơh nkoch ma nau ang, gay tă bơh păng lĕ rngôch bunuyh chroh da dê. 8Păng nơm mâu di ôh jêng nau ang, ƀiălah păng văch gay mbơh nkoch ma nau ang. 9Aơ jêng nau ang ngăn tât jêh ta neh ntu gay sol ang ma lĕ rngôch bunuyh. 10Nau Ngơi gŭ tâm neh ntu jêh ri neh ntu hŏ njêng jêh tă bơh Păng, ƀiălah neh ntu mâu gĭt năl Păng ôh. 11Păng hŏ văch tâm bri dak Păng nơm, ƀiălah phung ƀon lan Păng mâu ŭch rom dơn Păng ôh. 12Ƀiălah mbu nơm rom dơn Păng, nâm bu ntĭt chroh ma amoh Păng, Păng ăn bunuyh nây nau dơi plơ̆ jêng kon Brah Ndu, 13jêng phung bunuyh deh mâu di deh tă bơh mham, mâu lah tă bơh nglay săk kơnh, mâu lah tă bơh nau bunuyh ŭch, ƀiălah tă bơh Brah Ndu.
14Nau Ngơi hŏ plăch jêng săk jăn bunuyh, gŭ rêh#1:14 Nrn: ƀư vâl bok. ta nklang he, bêng ma nau yô̆ jêh ri nau ngăn. Phung he hŏ saơ jêh nau chrêk rmah Păng, nanê̆ ngăn jêng nau chrêk rmah Kon Dul văch tă bơh Mbơ̆ Păng. 15Y-Yôhan mbơh nkoch ma Păng jêh ri mbơh pô aơ: “Aơ jêng Nơm gâp hŏ lah jêh: ‘Nơm văch pakơi gâp rlau lơn ma gâp, yorlah Păng hŏ ơm geh lor ma gâp jêh.’ ” 16Jêh ri tâm Păng jêng tu nau rmeh ler, lĕ rngôch phung he sŏk dơn nau yô̆ da dê, lơ hâu ntop nau yô̆. 17Yorlah nau vay dơi mbơh tă bơh Y-Môis, ƀiălah nau yô̆ jêh ri nau ngăn tât tă bơh Brah Yêsu Krist. 18Ê hŏ geh bunuyh saơ Brah Ndu, knŏng Kon Dul gŭ tâm nuih n'hâm Mbơ̆ jêng Nơm tâm mpơl jêh Mbơ̆ ăn ma he gĭt.
Nau ndrăp lor ma nau Brah Yêsu pah kan
(1:19-51)
Nau Y-Yôhan nti lah
(Mathiơ 3:1-12; Markôs 1:1-12; Luka 3:1-18)
19Aơ jêng nau Y-Yôhan mbơh: Lah phung Yuđa njuăl phung kôranh ƀư brah jêh ri phung Lêvi tă bơh ƀon Yêrusalem tât ôp păng pô aơ: “Moh may jêng?” 20Y-Yôhan mbơh sŏng, mâu ôh pôn mo. Păng lah: “Gâp mâu di jêng Brah Krist ôh.” 21Khân păng ôp tay: “Lah ndrĭ may mbu moh? Di lĕ may jêng Y-Êli?” Păng plơ̆ lah: “Mâu di.” “Di lĕ may jêng nơm mbơh lor?” Păng plơ̆ lah: “Mâu di.”#Mal 4:5; Nkah 18:15,18. 22Khân păng lah: “Lah ndrĭ moh may jêng gay ma hên plơ̆ lah ma phung njuăl jêh hên? May mbơh mbu moh may jêng?” 23Păng plơ̆ lah:
“Gâp jêng bâr bunuyh kuăl nter tâm bri rdah,
‘Ƀư sŏng hom trong Kôranh Brah,’
nâm nau nơm mbơh lor Y-Êsai hŏ lah jêh.”#Êsai 40:3. 24Phung bunuyh bu njuăl tât jêng tâm mpôl Pharisi,#1:24 Uănh rblang ta Mat 3:7. 25ôp păng pô aơ: “Tơlah may mâu di jêng Brah Krist, mâu di jêng Êli, mâu đŏng jêng nơm mbơh lor, lah ndrĭ mâm may dơi ƀư ƀaptem?” 26Y-Yôhan plơ̆ lah: “Gâp ƀư ƀaptem ma dak, ƀiălah geh du huê Nơm dôl gŭ tâm nklang khân may, ƀiălah khân may mâu gĭt năl Păng ôh; 27Nơm nây văch pakơi gâp, ƀiălah gâp mâu khư doh rse ntâu jot Păng ôh.” 28Lĕ nau aơ hŏ tât jêh ta ƀon Bêthani đah tê̆ dak krong Yurdan, ntŭk Y-Yôhan ƀư ƀaptem.
29Nar ôi taơ, Y-Yôhan saơ Brah Yêsu văch ta păng, păng lah pô aơ: “Ri Kon Biăp Brah Ndu, jêng Nơm sŏk lơi nau tih neh ntu! 30Aơ jêng Nơm gâp hŏ lah: ‘Nơm văch pakơi gâp, rlau lơn gâp, yorlah Păng hŏ ơm geh lor ma gâp jêh.’ 31Gâp nơm mâu gĭt năl Păng, ƀiălah gâp hŏ văch jêh ƀư ƀaptem ma dak, gay ma Păng tâm mpơl ăn ma phung Israel.” 32Y-Yôhan hôm mbơh nkoch pô aơ: “Gâp hŏ saơ jêh Brah Huêng Ueh jŭr tă bơh trôk tâm ban ma sĭm plŭk drâm klơ Păng. 33Gâp mâu gĭt năl Păng, ƀiălah Nơm njuăl gâp ƀư ƀaptem ma dak hŏ lah jêh ma gâp: ‘Nơm may mra saơ Brah Huêng Ueh jŭr drâm klơ, nây jêng Nơm ƀư ƀaptem ma Brah Huêng Ueh.’ 34Gâp lĕ saơ jêh ri mbơh nkoch pô aơ, aơ yơh jêng Kon Brah Ndu.”
Phung oh mon lor lơn ma Brah Yêsu
35Nar ôi taơ, Y-Yôhan hôm gŭ ta nây ndrel ma bar hê tâm phung oh mon păng. 36Păng saơ Brah Yêsu hăn rgăn ta nây, păng lah: “Ri, Kon Biăp Brah Ndu!” 37Bar hê oh mon tăng nau nây, khân păng tĭng ndô̆ Brah Yêsu. 38Brah Yêsu n'gĭl, saơ khân păng hăn tĭng Păng, jêh ri ôp: “Moh nau khân may joi?” Khân păng ơh: “Rabi (nâm bu ntĭt jêng Nơm Nti), mbah ntŭk Nơm Nti gŭ?” 39Brah Yêsu lah: “Văch uănh hom.” Khân păng hăn tât uănh ntŭk Păng gŭ, jêh ri gŭ ndrel ma Brah Yêsu tâm nar nây. Rnôk nây klăp lah puăn mông mhaơ.#1:39 Nrn: mông rơh jât. 40Tâm bar hê geh du huê hŏ tăng jêh nau Y-Yôhan lah jêh ri hăn tĭng Brah Yêsu, nây jêng Y-Andrê, oh Y-Simôn Pêtrôs. 41Lor lơn, păng joi nâu păng jêng Y-Simôn jêh ri lah: “Hên hŏ mâp jêh Nơm Mêsi” (nâm bu ntĭt Brah Krist). 42Păng njŭn leo Y-Simôn văch ta Brah Yêsu. Brah Yêsu uănh Y-Simôn jêh ri lah: “May jêng Y-Simôn, kon Y-Yôhan,#1:42 Klăp lah nchih bâr ngơi: Y-Yôna. bu mra amoh may Y-Sêphas,” nâm bu ntĭt Y-Pêtrôs.#1:42 Lĕ bar rplay samƀŭt Sêphas (nau ngơi Aram) jêh ri Pêtrôs (nau ngơi Grek) geh ntĭt jêng “lŭ”
43Nar ôi taơ, Brah Yêsu ŭch hăn rgăn n'gor Galilê. Păng joi Y-Philip jêh ri lah pô aơ: “Tĭng hom Gâp.” 44Y-Philip jêng bunuyh ƀon Ƀêtsaiđa, jêng ƀon ndrel ma Y-Andrê jêh ri Y-Pêtrôs. 45Y-Philip joi Y-Nathanel jêh ri lah: “Hên hŏ mâp jêh Nơm Y-Môis hŏ nchih jêh tâm nau vay, jêh ri lĕ phung nơm mbơh lor geh đŏng nchih tay; nây yơh jêng Brah Yêsu, kon Y-Yôsep, gŭ ta ƀon Nasaret.” 46Y-Nathanel lah: “Moh ndơ ueh luh tă bơh ƀon Nasaret?” Y-Philip lah: “Hăn uănh hom!” 47Brah Yêsu saơ Y-Nathanel văch ta Păng, Păng lah ma Y-Nathanel pô aơ: “Aơ jêng du huê bunuyh Israel ngăn, tâm păng mâu geh nau mƀruh nchơt ôh.” 48Y-Nathanel ơh: “Mâm ƀư Nơm Nti gĭt năl gâp?” Brah Yêsu plơ̆ tay: “Êlor Y-Philip kuăl may, Gâp hŏ saơ jêh may dôl gŭ tâm dâng tơm rvi.” 49Y-Nathanel ơh: “Hơi Nơm Nti, May jêng Kon Brah Ndu! May jêng hađăch ma phung Israel!” 50Brah Yêsu plơ̆ lah: “Di lĕ yorlah Gâp hŏ lah jêh Gâp saơ may gŭ tâm dâng tơm rvi, yor ri may chroh hĕ? May mra saơ lĕ nau kan dŭt toyh lơn đŏng.” 51Jêh nây Brah Yêsu lah: “Nanê̆ ngăn, Gâp lah ngăn ma khân may: Khân may mra saơ trôk pơk jêh ri tông mpăr Brah Ndu jŭr ta klơ Kon Bunuyh.”#Ntơm 28:12.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yôhan 1: CMO2023
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2023 United Bible Societies. All rights reserved.
